Pallati 6-katësh në zonën e Astirit është shembur me shpërthim të kontrolluar nga IKMT duke i hapur kështu rrugë ndërtimit të projektit të “Unazës së Madhe”. Shpërthimi i kontrolluar ndodhi nga ekspertët e IKMT, të cilët përdorën plot 10 kilogramë eksploziv dhe hapën 250 vrima në kolonat e pallatit 6-katësh për shembjen e tij. Shpërthimi ndodhi në orën 15:30, ndërsa pallati brenda pak sekondave pushoi së ekzistuari duke lënë pas vetëm shtëllunga të mëdha tymi.
![](https://realstory.al/wp-content/uploads/2020/01/e6495458-13a6-4b19-a51b-a9796d4f727a-1024x715.jpg)
Gjatë aksionit të IKMT nuk pati asnjë incident apo rezistencë të banorëve të Astirit. Forcat zjarrfikëse përmes hedhjes së ujit bënë të mundur lokalizmin e shtëllungave të tymit, ndërsa policia kishte vendosur më herët perimetrin e sigurisë për të mos rrezikuar asnjë qytetarë.
Një ditë më parë, IKMT shembi edhe 5 ndërtesa të tjera duke prishur kështu të gjitha ndërtesat që ishin pengesë për zbatimin e projektit të Unazës së Madhe.