Tërhiqet Presidenti i Kilit, u nxori tanket protestuesve

Kili është përfshirë nga protesta të mëdha në vend prej një jave, por që u përballën me reagimin e ashpër të qeverisë duke nxjerrë në rrugë ushtrinë dhe shpallur gjendjen e jashtëzakonshme për t’i mposhtur kryengritjen e popullit. Duket se kjo gjë nuk funksionoi, pasi njerëzit filluan të dilnin gjithmonë e më shumë duke i bërë më të forta protestat. Rreth 1 milionë protestues mbushën rrugët e Santiagos, duke detyruar qeverinë të anulojë gjendjen e jashtëzakonshme dhe të tërheqë ushtrinë. Gjithashtu presidenti i Kilit Sebastian Pinera vendosi të shpërndajë kabinetin qeveritar me qëllim për të krijuar një qeveri të re “që do trajtojë kërkesat dhe do menaxhojë të ardhmen”.

“U kam kërkuar gjithë ministrave të mi të japin dorëheqjen për të formuar një qeveri të re që të jetë e aftë të përballojë kërkesat e reja dhe të menaxhojë të ardhmen e vendit” – tha Piñera.

Protesta nisi me studentët, të cilët dolën në rrugë një javë më parë pasi u rrit papritur çmimi i transportit publik. Qeveria u përgjigj fillimisht shumë ashpër ndaj manifestimeve, gjë që rriti zemërimin e sindikatave, të cilat iu bashkuan studentëve. Pinjera u përgjigj sërish me ashpërsi, duke shpallur gjendjen e jashtëzakonshme, duke vendosur shtetrrethime, si dhe duke shprehur në deklarata se vendi ishte në luftë. Ushtria u urdhërua të marrë përsipër mbrojtjen e institucioneve dhe tanket dolën në rrugë për herë të parë që nga koha e diktaturës. Por kjo shtoi numrin e protestuesve.

Pasi pa reagimin masiv, Pinera tha se e kishte kuptuar shumë qartë mesazhin e njerëzve dhe se kërkonte falje.

Bilanci i një jave protesta në Kili është 19 të vdekur, mbi 7 mijë të arrestuar dhe dëme në ekonominë e vendit të vlerësuara në rreth 1.4 miliardë USD.

Katastrofë mjedisore në Kili, me mijëra litra nafte derdhet në det

Një nga zonat më të bukura, me ujin më të pastër dhe ekosistemin më të gjallë në Kili është shkatërruar për shkak të derdhjes së rreth 40 000 litra naftë në të.

Kjo ndodhi si pasojë e një incidenti në terminalin e një kompanie minerare që ndodhet në një ishull në Patagoni.

Përballë kësaj urgjence, autoritetet kanë dërguar patrulla detare dhe specialistë në mënyrë që të reduktojnë sa të munden dëmet e shkaktuara nga derdhja e hidrokarbureve në det.

Amerika e Jugut në ‘terr’, eklipsi i rrallë diellor dhuron spektakël në Kili

Një eklips total diellor ka mbuluar me errësirë për 2:36 minuta pjesën jugore të kontinentit të Amerikës Latine. Qindra mijëra njerëz shkuan në rajonin verior Coquimbo të Kilit, pranë shkretëtirës së Ataçamës, e cila është e mbushur me disa nga teleskopët më të fuqishëm të planetit, për të ndjekur eklipsin e rrallë diellor, të martën pasdite. Turmat e njerëzve u mblodhën në qytetin La Higuera, rreth 2400 metra mbi nivelin e detit, pranë Observatorit La Silla.

“Unë nuk besoj se ka një vend tjetër më të mirë se ky në botë, për të parë një eklips diellor”, është shprehur për mediat lokale një turiste australiane, që kishte shkuar posaçërisht për të parë këtë fenoment të rrallë të sistemit tonë diellor.

Eklipset krijohen nga vendosja në një vij të drejtë e Diellit, Hënës dhe Tokës, duke i lejuar Hënës (satelitit të Tokës), që të krijojë hije mbi planetin tonë. Zona ku ndodhet observatori i La Silla, ka motë të thatë, ajër të pastër dhe ndriçim të ulët të dritës diellore, duke e bërë një vend të shkëlqyer për të shijuar spektaklin e eklipsit.

Eklipsi nisi në orën 13:01 me orën lokale të Kilit mbi Oqeanin Paqësor dhe krijoi një brez errësire prej 150 kilometrash. Një eklips i till diellor ndodh shumë rrallë pranë vendeve ku ka të instaluar teleskop për studimin e galaktikës tonë yjore, ndaj për banorët e Kilit, ajo është përjetuar si ditë feste.

“Sot është një ditë shumë e rëndësishme dhe ne kemi pritur shumë për këtë ditë”, u shpreh Presidenti i Kilit Sebastian Pinera. “Vendi jonë është kryeqyteti i botës në askeptin e astronomisë.

Ne jemi sytë dhe shqisat e njerëzimit, duke qenë se kemi mundësi të shohim, vëzhgojmë dhe studiojmë yjet dhe universin”, është shprehur presidenti kilian.

Në qytete të tjera të Kilit, njerëzit hipën mbi çatitë e shtëpive për të parë eklipsin, ndërsa në vende të caktuar u mbyllën shkollat, me qëllim që fëmijët të kishin mundësi të shihnin spektaklin që dhuroi eklipsi. Eklipsi është fotografuar nga vende dhe kënde të ndryshme, duke fiksuar në foto dhe pamje këtë spektakël të rrallë.