“Marrëveshja e 5 qershorit nuk duhet të ndryshojë”, ambasadori britanik apelon nga Shkodra: Nëse ka ndryshime duhet konsensus

Ambasadori britanik Duncan Norman deklaroi nga Shkodra se marrëveshja e 5 qershorit nuk duhet të ndryshojë dhe nëse do të kishte vazhdimësi të reformës duhet të bëhen në mënyrë sa më transparente dhe të jenë në përputhshmëri edhe me konsensusin e duhur.

Jemi në kulmin e reformës zgjedhore, sa besoni se tryeza do jetë frytdhënëse dhe me lista të hapura, janë të mundshme këto në Shqipëri?

Reforma elektorale është një çështje e nxehtë dhe diçka që ne e shohim me rëndësi dhe do donim që të implementohet në mënyrën e duhur. Nuk kam një ide të saktë se cila do të ishte mënyra e duhur, çdo vend ka sistemet e veta politike dhe çdo sistem bëhet mirë funksional nëse ka vullnet politik. Ne ishim mbështetës të fuqishëm të reformës dhe ndryshimeve që u bënë në 5 qershor, një marrëveshje që u firmos nga të gjitha palët dhe vazhdon të qëndrojë dhe nuk duhet të ndryshojë ajo marrëveshje që u bë në 5 qershor. Nëse do të kishte vazhdimësi të reformës duhet të bëhen në mënyrë sa më transparente dhe të jenë në përputhshmëri edhe me konsensusin e duhur. Është detyrë e Këshillit politik për të gjetur një mënyrë funksionale dhe të gjejë një konsensus të përbashkët. Mendoj se kjo është e mundur.

Inkurajoj palët që të gjejnë një konsensus dhe ajo çfarë rekomandoj është që të gjendet një sistem që do funksiononte për Shqipërinë dhe që do i bënte zgjedhjet e 25 prillit të lira dhe të ndershme, kjo është me rëndësi për ne.

Sa shanse ka të ketë zgjedhje të lira dhe ekonomike kur ka tensione ndërsa edhe krimi i organizuar mund të diktojë rezultatin e këtyre zgjedhjeve?

Besoj realisht që nëse ekziston vullneti politik Shqipëria do mund të ketë zgjedhje të lira dhe të ndershme. Qeveria britanike punon ngushtësisht me Shqipërinë për të luftuar krimin e organizuar dhe do punojmë edhe me fuqishëm në muajt që vijnë duke pasur parasysh zgjedhjet e ardhshme. Gjithashtu do vijojmë edhe bashkëpunimet me palët ndërkombëtare në mënyrë që të kemi një monitorim më të mirë të zgjedhjeve të ardhshme.

Ka një tensionim të gjuhës së ashpër të Presidentit ndaj qeverisë, mund të ndikojë kjo në zgjedhjet e 25 prillit dhe a është në gjuhën dhe vendin e duhur institucioni i Presidentit?

Presidenti ka një rol të rëndësishëm dhe të qartë kushtetues dhe ai vepron mbi atë që mendon se është gjëja më e drejtë në raport me Kushtetutën dhe nuk mendoj se është vendi i duhur që unë të komentoj.

Si i shihni përplasjet e fundit në Këshillin politik dhe kërkesat e reja?

Këshilli politik të vijojë punën e vet dhe nëse kjo gjë nuk është e mundur na duhet të shohim mënyra arbitrimi për ta zgjidhur por nuk jemi ende në atë stad.

Shumë të rinj nga veriu emigrojnë drejt Anglisë dhe përfshihen në krimin e organizuar atje, keni menduar si mund të ndalet kjo?

Lufta ndaj krimin të organizuar një nga prioritetet e mia më të mëdha dhe patjetër që do jetë në fokus të punës time edhe gjatë këtij viti që jam këtu në Shqipëri. Vitin e fundit ambasada jonë është rritur në numër dhe janë të fokusuar të gjithë se janë të fokusuar për të parandaluar krimin e organizuar dhe një pjesë e rëndësishme e asaj që shohim është që të merremi me procesin e krimit të organizuar. Një nga arsyet që njerëzit bëhen pjesë e krimit të organizuar është për të bërë para dhe nëse do kishim mundësi ta ndalonim këtë rrjedhje të burimit të të ardhurave atëherë edhe largimi i të rinjve do ndalohet.

Jeni i kënaqur me reformën në drejtësi deri më tani sepse shumë janë skeptikë dhe kemi parë disa anëtarë bandash që po lirohen nga burgu?

Britania e Madhe është mbështetës i madh i reformës në drejtësi dhe dje pata mundësi të takoj kreun e FBI shqiptare Aida Hajnaj dhe krijimi i BKH është i rëndësishëm dhe patjetër që ne do donim që kjo të ndodhte me shpesh por e vërteta është se nuk kemi alternativa të tjera dhe duhet të shohim reformën në drejtësi që të realizohet.

Integrimi ne BE, Shqipëria po bën hapa pas, keni një koment për këtë?

Britania nuk është me pjesë e BE por ne mbështesim fuqimisht dëshirën e Shqipërisë për t’u bërë pjesë e BE dhe gjitha reformat që Shqipëria të bëhet pjesë e BE dhe do donim që gjërat të bëhen më shpejt, Shqipëria ka shumë për të bërë dhe asgjë nga çfarë kërkohet nuk është se nuk mund të realizohen. Shqipëria do mundet t’i plotësojë kriteret e kërkuara nëse do të bëhet anëtar në BE.

Cila është porosia që keni për shqiptarët për zgjedhjet e 25 prillit?

Mbase nuk kam një këndvështrim se cilën parti shqiptarët duhet të votojnë por jam i bindur se shqiptarët duhet të votojnë. Është një detyrë dhe përgjegjësi që shqiptarët kanë ndaj vendit të tyre dhe vetes së tyre dhe ata janë që vendosin për të ardhmen e tyre.

“Djegia e mandateve një marrëzi. Të mos kthejmë ‘97-ën”

Presidenti i Republikës, Ilir Meta e quan marrëzi djegien e mandateve nga ana e deputetëve të opozitës, ndërsa ngarkon me përgjegjësi dhe maxhorancën për situatën politike në vend. Në një intervistë mbrëmë në emisionin “Përballë”, Meta tha se zgjidhja nuk vjen as nga bojkoti dhe as nga djegia e mandateve, por nga dialogu mes palëve. Ai gjithashtu theksoi bindjen se ende ka vend për kompromis për të mos lejuar që vendi të kthehet mbrapsht në ’97-ën.

“Duhet të keni parasysh që qëndrimi im, jo kundër djegies së mandateve që gjithmonë më është dukur një marrëzi, mund ta them pa frikë këtë gjë, por edhe ndaj bojkotit ka qenë gjithmonë që bojkoti është për të dhënë një mesazh, mund të ikësh në një seancë ku shkelet një e drejtë apo do të japësh një qëndrim që do të tërheqësh vëmendjen e opinionit, por nuk është një zgjidhje, pasi duke mos pasur iluzione dhe duke mos kërkuar standardet e demokracisë daneze, pasi kjo është dhe çështje kulture e tradite, besoj se edhe pse Parlamenti ynë apo institucionet tona kanë mangësitë e tyre, rruga më e mirë është të punosh brenda institucioneve për t’i përmirësuar ato. Ashtu sikurse mund të punosh edhe jashtë tyre përmes protestave duke ushtuar presion apo ndikim në mënyrë që ato të jenë në lartësinë e duhur që kërkon Kushtetuta, ligji, interesi kombëtar dhe publik.

Pra, nuk kam qenë dakord me këtë qasje, ashtu sikur se kam qenë gjithmonë i bindur që mazhoranca duhet të bënte përpjekje shumë më të mëdha për dialogun me opozitën, për tu bashkërenduar me të për shumë çështje të rëndësishme, sidomos ato të integrimit europian, sepse duhet paraqitur duhet demonstruar si një interes kombëtar, po këtë gjë nuk e kemi vënë re. Mua më vjen keq për këtë situatë sepse ka qenë tërësisht e evitueshme. Por dëshira për të treguar forcë secila palë më tjetrën na ka sjellë në këtë përshkallëzim të krizës.

Shpresoj të jemi ende në kohë që të mos shkojmë drejt një konfrontimi që do të ishte tërësisht i pafalshëm për të gjithë. Siç e kam theksuar dhe më parë të gjithë duhet të kemi nxjerr mësime nga ‘96-’97 dhe nuk do të rrezikojmë arritjet e vendit që nga ajo kohë e deri më tani, përfshirë edhe liberalizmin e vizave dhe shumë arritjeve të tjera. Në këtë drejtim duhet një reflektim nga të gjithë për të rikthyer vendin në normalitet kushtetues, institucional, demokratik, sepse ky është vendi i të gjithë neve dhe nuk mund të ecim me logjikën e përjashtimit”, u shpreh presidenti.

“Të tregojmë se kompromisi mund të arrihet”

Drejtoresha për Evropën Perëndimore, Ballkanin Perëndimor dhe Turqinë në EEAS, Angelina Eichhorst ka qenë sot e pranishme në Tiranë ku ka marrë pjesë në Forumin Ballkanik për Shoqërinë Civile. Në fjalën e saj ajo i ka bërë thirrje palëve për dialog, për gjetjen e një rruge kompromisi, ndërsa ka theksuar se bojkoti nuk i shërben askujt.

“Përmes dialogut dhe punës që ne kemi bërë sëbashku, mund të tregojmë se kompromisi mund të arrihet. Bojkoti nuk mund të jetë një instrument që duhet të përdoret. Është shumë negative të thuash ne nuk do jemi të pranishëm, ne nuk vijmë. Padyshim duhet kurajo për t’u bashkuar në tryezë, të diskutojmë dhe të ballafaqohemi me çështjet që duam të diskutojmë. Është pikërisht kjo, pse ne duhet të përdorim këto mekanizma që kanë në fokus debatin, dhe themi se debati nuk është rruga e duhur që duhet ndjekur. Kjo nuk të çon drejt standardeve demokratike. E rëndësishme është që të ketë debat në të gjitha nivelet”, tha Angelina Eichhorst.

I pranishëm në këtë forum ka qenë edhe kryebashkiaku Veliaj i cili se bashku me Drejtoreshën për Evropën Perëndimore, Ballkanin Perëndimor dhe Turqinë në EEAS theksuan domosdoshmërinë për bashkimin mes palëve.

“Siç e tha edhe Erioni, ka pak nervozizëm lidhur me punët që janë bërë, disa herë ka negativitet, dhe ne gjithmonë përpiqemi të shohim më të mirën. Është shumë gjë e mirë të shohim atë që vërtet ka ndodhur, të shohim pozitivitet. Ky është një mesazh gjithashtu për Ballkanin dhe BE. Ju jeni vërtet të bashkuar, jemi në një kontinent, ndaj është shumë e rëndësishme mënyra sesi ne do të vazhdojmë të punojmë së bashku, në një kontinent, në një union, në një familje. Kjo është busulla e punëve që ne duam të bëjmë sot dhe unë këtë e shoh qartësisht këtu në Ballkan. Është e rëndësishme të shohim bashkëpunimin e thellë në të gjitha nivelet, sigurinë, politikat për fondet, edukimin, mjedisin, në të gjitha nivelet dhe unë e di që këtë do ta diskutojmë së bashku sot”, deklaroi Angelina Eichhorst.