Shkarkimi i Metës, Cutillo: Procedura sipas ligjit që të jetë e pakundërshtueshme

Shkarkimi i presidenti është një proces shumë delikat tha ambasadori i Italisë, Cutillo dhe për këtë nuk duhet ndërhyrë. Cutillo, në emicionin Real Story, tha se parlamenti ka bërë një akuzë ndaj Presidentit se bërë atentat ndaj Kushtetutës, dhe për këtë duhen ndjekur të gjitha ligjet dhe proceset sipas Kushtetutës. Megjithatë tha Cutillo, Kushtetuta italiane ka një nen që nuk lejon që kjo gjë të ndodhi. Ambasadori ka mohuar se po sugjeron ndryshime të Kushtetutës, por ka vlerësuar se duhet të ndiqen të gjitha parimet dhe normat e ligjit, që vendimi përfundimtar të jetë i pakundërshtueshëm.

“ Kushtetuta italiane ka njëlloj mjeti parandalues për të shmangur atë që po ndodhë aktualisht në Shqipëri. Është një nen i Kushtetutës, Neni 89 në veçanti, që thotë ‘të gjitha aktet e Presidentit të Republikës, që të jenë të vlefshme duhet të firmosen edhe nga Qeveria’. Nuk po sugjeroj që të ndryshohet Kushtetuta… Sigurisht bëhet fjalë për një proces shumë delikat, nuk duhet ndërhyrë. Parlamenti e ka mundësinë për të bërë një akuzë ndaj Presidentit. Në rastin tonë flitet për atentat ndaj Kushtetutës, pra jo vetëm shkelje të rënda të Kushtetutës. Por këtë ja lë juristëve ta analizojnë më mirë. Është një procedura që ne e quajmë demokratike, sepse është e parashikuar në Kushtetutë. Është një kundërpushtet i drejtë, por mënyra se si ushtrohet mendoj se askush nga jashtë nuk ka të drejtë të komentoj, i vetmi vëzhgim që më duket i panevojshëm, është që të ndiqen të gjitha parimet dhe normat e ligjit, që vendimi përfundimtar të jetë i pakundërshtueshëm.” – tha Cutillo për emisionin Real Story.

Në lidhje me pyetjen e gazetarit Sokol Balla se pse foli vetëm Rusa në mbrojtje të Presidentit dhe askush tjetër, Cutillo ka preferuar të mos jap një mendim duke thënë se për këtë duhet të ftojë ambasadorët rus për të sqaruar pozitën e tyre.

Cutillo për RealStory: Dialogu, përgjegjësi e palëve. Opozita të jetë e arsyeshme

Ambasadori i Italisë, Alberto Cutillo ka deklaruar se tashmë qeveria dhe opozita duhet të kalojnë në fazën dy, atë të dialogut. I ftuar në emisionin “Real Story” të gazetarit Sokol Balla, Cutillo tha se duhet të ketë përpjekje reale si nga qeveria ashtu edhe opozita për tu ulur në tryezën e dialogut. Qeveria tha Cutillo nuk duhet të rrijë vetëm në deklarata të përgjithshme disponibiliteti, por t’i propozojë opozitës një platformë për të rinisur përpjekjet dhe diskutimet mbi reformat e rëndësishme për vendin. Ambasadori italian, nuk la pa përmendur edhe opozitën duke thënë se tashmë ajo duhet të tregohet e përgjegjshme dhe e arsyeshme dhe të tregohet e vendosur për të negociuar.

“Pa favorizuar njërën palë ndaj tjetrës, mendoj se në këtë pikë, qeveria duhet të tregojë pjekuri për t`u hapur ndaj dialogut. Jo me deklarata të përgjithshme disponibiliteti, por duke i propozuar opozitës një platformë të saj për të rinisur një përpjekje kombëtare për reformat… Do t`i këshilloja opozitës të jetë e arsyeshme. Opozita ka bërë disa beteja ekstreme, sidomos për mënyrën se si janë realizuar. Nuk më takon mua të vlerësojë, nëse janë bërë mirë apo keq, por është një periudhë për t`u treguar të vendosur dhe për të negociuar. Unë mendoj se tani kemi mbërritur në fazën e dytë, natyrisht kjo do të varet shumë dhe nga qeveria.” – tha Cutillo

Ambasadori Cutillo gjithashtu kërkoi një tryezë të gjerë dhe reformiste për diskutimin e temave më të rëndësishme.

“Temat që duhet të diskutohet, disa mund të imagjinohen, sepse kanë qenë pjesë e diskutimeve prej muajsh. Flitet për Reformën Zgjedhore, që është shumë e rëndësishme, por unë do të preferoja një tavolinë sa më të gjerë. Kështu që duhet të shkojmë drejt një fryme reformiste. Gjithçka që duhet të reformohet në këtë vend, duhet të jetë e përbashkët. Pra duhet të gjejë qasjen e të gjitha forcave politike. Pastaj, diku mund të gjendet një marrëveshje e plotë, diku mund të ketë dhe mospërputhje, por është shumë e rëndësishme që të gjenden pikat e përbashkëta. Prandaj unë nuk do të doja të caktoja një axhendë të reformave, por dua të përsërisë se kemi një objektiv shumë të madh përpara, integrimin evropian dhe të gjitha hapat që kjo kërkon.” – tha Cutillo për emisionin “Real Story”

Si do të zgjidhet kriza politike? Ambasadori Cutillo i ftuar në “Real Story”, sonte në orën 21:00

Kriza politike në vend mbetet ende një temë e rëndësishme diskutimi për çdo shqiptar. Ndonëse palët kanë ulur tonet e rënduar të retorikës, që na ka shoqëruar prej shkurtit deri më 8 korrik, kur u mbajt protesta e fundit e opozitës, përsëri, problemi mbetet aty. Kriza nuk është zgjidhur, dhe në këtë rast, në dështimin e politikës për t`i dhënë fund këtij ngërçi, janë miqtë ndërkombëtar të cilët na vijnë në ndihmë.

Për këtë arsye, në studion e “Real Styry”, të gazetarit Sokol Balla, mbrëmjen e sotme në Vizion Plus, i ftuar do të jetë ambasadori i Italisë në Shqipëri, Alberto Cutillo. Kriza politike në vend, përgjegjësit për nisjen e saj, përgjegjësia e opozitës, qeverisë, presidentit dhe si mund të dilet prej krizës? Cilat janë opsionet që duhet të jenë mbi tavolinë? A ka një misionar ndërkombëtar për të zgjidhur këtë krizë?

Ndërkohë, në pjesën e dytë të emisionit, do të transmetohet një intervistë e filantropit George Soros, intervistë dhënë gazetarit Sokol Balla 14 vjet më parë, e cila do të ritransmetohet mbrëmjen e së hënës në “Real Story”. Në këtë intervistë, do të rikthehen dhe njëherë mesazhet e dhëna 14 vjet më parë, të cilat janë aktuale për Berishën, për Edi Ramën, për përfshirjen e tij në zhvillimet politike në vend. Të gjitha, këto, i ndiqni në orën 21:00 në “Real Story” në dhe në Realstory.al.

Ambasadori italian: Gati 20 milionë euro për projektet me Shqipërinë

Ambasadori italian Alberto Cutillo ka deklaruara se Italia është e gatshme të zhvillojë projekte dhe të mbështesë financiarisht qeverinë shqiptare në programe të ndryshme. Këto deklarata Cutillo i bëri pas inspektimit të qendrës së re shëndetësore në Vaun e Dejës, një investim prej 68 milion lekësh, ku një kontribut kryesor kishte edhe Italia.

“Kemi fondet për të nisur një program të ri mbështetje prej 20 milionë euro.” tha Cutolli, ndërsa shtoi se “qeveria italiane është duke pritur qeverinë shqiptare të jetë gati, në mënyrë që të hapim garën për projektet që do të mbështeten në të ardhmen.”

Cutillo paralajmëron Metën: Shtyrja e zgjedhjeve vetëm kur të ketë marrëveshje

Ambasadori italian, Alberto Cutillo është shprehur nga Shkodra ku ka zhvilluar një takim me të rinjtë, se “shtyrja e vazhdueshme e zgjedhjeve do të ishte një varr më i keq se gropa”. Ai ka zgjedhur kështu një shprehje popullore italiane për t’i dhënë përgjigje pyetjes nëse duhet të shtyhen zgjedhjet e 30 qershorit. Më tej, diplomati italian deklaroi se zgjedhjet në Shqipëri nuk mund të shtyhen pa pasur një marrëveshje dhe sigurisht që kjo do të sillte dhe ndryshimin e Kushtetutës.

“Është e qartë se zgjedhjet sikur ne i imagjinojmë apo janë zhvilluar, janë zgjedhje që të gjitha partitë politike që pretendojnë se kanë elektoratin e tyre, parti që kanë zë të shprehen dhe mbështetjen e zgjedhësve të tyre, prezantojnë listat dhe më pas kush merr më shumë vota është fitues. Në Shqipëri kemi mbërritur në një situatë komplekse ku disa parti që të paktën në dukje kanë mbështetje të fortë politike kanë vendosur të mos futen në zgjedhje. Në këtë pikë rregullat kanë devijuar dhe nuk mund të thuhet çfarë është më logjike, te zhvillohen zgjedhje apo te shtyhen çka do të sillte ndryshime në ligj dhe Kushtetutë. Ndryshimi i dytë mund te jetë gjetja e një akordi e një marrëveshje, por në dijeninë time deri tani nuk ka, prandaj të shtysh zgjedhjet pa arritur në një marrëveshje mund të sillte probleme më të mëdha pasi sjell ndryshimin e Kushtetutës, duke lejuar kështu shtyrje të vazhdueshme të zgjedhjeve dhe italianët e quajnë ‘një varr më të keq se gropa’ por nuk janë sugjerime që më takojnë mua t’i bëj”, tha ambasadori italian Cutillo.

Paralajmërimi i ambasadorit Cutillo ka shpjegim vetëm nëse i drejtohet një adrese: Presidentit të Republikës. Në bazë të Kushtetutës, kreu i shtetit mund të shtyjë datën e zgjedhjeve, “vetëm nëse palët bien dakord”. Pikërisht kësaj i referohet Cutillo kur flet për ndryshim date, pra vetëm me marrëveshje mes palëve. Po pse vjen ky paralajmërim i fortë i ambasadorit italian?!

Një burim pranë Presidentit të republikës i tha www.realstory.al se kreu i shtetit po mendon të nxjerrë një dekret të dyte pa pyetur mazhorancën.

Një vendim i tillë, ndërkohë që fushata për 30 qershorin ka filluar dhe në mungesë të Gjykatës Kushtetuese për ta kundërshtuar atë, do ta fuste vendin në një tjetër cikël të frikshëm krize. Mesa duket këtë po mundohen të parandalojnë ndërkombëtaret, me këtë mesazh të ambasadorit italian në vendin tonë, drejtuar vetëm një personi, Ilir Metës.

Ambasadori italian: Zgjedhjet janë legjitime, kriza brenda opozitës

“Zgjedhja për të mos marrë pjesë është një zgjedhje personale, që duhet respektuar, por që nuk i bën të pavlefshme këto zgjedhje.” Ky ishte mesazhi i Ambasadorit italian në Tiranë, Alberto Cutillo që dha gjatë një interviste në emisionin “Përballë” në RTSH. Cutillo tha se zgjedhjet e 30 qershorit janë legjitime dhe se pjesëmarrja në to është një zgjedhje personale, por gjithashtu bëri thirrje për opozitën e mbetur jashtë parlamentit dhe se ajo duhet të gjejë një rrugë brenda saj për të zgjidhur krizën në vend.

“Manifestimet e fundit kanë treguar se mund të manifestohet në mënyrë paqësore. Parlamenti sot ka një opozitë të re, që është legjitime, por e dimë të gjithë që opozita, në kuptimin e udhëheqësve kryesor të forcave të opozitës, është jashtë parlamentit. Duhet mbajtur një dialog i hapur me të gjithë. Opozita duhet të gjej në brendësi të saj zgjidhjet, të cilat i japin mundësinë e zgjidhjes së krizës. Për mua këto zgjedhje janë legjitime. Zgjedhja për të mos marrë pjesë është një zgjedhje personale, që duhet respektuar, por që nuk i bën të pavlefshme këto zgjedhje. Nga kjo situatë demokracia nuk del e ekzaltuar, por as e poshtëruar.’ – tha ambasadori Cutillo.

Ambasadori italian tha se kriza duhet të zgjidhet brenda opozitës, pasi aty lindi dhe u zhvillua. Të njëjtën gjë do të bënin edhe partitë e tjera në botë.

“Kjo është një krizë e ndërlikuar që ka lindur dhe zhvilluar në brendësi të opozitës dhe kësisoj i takon opozitës që ta zgjidhë. Besoj se në vende të tjera një krizë e tillë do të ishte administruar në brendësi të partive mbi bazën e rregullave të demokracisë së brendshme të partive, të cilat në Shqipëri janë disi të ndryshme. Partitë janë më të ngurta dhe kërkojnë t’i eksportojnë jashtë krizat, të cilat normalisht duhet të administrohen brenda tyre. Por besoj se në fund, partitë do të dinë të zgjedhin në interes të vendit. Ka diçka që nuk ecën në mekanizmin zgjedhor. Kjo mund të reformohet. Nëse nuk bëhet brenda 30 qershorit, të mos e kthejmë në një dramë”. – tha Cutillo