Administrata Trump po përjashton disa aleatë të rëndësishëm nga një takim të anëtarëve të NATO-s muajin e ardhshëm, pas kërcënimeve të mëparshme për të vendosur një “listë të të mirëve dhe të këqijve” ndaj qeverive që kanë dalë kundër prioriteteve të presidentit, raporton “Politico”.
Takimi i planifikuar në Poloni është në thelb një grup pune i përqendruar te e ardhmja e NATO-s, sipas gjashtë diplomatëve të njohur me përgatitjet.
Por shumë prej vendeve që nuk kanë marrë ftesë, si Mbretëria e Bashkuar, Franca dhe vendet baltike, janë ndër shpenzuesit e mëdhenj për mbrojtjen dhe luajnë role kyçe në aleancë, duke bërë që diplomatët e tyre të pyesin se përse po lihen jashtë.
Ata ngrenë pikëpyetje nëse administrata po favorizon disa vende, në një mënyrë që mund të përçajë më tej një aleancë që tashmë po përballet me agresionin në rritje të Rusisë dhe rezervat e pakësuara të armëve.
“Ne po bëjmë gjithçka që po na kërkohet”, tha një zyrtar i një vendi aleat që është përjashtuar nga takimi. “Po përpiqemi të kuptojmë se cilat janë kriteret dhe cili është qëllimi i këtyre takimeve. Deri tani, nuk na është përcjellë shumë informacion.”
Shtëpia e Bardhë nuk iu përgjigj kërkesës për koment, ndërsa Pentagoni refuzoi të komentojë. Presidenti Donald Trump dhe bashkëpunëtorët e tij të ngushtë kanë kritikuar vazhdimisht NATO-n që prej rikthimit në pushtet, për çështje që variojnë nga refuzimi i disa vendeve për të mbështetur luftën në Iran, deri te dështimi i disa shteteve për të shpenzuar 5% të PBB-së për mbrojtjen.