Piloti i ri, australiani Alex Peroni, që garon në kampionatin e Formula 3, mund ta quajë veten me fat, pas një aksidenti të frikshëm në Çmimin e Madh të Italisë, në pistën e Monza. Piloti australian, ishte duke drejtuar makinën e tij, teksa në një kthesë ai goditi një bordurë, e cila e fluturoi në ajër makinën. Fatmirësisht, edhe pse makina fluturoi në ajër duke u rrëzuar në tokë me forcë, 19-vjeçari shpëtoi pa asnjë dëmtim, por shumë i tronditur nga aksidenti.
Aksidenti në pistën e Monza, vjen vetëm një javë pasi në Belgjikë humbi jetën një pilot 22-vjeçar gjatë garës në Formula 2. Anthoine Hubert u aksidentua teksa përplasi me forcë një tjetër makinë përpara tij në pistë, duke humbur jetën tragjikisht në aksident.
Ndërkohë, piloti i Sauber Junior Team, Juan Manual Correa, që ishte dhe shkak i aksidentit të SPA, ndodhet ende në spital në gjendje të rëndë për jetën. Ndërkohë, në garën e Formula 3 të Çmimit të Madh të Italisë, piloti shqiptar Lirim Zendeli e nisi garën nga vendi i dytë, por në xhiron e dytë të saj ai doli jashtë gare duke humbur shansin për t`u ngjitur në podium.