Kreu i qeverisë, Edi Rama është nisur për një vizitë zyrtare në Gjermani, ku do të takohet me kancelaren Merkel para konferencës së donatorëve për pasojat tragjike të tërmetit të 26 nëntorit. Udhëtimin për në Gjermani e ka bërë publik vetë Rama me anë të postimit të një fotoje në një nga avionët me të cilin po udhëton për në Gjermani.
Në një reagim në rrjetet sociale, Rama shkruan se është nisur për në Berlin dhe do takohet me Kancelaren Angela Merkel, për të biseduar me të për Konferencën e Donatorëve.
“Për në Berlin për takimin me Kancelaren Merkel, enkas për Programin e Rindërtimit në vigjilje të Konferencës së Donatorëve, që do të mbahet në Bruksel më 17 shkurt ”, shkruan Rama. Po ashtu, kreu i qeverisë pritet të diskutojë me Merkel dhe mbi çështjen e negociatave pas vendimit për mos hapjen e tyre në tetor të vitit që lamë pas.