PD merr në mbrojtje Metën: ‘Venecia’ foli politikisht

Partia Demokratike merr në mbrojtje Presidentin pas publikimit të draft raporti të Komisionit të Venecias, ku deklaron se Meta tejkaloi kompetencat e tij dhe shkeli Kushtetutën. Ish-presidenti Bujar Nishani, kritikon Venecian se dha një vendim politik dhe gaboi me Metën. Nishani tha se Komisioni i Venecias përveç qëndrimit ligjor, dha dhe një mesazh politik që nuk i takon dhe tejkalon kompetencat e saj.

“Kemi një qëndrim ligjor ku thuhet se nuk ka vend për shkelje të rëndë për të shkarkuar Presidentin. Ka edhe një mesazh politik, që nuk duhet të dilte nga komisioni i Venecias. Komentimi se ka tejkaluar kompetencat është argumentim politik dhe jo ligjor” tha Nishani për Report Tv.

Shkeljet kushtetuese të presidentit me dekretin e tij për anulimin e 30 qershorit, nuk po kapërdihen jo vetëm nga Meta, por as nga opozita. Fundi i gjithë procesit mund të jetë shkarkimi, por kjo do vendoset nga institucionet shqiptare. Tentativa mbrojtëse e Metës shkon deri aty sa dërgoi një letër sulmuese ndaj kreut të Komisionit të Venecias Gianni Buquicchio, ku e akuzon për “tejkalim kompetencash” dhe “vlerësim joprofesional.”

E quajti sharlatan, Panucci çon Nishanin në Apel: Kërkon 100 mijë euro

Ish-trajneri i Kombëtares së futbollit, Christian Panucci, nuk heq dorë nga padia e tij për të marrë 100 mijë euro dëmshpërblim nga ish-Presidenti Bujar Nishani i cili e quajti atë sharlatan.

Ish trajneri italian i Kombëtares shqiptare ngriti padi kundër ish presidentit dhe kërkoi 100 mijë euro dëmshpërblim për fyerje, por Gjykata e Tiranës vendosi në shkurt të këtij viti të mos dënonte Nishanin.

Por Panucci nuk ka hequr dorë, ai e ka çuar çështjen në Apel.

“Bravo Kosova, Panucci një sharlatan që shkatërron dhe atë që ishte ndërtuar”- shkruante Nishani në një koment në facebook disa kohë më parë.

Koment ky që mund t’i shkaktojë një dëm prej 100 mijë eurosh.

Kur shahen presidentët në Tiranë

Ish presidenti Bamir Topi ka botuar së fundi librin me kujtime “Nocturn”, kur përshkruan ngjarje nga jeta politike. Gazetat sot kanë shkëptur një pjesë ku ish presidenti Topi ka përshkruar momentin e futjes në politikë të Bujar Nishanit. Topi shkruan se Bujar Nishani ishte thjeshtë një punonjës karburanti tek Plepat në Durrës kur ai e futi në politikë dhe e takoi për herë të parë me Sali Berishën.

“–Mendoj që pas rezultateve zhgënjyese, Shaban Memia duhet të lirohet nga detyra e sekretarit, -tha ai (Berisha). Vendosa të mos shprehesha dhe të dëgjoja se ku do të dilte. -Unë nuk kam një emër për ta zëvendësuar dhe po e pate ndonjë, na thuaj ta propozojmë në mbledhjen e radhës në Kryesisë, – tha Berisha. Pas një pauze të shkurtër i them se nuk kam përse mendohem, sepse e kam një emër. -Cili është? -Është personi që ka qenë kryetar komisioni në zonën tim elektorale, Bujar Nishani quhet, – i thash duke menduar se do e njihte ndopak. -Nuk e njoh, çfarë profesioni ka ky? -Ka qenë oficer dhe tani punon në një biznes privat, i punësuar. E lash shpjegimin me kaq, për të mos e ndërlikuar situatën, duke mos i thënë që punonte në një pikë karburanti. Në fakt unë doja shumë që aty të ishte Bujari, pasi krijova konsideratë për të dhe doja t’ia ‘shpërbleja’ angazhimin që pati në punën e komisionit të zonës sime, ku beteja zgjedhore ishte një nga më të fortat në Tiranë. Berisha, pasi u mendua pak, me sa duket duke mos pasur ndonjë emër tjetër në mendje vazhdoi: Hajde nesër së bashku me të, ta takoj njëherë!”, shkruan Topi I cili më pas shton se Nishani I ka dalë kundër në 2007 kur ai do të kandidonte si president. Madje Topi shkon më tej duke e cilësuar Nishanin “intelektual mediokër dhe servil i Sali Berishës”.

I menjëherëm ka qenë reagimi i ish presidentit Bujar Nishanit. Ai shkruan sot se nuk i është dashur kurrë të punojë se pompist por nëse do kishte nevojë do e kishte bërë edhe atë punë. Ai gjitashtu tregon se kur hyri në presidencë pas Bamir Topit e gjeti atë të kthyer në një mensë.

“Nuk kam preferuar kurrë ti kundërpërgjigjem provokimeve dhe sulmeve të ndërsyera të Bamir Topit vetëm për një arsye.

Duke e njohur mirë atë njeri, që për shkak të kompleksit të thellë të inferioritetit që e karakterizon, është përpjekur gjithë jetën e tij vegjetative të ndërtojë kontraste haluçinante me të tjerët që e mundonin me qënien e tyre.

Nuk kam reaguar as kur mora detyrën e Presidentit të Republikës dhe u skandalizova kur e gjeta institucionin më të lartë të Shtetit Shqiptar të kthyer në një vend ku kalbeshin mbeturina të hedhura prej vitesh, e ku vendi më i investuar ishte kuzhina e gatimit dhe menca e ngrënies.

Në fakt nuk mund ta mendoja më parë se si zyra e Kryetarit të Shtetit të kthehej në kuzhinë gatimi e ngrënie.

Natyrisht që e ktheva urgjentisht atë ambient në një bibliotekë e dhomë për median dhe të gjithë ambientin e Presidencës në një vend dinjitoz për shtetin e qytetarët.

Tashmë Bamiri më paska bërë edhe pompist karburanti !!!

Të punosh pompist nuk është ndonjë gjë e keqe aspak.

Kam respektin dhe nderimin tim më të madh për të gjithë ata shqiptarë të ndershëm që bëjnë atë punë.

Ajo është shumë më e ndershme se sa p.sh. ti ushqesh fëmijët me paratë që ju merr si gjoba gjyqtarëve e prokurorëve.

Por mua nuk më është dashur të punojë kurrë si pompist.

Nëse do ta kisha të nevojshme atë punë do ta bejë pa asnjë problem”, shkruan Nishani.