Gjashtë media në vend, i kërkojnë Autoritetit të Mediave Audiovizive, që të urdhëroj TV Klan, ABC News dhe Shijak TV, fikjen e transmetimeve analoge. Në datën 1 tetor, AMA mbylli transmetimet analoge për qarkun e Tiranës dhe të Durrësit. Të gjitha kanalet televizive që transmetojnë në këto qaraqe, duhet të kalonin në transmetime dixhitale, pra qytetarët mund t`i shohin vetëm duke u pajisur me dekodera DVB/T2.
Megjithatë, nëse News 24, Vizion Plus, OraNews, Ora HD, Report Tv dhe Top Channel, respektuan vendimin e AMA-s për kalimin në transmetime dixhitale, TV Klan, ABC News dhe Shijak TV vijojnë ende transmetimet analoge. Kjo është arsyeja, që gjashtë media në kryeqytet me anë të një ankese “urgjent”, i kërkojnë këtij institucioni që tre mediat të fikin transmetimet analoge.
“Konstatohet me shqetësim, ashtu edhe si ju jeni në dijëni nga mbikëqyrja e OSHMA-ve në treg se operatorë të tjerë si Klan, Klan Plus, ABC News, Shijak TV etj nuk kanë respektuar këtë vendim dhe vazhdojnë të transmetojnë përveç në dixhitale edhe në sinjal analog në qarqet Tiranë dhe Durrës. Ky transmetim po bëhet në kundërshtim me vendimin tuaj, dhe për më tepër, ka krijuar pabarazi dhe deformim të konkurencës në treg” thuhet në letrën dërguar AMA-s.
Më tej, mediat shtojnë: “Kërkojmë nga strukturat e AMA-s që të ndërmarrin masat e duhura operacionale dhe ligjore, për të detyruar këta operatorë të zbatojnë ligjin dhe të mos prishin ekuilibrat e tregut kaq sensibël si ai i mediave, duke mos u bërë palë me shkaktuesit e shkeljeve” përfundon letra e operatorët televizive, që e kanë respektuar ligjin për fikjen e sinjal analog.
