Euro 2020/ Italia 9 “silurë” Armenisë. Fitore tenistike për Spanjën dhe Zvicrën

Italia nuk zhgënjeu përballë Armenisë. Një rival modest, të cilin e “shtypi” rëndë, duke i shënuar 9 gola në takimin e fundit eleminator të Euro 2020. Immobile me dygolësh, Zaniolo gjithashtu, Barella, Orsolini, Romangnoli, Jorginho dhe Chiesa shënuan nëntë herë në portën armene, ndërsa Babayan shënoi golin e nderit për miqtë.

Kështu Italia kualifikohet e para në Grupin J me 30 pikë, duke fituar të 10-të takimet, e padyshim tregon se do të jetë një pretendent për të fituar trofeun në europianin e verës së vitit 2020. U kualifikua dhe Finalanda si e dyta në grup me 18 pikë, ndërsa mbeti jashtë Greqia, që e mbylli në vendin e dytë me 14 pikë.

Me goleadë e mbylli dhe Spanja, që mundi Rumaninë me rezultatin 5-0 në sfidën e fundit eleminatore të Euro 2020. Ruiz, Moreno me dopietë, një autogol i rus dhe Oyarzabal i dhanë fitores skuadrës spanjolle, që kualifikohet në Euro 2020 si e para e Grupit F, ndërsa pas saj është Suedia që kualifikohet si e dyta në grup.

Zvicra, gjithashtu, mundi Gjibraltarin me rezultatin 6-1 duke u kualifikuar e para në Grupin D, ndërsa lë pas Danimarkën me 16 pikë, që gjithësesi u kualifikua në Euro 2020. Itten me dygolësh, Vargas, Fassancht, Benito dhe Granit Xhaka i dhanë fitoren skuadrës “Helvete”, që bashkohet me ekipet elitare që do të luajnë në fazën në grupe të Euro 2020.

Euro 2020/ Belgjika kualifikohet me rekorde

Belgjika është skuadra e parë që kualifikohet zyrtarisht në fazën në grupe të Euro 2020. Skuadra belge mundi Kazakistanin në transfertë të dielën pasdite me rezultatin 2-0, duke vendosur dhe një rekord në këto kualifikuese, pasi kanë marrë pikët e plota në tetë ndeshje të luajtura.

Ndonëse një kundërshtar jo shumë i vështirë, trajneri Martinez e vlerësoi maksimalisht duke hedhur që nga minuta e parë lojtarët më të mirë të tij. Batshuayi në të 21` dhe Meunier në të 53`, ishin autorët e golave për Belgjikën, duke i dhënë skuadrës së tyre tre pikë, që e kualifikojnë zyrtarisht në Euro 2020 me 24 pikë, ndonëse janë dhe dy ndeshje për tu luajtur.

Rekordi i Belgjikës është unik. Në 8 ndeshje të luajtura, Belgjika shënoi 30 gola dhe pasoi vetëm 1, ndërsa regjistroi tetë fitore. Në vendin e dytë të Grupit I është Rusia, që nëse fiton ndaj Qipros mbrëmjen e të dielës, edhe ajo kualifikohet bashkë me Belgjikën për në fazën tjetër të Euro 2020.

Euro 2020/ Belgjika “shtyp” San Marinon, fitojnë pretendentët

U luajtën pasditen e të enjtes ndeshjet e radhës kualifikuese të Euro 2020. Kazakistani u mund në shtëpi nga Qipro me rezultatin 1-2, me skuadrën qipriote që mbanë vendin e tretë në grupin I me 10 pikë. Ndërkohë, po në këtë grup, Belgjika fitoi ndaj San Marinos me rezultatin e thellë 9-0, duke mbajtur vendin e parë me 21 pikë. Ndërkohë, Rusia mundi Skocinë me rezultatin 4-0, duke siguruar vendin e dytë në grup me 18 pikë. Kroacia në grupin E fitoi 3-0 ndaj Hungarisë, duke shkuar në kuotën e 13 pikëve.

Aktualisht skuadra kroate mban vendin e parë në këtë grup, ndërsa ndiqet nga Sllovakia që barazoi 1-1 me Uellsin. Hollanda fitoi ndaj Irlandës së Veriut 3-1 në grupin C, duke marrë kryesimin e grupit me 12 pikë. Megjithatë, në këtë grup gjithçka është e komplikuar, pasi Gjermania dhe Irlanda e Veriut ndodhen në vendin e dytë dhe të tretë, por kanë nga 13 pikë. Ekipet e tjera të këtij grupi, Bjellorusia dhe Estonia barazuan 0-0, ndërsa të dyja skuadrat janë jashtë garës për kualifikimin.

Në grupin G, Polonia mundi Lituanin me rezultatin 3-0, duke u ngjitur në vendin e parë me 16 pikë, ndërsa Austria ndodhet në vend të dytë në këtë grup me 13 pikë, pasi fitoi ndaj Izraelit me rezultatin 3-1. Maqednoai e Veriut fitoi ndaj Sllovenisë me rezultatin 2-1, duke mbajtur gjallë shpresat për kualifikim, pasi ndodhet në vend të tretë në grup me 11 pikë, kur kanë mbetur dhe tre ndeshje për tu luajtur.

Euro 2020/ Belgjika vendos rekord, Gjermania kthehet te fitorja

Janë luajtur mbrëmjen e të hënës disa nga takimet e radhës për kualifikueset e Euro 2020. Nënkampionët e botës në fuqi, Kroacia, ka barazuar në transfertë ndaj Azerbajxhanit me rezultatin 1-1 në Grupin E. Pika e marrë në transfertë e mban kombëtaren kroate në vend të parë të këtij grupi, ndërsa mbetet pas Sllovakia dhe Hungaria me nga 9 pikë secila. Ndërkohë, po në këtë grup, Sllovakia ka mundur me rezultatin 2-1 në transfertë Hungarinë, duke marrë vendin e dytë, por me pikë të barabarta me rivalin e të hënës.

Hollanda ka shkatërruar në transfertë 4-0 Estoninë, duke u ngjitur në vendin e tretë në grupin C, me 3 pikë më pak se Gjermania dhe Irlanda e Veriut, por dhe me një ndeshje më pak të luajtur. Ndërkohë, Gjermania fitoi në transfertën e Irlandës së Veriut me rezultatin 2-0, duke marrë kryesimin e grupit C.

Maqedonia e Veriut ka fituar në transfertë ndaj Letonisë me rezultatin 2-0, duke u ngjitur në vendin e 4 në renditjen e Grupit G. Po në këtë grup, Polonia dhe Austria kanë barzuar 0-0, por pika ka vlejtur shumë për polakët, që mbajnë kryesimin e grupit me 13 pikë. Rusia ka fituar 1-0 në shtëpi ndaj Kazakistanit, duke u ngjitur në vendin e dytë në Grupin I, me 15 pikë, 3 më pak se Belgjika që kryeson grupin. Po në këtë grup, Qipro ka mundur San Marinon në transfertë me rezultatin 4-0, duke marrë vendin e 4 në renditje.

Belgjika ka shkatërruar Skocinë me rezultatin 4-0, duke shkuar në kuotën e 18 pikëve pas 6 ndeshjes në eliminatoret e Euro 2020. I vetmi ekip që deri tani ka marrë pikët e plota duke fituar të gjitha takimet, praktikisht duke siguruar edhe kualifikimin për në fazën në grupe të Euro 2020. Ndërohë, Sllovenia ka fituar 3-2 ndaj Izraelit në grupin G, duke u ngjitur në vendin e dytë në këtë grup, me 2 pikë më pak se Polonia.

Përballja me Moldavinë, Reja: Skema 3-5-2, por nuk kam vendosur për formacionin

Kombëtarja shqiptare pritet të përballet ditën e martë me Moldavinë në “Elbasan Arena”, pjesë e kualifikueseve në “Euro 2020”. Trajneri i Kombëtares, Edy Reja ka folur në një konferencë për shtyp në lidhje me humbjen që pati me Islandën dhe skemën që do të ndjek gjatë ndeshjes me Moldavinë. Reja tha se do të ndiqet skema 3-5-2, por do të bëhen disa ndryshime në mbrojtje.

Skema 3-5-2- “Unë nuk pashë probleme në këtë repart, por në sulm jam dakord. Duhet të gjejmë zgjidhje për të sulmuar, të çojmë më shumë topa në zonë. Na mungoi finalizimi, ata nuk arritën të bënin më shumë se sa një rast në portë.

Ndryshimet- “Mbrojtja mund të jetë me 3 ose 4. Në mesfushë do të ketë ndryshime dhe në sulm padyshim, pasi ka lodhje. Në fillim duhet të flas me lojtarët dhe pastaj do shihni formacionin. Kemi dhe 24 orë ende për të parë.

Potenciali i skuadrës- I kemi të gjitha mundësitë, na duhen disa mesfushorë të mirë për të kaluar më para. Me Islandën pamë anën e djathtë që ishte shumë mirë, do të shohim dhe repartet e tjera ku çaluam.

Formacioni- Nuk kam vendosur ende. Kam Uzunin dhe Sadikun që janë gati. Mund të jenë tre katër ndryshime dhe do të vlerësohen me tej. Mbrojtja ka bërë mirë, por mund të ketë ndryshim.

E zyrtarizon UEFA, Shqipëri-Moldavi do të luhet në Elbasan (foto)

Shqipëria do të pres Moldavinë më 11 qershor, në ndeshjen e vlefshme për kualifikueset e Euro 2020. Në fund të vitit të kaluar por dhe gjatë muajve të parë të këtij viti, FSHF-ja deklaroi se ky takim do të luhej në stadiumin “Arena Kombëtare”, që duhet të përfundonte në qershor.

Megjithatë, me kalimin e muajve, diçka ka ndryshuar pasi nga ecuria e punimeve në stadiumin e ri kombëtar, është lënë të kuptohet se impianti 22 mijë vendësh nuk do të jetë gati për këtë ndeshje.

Mirëpo “Arena Kombëtare” ishte konfirmuar nga FSHF-ja në UEFA, si stadiumi ku do të luhej ndeshja zyrtare mes Shqipërisë dhe Moldavisë më 11 qershor. Fakti që punimet do të zgjaten, ka detyruar FSHF-në të njoftojë UEFA-n për ndryshimin e stadiumit.

Sipas rregullores, Federata Shqiptare e Futbollit duhet të njoftojë të paktën 30 ditë para UEFA-n për stadiumin ku do të zhvillohet ndeshja. Kjo gjë ka ndodhur, ndonëse federata nuk ka publikuar asgjë zyrtare, është UEFA ajo që zbulon stadiumin ku do të zhvillohet ky takim

“Elbasan Arena” është impianti që UEFA ka listuar në faqen e saj zyrtare për ndeshjen e 11 qershorit mes Shqipërisë dhe Moldavisë. Ky ndryshim në protokollin e UEFA-s është bërë së fundi, pasi deri disa ditë më parë emri i stadiumit ku do të zhvillohej ky takim, nuk ishte shkruar në të dhënat e kësaj ndeshje në faqen zyrtare të UEFA-s.