Kryeministri Edi Rama zhvilloi një takim me operatorët e biznesit ushqimor, ku theksoi se siguria ushqimore është një nga sfidat më të vështira dhe më komplekse të procesit të anëtarësimit në Bashkimin Europian.
Rama u shpreh se ky proces nuk lidhet thjesht me detyra të kërkuara nga Brukseli, por me një “bagazh të pazëvendësueshëm dijeje” që vendi ynë duhet ta përvetësojë për të ndërtuar shtetin dhe për të garantuar standardet e BE-së në interes të qytetarëve.
“Proceset po zhvillohen në kuadër të negociatave me BE dhe ky proces ka një rëndësi të posaçme sepse lidhet me sfidën më të vështirë dhe më komplekse të të gjithë proceseve të anëtarësimit. Sfida e sigurisë ushqimore.
Në këtë aspekt del rëndësia madhore që ka për vendin tonë dhe shoqërinë tonë dhe për të ardhmen procesi i anëtarësimit në BE, të cilin shumëkush e ngatërron, që lidhet me detyra që ne duhet t’i plotësojmë për hir të të tjerëve se na i kërkon Brukseli. Ky proces lidhet me një bagazh të pazëvendësueshëm dijeje që ne duhet ta importojmë nga BE në vendin tonë për të ndërtuar shtetin në çdo drejtim për të implementuar standardet e BE dhe në interes të vetë qytetarëve tanë. Pa BE, reformat dhe dijet që vijnë nga ky proces i anëtarësimit, ne do ta kishim të pamundur të arrinim ato standarde sigurie dhe garancie për zhvillim dhe prosperitet të vendit tonë”, tha Rama.
Kryeministri tha se nëse 900 subjektet ushqimore që operojnë në vendin tonë rrezikojnë mbylljen apo përjashtimin nga tregu që ditën e parë të anëtarësimit të vendit nëse nuk përmbushin standardet e BE-së.
“BE ka sjellë një përfaqësi ekspertësh që kanë parë pikat e prodhimit, grumbullimit dhe aktivitete që lidhen me produkte shtazore dhe nënproduktet e tyre dhe kanë lënë një sërë detyrash të cilat do të duhet të ndërveprojmë me 900 subjekte që janë në vend dhe që kanë rrezikun shumë të qartë të mbylljes ose përjashtimit nga tregu që nga dita e parë e anëtarësimit”, tha ai.
Rama theksoi se informaliteti në sigurinë ushqimore mbetet një problem i përditshëm, ndaj është vënë theksi tek jetësimi i ligjit të ri për inspektoriatet dhe reformimi i Agjencisë Kombëtare të Ushqimit. Ai shtoi se Instituti i Sigurisë Ushqimore dhe Veterinare dhe AKU ka nevojë për mbështetje dhe binjakëzim me institucionet e BE-së, për të marrë eksperiencën e tyre.
“Informaliteti në sigurinë ushqimore është një problem që e përballemi çdo ditë. Ne i kemi kushtuar një vëmendje të veçantë procesit të jetësimit të ligjit të ri për inspektoriatet dhe AKU që i janë futur një procesi reformimi nga themeli.
Detyrat e tyre janë shumë të qarta, zhvillimi i këtyre institucioneve dhe ndërtimi i një kulture kontrollesh zyrtare në bazë risku të harmonizuara dhe të monitoruara nga qendra për t’i dhënë fund njëherë e mirë traditës së vjetër dhe të shëmtuar të kontrolleve të befasishme të iniciuara nga vetë inspektorët.
Sot kemi një institut të sigurisë ushqimore dhe veterinare që kërkon mbështetje, zgjerim dhe rritje të kapaciteteve dhe t’i kërkojmë BE që të na mbështesë me binjakëzim me institucionet e tyre për të marrë eksperiencën.
Po zhvillohen bisedime në këtë drejtim dhe së shpejti do të kemi qoftë një binjakëzim të AKU qoftë të institutit të sigurisë ushqimore dhe veterinar”, shtoi Rama.