GJKKO ka shpallur të pafajshëm për akuzën e korrupsionit pasiv Roven Zekën, ish-shef i Qarkullimit Rrugor në Tiranë, pasi nuk u provua se ka kryer veprën penale.
Me këtë vendim, gjykata ka vendosur edhe heqjen e masës së “arrestit të shtëpisë” ndaj tij.
Ish-shefi i hetimit të aksidenteve në Tiranë, Sokol Novaku, është dënuar me 3 vite burg ndërsa me gjykim të shkurtuar, dënimi i është ulur në 2 vite dhe i është pezulluar, duke u vendosur në shërbim prove.
Ndërkohë, oficeri Edison Tabaku është dënuar me 3 vite burg, por në gjykim të shkurtuar dënimi i është ulur në 2 vite dhe është vendosur gjithashtu në shërbim prove.
Edhe për të pandehurin Bledi Belba, i dyshuar dhe i akuzuar si i përfshirë në skemën e korrupsionit, dënimi me 1 vit e 6 muaj burg është pezulluar dhe është konvertuar në shërbim prove.
Ergest Vrioni është dënuar me 1 vit e 6 muaj burg, ndërsa në gjykim të shkurtuar dënimi i është ulur në 1 vit. Dënimi është konvertuar në shërbim prove për 2 vite.
Roven Zeka, ish-shefi i Policisë Rrugore në Tiranë, i emëruar në këtë detyrë rreth dhjetorit 2024, u arrestua më 19 prill 2025 me urdhër të SPAK.
Sipas akuzave të ngritura nga SPAK, Zeka dyshohej se së bashku me dy zyrtarët e tjerë të policisë Novaku dhe Tabaku të kishin marrë ryshfet nga një grua e përfshirë në një aksident, me qëllim që çështja të mos referohej në prokurori ose të manipuloheshin provat dhe hetimi i aksidentit.