Real Madrid ka fituar 3-1 në shtëpi kundër Sociedad dhe ka arritur Barcelonën në kreun e renditjes, ku të dy skuadrat janë në kuotën e 28 pikëve. Ndeshja nuk ka nisur mirë për vendasit që janë ndëshkuar pas vetëm 2 minutash lojë nga Willian Jose, i cili ka përfituar nga një gafë e Sergio Ramos.
Reagimi i madrilenëve ka ardhur në minutën e 37-të me Benzema. Dy minuta pas fillimit të pjesës së dytë ka ardhur përmbysja e vendasve. Goli është shënuar nga Valverde, i cili është ndihmuar edhe nga një devijim. Skuadra e Zidane ka siguruar tri pikët në të 74-ën me një gol të bukur të Modric. Gjithashtu, kroati ka dhënë dy asis në këtë takim, gjë që nuk e kishte bërë kurrë më parë në karrierën e tij me Real Madrid.
Ndërsa me golin në këtë ndeshje, Benzema arrin në kuotën e 25 golave. Vetëm Messi (29) dhe Lewandowski (28) kanë shënuar më shumë se francezi në pesë kampionatet kryesore të Europës në 2019-ën (25 gola për Benzema, po aq sa Mbappe).