Në verën e “vetmisë së madhe”, Ilir Meta me sytë te Mali i Tomorrit

Presidenti Ilir Meta e ka nisur mëngjesin e së premtes duke postuar një foto në facebook, së bashku me të birin, Besarin në Malin e Tomorrit ku kanë nisur ditët e pelegrinazhit drejt vendit të shenjtë të bektashinjve.

Edhe gjatë të enjtes Meta ishte atje në krah të besimtarëve ndërsa bëri dhe një lutje për Shqipërinë dhe shqiptarët duke shpresuar në një zgjidhje që vendit mund t’i vijë tani nga qielli, ose nga Abaz Aliu dhe Mali i Tomorrit.

“Abaz Aliu të na japë forcë të gjithëve në rrugën tonë për një Shqipëri më të drejtë, më të bashkuar, për një Shqipëri të vërtetë europiane, siç e meritojnë të gjithë shqiptarët e sidomos të rinjtë e të rejat!”, tha Presidenti Meta.

Një deklaratë kjo që tregon se presidenti duket i pashpresë se propozimet e tij për daljen nga kriza politike do të mund të zbatohen ndonjëherë.

Duket se në prag të shtatorit, kur parlamenti të vërë pikat mbi “i” në lidhje me procedurat parlamentare për shkarkimin e tij, Presidenti është bindur se 13 tetori i tij ka rënë dhe se ai ka mbetur vetëm në këtë propozim antikushtetues.

Në fakt e gjithë kjo verë e nxehtë tregoi se presidenti ishte vetëm. Ai ishte vetëm në vendimet antikushtetuese, pasi iu zhvlerësuan dy dekrete të njëpasnjëshme, si ai për anulimin e zgjedhjeve, ashtu edhe ai për 13 tetorin. Meta ishte vetëm pasi nuk mori as mbështetjen e PD-së, e të Bashës për 13 tetorin, megjithëse për të anuloi 30 qershorin. Presidenti ishte vetëm edhe në sulmin kundër ndërkombëtarëve e SHBA-së, megjithëse këtu duhet thënë se pati mbështetjen e “ish” partisë së tij, LSI-së dhe veçanërisht Petrit Vasilit që volli vrer kundër amerikanëve.

Ai u la vetëm në 2 muaj, duke mos zhvilluar asnjë vizitë të rëndësishme ndërkombëtare, duke mos pritur asnjë homolog të huaj, ose ndonjë zyrtar të rëndësishëm, përjashtuar këtu takimet e lamtumirës me ambasadorët e huaj, takime rutinë protokollare.

Meta ishte vetëm dhe këtë e tregoi në çdo postim që bëri gjatë verës, ku u shfaq në breg të detit, në male e nëpër shpella. Presidenti është vetëm dhe në shtator e pret shkarkimi./reasltory.al

Meta: Shkarkimi dekoratë për mua, Rama nën efektin e dopingut

Presidenti i Republikës, Ilir Meta ka sfiduat qeverinë dhe miratimin e kërkesës për shkarkimin e tij në Kuvend duke e quajtur me ironi si një procedurë “Dekorimi” pasi respektoi Kushtetutën. Edhe pse Komisioni Hetimor ka nisur punën për verifikimin e shkeljeve të kryera nga Presidenti, Meta deklaron se ai ka mbrojtur vetëm Kushtetutën dhe se nuk ka asnjë nën apo ligj që të ketë shkelur apo t’i ketë sjell dëm shtetit apo qytetarëve.

“Në fakt unë e konsideroj si një procedurë dekorimi sepse nuk shoh asnjë shkelje të Kushtetutës së Republikës së Shqipërisë, aq më tepër natyrisht, e them me trishtim, nga një Parlament që ka thyer çdo rekord në shkeljen e qartë dhe flagrante të Kushtetutës së Shqipërisë edhe falë një kontributi që ka po ky Parlament për bllokimin e qëllimshëm të ndërtimit të Institucioneve të reja të drejtësisë dhe të Gjykatës Kushtetuese në mënyrë të veçantë. Pra, ndihem në procedurë dekorimi sepse nuk e di se cilin nen të Kushtetutës kam shkelur dhe se çfarë dëmi i kam bërë Kushtetutës dhe qytetarëve shqiptarë”, – është shprehur Presidenti Meta në një intervistë në një studio televizive.

Në lidhje me akuzat publike që kryeministri Rama bëri në drejtim të presidentit duke e quajtur “tespie në duart e Berishës”, Meta është treguar i ashpër duke i quajtur deklaratë “nën efekte të caktuara”.

“ Më vjen për të qeshur kur dëgjoj deklarata të tilla. Natyrisht që ato janë nën efektet e caktuara. Unë jam një politikan që nuk përdor doping. Madje edhe sportin e lashë, sepse kisha përshtypjen që nëse do të bëhesha kampion, do të më duhej të përdorja pak doping. “ – tha Meta

PD mbron Metën, Gjata: Nuk ka shkelur Kushtetutën, shkarkimi është propagandë

Partia Demokratike, ashtu si dhe LSI, i ka dalë zyrtarisht në mbrojtje Presidentit të Republikës Ilir Meta, për të cilin është ngritur Komisioni Hetimor Parlamentar, për të hetuar shkeljet kushtetuese dhe më pas të propozojë shkarkimin e Presidentit në Kuvend. Në një dalje për mediat nga Selia Blu, Çlirim Gjata u shpreh se Presidenti nuk ka bërë asnjë shkelje. Sipas tij, dekreti për anulimin e zgjedhjeve është diçka normale.

“Presidenti nuk ka bërë asnjë shkelje. Ai ka vendosur datë demokratike, ka vendosur dekret normal. Kemi Komision Hetimor të ngritur në bashkëpunim me krimin e organizuar që do të hetojë dekretin e presidentit, që është akoma në fuqi. Shkarkimi i Metës është vetëm propagandë. Rama duhet t’i tregojë popullit se aktorët kryesorë të komisionit për shkarkim të presidentit janë të përlyer në krim”, u shpreh Gjata.

Kjo deklaratë e PD-së, vjen pas mbledhjes të së hënës të Komisionit Hetimor, ku anëtarët e tij, kërkuan që hetimi për shkeljet kushtetuese të Ilir Metës, të bëhej edhe me asistencën e një eksperti ndërkombëtar. Gjithashtu, në mbledhjen e së hënës, anëtarët e Komisionit Hetimor, kërkuan që të kenë akses në të dhënat e cilësuara “sekrete”, në mënyrë që shkarkimi i kreut të shtetit, të mos jetë vetëm për shkeljet e Kushtetutës, por të bazohet dhe në të dhëna të tjera.

Shkarkohet nga detyra drejtoresha e Bibliotekës Kombëtare

Këshilli i Ministrave ka vendosur të shkarkojë nga detyra drejtoreshën e Bibliotekës Kombëtare, Persida Asllani.

Shkarkimi i Asllanit është bërë me propozim nga Ministria e Kulturës, për arsye ende të paditura.

Persida Asllani mbante postin e drejtoreshës së Bibliotekës Kombëtare prej 5 vitesh. Ajo u emërua në 2014 në vendin e Aurel Plasarit.

Vendimi i qeverisë për lirimin nga detyra:

Në mbështetje të nenit 100 të Kushtetutës dhe të pikës 11, të nenit 27, të ligjit nr.8576, datë 3.2.2000, “Për bibliotekat në Republikën e Shqipërisë”, të ndryshuar, me propozimin e ministrit të Kulturës, Këshilli i Ministrave

V E N D O S I:

Znj. Persida Asllani, drejtor i Bibliotekës Kombëtare, të lirohet nga kjo detyrë. Ky vendim hyn në fuqi menjëherë dhe botohet në “Fletoren zyrtare”.

Sondazhi i Realstory.al, 81% e votuesve, pro shkarkimit të Metës

Rreth 81% e qytetarëve shqiptarë e vlerësojnë “të drejtë” shkrkimin e Ilir Metës nga posti i Presidentit të Republikës së Shqipërisë. Kjo është përgjigja ‘pro’ që i kanë dhënë sondazhit të “Realstory.al”, rreth 944 votues në pak më shumë se 24 orë, nga hapja e pyetësorit, që Realstory.al i drejton shqiptarëve për vendimin e Qeverisë mbi shkarkimin e kreut të shtetit. Ndërkohë, 19% e votuesve e vlerësojnë si të gabuar vendimin për shkarkimin e Ilir Metës nga posti që mban. Të hënën Parlamenti votoi me 101 vota pro kërkesën e Komisionit të Ligjeve për ngritjen e Komisionit Hetimor, i cili do të hetojë shkeljet e Kushtetutës nga Presidenti i Republikës dhe më pas do të kërkojë nga Parlamenti shkarkimin e tij.

Ilir Meta, sipas raportit të Komisionit të Ligjeve, ka bërë disa shkelje të rënda kushtetuese, të cilat lidhen me dekretin e datës 10 qershor, për anulimin e dekretit të mëparshëm, që cakton 30 qershorin si datë të ligjshme të zgjedhjeve. Në këtë pikë, Ilir Meta vulosi fatin e tij në zyrën e Presidentit, pasi bëri një akt të paprecendentë dhe mbi të gjitha i pabazuar në Kushtetutë, pasi akti themeltar i shtetit, nuk e njeh çdekretimin si veprim.

Ndaj, Qeveria vendosi t`i shkojë deri në fund shkarkimit të Ilir Metës, çka tashmë duket se ka dhe mbështetje të gjerë qytetare, referuar sondazhit të Realstory.al. Duket se qytetarët, në shumicë kanë kuptuar qartë veprimet e Presidentit, i cili me dekretin anti-kushtetues, jo vetëm që nuk i dha zgjidhje krizës politike në vend, por e drejtoi vendin drejt një përplasje civile, që për fatin e mirë të Shqiptarëve, u shmang pas ndërhyrjes së menjëhershme të Shteteve të Bashkuara ta Amerikës. Ndërkohë, sondazhi i Realstory.al, vijon të jetë i hapur për të gjithë qytetarët shqiptarë që duan të shprehin mendimin e tyre. Ju mund të votoni në Facebook, dhe në ueb në www.realstory.al.

Voto në sondazhin e mëposhtëm

Shkarkimi i Presidentit:

E hëna e “nxehtë” e korrikut, nga shkarkimi i Metës te protesta e opozitës

Dita e hënë pritet të jetë tepër e nxehtë, jo vetëm për shkak të temperaturave por edhe për situatën politike në vend. Më 8 korrik pritet që në Kuvend të diskutohet shkarkimi i presidentit Meta si dhe do të mbahet protesta e 10 kombëtare e opozitës. Që pas djegies së mandateve të opozitës vendi ka kaluar në një krizë politike që sa vjen dhe është thelluar. Djegia e mandateve u shoqërua me protesta të dhunshme, sulme ndaj disa KZAZ dhe me bojkotimin e zgjedhjeve lokale të 30 qershorit. Sot opozita duket sikur ka ngelur ne një udhë pa krye. Edhe pse protestoi për 5 muaj rresht për të ndaluar zgjedhjet (që u zhvilluan mjaft të qeta) dhe për të rrëzuar qeverinë Rama ( qeveri e kapur nga krimi sipas opozitës) ajo nuk arriti asnjë nga qëllimet e saj. Dështimet e arritjes së qëllimeve të tyre deri tani, kanë sjell një luftë të brendshme brenda PD, e cila për herë të parë pas rreth 30 vitesh ka mbetur pa asnjë lloj pushteti.

Me 8 korrik në orën 20:00 opozita ka thirrur protestën e 10 kombëtare. Por këtë herë kërkesat e saj kanë ndryshuar. Opozita tashmë kërkon për të dënuar vjedhësit e votës pas përgjimeve të BILD dhe të largohet Kryeministri Rama. Si Lulzim Basha ashtu edhe Monika Kryemadhi kanë deklaruar se ajo do te jetë paqësore duke ftuar gra, femra e fëmijë të bëhen pjesë e saj. Në këtë protestë ato i kanë bërë thirrje të bashkohen edhe 85% të qytetarëve, që refuzuan të merrnin pjesë në zgjedhjet farse dhe nul të 30 qershorit sipas opozitës.

Një tjetër situatë e nxehtë është edhe ajo e shkarkimit të Presidentit Meta, i cili thelloi edhe më tej krizën duke anuluar zgjedhjet e 30 qershorit me arsyetimin e shmangies se një përplasje civile. Ky dekret në fakt ishte si t’i hidhje benzinë zjarrit pasi tensionoi edhe me tej situatën duke nxitur jo vetëm dhunën e militantëve të PD ndaj policisë dhe KZAZ, por thelloi krizën institucionale e politike në vend. Të hënën Kuvendi pritet të mblidhet në orën 17:00 për të diskutuar ngritjen e një komisioni hetimor që do të shqyrtojë raportin e hartuar nga Komisioni i Ligjeve për shkarkimin e presidentit Ilir Meta. Në raport argumentohen 9 shkeljet e Kushtetutës nga Meta me firmosjen e dekretit për anulimin e zgjedhjeve të 30 qershorit.

Ky raport është bërë publik me herët nga RealStory.al dhe do paraqitet në Kuvend për miratim për t’i hapur më pas rrugën procedurave të tjera parlamentare, si ngritja e komisionit hetimor për shkarkimin e presidentit. Vendimi përfundimtar do të merret nga Gjykatës Kushtetuese që pritet të jetë funksionale deri në fund të korrikut.

Të gjitha këto zhvillime do të ndodhin gjatë ditës së hënë dhe priten me interes të madh jo vetëm nga qytetarët dhe partitë politike, por dhe ndërkombëtarët, të cilat gjatë gjithë kësaj kohe kanë bërë thirrje për dialog mes palëve politike.

Shkarkimi i Metës, Hajdari kërkon shtyrje. Maxhoranca: Zyra të jetë bosh sa më parë

Rudina Hajdari ka kërkuar shtyrjen e ngritjes së Komisionit Hetimor për shkarkimin e presidentit Meta, pasi thotë se ende nuk ka një Gjykatë Kushtetuese dhe se ky vendim do përkeqësonte më shumë situatën e nxehtë politike. Ndërsa thotë se ky është një konflikt mes Ramës dhe Metës, Hajdari deklaron se grupi opozitar nuk do të marrë pjesë në seancën parlamentare për ngritjen e komisionit Hetimor për Metën.

“Ne e shohim konfliktin mes Ramës dhe Presidentit si një përplasje personale dhe prandaj ne kërkojmë që ky komision hetimor të shtyhet dhe të ridiskutohet kur të kemi një Gjykatës Kushtetuese funksionale. Nuk kemi pse nisim një procedurë dhe më pas ta lëmë përgjysmë”, tha Hajdari.

Kreu i Grupit Parlamentar të PS-së, Taulant Balla nga ana e tij, bazuar në shpërthimet e fundit të Presidentit tha se “sa më shumë ditë kalojnë aq më kuptimplotë bëhet bazueshmëria e nevojës për të liruar sa më shpejt zyrën e presidentit”.

Më tej ai sqaroi se komisioni i ligjeve e ka miratuar raportin përfundimtar, i cili bazuar në Kushtetutë miratohet në seancë dhe më pas ngrihet një komision hetimor për shkarkimin e presidentit.

“Në zbatim të kushtetutës dhe rregullores së kuvendit jemi në fazën që po shqyrtojmë nismën e depozituar nga 55 anëtarë të Kuvendit për shkarkimin e Presidentit. Në këtë fazë raporti i shkon seancës plenare, kishim një diskutim për këtë cështje. Kuvendi diskuton në seancë raportin e komisionit të Ligjeve dhe nëse raporti miratohet, me të ngrihet edhe Komisioni Hetimor për evidentimin e shkeljeve nga ana e presidentit dhe më pas komisioni hetimor paraqit në kuvendin e Shqipërisë raportin përfundimtar. Nëse merr 94 a më shumë vota nga deputetë, miratohet shkarkimi i presidentit dhe certifikimin e këtij procesi e bën Kushtetuesja”- ka sqaruar Balla.

Kërkesa për shkarkimin e presidentit është firmosur nga 55 deputetë të maxhorancës por edhe të opozitës. Në përfundim të procesit vendimi i parlamentit i miratuar me 94 vota e më shumë, shkon për vlerësim nga Gjykata Kushtetuese e cila vendos shkarkimin përfundimtar të presidentit. Maxhoranca akuzon presidentin se ka tejkaluar kompetencat që i njeh kushtetuta me dekretin e tij për anulimin e zgjedhjeve të 30 qershorit.

KUVENDI SEANCË TË POSAÇME MË 8 KORRIK, FILLON ZYRTARISHT SHKARKIMI I METËS

RAMA NË REAL STORY: SHKARKIMI I METËS PA KTHIM

Rama në Real Story: Shkarkimi i Metës pa kthim

Kryeministri Rama është shprehur i vendosur që të vazhdojë me procesin e shkarkimit të presidentit Meta. I pyetur drejtpërdrejtë nga gazetari Sokol Balla në Real Story: A do të vazhdoni me procesin e shkarkimit të presidentit Meta? Rama u shpreh: “Për sa na takon ne, nuk diskutohet.”

Rama tha se ky proces do të vijojë deri në fund duke e votuar në parlament dhe më pas i takon vendimi Gjykatës Kushtetuese.

“Ne do ta çojmë deri në fund procedurën e nisur për shkarkimin e Ilir Metës. Do ta votojmë në Parlament dhe më pas i takon Gjykatës Kushtetuese për t’u shprehur. Meta do të thirret në Komisionin Hetimor, që dhe këtu është e drejta e tij që me një dekret me vulën e Haxhi Qamilit ta shpërbëjë këtë komision. Ne do e votojmë në Parlament dhe më pas i takon Gjykatës Kushtetuese për t’u shprehur. Do të jetë kjo gjykatë që do të jap vendimin përfundimtar.” – tha Rama

Ndërsa në lidhje me deklaratën e Metës se ai do të jetë president deri në 2022, Rama u shpreh me ironi “ Sa data kam dëgjuar unë nga filxhani.”

Balla: Meta u zgjodh me 87 vota, por u ndëshkua me 100 vota

Kreu i grupit parlamentar të PS-së, Taulant Balla, nga një takim me shqiptarët në Selanik, tha se presidenti Meta e ka humbur të drejtën të qëndrojë në zyrë dhe për shkak se ka thyer Kushtetutën ai duhet të shkarkohet nga detyra. Akti i anulimit të zgjedhjeve është i paprecedentë pa asnjë lloj të drejtë kushtetuese tha Balla.

“Ne nuk i kishim numrat të zgjidhnim një president tjetër, por sot Ilir Meta e ka humbur të drejtën të qëndrojë në atë zyrë. Ne ia dhamë përgjigjen të enjten në Kuvend, nëse Ilir Meta u zgjodh me 87 vota, me 100 vota i thamë zoti president ke thyer parimet bazë të Kushtetutës sonë, teksa Presidenti i Republikës nuk e ka asnjë lloj të drejte, nuk figuron në asnjë paragraf, në asnjë fjalë, fjala ç’dekret dhe patjetër që ne do ta institucionalizojmë atë që paragrafi i dytë i nenit 90 të Kushtetutës sanksionon, se çfarë ndodh kur presidenti thyen Kushtetutën, presidenti shkarkohet kur shkel kushtetutën”– deklaroi Balla.

Ngjela: Nëse do shpërndajë parlamentin, Metën e pret burgu përjetë

Avokati Spartak Ngjela e ka cilësuar si dënim me burg të përjetshëm nëse presidenti Meta vendos të shpërndajë parlamentin me kërkesën e tij, që i bëri KQZ për numrin e deputetëve.

“Nëse do të shkarkohet le ta lërë me kaq, nëse do të dënohet me burgim të përjetshëm le të vazhdojë. Nuk ka asnjë pikë në kushtetutë të shpërndajë parlamentin, përveç dy rasteve. Nëse bën një dekret jashtë kompetencave quhet i pavlefshëm dhe nuk e shqyrton askush.” -u shpreh Ngjela për News 24

Për sa i përket nismës së PS për shkarkimin e presidentit, Ngjela tha se ky është një kalvar që zgjat për 3 muaj dhe përgjatë kësaj kohe, Meta do të qëndrojë president.

“35 deputetë duhet të paraqesin kërkesën për shkarkim, parlamenti ia drejton komisionit te ligjeve i cili thërret Presidentin dhe e merr në pyetje, parlamenti mblidhet dhe thërret presidentin në dëgjesë më pas formulon një komision hetimor parlamentar, i cili zgjat deri në 3 muaj dhe thërret Presidentin sa herë të dojë. Komisioni i kthen raportin Kuvendit, i cili e voton me 94 vota. Më pas i shkon gjykatës kushtetuese për verifikim. Nuk ka njeri t’i rezistojë këtij kalvari. Niksoni dha dorëheqjen. Është tre muaj kalvar. Deri sa të vijë votimi në Parlament, Meta është President”- theksoi Ngjela.