Ambasadori i Gjermanisë në Shqipëri, Peter Zingraf shpreh bindjen se Kancelaria Angela Merkel do të bindë vendet skeptike, për t`i thënë “Po” Shqipërisë për negociatat. “Vendimi është strategjik dhe politik njëherazi. Shpresojmë që 28 vendet anëtare të BE do të bëhen bashkë për një vendim pozitiv. Ka një maxhorancë që është pro hapjes së negociatave. Por gjithsesi na duhet unanimitetit. Prandaj na duhet të bindim ҫdo vend anëtar të BE”.
Në një intervistë për Deutche Welle, Zingraf konfirmoi se për Gjermaninë, hapja e negociatave për Shqipërinë përbën një vendim strategjik. “Për Gjermaninë hapja e negociatave me Shqipërinë për hyrjen në BE përbën një vendim strategjik. Ne jemi të bindur që Shqipëria dhe rajoni kanë një rëndësi strategjike për BE dhe gjeografikisht Shqipëria është brenda BE. Kancelarja Merkel e ka bërë të qartë, se është për “PO” dhe se ajo po bisedon me vendet partnere të BE, p.sh. ka biseduar me kryeministrin holandez Mark Rutte . Jam në dijeni gjithashtu që po zhvillohen bisedime në nivele të ndryshme, qeveritare dhe partiake. Vendet që janë për “PO” po bisedojnë me partnerët që ende nuk kanë vemdosur qëndrimin e tyre. Le të shpresojmë që argumentat strategjike do të mbizotërojnë në fund”, tha Zingraf.
Ndërkohë, ai shprehet se partitë politike në vend, duhet të ulen për Reformën Zgjedhore, ndërsa shprehet se ajo duhet të jetë miratuar para zgjedhjeve parlamentare të vitit 2021. “Bundestagu gjerman në rezolutën e tij u bën thirrje aktorëve politikë në Shqipëri, të ulen në tryezën ë bisedimeve dhe të arrijnë një përfshirje maksimale për reformën zgjedhore. Nga ana tjetër, mendoj që reforma zgjedhore është një element thelbësor për të kthyer besimin tek procesi. Ndërkohë, siç e thatë edhe ju, ka një element që lidhet me kohën: ekspertët na kanë thënë që nëse përcaktohet data për zgjedhjet parlamentare të 2021, duhet të jetë miratuar ligji për reformën zgjedhore deri në fund të këtij viti, që ligji të zbatohet para se të vijë dita e zgjedhjeve. Ky është një element i rëndësishëm, për të cilin u është bërë thirrje të dyja palëve”, shprehet Zingraf.
Sipas ambasadorit të Gjermanisë, elementi tjetër ka të bëjë me miratimin e kushteve të Bundestagu gjerman nga Këshilli Europian. Sipas Zingraf, nëse ato miratohen, do të jemi në situatën që disa prej tyre do të duhet të plotësohen përpara Konferencë së parë ndër-qeveritare. “Elementi tjetër ka të bëjë me miratimin e kushteve të Bundestagut Gjerman nga Këshilli Europian . Nëse ato miratohen do të jemi në një situatë që disa prej tyre do të jenë plotësuar pëpara Konferencës së parë ndër-qeveritare për negociatat e pranimit. Pra do të jetë në interes të dyfishtë për shqiptarët që të arrijnë të zhvillojnë zgjedhje të mira dhe të mos shtyjnë në kohë konferencën e sipërpërmendur, dhe duke pasur të kryer paketën e parë për reformën zgjedhore”, shprehet Zingraf.
Ai gjithashtu thekson se për miratimin e Reformës Zgjedhore, duhet bashkëpunim i mirë mes mazhorancës dhe opozitës parlamentare. “Që kjo të ndodhë duhen votat e maxhorancësë por edhe të opozitës parlamentare. Ne i kemi bërë thirrje dy palëve të kenë maksimumin e gjithëpërfshirjes për të pasur besueshmëri dhe që produkti i reformës të ketë kredibilitet. Në fakt kjo është një detyrë për qeverinë dhe opozitën brenda dhe jashtë parlamentit. Shpresojmë që kjo e fundit do të rikthehet në Parlament . Por ligji për reformën zgjedhore mund të bëhet pa pjesëmarjen e opozitës jashtë parlamentare. Ligjërisht kjo është e mundur por natyrisht, siç ju thashë më parë, do të ishte shumë më mirë të ketë një mbështetje maksimale, për këtë reformë. Gjithsesi, ajo mund të bëhet nga parlamenti egzistues. Le të të shohim sesi palët mund të bëhen bashkë”, tha ndër të tjera Zingraf.