“Vijmë për një jetë më të mirë”, vajza nga Afganistani në lot pasi kapet nga policia në Pogradec: S’jemi terroristë!

Ka shpërthyer në lot një vajzë e re nga Afganistani e cila u kap nga policia e Pogradecit ndërsa kishte kaluar ilegalisht kufirin duke hyrë në Shqipëri.

“Nuk dua para. Nuk dua ushqim, dua të shkoj në një vend më të mirë ku të shkollohem. Ne nuk jemi terroristë” – tha ajo, ndërsa bashkë me të janë arrestuar edhe 5 persona të tjerë.

“Vijmë nga Greqia. Jemi nga Afganistani. Ne vijmë për një jetë më të mirë, pasi vendi ynë… (Qan) Unë jam e re, dua të shkollohem. Nuk dua ushqim, nuk dua para, dua shkollë. Nuk mund të më kuptoni. Është e vështirë. Policia na mori, por ne nuk jemi terrorist. Mami im është në Tiranë, unë jam me babin”, tha ajo.

Burime zyrtare nga policia thanë se 6 refugjatë afganë, mes tyre 3 të rritur dhe 3 fëmijë, u kapen nga policia në hyrje të Pogradecit, në zonën e quajtur “Enkelana”./realstory.al

Të rinjtë fshihen poshtë sediljes e brenda kroskotit të makinës për të shkuar në Spanjë

Dy adoleshentë kanë gjetur një mënyrë mjaft origjinale për të kaluar nga Maroku në Spanjë, pa u diktuar nga policia kufitare. Ato ishin fshehur njëri poshtë sediljes së pasme të makinës dhe tjetri brenda kroskotit, me shpresën për të kaluar klandestinë në Spanjë për një jetë më të mirë. Adoleshentët e moshës 19 dhe 17 vjeç, u kapën në kufi në tentativë për të shkuar në Spanjë, gjatë kontrollit të makinës që drejtohej nga një çift nga Maroku.

Në momentin që u nxorën nga vendi sekret në makinë, të rinjtë shfaqën probleme shëndetësore si marrje mëndësh, mpirje të trupit dhe mungesë të ajrit, për shkak të hapësirës shumë të vogël ku ishin futur dhe qëndronin prej orësh.

Pajisjet speciale të policisë kufitare që u përdorën gjatë skanimit të makinës zbuluan rrahjet e zemrës së të rinjve dhe zbulimin e vendeve sekrete ku ishin futur.

Transportonin klandestinë, pranga dy personave. Një drejtonte mjetin i dehur

Policia e Shtetit arrestoi dy persona, të cilët po transportonin klandestinë. Në fshatin Udënisht, policia ndaloi 15 emigrantë të huaj, të cilët po transportoheshin ilegalisht nga dy shtetas, njëri prej të cilëve drejtonte mjetin në gjendje të dehur. Klandestinët do të dërgoheshin në vendet e Bashkimit Europian kundrejt përfitimit të shumave financiare. Shtetasit e arrestuar janë M.M., 19 vjeç banues në Kamëz dhe P.Gj., 45 vjeç banues në Tiranë.

Të dy këta shtetas, në aksin rrugor Bilisht-Pogradec, po transportonin emigrantët e huaj. Konkretisht, shtetasi M.M., u kap duke transportuar 12 shtetas të huaj ndërsa shtetasi P.Gj., u kap duke drejtuar mjetin i dehur dhe brenda tij ndodheshin 3 shtetas të huaj. Të dy të arrestuarit u kishin premtuar shtetasve të huaj, kalimin dhe transportimin e tyre drejt vendeve të BE-së, kundrejt fitmit prej 500 euro secili.

Ndërkohë, Policia e Shtetit është duke vijuar punën për të vendosur përpara përgjegjësisë ligjore edhe persona të tjerë, të dyshuar si të implikuar në këto ngjarje. Materialet në ngarkim të tyre i kaluan Prokurorive të Rretheve Gjyqësore Korçë e Pogradec për veprat penale “Ndihma për kalim të paligjshëm të kufijve” si dhe “Drejtimi i mjetit në gjendje të dehur” në ngarkim të shtetasit P.Gj.

Kapen me 9 klandestinë në makinë, arrestohen dy persona

Dy persona u arrestuan gjatë kohës që po ndihmonin 9 klandestinë të kalonin kufirin ilegalisht me qëllim përfitimin monetar. Pas marrjes së informacioneve, policia bëri të mundur ndalimin e dy mjeteve një fugoni, ku udhëtonin 7 klandestinë dhe një taksie, ku udhëtonin dy të tjerë.

Në pranga ranë 25-vjeçari A.V., i cili ishte drejtues i fugonit dhe një 52-vjeçar me iniciale V.M., drejtues i taksisë. Të arrestuari, kundrejt një shume parash, do ndihmonin 9 klandestinët të kalonin kufirin për të hyrë më pas në vendet e BE-së.

Dy personat, së bashku me klandestinët u ndaluan në fshatin Buqezë të Pogradecit , ndërsa policia ka rritur aksionet e saj për goditjen e veprimtarisë së paligjshme kundrejt trafikimit të klandestinëve.

Trafikonin klandestinët, burg për 5 të arrestuarit në Elbasan

Gjykata e Elbasanit ka dhënë masën e sigurisë për 8 personat, të cilët u arrestuar për kalimin e paligjshëm të klandestinëve që vinin nga Siria, Turqia dhe Iraku drejt vendeve të BE.

Gjykata ka dhënë masën “arrest me burg” shtetasit me iniciale E.M, F. S., D. Q., R. H dhe shtetasi turk U.Ç, ndërsa për tre personat e tjerë është dhënë masa “detyrim paraqitje”.

Këta persona në bashkëpunim me njëri- tjetrin, vepronin si grup kriminal, duke organizuar transportin e klandestinëve te huaj nga Kufiri i Gjelbër me shtetin grek në drejtim të Tiranës dhe më pas në drejtim të Mal të Zi. Klandestinet paguanin shuma të konsiderueshme eurosh tek organizatori i këtij trafiku.

Trafikonin qenie njerëzore, 5 të arrestuar, mes tyre një polic

Shërbimi për Çështje të Brendshme dhe Ankesa (SHÇBA) ka arrestuar 5 persona, mes të cilëve ehde një efektiv policie. Të arrestuarit kanë ndihmuar 19 shtetas të huaj për të kaluar kufirin në mënyrë të paligjshme.

SHÇBA finalizoi goditjen ndaj këtij grupi, në hyrje të qytetit të Pogradecit rreth orës 23:50. Shërbimet ndaluan 19 shtetas të huaj, me shtetësi kurdë dhe sirianë, të cilët po transportoheshin drejt Tiranës me mjete që drejtoheshin nga shtetasit shqiptarë E.A. dhe T.H.

Shtetasit e huaj kanë hyrë nga kufiri i gjelbër në zonën e Devollit dhe në afërsi të fshatit Trestenik janë marrë me makina nga shtetasit E.A. dhe T.H. Punonjësi i Policisë, J.Z. (trup shërbimi në Komisariatin e Elbasanit) dyshohet se kishte rolin e kontrolluesit të rrugës. Shtetasit M.A. dhe K.M. ishin shoqërues.

Në këtë aksion të SHÇBA-së u sekuestruan në cilësinë e provës materiale 4 automjete, aparate celularë dhe 120.000 lekë. Mbi shtetasit e arrestuar është ngritur akuza për veprën penale “Ndihma për kalim të paligjshëm të kufirit, kryer në bashkëpunim”.