Ministri serb i Tregtisë, Rasim Ljaliç ka deklaruar se për shkak të vendojes së taksës mbi mallrat serbe nga qeveria e Kosovës, Serbia ka humbur jo pak por 281 milionë euro nga muaji nëntor deri në gusht të këtij viti.
Në një prononcim për televizionin shtetëror serb (RTS), ministri serb tha se humbja e parave ka ardhur si pamundësi e eksportit të mallrave në Kosovë.
“Ne nuk kemi shpresë së në Kosovë do të flitet për heqje të taksës, pasi të gjithë po garojnë duke prezantuar taksën si ide të vetën dhe po përdoret si fushatë për të mbledhur pikë politike”, deklaroi ministri serb.
Ministri serb i tregtisë, Ljajiç deklaroi se është më mirë që Serbia nuk ka marrë ndonjë kundërmasë ndaj Kosovës, pasi sipas tij kështu ka fituar politikisht.
Ljajiç ka thënë se nëse vazhdon kjo situatë humbjet do të vazhdojnë të jenë edhe më të mëdha.
“Këto janë humbje direkte financiare, por dëmet do të jenë edhe më të mëdha sepse prodhuesit tanë ndoshta do ta humbin atë treg”, deklaroi Ljajiç.
Këtë situatë duket se e kanë shfrytëzuar më së miri shtetet e tjera të Ballanit. Greqia në maj ka rritur eksportin në Kosovë tri herë e gjysmë. Hungaria, Sllovenia, Bullgaria dhe Kroacia më shumë se dy herë e gjysmë, kurse Maqedonia e Veriut për 50 për qind. Taksa prej 100 për qind ndaj mallrave serbe është vendosur më 21 nëntor të vitit të kaluar nga Qeveria e Kosovës si kusht për njohjen e pavarësisë së Kosovës nga ana e Serbisë.