Urdhri i Ramës, ngrihet kampi në stadium

Pas urdhrit të Ramës në mbledhjen me prefektët e vendit, menjëherë ka nisur puna për ngritjen e kampit brenda stadiumit “Niko Dovana” në Durrës. Ky kamp do të shërbejë, jo vetëm për banorët, shtëpitë e të cilëve janë prekur nga tërmeti dhe janë në rrezik për banim, apo edhe krejt të pabanueshme, por edhe për ata të cilët nga frika e tërmeteve, nuk mund të qëndrojnë në shtëpitë e tyre.

Nga emergjencat civile është vendosur menjëherë pas mbledhjes me kryeministrit ngritja e kampit të strehimit. Mëngjesin e së dielës ishte vendosur që çadrat të ngriheshin në aneksin e stadiumit, por me urdhër të kryeministrit Rama, u la që kampi të ngrihej brenda stadiumit, me qëllim që banorët të jenë më të kontrolluar dhe të marrin shërbimet e duhura.

Ndaj, ekipet e emergjencës janë drejtuar fushës së gjelbër për të ngritur kampin e strehimit të banorëve dhe për të ofruar shërbimet e tjera për të prekurit. Gjithashtu aty do të shkojnë edhe psikologë, sidomos për fëmijët. Ndërkaq, Bashkia ka marrë masa për të pasur gjithçka në funksion të banorëve, ndërsa një pjesë e ushtrisë ka zbarkuar që herët për të qenë në gatishmëri të plotë sidomos për ngritjen dhe montimin e çadrave.

“Tërmetet, strukturat civile neglizhuan situatën”

Prefektja e Tiranës, Suzana Jahollari ka vënë në dukje se lëkundjet gjatë mesnatës dhe orëve të para të mëngjesit të së dielës më shumë panik dhe probleme kanë krijuar në zonën e Don Boskos, ndërkohë që sipas saj strukturat civile neglizhuan situatën.

Prefektja tha se janë dëmtuar 187 banesa, mes tyre 20 pallte. “Më shumë panik në mesnatë nga tërmeti pati në Don Bosko. Bashkë me zjarrfikëset në orën 06:00 i montuam 19 çadrat. Të gjithë kërkonin çadra dhe nuk pranonin të hynin në qendrat sociale, përveç 14 vetave në Kombinat. 187 dëmtime banesash, 20 pallte janë çarë. Do të vijojmë që të mbledhim komisionin e Emergjencave, duhet të fillojmë si të bëjmë vlerësimin që të jetë real. Kryesisht janë dëmtime të ndërtimet para viteve ’90”, deklaroi Prefektja Jahollari.

Ajo vuri në dukje se strukturat civile neglizhuan emergjencën, ndryshe nga strukturat ushtarake. “Mbeten për t’u vlerësuar strukturat ushtarake, ndryshe nga ato civile, të cilat braktisën qytetarët. Pjesa civile iku pasi ikëm ne, por u rikthyem sërish dhe u thamë që detyra duhet të çohet deri në fund ka apo nuk ka njerëz”, tha me ton të fortë prefektja në raportimin e saj para kryeministrit.

Rama: Të gjithë prefektët të shkojnë në Durrës. Hapni stadiumin

Kryeministri Edi Rama ka zhvendosur të gjithë prefektët, Forcat e Armatosura, deputetët dhe ministrat, në qytetin e Durrësit, aty ku pasojat e tërmeteve ishin më të mëdha dhe më shkatërruese.

Në mbledhjen e së dielës me prefektët në Ministrinë e Mbrojtjes, kreu i qeverisë tha se të gjithë prefektët do të spostohen në Durrës për të nisur menjëherë komunikimin me qytetarët, që janë prekur më shumë nga tërmeti i fuqishëm 5.8 ballë.

“Gjëja e parë që kërkoj është që të gjithë ju, edhe prefektët e ardhur nga qarqet e tjera, të spostoheni në Durrës, me synimin që çdo familje që hyn në atë rrethin e parë të stresit dhe që dje gjatë gjithë natës ka qëndruar jashtë të kontaktohet. Mbi atë hartë të të dhënave që ka prefektura të bëhet një shpërndarje e forcave dhe çdo familje të konkatohet për t’u dëgjuar. Ju të gjithë këtu, plus strukturat atje të Policisë së Shtetit dhe ato të mirëqenies sociale të organizohen dhe shpërndahen në mënyrë të struktura, me destinacione konkrete, dhe brenda ditës së diel, para se të vijë nata, duhen kontaktuar të gjithë, sy më sy. Do të angazhohen edhe deputetët, edhe ministrat, sepse është një moment psikolog që kapërcehet me komunikim”, tha Rama.

Po ashtu, kryeministri vuri në dukje se nuk duhet të ndodhin incidente si një natë më parë në Durrës, duke iu referuar moshapjes së stadiumit. “Mbrëmë jam marrë unë me stadiumin për të ndezur dritat, nuk e di sa orë. Kjo nuk duhet të përsëritet më. Qëndroni afër njerëzve dhe shpjegojini qytetarëve gjithçka që të minimizojmë panikun për plasaritjet. Çdo plasaritje dhe dëmtim pallati të inspektohet në mënyrë profesionale, për të vlerësuar nëse kemi të bëjmë me cenim të rrezikshëm. Çdo familje duhet kontaktuar “sy më sy” para se të vijë nata. Stadiumi të hapet me drita ndezur, jo si mbrëmë që njerëzit rrinin në errësirë. Tërmeti është në psikologjinë e njerëzve akoma, prandaj duhet t’u ofrojmë gjithçka me të gjitha kapacitetet që kemi. Strukturat e godinave, detyrë parësore. Më pas plasaritjet e shtëpisë. Familjet duan të dinë sa të sigurt janë në shtëpitë e tyre”, deklaroi kryeministri para prefektëve, emergjencave civile dhe strukturave të Ministrisë së Mbrojtjes dhe asaj të Brendshme.

Gjatë fjalës së tij, Rama u la detyra konkrete prefektëve dhe institucioneve të tjera që të kontaktohet çdo person i prekur nga tërmeti. “Pasdite dua të shikoj hartën, kush bën çfarë. Kush është përgjegjës për çdo pallat për t’u marrë me njerëzit dhe infrastrukturën. Prefekti, drejtori i emergjencave dhe dikush nga instituti i ndërtimit duhet të punojmë bashkë. Nëse e kemi këtë hartë sot gjithçka do të shkojë mbarë. Edhe identifikimi i dëmeve duhet bërë me kujdes, të mos mbetet pa asistuar asnjë, por të mos kemi spekulantë, duhen kontrolluar të gjithë bashkë të unifikuar. Si në një hartë beteje. Ju duhet të keni deri sot pasdite (e diel) çdo pikë të dëmtuar me emra. Kërkohet solidariteti i prefektëve të tjerë. E fundit që kam, ata që janë dëmtuar do të jenë të sigurt që të mos harrohen” tha Edi Rama.

Emergjencat civile, Rama: Sanksione për bashkitë dhe privatët

Rritja e përgjegjësive nga njësitë e qeverisjes vendore, por dhe e biznesit privat, përballë emergjencave civile, promovimi i vullnetarizmit, dhe mbi të gjitha parandalimi i rreziqeve, përbëjnë thelbin e ligjit të ri për Mbrojtjen Civile, i prezantuar nga Kryeministri Edi Rama dhe drejtues të tjerë të Qeverisë këtë të mërkurë.

“Mbrojtja civile ka kaluar në një nivel tjetër, që prej kohës që Drejtoria e Emergjencave Civile kaloi në varësi të Ministrisë së Mbrojtjes, provat i kemi dhënë tashmë. Sot mund të themi që kemi një bazë të re ligjore të hartuar, të gatshme për miratim me një strategji kombëtare për reduktimin e riskut. Këtu sfida mbetet e përditshmja, jo momenti kur emergjenca shfaqet. Do ketë një përpjekje e vazhdueshme për parandalimin e emergjencave”, tha Rama.

Më tej shefi i Qeverisë, u shpreh se trashëgimia nga e kalaura është shumë e rëndë. Një pjesë e problemit ka ardhur prej papërgjegjshmërisë së pushtetit lokal në këto tre dekada, të cilët kanë bërë pak ose aspak për rritjen e kapaciteteve parandaluese nga rreziqet natyrore. Me ligjin e ri, tashmë Bashkitë, por dhe bizneset private, do të kenë përgjegjësi direkte për parandalimin e emergjencave civile.

“Kemi një trashëgimi shumë të rëndë në gjithçka është bërë në këto dekada të rrëmujshme. Është përkeqësuar kapacitetit natyral mbrojtës. Me këtë ligj kemi një shpërndarje të qartë të përgjegjësive dhe përcaktim të roleve. Kemi dhe një bazë për përditshmërinë. Plani për emergjencat civile tani do të jenë të detyrueshme qoftë për shtetin qoftë për sektorin privat. Do të ketë sanksione të qartë për cdo institucion apo subjekt privat, nuk mund dot që në përditshmëri t’i hapim gropën vetes e pastaj kur vjen furtuna t’i kërkojmë shtetit të në nxjerrë nga gropa, nuk mund dot ti bien shkurt duke këputur kanalin e shkarkimit të ujërave për të bërë një hyrje me palma në lokal dasmash e pastaj ankohemi pse shteti na prishi dasmën kur erdhi furtuna. Njësitë e qeverisjes vendore nuk mund të mos jenë të papërgjegjshme njësoj si një pronar i një lokali dasmash ”, u shpreh Kryeministri.

Më tej, Rama u shpreh se Drejtoria e Emergjencave Civile do të transformohet në Agjencinë Kombëtare Civile, e cila do të jetë në varësi të Ministrisë së Mbrojtjes, dhe do të ketë më shumë kapacitete financiare dhe kompetenca ligjore, për mbrojtjen e qytetarëve.

“Agjencia e re do të jetë në varësi të ministrit, do të jetë një autoritet shumë më i madh se drejtoria e emergjencave civile. Agjencia e re për Mbrojtjen Civile do të ketë kapacitete më të mëdha financiare dhe kompetenca ligjore. Me këtë ligj ne e përafrojmë vendin me standardin e mekanizmit të mbrojtjes civile të vendeve të Bashkimit Europian”, u shpreh Kryeministri.