Policia e Shkodrës arrestoi një person i dyshuar si autor i vrasjes së 55-vjeçarit Lazër Arraj, i cili mbeti i vrarë të hënën në zonën e Shoshit në Dukagjin.
Ndonëse ende nuk ka dalë me komunikim zyrtar, Policia e Shkodrës arrestoi djalin e xhaxhait të viktimës, ndërsa janë shoqëruar në komisariat babai dhe vëllai i tij.
Dyshohet se autor i vrasjes është personi i cili të hënën lajmëroi në komisariat se kishte gjetur të vrarë shtetasin Lazër Arraj. Ai u gjet i vrarë me dy plumba, ndërsa ishte lënë në mes të rrugës. Lazër Arraj ishte 55 vjeç.
Ai jetonte në Shkodër, ndërsa në malësinë e Shoshit kishte shkuar për të mbledhur disa prodhime bujqësore.
Nipërit e tij lajmëruan policinë për ngjarjen e rëndë. Më pas, efektivët Blu të Shkodrës shkuan në zonë, duke arrestuar autorin e dyshuar. Motivet e vrasjes së Lazër Arraj mbeten ende të pazbardhura.