Masat ajrore që vijnë nga Afrika e Veriut kanë bërë që Shqipëria të përfshihet nga një valë temperaturash tejet të larta. Gjatë të dielës është regjistruar temperatura më e lartë në qytetin e Elbasanit me 41.5°C por që ndjesia e vërtetë ishte disa gradë më e lartë.
Gjithashtu temperatura të larta termometri shënoi edhe në vende të tjera si Gjirokastër 40.4°C si dhe Berat e Tiranë me 38.0°C.
Sipas Shërbimit Meteorologjik Ushtarak edhe gjatë ditës së hënë por edhe në ditët në vijim, vendi do të vazhdojë të karakterizohet nga temperatura të larta.
Pra e hëna (dita e sotme) parashikohet të jetë një tjetër ditë e nxehtë me temperatura të larta (në vlerat e mesditës 40-42°C) ndërsa me kalimin e ditëve pritet tërheqja e masat ajrore me origjinë nga Afrika e Veriut me temperaturat e mesditës të cilat do të zbresin në vlerat e tyre normale për periudhën në të cilën ndodhemi.
Gjatë ditës së mërkurë dhe të enjte pritet depërtimi i masave ajrore relativisht të paqëndrueshme me origjinë perëndimore. Moti do të jetë kryesisht i kthjellët, por do të ketë edhe prezencë të vranësirave kalimtare shoqëruar me reshje shiu në formë shtrëngatash (dita e mërkurë) në zonën e veriut. Dita e enjte do të ketë vranësira kalimtare të cilat do të shoqërohen me reshje shiu të izoluara.