Gjermania votoi pro hapjes së negociatave me Shqipërinë. Përmes një rezolute që mori votat “pro” nga CDU/CSU, Gjermania vërtetoi se të gjitha kushtet e kërkuara nga Shqipëria për hapjen e negociatave janë plotësuar. Por për zëvendëskryetarin e grupit parlamentar të CDU/CSU, Johann David Wadephul ky nuk është një lajm i mirë, pasi tregon pikërisht dështimin e tij.
Në një deklaratë të tij më 30 maj, para marrjes së vendimit nga BE në muajin qershor për shtyrjen e vendimit në tetor, Wadephul doli kundër Shqipërisë duke deklaruar se ajo nuk ka plotësuar asnjë kusht për hapjen e tyre dhe kritikoi sistemin gjyqësor që nuk është funksional. “ Një analizë fillestare tregon se Shqipëria deri më tani nuk ka arritur të përmbushë asnjë nga kushtet për hapjen e negociatave për anëtarësim, siç u tha nga ministrat e jashtëm të BE më 26 qershor 2018. Ende nuk ka sistem gjyqësor funksional. As Gjykata Kushtetuese as Gjykata Supreme nuk funksionojnë”, tha Wadephul
Miratimi i rezolutës pro hapjes së tyre nga vetë grupi parlamentar i Wadephul, tregon se ai dështoi me parashikimet e tij dhe se Shqipëria i ka plotësuar të gjitha kushtet për hapjen e tyre. Rënia e skepticizmit gjerman erdhi pikërisht nga përmbushja e kërkesave nga ana e Shqipërisë dhe reforma në drejtësi. Kushtet e reja që Gjermania i ka vendosur Shqipërisë nuk janë për negociatat por për kapitujt që do të pasojnë me hapjen e tyre.
Në lidhje me pakënaqësitë e Wadephul për sistemin gjyqësor, Reforma në Drejtësi është një ndër reformat më të vlerësuara nga Bashkimi Europian dhe se po jep efektet e saj të para me vettingun duke spastruar nga drejtësia gjyqtarët dhe prokurorët e korruptuar. / Real Story
