Kryetari i bashkisë së Vaut të Dejës, Zef Hila shkarkohet nga detyra pas sulmeve të së enjtes në KZAZ-në nr. 6 në Bushat të Shkodrës.
Lajmi është bërë i ditur të premten nga Ministri i Brendshëm, Sandër Lleshaj i cili dënoi sulmet ndaj KZAZ-së dhe theksoi se policia do të garantojë zhvillimin në mbarë vendin të zgjedhjeve të 30 qershorit.
Ministri i Brendshëm akuzoi drejtuesit e opozitës për sulmin ndaj KZAZ-së.
“Zjarri i mbrëmshëm, djegia e materialeve zgjedhore dhe plagosja e tre punonjësve të Policisë së Shtetit, nga një grup sulmi, i përbërë kryesisht nga punonjës të Bashkisë së Vaut të Dejës është një shprehje shembullore e paramilitarizimit të një partie, që ka humbur jo vetëm arsyen, por tashme edhe pseudo-kauzën e saj.
Aq sa i ulët ishte sulmi ndaj shkollës, ku është vendosur KZAZ, po aq e neveritshme ishte tentativa e drejtuesve të opozitës për të larë duart nga aksioni kriminal i militantëve të tyre, duke u përpjekur si gjithmonë, që nga nxitës të agresionit të kthehen në viktima të tij!
Në mënyrë sa të paturpshme aq edhe qesharake, ata akuzuan Policinë se paska sulmuar dhe plagosur veten, nën drejtimin e Ministrit të Brendshëm dhe të Kryeministrit. Pra, sipas këtyre ‘haxhiqamilistëve’ të rikthyer në skenë pas 100 vitesh, punonjësit e bashkisë së Vaut të Dejës dhe familjarët e kryetarit të saj, paskan zbatuar urdhrat tona për dhunë.
Përpjekja e opozitës për të larë duart përpara qytetarëve shqiptarë dhe përpara partnerëve strategjikë të Shqipërisë, të cilët janë investuar për stabilitetin dhe demokracinë e vendit, tregon qartë se në çfarë gjendje të rënduar mendore dhe në çfarë katandisje të ulët morale janë sot drejtuesit e revolucionit imagjinar për pengmarrjen e zgjedhjeve”, tha Lleshaj.
Ai theksoi se “incidenti i mbrëmshëm nuk mund dhe nuk do të cenojë aspak integritetin e zgjedhjeve.
Zgjedhjet do të mbahen në të gjithë vendin, në pajtim të plotë me Kushtetutën, me Kodin Zgjedhor dhe legjislacionin e vendit, si edhe me mbështetjen e vendosur të partnerëve strategjikë të Shqipërisë”.
Ministri gjithashtu tha se kryetari i Vaut të Dejës do të shkarkohet nga detyra dhe të njëjtin fat do të kenë të gjithë ata që do të përdorin dhunën për të penguar zgjedhjet.
“Për arsye të një serie shkeljesh të rënda të detyrës dhe të ligjit, të cilat kulmuan mbrëmë me sulmin ndaj KZAZ nr. 6, të realizuar nga punonjës të Bashkisë së Vaut të Dejës, Kryetari i saj do të shkarkohet sot nga detyra me propozim të Ministrit të Brendshëm.
Të njëjtin fat do të ketë cilido, që autoritetin e Kryebashkiakut do ta përdorë për të penguar zgjedhjet, duke i kthyer apo lejuar punonjësit e Bashkisë të sillen si forca të dhunshme paramilitare”, tha ministri i Brendshëm.
Ai u bëri thirrje drejtuesve të bashkive që të garantojnë kushtet optimale për qytetarët e tyre që të mund të ushtrojnë të drejtën për të zgjedhur.
“Të mos merren me veprimtari penguese dhe me bravat e dyerve të shkollave të përcaktuara tashmë si Qendra Votimi, sepse kështu bëhen jo vetëm qesharakë, por edhe subjekt i Kodit Penal të Republikës së Shqipërisë.
30 qershori është data e zgjedhjeve dhe zgjedhjet janë të popullit shqiptar, as të partive, as të bashkive!”, përfundoi ministri Lleshaj.
Gjatë ditës të premtes, policia e shtetit njoftoi se ka arrestuar 14 persona për sulmin në KZAZ-në e Bushatit, ndërkohë që 9 të tjerë janë shpallur në kërkim.
Policia njofton gjithashtu se është arrestuar Alfred Hila, vëllai i kryetarit të bashkisë së Vaut të Dejës. Nga sulmet me molotov në Bushat mbetën të plagosur 3 punonjës policie.