Me mijëra besimtarë shqiptarë janë mbledhur mëngjesin e të dielës në sheshin “Skënderbej” për t’u falur për namazin e Kurban Bajramit. Kjo festohet nga mijëra besimtarë mysliman në të gjithë botën dhe njihet ndryshe si “festa e flijimit”.
Nga sheshi “Skënderbej” , kryetari i Komunitetit Mysliman të Shqipërisë, Bujar Spahiu bëri thirrje për më shumë paqe dhe harmoni, dhe devotshmëri ndaj Allahut. Spahiu u shpreh se simbolika e kësaj dite është kurbani, si shenjë mirënjohje ndaj Zotit.
“Kurban Bajrami është dita ku ne i shërojmë plagët që i kemi shkaktuar njëri-tjetrit. T’i shohim të gjithë njerëzit me sytë e dashurisë. Allahut i intereson devotshmëria jonë. Te Allahu nuk arrin as mishi dhe as gjaku i Kurbanit, por bindja ndaj tij. Sot në këtë ditë besimi Bajrami. Dëshmia e sakrificës na bën që ti jemi Zotit mirënjohës. Kjo na nxit të jemi gjithmonë të gatshëm dhe të bëjmë sakrifica për fe dhe atdhe. Kurbani do të thotë afrim të njeriut me krijuesin. Njerëzit nuk duhet t’i ndërpresin shpresat te Allahu”, tha Spahiu.
Simbolika e Kurban Bajramit është prerja e kurbanit, riti që nis që nga periudha e Profetit Abraham dhe është një nga rregullat e Islamit. Para festës së Kurban Bajramit, në Mekë zhvillohet pelegrinazhi i përvitshëm i Haxhit, ku miliona myslimanë nga e gjithë bota marrin pjesë.
