Presidenti Meta nuk ndalet nga sulmet, duke i marrë me radhë të gjithë, pasi vetëm brenda pak orësh ka bërë reagimin e tretë publik, ku dy herë ka sulmuar kryeministrin Rama, ndërsa herën e tretë i është vërsulur ambasadorit të BE, Soreca.
Kreu i shtetit, në reagimin e tij të ashpër i drejton dhjetë pyetje Sorecës, vetëm për krizën politike, ku në qëndrimin e tij kërkon të vendosë para përgjegjësisë ambasadorin që nuk e ka mbështetur Metën në vendimet e tij për të anuluar zgjedhjet e 30 qershorit, ndërsa shfajësohet me qëndrimin e gjermanëve të Bashës, që sipas tij, theksuan rëndësinë e një date të re për zgjedhjet vendore, si domosdoshmëri për të ndihmuar çeljen e negociatave.
Madje, ai nuk ndalet me kaq, por paralajmëron se më vonë, do i shkruajë po publikisht ambasadorit të BE edhe për reformën në drejtësi, atë që me qëndrimet e tij këto ditë, kreu i shtetit duket se ka shqetësimin më të madh, ndërsa shton se shqetësimi i tij për delegacionin e BE gjatë gjithë këtyre viteve ka qenë se nuk ka bërë përpjekjet më të mira për të nxitur një dialog real midis palëve.
“Për pyetjet e tjera për Reformën në Drejtësi dhe Gjykatën Kushtetuese do vijoj më vonë, por dialogu, temat, mënyrat dhe objektivat e tij të përcaktuara qartë janë prioriteti numër një për momentin, sipas mendimit tim”, deklaron Meta në qëndrimin publik, ndërsa me ironi poston për ambasadorin e BE edhe qëndrimin e Wadephul. “Përshëndetjet më të përzemërta dhe bashkëngjitur po ju kujtoj publikisht dhe qëndrimin zyrtar të Zv/kryetarit të Grupit parlamentar të CDU/CSU në Bundestagun gjerman, z.Johann Wadephul”, deklaroi Meta.
Vetëm pak minuta para shpërthimit të Metës ndaj Sorecës, edhe ish ministri i LSI, Ylli Manjani reagoi ndaj ambasadorit të BE, duke deklaruar “që ta mbledhë mendjen Sorecca e të tjerët, Shqipëria ka nevojë për rivendosje të autoritetit Kushtetues”, ndërsa kujtojmë se herët e fundit Meta i ka mbështetur publikisht edhe qëndrimet e ish zyrtarit të partisë që drejtohej prej tij.
Reagimi i plotë i Metës për Ambasadorin Soreca
PYETJE PUBLIKE PËR AMBASADORIN SORECA
Presidenti i Republikës përshëndet nxehtësisht thirrjet e sinqerta të ambasadorit Soreca për “pjekuri politike dhe për angazhimin urgjentisht në një dialog politik për të kapërcyer situatën aktuale”.
Me këtë rast Presidenti ka disa pyetje publike:
A ishit ju realisht për nxitjen e dialogut mes palëve më parë z.Ambasador?
A morët ju ndonjë nismë konkrete për vendosjen e këtij dialogu mes palëve?
A i kërkuat ju mbështetjen Presidentit për dialog, me qëllim që t’ia kursenim shfaqjen e shëmtuar të 30 qershorit Shqipërisë dhe së ardhmes së saj europiane?
A e dini ju që Presidenti mori një nismë për anulimin e zgjedhjeve me qëllim vendosjen e dialogut mes palëve?
Përse nuk e mbështetët ju Presidentin në këtë iniciativë publikisht?
A e dini ju që në 24 maj 2019 përfaqësuesit zyrtarë të grupit kryesor në Bundestag, deputetët Wadephul dhe Schmidt, përmes një qëndrimi zyrtar kërkuan vendosjen urgjent të dialogut për zgjidhjen e krizës, madje u ofruan për moderimin e këtij dialogu me qëllimin e mirë për të ndihmuar në çeljen e negociatave të anëtarësimit me BE-në dhe theksuan edhe rëndësinë e një date të re për zgjedhjet vendore, që të ishin demokratike dhe gjithëpërfshirëse, si domosdoshmëri për të ndihmuar çeljen e negociatave?
A e dini ju që Presidenti menjëherë reagoi duke mbështetur këtë nismë dhe tregoi vullnetin e tij për të dekretuar një datë të re të zgjedhjeve, pas dakordësimit të palëve?
A e dini ju që Presidenti i Republikës ka dekretuar datën 13 tetor 2019, për zhvillimin e zgjedhjeve lokale gjithëpërfshirëse? Çfarë qëndrimi keni ju?
A e keni sqaruar z.Rama se zgjedhjet pa opozitën nuk plotësojnë kriteret e Kopenhagës, shkelin parimet e Marrëveshjes së Stabilizim-Asociimit dhe pamundësojnë çeljen e negociatave të anëtarësimit në tetor 2019?
A e dini ju që po dje Presidenti ka theksuar, duke pasur parasysh rëndimin e krizës politike në vend, që 13 tetori 2019 të jetë jo vetëm data e zgjedhjeve lokale, por edhe e atyre parlamentare dhe presidenciale, për t’i dhënë fund njëherë e mirë kësaj krize të thellë dhe të gjithanshme të përfaqësimit në vend?
Ju e dini shumë mirë, që ditën e parë që keni mbërritur këtu, se një nga shqetësimet dhe vërejtjet e mia për Delegacionin e BE gjatë gjithë këtyre viteve ka qenë se nuk ka bërë përpjekjet më të mira për të nxitur një dialog real midis palëve.
Për pyetjet e tjera për Reformën në Drejtësi dhe Gjykatën Kushtetuese do vijoj më vonë, por dialogu, temat, mënyrat dhe objektivat e tij të përcaktuara qartë janë prioriteti numër një për momentin, sipas mendimit tim.
Përshëndetjet më të përzemërta dhe bashkëngjitur po ju kujtoj publikisht dhe qëndrimin zyrtar të Zv/kryetarit të Grupit parlamentar të CDU/CSU në Bundestagun gjerman, z.Johann Wadephul.
DEKLARATA E ZV/KRYETARIT TË GRUPIT PARLAMENTAR CDU / CSU, Z.JOHANN DAVID WADEPHUL:
“Pas vendimit të Presidentit, ekziston një situatë e re politike dhe të gjitha palët tani duhet të kërkojnë rrugën e pajtimit, duke përfshirë zgjedhjet lokale demokratike me kandidatë potencialë të shumëfishtë, që do të thotë se TË GJITHË DUHET TË PRANOJNË VENDIMIN E PRESIDENTIT dhe pastaj marrin pjesë në procesin politik. GJITHÇKA TJETËR DO TË JETË JO EUROPIANE dhe do të shtonte dyshimet në mënyrë të panevojshme sa i përket dobishmërisë së procesit të aderimit, duke krijuar kështu një bazë të re për bashkëjetesën paqësore të konkurrentëve politikë.
Në Europë, çdo qeveri duhet të pranojë një opozitë kritike, dhe çdo opozitë duhet të pranojë një qeveri efektive. Kjo është një bazë esenciale për një shtet po aq të qëndrueshëm dhe demokratik. NËSE SHQIPËRIA DËSHIRON TË SHKOJË NË KËTË RRUGË DREJT EUROPËS, SIGURISHT QË DO TË MARRË NDONJË MBËSHTETJE NGA GJERMANIA”.