Duro hyn në zyrë: Punonjësit që protestuan do të jenë pjesë e stafit tim

Kryetari i ri i Bashkisë Devoll, Eduard Duro ka mundur të futet në zyrën e tij edhe pse nuk është lejuar nga ish kryetari i bashkisë nën siglën e PD, Bledjon Nallbati. Duro është futur në zyrë duke thyer bravën e derës së bashkisë, që ishte mbyllur me çelës nga punonjësit e bashkisë, pas mbarimit të orarit zyrtar të punës. Nën praninë e një komisioni dhe policisë, Duro ka bërë hapjen e derës dhe është futur brenda në zyrë.

Pasi u fut në zyrë kryetari i ri i Bashkisë së Devollit ka dhënë intervistën e parë nga zyra e tij. Eduard Duro tha se nuk do të largojë asnjë punonjës nga administrata.

“Sot është dita kur iu dha fund janë procesi të stërzgjatur. Kryetari i bashkisë nuk denjoi të na priste, prandaj u detyruam të hynim në këtë mënyrë. Ata punonjës që sot u terrorizuan dhe dolën të protestonin do të jenë pjesë e stafit tim të ri. Pres urim nga ish-kryetari, pasi unë e kam uruar kur ka filluar detyrën. Të hënën bashkia do të fillojë aktivitetin normal. Nuk do të ketë asnjë largim” tha Duro

Edhe pse PD ka deklaruar se nuk do të lirojë zyrat në asnjë bashki që është fituar nën siglën e saj, duket se rezistenca nuk ka zgjatur shumë. Bledion Nallbati nuk lejoi hyrjen e Duros në bashki dhe betimin e tij aty, por kjo ka zgjatur deri në mbarimin e orarit zyrtar të punës, më pas ai është larguar i qetë nga bashkia dhe po aq qetë është futur edhe kryetari i ri i saj.

Duro ka shkuar te bashkia, menjëherë sapo ish-kryetari i kësaj bashkie, Bledion Nallbati i Partisë Demokratike, ka përfunduar orarin zyrtar të punës. Nallbati është larguar nga zyra pasi ka mbaruar punën duke mbyllur derën e jashtme me çelës. Kryetari i ri Duro deklaroi për mediat se dera e bashkisë do hapet nga një komision dhe në prezencën e policisë. Ai theksoi se dera do të hapet qetësisht.

“I kam bërë kërkesë kryetarit paraardhës dhe komisariatit të policisë Devoll, që personat e paautorizuar nuk duhet të rrinë në territorin e bashkisë. Aty kishte njerëz që nuk janë pjesë e këtij komuniteti, nuk lejohet të protestojnë në korridoret e bashkisë. Kryetarit i kërkoj dorëzimin e zyrës. Ne do ta hapim qetësisht” -tha Duro

Gjatë paradites së premte, ish kryetari i në largimin Bledjon Nallbati nuk ka pranuar të lirojë zyrën e tij me pretendimin e nuk njeh zgjedhjet e 30 qershorit dhe se njeh dekretin e presidenti Meta. Betimi i Eduard Duro përpara këshillit të ri të Bashkisë Devoll, u zhvillua në ambientet e nën-prefekturës për shkak të protestës së militantëve të PD përpara bashkisë.

Bie skenari i PD, betohet kryebashkiaku i ri i Devollit

Eduard Duro është betuar përpara këshillit të ri të Bashkisë Devoll, duke marrë zyrtarisht detyrën si kryetar i kësaj bashkie. Pas gati dy orë mbledhje, e cila u zhvillua në ambientet e nën-prefekturës për shkak të protestës së militantëve të PD përpara bashkisë, i zgjedhuri i PS në 30 qershor, ka bërë betimin para këshillit të ri bashkiak, pas konstituimit të tij. Në këto kushte bie dhe skenari i Partisë Demokratike për të mos lejuar futjen në zyrë të bashkiakëve të zgjedhur në 30 qershor, të paktën në ato bashki që katër vitet që ikën janë drejtuar nga Partia Demokratike.

Tashmë mbetet të shihet se si do të veprohet më tej, pasi pas betimit të kryetarit të ri të bashkisë, praktikisht Eduard Duro duhet të shkojë në zyrën që do të drejtojë katër vitet e ardhshme. Megjithatë, Realstory.al kontaktoi me përfaqësues të lartë të Partisë Socialiste, për të mësuar se cili do të ishte hapi i radhës, që Eduard Duro të futet në zyrën, që aktualisht mbahet nga Blejon Nallbati. Por drejtues të PS u shprehën se është ende herët për këtë proces, duke mos dhënë shumë sqarime rreth asaj që pritet të ndodhë më pas.

Ndërkohë, në zyrën e kryetarit të bashkisë qëndron Bledjon Nallbati, i cili prej mëngjesit të së premtes me mbështetjen e ish-deputetëve të PD dhe LSI si dhe të militantëve të këtyre forcave politike, janë futur në bashki dhe nuk kanë lejuar zhvillimin e mbledhjes së këshillit të ri të kësaj bashkie. Gjithsesi, duket se marrja e zyrës do të jetë një proces formal, që në rastin më të keq do të kryhet edhe me ndërhyrjen e forcave të rendit, pasi mbajtja me forcë e zyrës mund të përbëjë vepër penale.

Pavarësisht kësaj, konsituimi i këshillit bashkiak dhe betimi i kryetarit të ri të kësaj bashkie, është fillimi i fundit i rrëzimit të skenarit të Partisë Demokratike për të mos njohur zgjedhjet, duke përdorur rrugën ligjore. Në kushtet kur gjykatat e shkallëve të para janë duke miratuar ditë pas dite mandatet e bashkiakëve të rinj, dhe në krahun tjetër Kolegji Zgjedhor po miraton shpërndarjen e mandateve për këshillat bashkiakë, brenda datës 10 gusht, pritet që të përfundojë konsituimi i këshillave dhe betimi i kryetarëve të rinj të bashkive. /Realstory.al/

PD pengon betimin e Eduard Duros në Devoll, Nallbati: Ne zbatojmë dekretin e presidentit

Këtë të premte në orën 11:00 ishte lajmëruar mbledhja e këshillit të ri në Bashkinë Devoll. Por para mbledhjes, militantët e Partisë Demokratike dhe kryetari i bashkisë në largim, Bledion Nallbati kanë protestuar përpara bashkisë duke mos lejuar zhvillimin e mbledhjes së këshillit të ri të Bashkisë Devoll. Në një prononcim për mediat lokale, kryetari aktual i bashkisë, Bledjon Nallbati është shprehur se nuk do të largohet nga zyra, pasi sipas tij, zgjedhjet e 30 qershorit nuk janë të ligjshme.

“Ne po vijojmë punën. Nuk ka pasur zgjedhje. Populli i abandonoi. Ishin zgjedhje të PS-së. Bashkia po uzurpohet. Ne zbatojmë dekretin e presidentit. 30 qershori është shfuqizuar. Do mbrojmë Kushtetutën. Nuk ka kryetar të ri as këshill të ri. Kryetarët vijnë dhe ikin me zgjedhje. Nëse bashkia pushtohet do ti ndalojmë dhe procedojmë pranë prokurorisë” deklaroi ai për mediat.

Të enjten, në një prononcim për Realstory.al, kryetari i ri i bashkisë Devol, Eduard Duro u shpreh se paraprakisht nuk kishte asnjë indicie për probleme gjatë mbledhjes së sotme. Por mesaduket skenari i PD për të penguar mbledhjen e këshillit të ri në Devoll, është organizuar gjatë mbrëmjes të së enjtes, pasi këtë të premte kanë shkuar nga Tirana edhe përfaqësues të PD dhe LSI për të mbështetur protestën e militantëve të tyre, që kanë bllokuar derën e Bashkisë Devoll.

Sot betohet kryetari i ri i bashkisë Devoll. A do e pengojë PD Eduard Duron?

Të premten në orën 11:00, është thirrur mbledhja e parë e këshillit të ri bashkiak në Bashkinë e Devollit, dalë prej zgjedhjeve të 30 qershorit. Në fakt, kjo mbledhje nuk do të jetë thjesht një konstituim i natyrshëm i ‘parlamentit’ të ri lokal në Bashkinë e Devollit dhe kryetarit të ri të sapo zgjedhur Eduard Duro, por ajo do të jetë prova e parë e forcës e opozitës, që ka deklaruar se “kryetarët e bashkive të PD-së nuk do t`i lirojnë zyrat”. Deri më sot, bashkia e Devollit është qeverisur nga Bledjon Nallbati, i zgjedhur katër vite më parë si kryetar nën siglën e Partisë Demokratike. Tashmë, Nallbatit i duhet të lërë zyrën për pasardhësin e tij, Eduard Duro, që fitoi bashkinë në 30 qershor.

Mirëpo Partia Demokratike ka deklaruar se “nuk i njeh zgjedhjet”, e për rrjedhojë, “zyrat e kryetarëve të bashkive që ka qeverisur për katër vjet, do të lirohen vetëm kur të zgjidhen kryetar të dalë nga zgjedhje të lira”, pretendon opozita. Ky është qëndrimi zyrtar që kanë mbajtur jo vetëm kryetarët e këtyre bashkive, që deri më tani janë qeverisur nga PD, por edhe i vetë Lulzim Bashës. Ndërkohë, Realstory.al pyeti kryetarin e ri të Bashkisë Devoll, Eduard Duro, rreth konstituimit të këshillit bashkiak dhe betimit të tij si kryetar i Devollit të premten në orën 11:00.

Duro u shpreh se deri tani nuk ka pasur asnjë incident apo indicie për incident nga PD dhe kryetari aktual i Bashkisë Devoll, për të penguar marrjen e detyrës nga i zgjedhuri i PS. “Nesër në orën 11:00 do të mblidhet këshilli bashkiak. Pasi të bëhet konstituimi do bëj dhe unë betimin si kryetar i Bashkisë Devoll. Nuk ka pasur deri tani ndonjë indicie apo problem për marrjen e detyrës, megjithatë të shohim se çfarë do të ndodhë të premten. Të pranishëm në betimin tim do të jenë deputetë e PS për qarkun e Korçës dhe prefekti”, tha shkurtimisht Eduard Duro për Realstory.al.

Ndërkohë, Partia Demokratike edhe pse është zotuar publikisht se do pengojë marrjen e detyrës nga të zgjedhurit e rinj, të paktën në bashkitë që katër vitet e fundit janë drejtuar nga demokratët, nuk ka folur për asnjë plan se si do e realizojë këtë në terren. Në krahun tjetër, PD është duke vijuar “luftën” e saj për të “mos njohur zgjedhjet”, duke kërkuar nga gjykatat në vend që të mos miratojnë mandatet e të zgjedhurve të 30 qershorit.

Megjithatë, deri tani, KQZ dhe Kolgji Zgjedhor, pasuar dhe gjykatat e shkallëve të para, kanë miratuar pothuajse çdo kërkesë për mandatet e kryetarëve dhe të këshillave në bashkitë e vendit, duke i hapur rrugë certifikimit përfundimtar të zgjedhjeve, pra marrjes zyrtare të detyrës nga bashkiakët e rinj. Dhe fillimi i fundit të këtij procesi do të fillojë të premten në orën 11:00 në Bashkinë Devoll, dhe pritet të përfundojë të paktën deri në datën 12 korrik. Ajo që mbetet ende për t`u parë, është reagimi i Partisë Demokratike. Prova e parë e rezictencës ose jo, do të fillojë të premten në Devoll.