Tërmeti dhe përmbytjet, vijnë ndihmat e para nga BE

Bashkimi Europian dërgon ndihmat e para në Shqipëri për banorët e prekur nga tërmeti dhe përmbytjet. Ambasadori i BE-së në Tiranë, Luigi Soreca tha se BE, por edhe vendet të tjera anëtare i janë bashkuar një nismë për të ofruar ndihma dhe mbështetjen e nevojshme për personat e prekur nga tërmeti e përmbytjet. BE shpreh solidaritetin për popullin shqiptar pas lëkundjeve të forta sizmike që përjetoi vendi më 21 shtator dhe përmbytjet që pasuan dy ditë më pas.

“BE qëndron në solidaritet me Shqipërinë, në këtë kohë të vështirë pas tërmetit dhe mbështetja e BE tashmë po shkon në Shqipëri. Disa prej shteteve anëtare në BE po i bashkohen kësaj nisme për ndihma.” shkruan Soreca

Përmes aktivizimit të Mekanizmit të Mbrojtjes Civile, BE ka ardhur në ndihmë të autoriteteve shqiptare pas tërmeteve shkatërruese dhe përmbytjeve, ku më të prekurat ishin zonat e Shqipërisë së Mesme. BE është gjendur pranë fillimisht me mjetet e domosdoshme dhe asetet e ndihmës së parë si çadra, tendat, gjeneratorët e energjisë dhe pompat e ujit kryesisht në zonat e prekura. Mekanizmi i mbrojtjes Civile, që kryesohet nga Christos Stylianides, tha se janë në kontakt të vazhdueshëm me autoritete shqiptare për të monitoruar nga afër situatën dhe për të kanalizuar ndihmën e mëtejshme të BE-së sipas kërkesës.

“Bashkimi Evropian qëndron në solidaritet me Shqipërinë në këtë kohë të vështirë dhe mbështetja thelbësore e BE-së tashmë është duke shkuar. Ekspertët evropianë, asetet për të shpëtuar jetën dhe materialet së shpejti do të bëjnë ndryshime në ditët e para të rëndësishme të përgjigjes. Falënderoj ngrohtësisht Austrinë, Kroacinë, Hungarinë, Slloveninë dhe Norvegjinë për ofertat e tyre të ndihmës përmes Mekanizmit tonë të Mbrojtjes Civile. Mendimet tona janë me të gjithë ata që janë në zonat e prekura dhe përgjigjet e para që punojnë në tokë. Ne jemi të gatshëm të ofrojmë ndihmë të mëtejshme.” u shpreh Stylianides

Shqipëria nën ujë, Xhaçka: Situata, nën kontroll

Ministrja e Mbrojtjes Olta Xhaçka deklaroi se situata e përmbytjeve e krijuar nga reshjet e pazakonta është drejt përmirësimit dhe se problematikat janë prezente vetëm në disa zona. Gjatë një deklarate për mediat në lidhje me situatën e shkaktuar nga reshjet e dendura mbrëmjen e së hënës, ministrja Xhaçka tha se falë bashkëpunimit dhe koordinimit të mirë të institucioneve dhe mekanizmit të ri të Mbrojtjes Civile ka pasur një reagim shumë herë më pozitiv dhe të efektshëm se herët e kaluara.

Xhaçka tha se problematikat paraqiten kryesisht në Bashkinë Kamëz të qarkut të Tiranës, ku në 105 banesa ka ende prezencë uji, ndërsa dalja e lumit Ishëm nga shtrati ka çuar në përmbytjen e tokave bujqësore në fshatrat Bilaj, Murqine dhe Mallkuc. Përmbytje të banesave ka pasur edhe në Kurbin dhe Fushë Krujë, ndërsa ministrja shtoi se Forcat e Armatosura po punojnë me kapacitete të plota për ardhjen në ndihmë të qytetarëve dhe zgjidhjen e zgjidhjen e problemeve të tyre.

“Në vetëm disa orë ka pasur reshje me intensitet të pazakontë, sa për 1 muaj. Situata është e stabilizuar, me përjashtim të disa zonave, të cilat po asistohen nga autoritetet. Kemi pasur mundësinë të testojmë sërish mekanizmin e ri të Mbrojtjes Civile që ka çuar në koordinimin mes institucioneve në një nivel të ri dhe shumë më tepër efikase sesa në të shkuarën. Akset rrugore dhe sistemet kryesore të furnizimit me energji dhe ujë janë funksionale.

Në qarkun e Tiranës, në 105 banesa ka prezencë uji, kryesisht në Bashkinë Kamëz, ku 400 efektivë e mjete janë në gjendje gatishmërie. Në Fushë Krujë në 10 familje në fshatin Larush dhe 8 familje në Bubq ka prani uji në banesat e tyre, ndërsa dalja nga shtrati i lumit Ishëm, ka përmbytur toka Bujqësore në fshatrat Bilaj, Murqine dhe Mallkuc. Në Kurbin, rritja e nivelit në kolektorin Laç-Milot, përmbyti disa banesa” tha Xhaçka, e cila shprehu solidaritetin me familjet në vështirësi deri në zgjidhjen e problemeve të tyre.