Presidenti Meta, prej disa ditësh ka nisur pushimet në Brezovicë, ku duket se po mbledh forcat për betejën e radhës kundër mazhorancës. Duke marrë shembull nga shprehja e vjetër “një mëndje e shëndoshë në trup të shëndoshë”, kreu i shtetit ka marrë të gjitha masat për të larguar stresin e verës dhe për t’u rikthyer fuqishëm në sezonin e ri, ku gjatë kësaj kohe duket se po kujdeset më së shumti për shëndetin e tij.
Të martën ai e nisi ditën duke mbledhur boronica, ushqim i shëndetshëm dhe duke bërë not në Liqenin e Jazhincës, ndërsa të mërkurën ka zbuluar kosin e Prevallës, që shkon shumë me boronica për një mëngjes të shëndetshëm. Pas kujdesit për mëngjesit, Meta duket më i fuqishëm dhe ka ngjitur malet nën tingujt e bukur të “Eye of the tiger” (Syri i Tigrit), një melodi shumë e njohur për publikun, kolonë zanore e filmit të famshëm “Rocky Balboa”. Veçse ndryshe nga Rocky, Meta ka marrë dhe dy bastunë për të ndihmuar veten në ngjitjen malore. Ashtu si Stallone, protagonisti i këtij filmi, Meta duket se do i vijë i përgatitur mirë për duelin e radhës me kundërshtarin e tij, Edi Rama.
