“S`ka krizë”, Mediu debat me Ngjelën në “Real Story”

Deklaratat e bëra nga Avokati Spartak Ngjela në studion e “Real Story” të gazetarit Sokol Balla, se “në Shqipëri nuk ka krizë politike”, kanë shkaktuar debat në panelin e të ftuarëve. Kryetari i Partisë Republikane, Fatmir Mediu dhe analisti Agron Gjekmarkaj, dolën kundër arsyetimit të Spartak Ngjelës. Mediu u shpreh se opozita nuk doli nga Parlamenti për qejf, por për shkak të vjedhjes së votës. Ndërkohë, Ngjela iu përgjigj duke i thënë që këtë çështje “çojeni në Ushaington”. Ndërkohë, Spartak Ngjela ka treguar formulën se si PD mund të kthehet në pushtet.

Mediu: Ne nuk dolëm nga parlamenti për qejfin tonë. Ne dolëm për shkak të asaj që po ndodh në Shqipëri. Ky nuk ishte parlament shumice. Ishte parlament që ishte ndërtuar për shkak të vjedhjes së votës dhe bërjes bashkë me krimin, nuk ka më as Prokurori etj.

Ngjela: Mirë ore zotëri, çojeni në Uashington. T’iu pranojë Uashingtoni t’iu pranoj edhe unë.

Mediu: Sot Shqipëria është në krizë. Shqipëria po shpopullohet.

Ngjela: Kjo është ineficencë e qeverisë. Ka qenë gjithmonë.

Gjekmarkaj: Nuk mund të thuhet se Shqipëria nuk ka krizë, siç thotë avokati.

Ngjela: Kjo nuk është krizë politike, krizë por jo politike. Kriza është kur e ke në parlament. Nuk ka krizë jashtë parlamentit në të gjithë Europën.

Gjekmarkaj: Me këtë krizë, kryeministrin mund ta kesh 30 vjet në pushtet.

Ngjela: Nuk iu ka përkrahur asnjë politikë e madhe, asnjë partner i madh ndërkombëtar. Nuk po ndihmoni opozitën. E djathta klasika ka qenë e gjitha pa shkollë, nuk i linte komunizmi në shkollë. Më kanë thënë të huajt se janë 1200 shqiptarë ekselentë në perëndim, thërrisni të djathtën klasike dhe e rrëzoni për 3 muaj, ndryshe nuk bëhet. Këtë frikë ka Rama, prandaj iu afron.

Mediu: Nuk ka as Gjykatë Kushtetuese…/Realstory.al/

Ngjela: S`ka krizë politike. SHBA kundër bojkotit të Parlamentit

Avokat Spartk Ngjela, i ftuar në studion e emisionit “Real Story” të gazetarit Sokol Balla, në News 24, është shprehur se PD gaboi me djegien e mandateve, pasi nuk kuptoi se SHBA dhe Gjermania nuk do e pranonin këtë vendim. Sipas tij, largimi nga Parlamenti është koncept anti-perëndimor. “Duhet të përcaktojmë se krizë nuk ka. Për mua kriza është në parlament. Pushteti luhet atje. Opozita iku, tani ka bërë dy gabime të rënda opozita në funksion të vetvetes. E para, nuk kuptoi që SHBA dhe Gjermania nuk do e pranonte bojkotin e parlamentit. Bojkoti është koncept anti-perëndimor. E bën dhe doli fitimtar Saliu dhe Basha. Nuk ka rëmdësi se çfarë ka pasur në mendje. Ikën nga parlamenti, nuk ta pranon perëndimi. Sepse e kupton që je i paaftë”, tha Ngjela.

Më tej, ai shtoi se PD bëri gabim që u largua në Kuvendi. Sipas tij, kriza mund të shkaktohej në Parlament duke bllokuar mazhorancën me vota. Ndërkohë, Ngjela tha se opozita nuk ka rrugëdalje tjetër veç dialogut me Kryeministrin Edi Rama. “Përse të duhet më shumë? Rregullo sistemin zgjedhor, kërko ndihmë nga perëndimit. Një rast ka në historinë botërore; socialistët e Italisë, ikën nga parlamenti, ua mori vendet Partia Komuniste. Ata kishin arsye shumë të madhe. Momenti duket, opozita e pa që nuk ka rrugëdalje. Mirëpo nuk është në parlament. Rama më mirë do të bashkëpunojë me këta, se sa nuk di se kush drejton opozitën parlamentare”, tha Ngjela.

Avokat Spartak Ngjela shprehet gjithashtu se situata do fillojë të jetë në favor të opozitës, në momentin që një delegacion ndërkombëtar do takohet me përfaqësuesit e saj. “Rama tani s`mund të thotë që nuk më lë opozita. Janë tre-katër grupe konfliktesh. Politika do fillojë të ndryshojë në favor të tyre, kur një delegacion i rëndësishëm që vjen këtu t`i takojë. Kriza është kur unë bllokoj qeverinë, s`ka vota për të marrë vendime. Kjo është krizë politike”, tha Ngjela. /Realstory.al/

Ngjela: Meta i çoroditur, mbrojtjen po e kthen në fajësi

Avokati dhe analisti Spartak Ngjela, deklaratat e Presidentit se ‘Parlamenti nuk është i plotë…dhe vendi është në krizë përfaqësimi’, i quan ‘çoroditje’ të Metës. Me anë të një komenti në rrjetet sociale, Ngjela shkruan se kjo nuk është krizë përfaqësimi, por sakrificë përfaqësimi për të ndëshkuar të korruptuarit.

“Çoroditja e Metës, vazhdon ta kthejë mbrojtjen e tij në fajësi…Meta deklaroi se “Parlamenti nuk është i plotë… kjo është krizë përfaqësimi”. Jo, zoti Meta, kjo nuk është krizë përfaqësimi, është sakrificë në përfaqësim, për të ndëshkuar të korruptuarit. Largimi i deputetëve PD dhe LSI, dhe futja në Parlament e deputetëve zëvendësues me arsye krejt e krejt ligjore nuk dha krizë, por sukses për Reformën në Drejtësi. Ky ishte sukses historik, sepse sot shqiptarët janë mu në prag të shpëtimit: në Shqipëri tani posa ka filluar antikorrupsioni si proces”, shkruan Ngjela.

Më tej, Sparak Ngjela komenton edhe deklaratat e Metës, ku u shpreh se kishte informacion se ‘do të digjej Parlamenti”, Ngjela shprehet se Meta gënjen. Ai ngre disa pyetje për Ilir Metën, duke arritur në konkluzionin se Meta është kundër Reformës në Drejtësi.

“Meta tha gjithashtu që “jam shtyrë për të zhvendosur me dekret datën e zgjedhjeve të dekretuara, sepse kisha të dhëna se do të digjej Parlamenti “. Nuk është profesionist prandaj gënjen, duke rënduar veten. Për këtë rast, pyetjet enigmë janë këto: Po mirë, ky President, nuk ka qenë fare në gjendje ta ndalonte djegien e mundshme të Parlamentit me forcën e shtetit?”.

“Po mirë, nuk mundej ky President të lajmëronte kryeministrin e ti kërkonte atij shpalljen e masave drastike: nga ndalimi i protestës e deri te vendosja e pjesëshme e gjendjes së jashtëzakonshme? Pse nuk ka bërë Meta asnjë nga këto? Sepse ka pritur djegien, domethënë destabilizimin e Shqipërisë, ngaqë vetë rrezikohet nga Reforma në Drejtësi kur të fillojë procesi antikorrupsion. Domethënë, Meta është kundër reformës? Sigurisht. Këtu ka qenë e gjithë loja e tij antikombëtare…”, përfundon Ngjela.

Ngjela zbulon skenarin: Meta donte destabilizim të Shqipërisë

Pas dëshmisë që Ilir Meta dhë përpara Komisionit Hetimor Parlamentar, që po heton shkeljet kushtetuese të Presidentit, ka reaguar avokati dhe analisti, Spartak Ngjela. Në një koment të shkurtër në rrjetet sociale, Ngjela shkruan se Meta dëshironte të digjej Parlamenti më 8 qershor. Sipas avokat Ngjelës, pasi kjo gjë nuk ndodhi, kreu i shtetit nxori dekretin e 10 qershorit për anulimin e datës së zgjedhjeve, me qëllim që t`iu jepte dhe një herë dorë hordhive të vijonin përplasjet për destabilizimin e Shqipërisë.

“Çfarë na tha sot presidenti ynë Meta? “Kisha të dhëna- tha ai – se do digjej Kuvendi në datën 8 qershor!” Po dekreti u zhdekretua në datën 10 qershor? Çdo të thotë kjo? Kjo tregon se ky farë Presidenti e ka pritur djegien e Kuvendit me ankth në datën 8 qershor, dhe meqë ai nuk u dogj dot, zhdekretoi zgjedhjet që t’iu jepte dhe një dorë hordhive të vijonin përplasjet për destabilizimin e Shqipërisë. Kjo është e vërteta. Por, a di Komisioni Hetimor këtë? Sigurisht që e di”, shkruan Ngjela.

Ndërkohë, Presidenti Ilir Meta deklaroi të hënën përpara Komisionit Hetimor Parlamentar, se kishte pasur ‘informacion se në protestat e opozitës, njerëz të caktuar do të tentonin të digjnin Kuvendin’. Mirëpo ishte i menjëhershëm reagimi i Partisë Demokratike, që nëpërmjet Gazmend Bardhit hodhi poshtë akuzat e Metës, duke u shprehur se opozita nuk kishte pasur një plan të tillë.

Ngjela: Opozita kryengritëse e Bashës dështoi, SHBA mbështet opozitën parlamentare

Nga Spartak Ngjela

Siç dihet, tani, ish opozita shqiptare është larguar nga Parlamenti; donte të kryente një kryengritje, por dështoi. Kurse Reforma në Drejtësi, këtë gjendje të re e pati në favor. Ish opozita Berisha u largua nga Parlamenti me shpresë të një kryengritjeje popullore. Por, nuk e mbështeti populli. Në fakt, kryengritjen e desh se i ndruhet për vdekje Reformës në Drejtësi që po e drejtojnë amerikanët në Shqipëri. Në thelb, lëvizja e saj “kryengritëse” ishte një lëvizje antiamerikane, por me flamur amerikan. Një aziatizëm naiv ky. Njëlloj si antimaoistët në Kinë që dilnin të luftonin maoistët me portretin e Mao Cedunit, se kishin frikë t’iu thoshin përkrahësve të tyre që jemi kundër Maos. Por tani, kryengritja Berisha mbeti një ëndër, kurse Reforma në Drejtësi është në prag të aktit të vet të parë antikorrupsion

Ndërkohë, në Parlament po funksionon opozita e re. Gjithsesi, duhet pranuar se, ndonëse momenti parlamentarist sot është më afër shoqërisë, sërish kësaj opozite i duhet shumë punë për të bindur opinionin publik. Opozita Berisha kishte dhe ka sens antikombëtar, sepse ishte dhe mbetet në luftë për ekzistencën e saj, gjithmonë në funksion të kundërshtimit që i bën Reformës antikorrupsion. Gjithsesi, lodhet kot: nuk shpëton dot. Kurse opozita aktuale, 90 përqind të së cilës kuptohet se e ka strukturuar politika perëndimore, po pritet të sjellë risi me vlerë kombëtare në Parlamentin shqiptar.

Në funksion të Reformës, kjo opozitë, nga ekspertët perëndimorë mendohet se e garanton ecurinë e projektit të ngritjes së SPAK- ut, por këtu del kjo pyrtje: A do të jetë në gjendje që opozita aktuale në Parlamentin shqiptar të ngrihet në rangun e një opozite të theksit kombëtar e perëndimor? Pikërisht kjo pritet të ndodhë, prandaj mendojmë se do ta kemi tani një opozitë të tillë. Dhe, ne mendojmë gjithashtu, që do të ndodhë, sepse është domosdoshmëri. Është domosdoshmëri për Shqipërinë, sepse vetëm me forcën e kësaj opozite të re parlamentare dhe me forcën e politikës amerikane, mazhoranca aktuale nuk do të këtë mundësi që të lëvizë drejt bllokimit të Reformës, ndonëse mendohet se do të jetë e nxitur kundër reformës nga liderët e saj që i kap antikorrupsioni.

ll.

Sipas analizës së më sipërme, kjo opozitë, që rezulton e pakorruptuar, duhet të marrë në dorë çështjen e vendosjes së drejtësisë në Shqipëri. Por, a do t’i imponohet kjo mazhorancës së korruptuar për ta çuar deri në fund Reformën në Drejtësi? Tani kuptohet që një grup liderërësh të mazhorancës janë të rrezikuar nga Reforma antikorrupsion. Por, koha tregoi që nuk iu kundërvunë dot hapur politikës amerikane, sikundër që bëri Berisha dhe Meta.

Kryeministri Rama bëri lëvizje për të frenuar Reformën, por nuk ia arriti dot. Kurse sot, nëse ky kryeministër mendon se mund ta mundë politikën amerikane në Tiranë me forcën e Erdoganit, do rrëzohet si në një skenë komedie. E dini pse? Sepse politika amerikane, forcën politike të Erdoganit e sheh si “forcën e pleshtit”. Dhe ka edhe diçka që duhet ta kujtojë zoti Rama: ambasadorja amerikane që pritet të vijë këto ditë në Tiranë, është forcë politike anti – Erdogan, sepse kështu e ka quajtur presidenti i Turqisë kur e dëboi si nongrata nga Turqia. Edhe diçka zoti Rama: hiqe atë memorialin e shëmtuar turk, të dëshmorëve fals të Erdoganit, para sesa të vijë ambasadorja.

lll.

Megjithate, na duhet të theksojmë se gjithçka do të varet nga skema që do të përdorë politika amerikane si forcë për shpejtimin e vënies në veprim të Reformës në Drejtësi. Kjo sepse tani gjithçka është afër kurorëzimit të Reformës, por edhe reaksioni antireformë mendohet të jetë i madh. Prandaj, gjithçka do të varet nga fora e parlamentit, dhe këtu duhet të spikasë opozita e re parlamentare. Opozita jashtëparlamentare tani, edhe pse ende ka vullnet kundërshtues antiteformë, nuk ka forcë se nuk është më në Parlament Prandaj, përfundimisht, na duhet të theksojmë se gjendja reformuese e Shqipërisë sot duket se mban me vete dy lëvizje që varen nga funksionimi normal i Parlamentit: shkarkimi i presidentit Ilir Meta, sa më shpejt që të jetë e mundur; dhe, fillimi normal i SPAK-ut. – sa më shpejt! E pra, pikërisht në këto dy pika vjen dhe qëndron edhe opozita e re për të dhënë ndihmesën e saj. Ashtu siç e theksuam më lart.

Mitsotakis ‘veto’ Shqipërisë, Ngjela: Është i paaftë, ne kemi SHBA-BE me vete

Nga Spartak Ngjela

Kryeministri grek, për çeljen e negociatave të Shqipërisë, na paska dalë sot me një kusht për minoritetin grek në Shqipëri.

Cili është ky minoritet?

Kryeministrat grekë, me ndonjë përjashtim, “minoritet grek” quajnë aneksimin e Jugut të Shqipërisë. Dhe, e dini pse? Se ata nuk mund të pranojnë që të ketë ortodoksë që të flasin shqip. Domethënë, shqiptarë. Sepse iu del zbuluar pushtimi i territoreve të gjera shqiptare, dhe gjithë politika e ndyrë që kanë bërë në 150 vjet kundrejt arvanitasve në Greqi dhe genocidit antishqiptar e antiçam në Epir.

Këta mesjetarë, pasi pushtojnë territoret shqiptare, me genocid, dëbojnë nga tokat e tyre shqiptarët myslimanë, si turq. Ky ka qenë turpi i tyre historik. Dhe këtë gjithmone ia ka pranuar edhe Stambolli; kurse pastaj, shqiptarët ortodoksë nuk i lënë të flasin shqip, dhe i detyrojnë të deklarohen “helenë”. Ja, kjo është metoda e tyre çnjerëzore kundër shqiptarëve në këta 150 vjetët e fundit.

Janë po këta, që, me anë të kishës greke, gjuhën shqipe e kanë quajtur “gjuhë të mallkuar”. Dhe, e dini pse? se gjuha shqipe është gjuha e parësore e gadishullit tonë, domethënë edhe e vetë Greqisë. Në shkollat greke nuk thellohen në atë që i thonë “greqishte e vjetër”, se ajo gjuhë mund të shpjegohet vetëm me gjuhën shqipe, sidomos me gegnishten.

E kuptoni tani se sa vuajnë këta kur shohin forcimin ndërkombëtar të Shqipërisë dhe Kosovës?

ll.

Por ky, në fakt është kryeministri më i paaftë grek. Do ta shihni.

Kryeministër! Asnjë kusht nuk vini dot ju shqiptarëve. Edhe Uashingtoni, edhe Berlini, edhe Brukseli, që të dyja gjeopolitikat e mëdha të botës perëndimore, e kanë përcaktuar Shqipërinë dhe Kosovën në zonën e vet.

Pse, kryeministri grek, që nuk di se ku ka kokën, do ta mundë këtë politikë të madhe! Le më pastaj injorantët liderë të Shqipërisë që shkojnë deri te Erdogani për të njëjtën gjë. Qesharakë janë këta ballkanas që nuk dinë asgjë dhe iu duket se dinë gjithçka.

Gjithsesi, lodhen kot së koti dhe fare kot.

lll.

Po ku ka forcë politika e kryeministrit grek që të mundë gjeopolitikën e madhe USA-BE!

Pse nuk e ka atë forcë?

E para, se grekë nuk ka as në Athinë e jo më në Shqipëri. Athina ka qenë e gjitha me shqiptarë të quajtur arbëreshë, si shqiptarët e Italisë së Jugut. Por çmendurisë greke po i vjen fundi.

E dyta: Greqia i ka Gjermanisë 350 miliardë Euro borxh. E di kryeministri grek që Shqipëria është aleate e ngushtë me politikën e Berlinit? Dhe, a e di ky që vota e Greqisë tanimë kondicionohet nga Berlini?

E pra, pse flet kështu kryeministri grek?

Sepse ka frikë nga potenca që po akumulon dhe do të akumulojë bota shqiptare në Ballkanin Perëndimor. Sidomos kjo do të shihet qartë pas përfundimit të reformës që ka nisur kundër liderëve të korruptuar të Shqipërisë, të gjithë të shitur te fqinjët dhe te armiqtë shekullorë të shqiptarëve dhe kundër botës shqiptare në Ballkanin Perëndimor.

Por, një gjë është e sigurt: kjo kohë e re po punon për shqiptarët. Prandaj, edhe kryeministri grek është mirë ta rregullojë gjuhën brenda kontekstit historik.

Ngjela: Meta do ndiqet penalisht, Shqipëria në BE

Nga Spartak Ngjela

Çfarë po sjell në psikologjinë e krimit fillimi i aplikimit të Reformës në Drejtësi?

Po sjell ndryshimin e madh. Kjo reformë ka tani afër dy hapa fillestare për të ndërmarrë:

1. Procesin penal për shkarkimin e presidentit Ilir Meta.

2. Strukturimin jurudik të SPAK-ut.

Që tani konstatohet frikë nga të korruptuarit e mëdhenj të Shqipërisë. Këta po flasin jashtë sistemit logjik dhe nuk dinë si të mbrohen. Më tipiku është Ilir Meta. Ky, pasi foli nonsese dhe gjithë frikë, pasi kërkoi ndihmë kudo, tani duket se po pret fatin e tij: një president i shkarkuar.

Në fakt historia politike e Shqipërisë, me goditjen penalale të Ilir Metës, fiton, sepse Shqipëria garanton hapjen e negociatave me Bashkimin Europian në fund të tetorit 2019.

Penalizimi i Ilir Metës është shenja e parë dhe e mjaftueshme për kushtin që ka vënë Bashkimi Europian në hapjen e negociatave për anëtarësimin në të: goditjen penale të të korruptuarve të pushtetshëm. Kështu ndodhi edhe më Kroacinë, menjëherë pas arrestimit të kryeministrit të saj, iu hapën negociatat.

Në fakt kjo do të ndodhë, sepse politika europiane e Shqipërisë ka ngrirë, deri sa të fillojë goditja penale e të korruptuarve të mëdhenj. Kurse Ilir Meta është më tipiku i korrupsionit të lartë shtetëror dhe është President i Republikës.

Shkarkimi i tij në akuzë penale, krijon hapin e parë drejt çlirimit të Shqipërisë.

Kjo në fakt i jep shoqërisë shqiptare forcë në besimin se ajo do të shpëtojë më në fund nga një uzurpim tridhjetëvjeçar.

Menjëherë pas shkarkimit të Metës dhe pas ngritjes së SPAK-ut, nis procesi penal kundrejt të gjithë të korruptuarve të mëdhenj të shtetit shqiptar.

Il.

Por çfarë pritet të krijojë në funksion të shtetit shqiptar Reforma në Drejtësi?

Respektimi ligjor i të gjithë reformës në drejtësi, e cila tani është e plazmuar juridikisht në Kushtetutën e Shqipërisë, do të krjojë për herë të parë në historinë e Shqipërisë një Sistem Penal të Drejtësie (Criminal Justice System).

Në fakt shteti shqiptar asnjëherë nuk e ka pasur drejtësinë penale të organizuar në një sistem.

Tani, sapo të fillojë aplikimin Reformës në Drejtësi, nis strukturimi real për krijimin real të Sistemit Penal të Drejtësisë.

Por, çfarë është ky Sistem?

Ky Sistem është një seri agjencish të pushtetit gjyqësor, të qeverisë dhe një sërë institutesh ligjorë, të cilët kanë për qëllim të identifikojnë individët e inkriminuar dhe të zbatojë kundrejt tyre një ndëshkim penal.

Institutet parësorë të sistemit të ri të drejtësisë penale në Shqipëri do të jenë: gjykata e zakonshme, Gjykata e Posaçme, prokuroria e zakonshme, Prokuroria e Posaçme, policia kriminale, Byroja Kombëtare e Hetimit, avokatia, dhe burgjet.

Ky është sistemi i ri, i gjithë i reformuar dhe i shkëputur plotësisht nga politika.

Dhe, sapo të fillojë, sistemi i organizuar do të merret me spastrimin e krimit në një spektër të gjerë dhe të plotë.

Brenda këtij Sistemi është vendosur edhe SPAK-u

Kurse SPAK-u, sipas kushtetutës, i vendos të dy aspektet e krimit të organizuar në një plan goditës: krimin e lartë shtetëror si korrupsion, dhe krimin e organizuar si pjesë e simbiozës me krimin shtetëror.

Shqipëria tani është një

Shtet i paralizuar dhe një shoqëri joproduktive pikërisht si pasojë e abuzimit me pushtetin.

Korrupsioni shqiptar sot nuk mund të quhet një gjë e rastit, sepse ai është një fenomen gjithështetëror. Ky lloj krimi shtetëror i ka pushtuar të dy ingredientët thelbësorë të një shteti: administratën e lartë shtetërore, dhe pushtetin gjyqësor. Domethënë që shteti i së drejtës nuk egziston sot në Shqipëri. Pikërisht këtë lloj shteti të së drejtës kërkon të sjellë me objektin e saj Reforma në Drejtësi.

lll.

Nga do të fillojë goditja penale?

Në rastet e rëndësisë që vijnë nga nivelet e larta të politikës së të dy krahëve, po ta shohësh me vëmendje profesionale korpusin e plotë ligjor të Reformës në Drejtësi, konstaton se goditja duhet të fillojë nga pjesëtarët e familjes dhe fisi i presidentëve, kryeministrave dhe ministrave. Kjo sepse këta naivë nuk e kanë menduar ndonjëherë ardhjen e drejtësisë penale në Shqipëri. Por, për faktin që kjo lloj drejtësie tani po vjen si sistem krejtësisht i pavarur, i ka shqetësuar të gjithë, sidomos pasi e kanë parë si test në rastin e pushtetin gjyqësor.

Ajo që panë këta në testin e vetingut të gjyqtarëve dhe prokurorëve të korruptuar, iu dha të kuptuar se deklarimet e tyre të pasurive, që kanë qenë të detyruar t’i jepnin sipas ligjit, i kanë bërë duke paguar komisionin e deklarimit të pasurive. Pikërisht kjo, njëlloj edhe si gjyqtarët e prokurorët, tani do t’i dërgojë përpara akuzës penale.

Deklarime të reme të pasurisë: këtu do të fillojë vetë procesi penal antikorrupsion edhe për pushtetarët e lartë..

Në fakt, këta të korruptuar të lartë e kuptuan qëkurse i detyruan me forcë të votonin Kushtetutën. Prandaj këta i ndërmorën të gjitha hapat kundërshtuese antireformë, deri në kërkesa të hapura për kryengritje mbarëshoqërore; por dështuan. Sigurisht, na duhet të vëmë në dukje se ky dështim erdhi drejtpërdrejt nga ushtrimi i forcës së politikës amerikane.

Këtë tani e dinë të gjithë shqiptarët, prandaj po presin të shohin atë që do të ndodhë.

Asgjë tjetër më shumë, do të ndodhë ajo që përshkruam më lart në këtë shkrim.

Ngjela: A është e vendosur politika amerikane te Reforma në Drejtësi?

Nga Spartak Ngjela

Vetëm Reforma në Drejtësi është zgjidhja parësore për të ardhmen e Shqipërisë. Këtë reformë, e cila ka filluar dhe është drejt finalizimit për të nisur si akt, e ka strukturuar politika amerikane dhe ajo e Bashkimit Europian.

Asnjë rrugë tjetër nuk mund të ishte e suksesshme në luftë kundër korrupsionit të lartë shqiptar, me përjashtim të Reformës në Drejtësi, e cila është strukturuar e gjitha ndërkombëtarisht nga politika amerikane dhe politika gjermane.

Deri tani reforma ka eliminuar nga detyra një numur të madh gjyqtarësh dhe prokurorësh të korruptuar, por ka trembur dhe të gjithë klasën e korruptuar politike. Politikanët e korruptuar, në të dy krahët e politikës, kuptohet se kanë humbur ekuilibrin dhe flasin në tym. Dhe e gjithë kjo vjen si pasojë e vendosmërisë amerikane për ta pasur Reformën në Drejtësi si armën kryesore në të gjithë ecurinë e më tejme të politikës së saj në Ballkanin Perëndimor.

Shqiptarët i mbijetuan shekujve të tërbimit ruso-serbo-grek të pushtimit të territoreve dhe të genocidit kundër tyre. Tani ata po e kanë luftën me hordhitë e brendshme korruptive te të cilat kërkon të mbështetet politika ruse kundër forcimit të Arbërisë së Re, që është në fakt e gjithë bota shqiptare në Ballkanin Perëndimor.

Kjo botë shqiptare, tani e përbërë nga dy shtete shqiptarë në këtë zonë, Shqipëria dhe Kosova, është futur në reformën e brendshme antikorrupsion. Por kjo luftë, qëndrën e vet e ka sot në Tiranë.

Politika amerikanë e ka të qartë që vetëm një shtet shqiptar pa korrupsion përbën mbështetjen kryesore të unifikimit të botës shqiptare në Ballkanin Perëndimor. Por, pikërisht këtu, është hedhur në reaksion politika ruse në ndihmë të korrupsionit të lartë në Tiranë.

Korrupsioni shqiptar në Tiranë ka bllokuar gjithçka, jo vetëm si zhvillim ekonomik, por edhe si kulturë shqiptare, sepse me qëllim dhe me ndërhyrje të jashtme 30 vjeçare, ka goditur arsimin sistematikisht në cilësinë e tij; dhe kërkon të groposë kulturën shqiptare. Gjithsesi deri tani nuk ia ka arritur plotësisht, por dëmi i madh rezulton.

Aplikimi i suksesshëm i Reformës në Drejtësi në Tiranë, domosdoshmërisht, shumë shpejt, do të kalojë po njëlloj edhe në eliminimin e korrupsionit të lartë në Prishtinë. Ndërkohë kuptohet se politika amerikane kërkon të krijojë një urë antikorrupsion Tiranë-Prishtinë, urë kjo e cila në fakt është traditë amerikane e transferimit të reformave demokratike nga një vend në tjetrin.

Kapitullimi i korrupsionit të lartë shtetëror në Tiranë dhe në Prishtinë, do të sjellë menjëherë klimën e kalimit të procesit të zhvillimit shqiptar në të gjithë Ballkanin Perëndimor. Keni për ta parë.

Dhe, më në fund, kjo është arsyeja kryesore që kuptohet se vetë politika anerikane, por edhe politika gjermane do ta kryejë deri në fund Reformën në Drejtësi në Tiranë. E cila tashmë ka nisur me shumë sukses të japë Rezultatet e para konkrete, sepse këto ditë u mbyll i gjithë cikli ligjor i kësaj reforme.

Pasi të përfundojë Reforma në Drejtësi, a do të shkojë deri në fund shkallmimi i korrupsionit të lartë shtetëror shqiptar?

Po, deri në fund do të shkojë, dhe me emrat e tyre të plotë. Dhe nuk kemi pse dyshojmë, mjafton të shohim kushtetutën. Kontrolli i korrupsionit shtetëror i niveleve të lartë, ka filluar.

Duke i qëndruar të gjithë argumenteve që kemi dhënë në këtë punim, dhe tezës kryesore të tij se pa eliminimin e korrupsionit të lartë shtetëror në Tiranë nuk mund të ketë perspektivë të botës shqiptare në Ballkanin Perëndimor, na duhet të theksojmë se, në rrugën që ka nisur, i gjithë korrupsioni i lartë shtetëror do të jetë nën akuzë. Kur të vijë kjo situatë akuzatore, në Shqipëri do të ketë një moment historik shumë optimist, shumë herë më të madh nga ai i rrëzimit të komunizmit. Do të akuzohen sjellësit e fatkeqësisë se re të Shqipërisë, dhe kjo situatë do të ndihet si festë nga shqiptarët që kanë njëqind vjet që po presin drejtësinë shoqërore në Shqipëri.

Është e kuptueshme se krerët e këtij korrupsioni enorm, sigurisht që janë hedhur për të kërkuar ndihmë te fryma armiqësore antishqiptare. Në fakt këta liderë të korruptuar, i janë drejtuar asaj fryme të ligë që, në dy shekuj rresht, ka krijuar tragjedinë historike shqiptare.

Por edhe këtu kemi një gjykim real dhe therrës që e dha flakë për flakë politika amerikane. Ishte zv/ndihmës sekretari i Departamentit të Shtetit, Palmer, që para dy muajsh theksoi drejtpërsëdrejti se: “targeti rus për Shqipërinë, është shumë i vështirë”.

Në fakt kuptohet se, politika amerikane ua drejtoi këtë gjykim therrës politik, në Tiranë, të gjithë atyre që kanë kërkuar ndihmë politike, apo kanë lyer duart me paranë ruse, siç është për shembull një pjesë e medias shqiptare që tani është e provuar për pagesat që ka marrë nga Moska apo nga Athina.

Të gjithë këta po duken tani të trembur, sepse deri më sot iu dukej Reforma në Drejtësi si të ishte një përrallë. Tani diçka po ndiejnë, prandaj e kanë humbur ekuilibrin. Në fakt duhet ta dinë mirë që goditja që po vjen, do të jetë drastike.

Ka një çast historik në historinë e një kombi kur, të gjitha padrejtësitë mblidhen në një pikë , dhe kur fillon procesi i drejtësisë për të, që të gjitha humbjet historike ai i përfiton në një proces.

Kjo është historia aktuale e Shqipërisë. Pse? Sepse politika amerikane e ka në interes që, pasi t’iu kthejë shqiptarëve padrejtësitë shekullore që iu janë bërë, do të fillojë me ta politikën e re në Ballkanin Perëndimor. Sepse nuk ka rrugë tjetër. Ballkani ka qenë Gadishull Ilirik dhe, më pas, hapësirë arbërore. Që ta dominosh politikisht këtë hapësirë duhet të rikrijojet Arbëria e Re.

Dhe procesi ka filluar. Kosova është sot shtet shqiptar i pavarur. Por, a do të jetë dhe Maqedonia shtet shqiptar i pavarur? Sigurisht që po, se atje shqiptarët përbëjnë 70 përqind të popullsisë, paçka se deri tani kanë qenë të shtypur dhe rreth 400 mijë shqiptarë ortodoksë janë shkruar maqedonas nga frika, kurse mbi 400 mijë shqiptarë muslimanë nuk i regjistrojnë arbitrarisht nëpër proceset e regjistrimit të popullsisë.

E pse të zgjatemi. Gjithë ky proces ka vetëm një kusht: reformën në drejtësi në Tiranë.

Dhe ky është njëherësh kushti i zhvillimit shqiptar, por edhe kushti i politikës amerikane.

Spartak Ngjela: Ilir Meta ka nevojë për psikiatër, nuk di çfarë flet nga tmerri i SPAK

Avokati Spartak Ngjela nuk e kursen ironinë për Presidentin e Republikës, Ilir Meta. Sa i takon paralajmërimit të këtij të fundit për një tërmet apokaliptik, Ngjela deklaroi se deklaratat e Metës tregojnë se ai ka nevojë për një psikiatër. Sipas tij, përgjigjen e saktë se pse presidenti flet në këtë formë mund ta japë vetëm një mjek i shëndetit mendor. “Më mirë të pyesni një psikiatër, unë s’jam psikiatër. Ai thotë budallallëqe. Shkenca e sizmologjisë nuk është e saktë, nuk parashikohen dot tërmetet. Me një aproksimativitet mund të thuhet që do të bjerë tërmet, por nuk mund të dihet sesa ballë do të jetë. Është shkenca e cila nuk është shkencë e saktë. Pse merret presidenti me këtë? Është mirë të pyesni një psikiatër”, tha avokati, për gazetën Sot.

Më tej, ai renditi arsyet pse Ilir Meta flet edhe për gjëra që s’i takojnë. Duke theksuar se presidenti e ka humbur ekuilibrin, Ngjela u shpreh se Meta ndjehet i tmerruar nga Struktura e Posaçme Antikorrupsion, por edhe nga hetimi parlamentar që ka nisur për të. Sipas tij, Meta e di që ka kryer një shkelje të rëndë të Kushtetutës dhe tani po pret pasojat. “Ai është nën akuzë, ka humbur ekuilibrin dhe gjithçka mund të ndodhë, por nuk ka gjë në dorë që të shkatërrojë shtetin. Po të kishte kompetenca të mëdha, do të duhet të ishim të shqetësuar. Por tani nuk ka ndonjë shqetësim të madh. Ai kështu flet gjithë ditën, se mos është vetëm kjo që ka thënë. Ai ka 20 ditë që lëshon gjëra të tilla. Ka 20 ditë që flet gjëra pa ekuilibër. Po të mos dinim arsyen, mund të themi që mund të vuajë nga ndonjë sëmundje. Por fakti që dimë arsyen tregon që ai është i shqetësuar. Është i shqetësuar nga reforma në drejtësi, por edhe nga procesi hetimor i nisur nga Parlamenti. Hetimi i Parlamentit është një gjë shumë e vështirë për të, është shkelje e Kushtetutës dhe ata do ta çojnë deri në fund. Në këto momente ai ka një arsye të fortë pse flet ashtu”, deklaroi avokati.

Në vijim të reagimit të tij, Spartak Ngjela paralajmëroi se shumë shpejt Shtetet e Bashkuara të Amerikës do të publikojnë dosjet për të gjithë të korruptuarit shqiptarë. Teksa komentoi edhe shpalljen “non grata” të Vangjush Dakos nga Amerika, avokati shtoi se kjo është një provë e qartë se amerikanët nuk flasin kot dhe kanë provat e tyre edhe për pushtetarë të tjerë, duke nënkuptuar këtu se mes të rrezikuarve është edhe Ilir Meta. Ai shprehet shpresëplotë se SPAK do t’i japë zgjidhje korrupsionit shqiptar. “Nga ana tjetër kemi edhe ndërkombëtarët. Ju e patë dje që zoti Dako u shpall “non grata”. Amerikanët kanë një vit që po merren me të korruptuarit shqiptarë konkretisht dhe do ta çojnë deri në fund. Ata kanë provat e tyre, Dako do të paraqesë provat e veta nëse do të shkojë çështja në një proces gjyqësor. Politika amerikane ka të dhëna për të cilat arsyeton ndalimin e vizës për të. Ata nuk mund të flasin kot. Ata kanë provat e tyre dhe shumicat i kanë nga shërbimet. Fakti që kanë nisur luftën antikorrupsion në Shqipëri, kam përshtypjen që do të kenë informacione shumë të gjera edhe për shumë pushtetarë të tjerë shqiptarë. Unë pres që të ketë shumë të akuzuar për korrupsion kur të ngrihet plotësisht SPAK”, deklaroi Spartak Ngjela.

Shqipëria në prag të shpëtimit historik nga SHBA dhe Gjermania

Nga Spartak Ngjela

Tani që Shqipëria dhe shqiptarët janë mu në prag të shpëtimit të tyre historik, është mirë të kujtojmë historinë.

Kemi bërë luftë historike kundër hordhive osmane, kur kemi qenë në këto troje 4 milionë shqiptarë në luftërat kastriotiane, me Gjergj Kastriot Skënderbeun në krye, tani një hero kombëtar dhe një figurë e madhe e historisë botërore…

Pastaj? Na kanë pushtuar… dhe përsëri gjallë mbetëm, sepse kishin shqiptarë të mëdhenj që na kanë mbrojtur, por…

Na kanë luftuar me tmerr në 200 vjetët e fundit. Na kanë genociduar dhe na kanë shpërngulur nga trojet tona në favor të të ashtuquajturve grekë që kanë ardhur nga Anadolli e janë vendosur në trojet tona; dhe sllavëve të jugut. Na kanë marrë 100 mijë km2 territor me zjarr dhe krim sllavët e jugut dhe grekët, në aleancë me Rusinë dhe Francën. Kemi mbijetuar në 28 mijë km2, dhe me këtë shtet kemi shpëtuar gjuhën. Por, kemi marrë para 20 vjetësh edhe një shtet tjetër shqiptar. Kemi sot përkrahjen e superfuqisë unike në këtë rruzull dhe dy shtete shqiptarë në Ballkan.

Ndërkohë gjithçka e kemi në favor për të rimarrë historinë tonë të humbur. Por tani shqiptarët i kanë pushtuar shqiptarët që i drejtojnë dhe po i sundojnë me paratë që iu kanë grabitur. Këta grabitës kuptohet se nuk duan të tërhiqen, duke luftuar kundër politikës së madhë perëndimore që po kërkon të rikthejë Arbërinë. Por, çfarë na duhet të bëjmë?

ll.

Na i ka thënë poeti kombëtar shumë saktë:

Asnji punë s’na shkon për s’marit.

Se, sa nisim nji pune t’re,

Të parët që e prishim, jemi ne!

Gjergj Fishta

Më saktë nuk ka ku shkon.

Ja pra, tani kemi “nis nji punë të re”, një inisiativë perëndimore për ribashkimin historik të Arbërisë, që po duan të na i prishin ata që e kanë prishur ngaherë: sunduesit e korruptuar dhe të shiturit në Shqipëri.

Por e kanë kot. Reforma e nisur tani ka marrë karakter të plotë perëndimor, dhe drejtohet nga forca e politikës amerikane. Dhe shqiptarët duhet të kujtohen, se, kur kemi humbur territoret e Arbërisë, 2/3 e politikës perëndimore i kemi pasur kundër. Sot, në mbështetje të politikës amerikane dhe asaj gjermane, njëqind përqind e politikës perëndimore janë me shqiptarët në Ballkanin Perëndimor, dhe rikthimi i Arbërisë është çështje kohe. Dhe Kjo politikë amerikane do të shkojë deri në fund, dhe shumë shpejt. Pse, pasioni i kancelares gjermane Merkel për mosprekjen e territoreve të Kosovës, ishte një kërkesë e izoluar? Jo, ajo ka të bëjë më bashkimin e Arbërisë.

E shikoni sesa histori të hidhur kemi? Ka tre vjet që krerët e Shqipërisë nuk lejojnë zhvillimin për bashkimin e Arbërisë historike, dhe po luftojnë me çdo mjet kundër Shqipërisë, pasi e kanë vjedhur dhe e kanë zhveshur atë.

Por, tani, është krimi i tyre korruptiv që po iu sillet netëve si hija e Bankos.

lll.

Jam i sigurt kur them se individëve të korrupsionit shqiptar ka një vit që iu shfaqet netëve hija e Bankos. E ndiejnë që janë të pashpresë. Dhe kjo i hodhi në sulm për të destabilizuar Shqipërinë. Por dështuan si pasojë e forcës që politika amerikane ushtroi kundër tyre.

Prandaj tani gjithçka po shkon sipas skemës së politikës amerikane. Ajo që bie në sy është fakti që politika amerikane dhe politika gjermane janë në unison për qëndrimin kundrejt botës shqiptare në Ballkanin Perëndimor. Por, deri tani, të dyja këto politika kanë gjetur pengesë te lidërshipi politik shqiptar, të të gjithë të korruptuarit të cilët do të jenë objekt i reformës antikorrupsion në Shqipëri.

Por një gjë është e sigurt: shumë shpejt këta do të ikin nëpër proceset e tyre penale. Nuk kanë më asnjë shpresë. Rreptësia me të cilën i goditi dhe po i godet politika amerikane të korruotuarit e Shqipërisë tregon hapur që Reforma në Drejtësi në Shqipëri do të jetë drastike.

Reforma antikorrupsion, që e ka qëndrën e vet të Reforma në Drejtësi, tani është e strukturuar plotësisht. Sot u mbyll i gjithë kuadri ligjor, dhe ajo që do të kërkohet, sigurisht duhet të jetë vëmëndje e plotë e opinionit publik ndaj kësaj Reforme, sepse te kjo Reformë është mbështjellë dhe jeton e gjithë e ardhmja moderne dhe në zhvillim e Shqipërisë. Të kjo reformë e përfunduar me sukses qëndron vetë ngritja e personalitetit të shtetit shqiptar dhe e dinjitetit kombëtar, i cili tani është krejt e krejt i nëpërkëmbur, nëpërkëmbje kjo që iu ka bërë shumë dëm shqiptarëve.