Negociatat, Majko debat me Ramën për Gent Cakajn

Mbledhja e Kryesisë së Partisë Socialiste, zhvilluar të hënën, nuk kaloi në qetësi, pasi mos hapja e negociatave nxiti debate. Sipas gazetës “Panorama”, e cila zbardhi pjesë nga debati në kryesinë e PS, Ministri i Diasporës Pandeli Majko dhe ish-ministri i Brendshëm Fatmir Xhafaj, i kërkuan Kryeministrit Edi Rama, që PS të dilte me një qëndrim për negociatat.

Majko mësohet se kritikoi në mbledhjen e kryesisë deklaratat e bëra nga Ministri në Detyrë për Evropën dhe Punët e Jashtme, Gent Cakaj se “Kryeministri nuk kishte premtuar hapjen e negociatave”. “Genti nuk duhet të bënte atë deklaratë, sipas të cilit, “unë (ai) dhe Kryeministri Rama nuk kemi premtuar hapjen e negociatave”, është shprehur Ministri i Diasporës.

Sipas Majkos, PS duhet të dilte me një qëndrim në lidhje me mos pasjen e një vendimi të Këshillit Europian për negociatat. “Prandaj, unë them se ne si kryesi duhet të dalim me një qëndrim për këtë vendim të Këshillit Europian dhe duhet të kemi një qëndrim në logjikën edhe të zhvillimeve në rajon”, është shprehur Majko.

Ndërkohë, sipas gazetës, Kryeministri Edi Rama mësohet të jetë shprehur në mbledhje se “qeveria që ai drejton ka përmbushur të gjitha kushtet e kërkaura nga Komisioni Europian. Gjë që u nënvizua dhe nga kret më të lartë të Bashkimit Europian, që nga kancelarja Merkel, e me radhë kryeministrat e Italisë, Bullgarisë”, madje sipas Kryeministrit Rama edhe nga Departamenti amerikan i Shtetit.

Ndërkohë, ish-ministrja e Mbrojtjes, Mimi Kodheli, është shprehur në lidhje me rastin e dorëheqjes së Zoran Zaev në Maqedoni, se ajo është çështje morali. “Maqedonia ka pasur një kusht mbi të gjitha kushtet, çështjen e emrit. Jetojmë në një sistem që nuk i përgjigjet marrjes së pushtetit në tavolinë. Dorëheqja nuk nënkupton domosdoshmërisht dhënien e pushtetit në tavolinë, në qoftë se ju besoni që jeni maxhorancë, mund të rifitoni besimin e qytetarëve… Dorëheqja ka të bëjë me moralin, ne po flasim për sistemin”, u përgjigj Mimi Kodheli.

Kryesia e Partisë Socialiste diskutoi dje përcaktimin e një norme të re statutore, siç është zgjedhja në krye të PS-së së bashkisë të dy kryetarëve, një burrë dhe një grua. Ky propozim është pritur mirë nga anëtarët e kryesisë, ndërsa kreu i PS-së e ka cilësuar si një risi që nuk e kanë partitë e tjera as në rajon, duke demokratizuar partinë dhe duke e hapur atë drejt grave, të cilat duhet të garojnë dhe në poste drejtuese. Ndryshimet statutore pritet të miratohen në asamblenë kombëtare dhe më pas në kongresin zgjedhor të PS-së.

Marrëveshje Rama-Basha? Majko shton dyshimet

Ministri për diasporën, Pandeli Majko ka shtuar më shumë dyshimet e opozitës së re për një marrëveshje të re Rama-Basha. Ndërsa deputetët e opozitës në parlament akuzuan “dorën e shtrirë” të Ramës për dialog dhe bashkëpunim me opozitën jashtë parlamentit, ministri Majko duke dashur t’i qetësojë kolegët opozitarë, i ka shtuar më shumë dyshimet, teksa ka thënë se çfarëdo marrëveshje të arrihet ajo do të vijë në kuvend dhe duhen votat tuaja për ta miratuar.

“Për ju është e rëndësishme që çfarëdolloj marrëveshje që do të diskutohet, politika është matematikë do vijë në këtë sallë, duhet vota juaj pa votën tuaj nuk ratifikojmë asgjë. Nuk bëhet as me mollë, pjeshkë, ngjala, hamburger me ca të doni. Zëvendësuesit në sport kanë bërë historinë, këtë nuk e kanë bërë as me batuta, as sharje, por akte dhe lojë të ndershme”, tha Majko.

Para tij, deputetët Ralf Gjoni dhe Myslim Murrizi të opozitës së re parlamentare, gjatë fjalës së mbajtur në seancën e së enjtes akuzuan Ramën se po flirton me Bashën për të bërë një marrëveshje për reformën zgjedhore. Ndërkohë që ata kërkojnë që marrëveshja të bëhet mes Ramës dhe deputetëve të opozitës në parlament, pasi do të jenë ata që do ta votojnë këtë reformë dhe jo Basha./realstory.al

Për cilin kryeministër e ka fjalën Klosi: Nano, Majko apo…?

Kohët e fundit, janë shtuar analistët apo figurat e ndryshme të politikës që thonë se gjithë sjella e çuditshme e presidentit Meta vjen për shkak të frikës nga Reforma në Drejtësi.

Ndërsa dy ditë më herët, ish kreu i SHIK-ut, Fatos Klosi bëri një deklaratë të bujshme dhe zbuloi se në kohën kur ai drejtonte Shërbimin Informativ amerikanët i kishin dorëzuar atij një dosje përvëluese për një kryeministër. Ai nuk tregoi emrin e kryeministrit por nisur nga situata aktuale ne po bëjmë një kontroll të fakteve.

Gjatë mandatit të tij 5-vjeçar në SHIK (1997- gusht 2002), Klosi ka punuar me tre Kryeministra: Fatos Nano, Pandeli Majko dhe Ilir Meta. Të gjithë pyesin lart e poshtë se cili është ai ish-kryeministër për të cilin flet Klosi mes këtyre tre emrave? Dhe përse Klosi e tha pikërisht tani këtë detaj që ka të bëjë me një ngjarje të ndodhur rreth dy dekada më parë? Ai nuk është nga ata tipat e tërhequr që ka refuzuar ftesat e medias. Përkundrazi, mund të ketë dhënë me qindra intervista a prononcime ndër vite, në gazeta apo televizione. Por kurrë nuk i kishte “rrëshqitur këmba”, duke nxjerrë një sekret profesional. Dhe çfarë sekreti, nga ato që përvëlojnë!

Por nga tre kryeministrat me të cilët ka punuar Klosi, nuk është as Fatos Nano dhe as Pandeli Majko që po bëjnë lëmsh vendin me dekrete, zhdekrete apo deklarata mjaft të rënda dhe të çekuilibruara në drejtim të qeverisë. Të gjithë janë të bindur për një gjë në këtë moment dhe për këtë nuk ka asnjë dyshim: Meta e ka një hall të madh (që nuk janë as zgjedhjet e lira e të ndershme, mbrojtja e Kushtetutës apo paqja sociale dhe uniteti i popullit)

Këtë e kanë kuptuar të gjithë, e thonë hapur, madje në studiot televizive ka nisur të qarkullojë rëndom tema se “Ilir Meta mund të arrestohet”. Po të kishte një dosje që po shqyrtohet në zyrat e prokurorëve shqiptarë, me siguri që do ta kishim marrë vesh të gjithë. Prokuroria historikisht ka qenë si një kullesë makaronash (madje prej aty kanë rrjedhur edhe përgjime apo sekrete hetimore të bujshme). Kështu që ky opsion bie poshtë. A mos kanë ndërkombëtarët një dosje për të? E para gjë që na vjen në mendje është përplasja e ashpër e Ilir Metës me amerikanët dy muajt e fundit. Krisja ishte shfaqur gjatë takimeve me diplomatë amerikanë “pas kuintave” për të dalë në sipërfaqe javët e fundit. Takim tejet i ftohtë me Zëvendësndihmës Sekretarin Amerikan të Shtetit, Mathew Palmer në Prishtinë, më pas përplasjet vazhduan pa frena fare dhe të paprecedenta. Meta ka sulmuar si kurrë më parë ndërkombëtarët dhe veçanërisht amerikanët në daljet e fundit para medias, duke krijuar kështu edhe idenë se mes palëve ka diçka personale…

Këtu lind pyetja, a mos është Ilir Meta, kryeministri i dosjes amerikane për të cilin flet Klosi dhe mbi të gjitha kjo dosje është arsyeja e gjithë kësaj situate politike në vend me dekrete e zhdekrete antikushtetuese, me kaos e molotov?!

Të presim SPAK dhe BKH, me siguri përgjigjen do ta marrim shpejt./Realstory.al

Majko bën të urtin, të mençurin dhe rri në mes: Zgjedhje në 30 Qershor, opozita t’i kontestojë në Kushtetuese.

Ministri Pandeli Majko thotë se zgjedhjet do të zhvillohen në 30 qershor, por ai ka dhe një sugjerim për PD-në. Meqenëse ajo po proteston kaq shumë për legjitimitetin e tyre, Majko sugjeron që të presë ngritjen e Gjykatës Kushtetuese dhe të kërkojë përsëritjen e tyre.

Partia Demokratike, thotë ai, i ka të gjitha mundësitë të kërkojë zerimin e procesit.

“Këshilla ime është që të mos shkohet tek përplasja. Është e paimagjinueshme që partia që krijoi votën e lirë pas viteve ‘90 të nxjerri njerëzit në rrugë për t’i penguar ata që të votojnë.

Është e paimagjinueshme. Prandaj mendoj se më qetësi dhe me dashuri ta mendojnë të shtruar dhe ka boll njerëz të mençur, të shkojnë nesër në Gjykatën Kushtetuese dhe të kërkojnë nëse janë të mendimit se dekreti i Presidentit është i ligjshëm dhe se ne jemi duke bërë zgjedhje të paligjshme të shkojnë në Gjykatën Kushtetuese dhe jo të djegin shkolla. Nëse kam ardhur sot këtu është se asnjë qytetar nuk i intereson të vërë jetën në rrezik të tij dhe të familjes së tij për politikanët shqiptarë, përfshirë edhe veten time.

Nuk dua të dal unë si delja e bardhe midis të zezave sepse edhe unë kam kusuret e mia bashkë me të tjerët. Sot PS-së nuk ka asnjë mundësi që të kthehet pas. PD i ka të gjitha mundësitë që të kërkojnë zerimin e procesit zgjedhor nëse ata mendojnë se ky proces është fals, i paligjshëm dhe anti-kushtetues, le të shkojnë në gjykatë. Të shkojnë në gjykatë dhe të mos nxjerri njerëzit dhe gratë që të përplasen me policinë”, është shprehur Majko në ABC News.

Majko uron Kosovën dhe ngacmon Brnabiç: Përshëndetje nga një barbar i zbritur nga pylli

Në 20 vjetorin e ndërhyrjes së NATO-s në Luftën e Kosovës, ministri shqiptar për diasporën, Pandeli Majko ka postuar një urim në facebook, por edhe ka ngacmuar kryenistres serbe, Brnabiç. Pak ditë më parë ajo i quajti shqiptarët njerëz të zbritur nga mali e të dalë nga pylli me të cilët s’merresh dot vesh.

Ndërsa Majko e mbyll urimin për Kosovën me fjalinë: “Të përshëndet nga Tirana një nga “barbarët e zbritur nga pylli”, duke cituar me humor kryeministren serbe.

“Në këtë përvjetor të 20 të Luftës së Kosovës ndjek me dëshirë e mall mbritjen në Prishtinë të miqve të shqiptarëve në ditë të vështira. Presidenti Klinton dhe Zonja Ollbrajt së bashku me ish-kryeministrin e Britanisë së Madhe Toni Bler janë ndër protagonistët kryesorë të cilët shënuan kthesën e historisë për shqiptarët.

Ata që dhanë jetën vlen të kujtohen me peshën e heshtjes së lirisë. Të gjithë ne të tjerët bëmë veç detyrën. Ta gëzosh lirinë Kosova ime.

Të përshëndet nga Tirana një nga “barbarët e zbritur nga pylli”, shkruan Majko.

Në këtë përvjetor të 20 të Luftës së Kosovës ndjek me dëshirë e mall mbritjen në Prishtinë të miqve të shqiptarëve në…
Gepostet von Pandeli Majko am Dienstag, 11. Juni 2019