Italianët, ashtu si qytetarët e 21 vendeve të tjera anëtare, iu drejtuan ditën e djeshme kutive të votimit për të zgjedhur përfaqësuesit e tyre në Parlamentin e ri të Bashkimit Europian. Rezultatet pas përfundimit të zgjedhjeve kanë nxjerr fitues partinë “Lega” e drejtuar nga Matteo Salvini.
34% të totalit të votave kanë shkuar pikërisht për partinë e Salvinit, ndërsa Partia Demokratike ka marrë 22.70%, duke lënë pas “Lëvizjen 5 yjet” me 17.07%. Forza Italia ka marrë 8.79%, Fratelli d`Italia 6.47%. 56.10% e italianëve me të drejtë vote ushtruan vullnetin e tyre ditën e djeshme për të zgjedhur eurodeputetët e rinj të PE.
Pas daljeve të rezultateve paraprake, Matteo Salvini ka folur në një konferencë për shtyp nga partia e tij, duke shprehur falënderimin për qytetarët që e votuan. “Unë dua të falënderoj të gjithë votuesit, ata nuk më ndihmuan mua, por ndihuam Italinë dhe Evropën për të gjetur shpresë, krenari, rrënjë, punë dhe siguri”.
“Vetëm pesë vjet më para të gjithë flisnin për zhdukjen e “Lega”, ndërsa tani ne jemi partia e parë në veri dhe në jug, në disa qytete me kemi fituar me mbi 50%. Pas javëve dhe muajve të betejës së vështirë me armë të pabarabarta, kundër çdo gjëje dhe të gjithëve, fjala që unë dua të them është, Faleminderit! Do ta përdorim këtë besim për të bërë punë të mira, jo në rregullimin e llogarive personale”, ka thënë Salvini.