Kryeministri Rama i ka kthyer përgjigje presidentit Meta dhe akuzave të tij për Reformën në Drejtësi. Rama shkruan të enjten se presidenti do ta marrë përgjigjen për reformën në drejtësi nga aleanca strategjike Shqipëri-SHBA-BE, aleancë të cilën Meta e cilësoi të martën si një grup i strukturuar që ka marrë peng Shqipërinë në përpjekje për të ndërtuar një shtet paralel.
“Sot duhet t’i mësojmë Presidentit të Republikës se Kuvendi i Shqipërisë është autoriteti më i lartë në këtë vend dhe kush guxon të pengojë Reformën në Drejtësi, do të marrë përgjigjen frontale të aleancës strategjike Shqipëri – SHBA – BE”, shkruan Rama të enjten, teksa publikon fjalën e kreut të grupit parlamentar Taulant Balla në Kuvend. Balla u shpreh se Meta duhet të lirojë zyrën urgjentisht.
Një ditë më herët, Presidenti Meta publikoi disa reagime që lidheshin me reformën në drejtësi ku akuzonte Ramën për kapjen e saj bashkë me ndërkombëtarët e Euraliusit. Reformën në drejtësi Meta e quan si Ramareforma, një timonier që s’ka frena, ndërsa ndërkombëtarë e Euraliusit i akuzonte për shkelje të kushtetutës dhe kompetencave të presidentit në emërimin e anëtarëve të Gjykatës së Lartë. I ndodhur në kushtet ku maxhoranca pritet të votojë në kuvend shkarkimin e tij dhe pa mbështetje ndërkombëtare, presidenti Meta kërkon emërimin e anëtarëve të Gjykatës së Lartë në prag të ikjes.
Reforma në Drejtësi ka dhënë rezultatet e para me vettingun në gjyqësor, gjë që është përshëndetur nga ndërkombëtarët. Por tani me ngritjen e strukturave të reja, siç janë SPAK dhe BKH do t’i vijë rradha edhe politikanëve. Ndaj dhe është kjo situatë e ndezur politike.
