Aleatët në një mendje me Bashën: Në fillim kriza, pastaj reforma

Opozita e bashkuar ka preferuar të shprehet se “është në një mendje me Bashën” në lidhje me ftesën e kryeministrit Rama për të nisur një dialog me pjesëmarrjen e të gjitha partive politike për Reformën Zgjedhore. Pas një takimit të zhvilluar në selinë blu për më shumë se 60 minuta mes Bashës dhe aleatëve të tij, ku ndër të tjera është diskutuar edhe për dialogun për reformën zgjedhore, aleatët thanë shkurt se në fillim duhet të zgjidhet kriza. Pas përfundimit të takimit, ka qenë kryetarja e LSI Kryemadhi, por edhe kreu i PDIU-së, Shpëtim Idrizi, të cilët deklaruan se opoizta ndan të njëjtat qëndrime si Basha.

Kryemadhi është shprehur për mediat se opozita e bashkuar shumë shpejt do të bëjë publike Planin Kombëtar për të dalë nga kriza, ndërsa për ftesën për dialog përgjigjen e ka dhënë më herët Basha.

“Ajo çfarë zoti Basha deklaroi 3 orë më përpara është përsëritje e çdo gjëje pas një akordimi që kemi pasur nëpërmjet telefonatave të të gjithë bashkëkryetarët e Frontit Opozitar. Ne jo vetëm që nuk lëvizim asnjë presje nga qëndrimet tona, por do të vazhdojmë të ecim përpara me platformën që opozita ka gati për zgjidhjen e krizës. Jemi duke punuar grupet e punës për platformën, e sigurisht në tryezë nuk ulet vetëm një njeri, por janë të gjithë personalitetet, njerëzit me integritet dhe me vlera të të gjithë partive politike. Mos harroni se Fronti Opozitar tashmë është 85 përqind e shqiptarëve” ka thënë Kryemadhi.

Ndërsa Idrizi është shprehur se “Padyshim që ftesa për dialog ishte pjesë e diskutimeve dhe ajo që tha zoti Basha është qëndrimi i të gjithë opozitës”.

Ashtu si Basha edhe aleatë e tij vlerësojnë se Reforma Zgjedhore të bëhet në një moment të dytë, pas zgjidhjes së krizës. Më herët kreu i PD, Basha tha se Reforma Zgjedhore nuk ishte shkaktarja e krizës, prandaj para saj duhet të zgjidhet kriza përmes vullnetit politik. Ai gjithashtu kërkoi nga mazhoranca të mos tallet me tryezën e dialogut, duket emëruar kryetar të saj Damian Gjiknurin, të cilin demokratët e akuzojnë si një nga emrat e dalë nga përgjimet e Bild për dosjen 184 për shit-blerjen e votës. Kjo na lë në një situatë ku të gjithë ende pyesin “do pranojë apo jo opozita ftesën e Ramës?”

Paraditen e të mërkurës, Rama u drejtohej me një ftesë publike drejtuesve të partive të opozitës jo parlamentare të marrin pjesë në tryezën e dialogut për Reformën Zgjedhore. Një ftesë e të tillë pak më herët e kishte bërë edhe OSBE-ja, ku ftonte PD të ishte pjesë e tryezës së diskutimeve për Reformën Zgjedhore që do të mbahet më 25 shtator.

Nuk dihet se çfarë do të vendoset për tryezën e dialogut, pasi opozita është duke mbajtur një qëndrim shumë të paqartë. Megjithatë kryetari i grupit parlamente të PS, Taulant Balla ka theksuar disa herë se pavarësisht ftesë që i bëhet opozitës joparlamentare, reforma nuk do të mbetet peng i saj./ RealStory

Bashës i “dezertojnë” aleatët, Duka: Shkojmë në dialog me Ramën

Aleatët e Bashës janë duke “dezertuar” një e nga një në lidhje me qëndrimin e tyre për mbajtjen e zgjedhjeve më 13 tetor. Pas deklaratës së Fatmir Mediut se opozita duhet të ulet në dialog me Ramën për mbajtjen e zgjedhjeve, të njëjtën mendim ndan edhe Kryetari i Partisë Agrare Ambientaliste, Agron Duka.

Duka thekson se ai e njeh dekretin e Metës për 13 tetorin, por duhet edhe të jemi realist pasi mbajtja e tyre është një mision i pamundur. Ai madje shtoi se edhe nëse do të zhvilloheshin teknikisht do të ishte një turp i madh për vendin krijimi i një dualiteti pushtetesh.

“ Njoh dekretin e Presidentit për 13 tetorin, por mbajtja e zgjedhjeve është një mision i pamundur. Afati i fundit i regjistrimit është 4 gushti, për këtë arsye është thuajse e pamundur. Është vetëm retorikë boshe që të përdoret në këtë periudhë vakumi lajmesh për të thënë kush është dhe kush nuk është dakord me 13 Tetorin. Por, edhe nëse teknikisht do të zhvilloheshin dhe do të krijohej një dualitet pushtetesh, do të ishte turp i madh”, tha Duka për A2 CNN.

Duka shesh si zgjidhje të kësaj krizë politike vetëm dialogun me Ramën dhe krijimin një e qeverie tranzitore për të zhvilluar zgjedhje gjithëpërfshirëse. Ashtu si Meta, Duka mendon se ndërkombëtarët duhet të ndërhyjnë për zgjidhjen e kësaj situate dhe uljen e palëve në dialog.

“Në negociata unë ulem edhe me Djallin, nuk e kam problem fare. E rëndësishme është që të kemi korrekt me atë që kemi komunikuar me publikun. Nuk mund të shkojmë në zgjedhje me Edi Ramën kryeministër. Ndaj, nëse ne arrijmë marrëveshje me mazhorancën, ku në tavolinë mund të jetë edhe Edi Rama si kryetar i PS-së, për të kaluar në fazën e krijimit të qeverisë tranzitore, natyrisht që ulemi. Thirrja e Presidentit për të ndërmjetësuar ndërkombëtarët, mua më duket pozitive”. – tha Duka

Në fakt Basha e sheh 13 tetorin si një mundësi të mirë për mbajtjen e zgjedhjeve, por nuk jep asnjë shenjë se mund të ulet në dialog me kryeministrin Rama. Nga ana tjetër Rama e bëri të qartë nga konferenca e të martës se nuk ka zgjedhje të parakohshme dhe zgjedhjet e ardhshme që do të zhvillohen në vend do të jenë ato të 2021.

Për sa i përket dialogut duket se Presidenti Meta është dorëzuar duke i kërkuar ndihmë ndërkombëtarëve me një letër drejtuar OSBE, pasi as Rama por as Basha nuk e shohin atë në rolin e negociatorit. Ndërsa vetë ndërkombëtarët e kanë bërë të qartë se ‘kriza duhet të zgjidhet brenda jush”.

Aleatët: dum prap protesta

Në selinë blu të Partisë Demokratike, kreu i saj Luzlim Basha ka zhvilluar një takim me aleatët. Takimi vjen një ditë pas mbajtjes së zgjedhjeve lokale, të cilën opozita refuzoi të merrte pjesë. Basha ka zhvilluar takim me kryetaren e LSI, Monika Kryemadhi, kreu i grupit të LSI-së Petrit Vasili, kreu i PAA, Agron Duka dhe Kreu i PR, Fatmir Mediu dhe anëtaren e Kryesisë së PDIU, Mesila Doda. Takimi mendohet se vjen për të diskutuar në lidhje me aksionin dhe qëndrimin që do të mbajë opozita pas zgjedhjeve të 30 qershorit.

E para që doli nga takimi ishte Kryemadhi, e cila nuk tha asgjë në lidhje me skenarin e opozitës se çfarë do të ndodhë më tej, por shtoi se çdo gjë do të ndodhë hap pas hapi. “Të gjitha do të vijnë hap pas hapi, e rëndësishme është që 85% e shqiptarëve i thanë jo Edi Ramës. Çdo gjë ka rënë, çdo gjë është ilegjitime”.

Pas saj doli Mesila Doda e cila tha se zgjedhjet e 30 qershorin vërtetuan atë që opozita kishte thënë prej kohësh. Ndërsa e pyetur nga gazetarët nëse opozita do të dal sërish në protesta, Doda tha se protestat nuk kanë ndaluar kurrë. “Zgjedhjet e kësaj radhe vërtetuan qëndrimin tonë prej kohësh. Do nisni protestat? Besoj se kjo është një nga vendimet që do të merret në vijim, por protestat nuk janë ndalur kurrë.”

Kryetari i Partisë Republikane, Fatmir Mediu tha para mediat se raporti paraprak i OSBE/ODIHR tregoi se në zgjedhjet e së dielës asnjë nga kushtet nuk është plotësuar. “ Raporti i OSBE tregon se nuk është plotësuar asnjë kusht. Shqiptarët e dinë se çfarë ka ndodhur . Shqiptarët refuzuan qeverisjen e korruptuar dhe zgjedhjet farsë. ” – tha Mediu

Lidhur me kontradiktat e shifrave që ka dhënë KQZ-ja, Mediu u shpreh se çdo gjë që i shërben procesit dhe bën transparencë. “Nuk më ka shkuar mendja tek hapja e kutive. Shqiptarët e dinë se çfarë ka ndodhur dhe mendoj se kjo është detyra e opozitës dhe forcave të opozitës për të parë realisht se çfarë ka ndodhur në mënyrë që ne të garantojmë elementë për zgjedhje të lira dhe të ndershme” tha Mediu.

Pas përfundimit të votimeve, ditën e diel, Basha doli në një konferencë për shtyp duke e cilësuar atë si fitore të demokracisë pasi “85 % e qytetarëve i bojkotuan zgjedhjet farsë dhe monopartiake të Kryeministrit Rama.” Vetëm 2 minuta pasi Basha mbaroi fjalën e tij për mediat të dielën në mbrëmje, Kryeministri Rama i bëri ftesë duke i shtrirë dorën për arritjen e një marrëveshje pa kushte, për të ardhmen e vendit. Të gjithë tashmë janë në pritje të qëndrimit të kryedemokratit Basha.

Aleatët e Bashës: Bojkotoni zgjedhjet, qëndresë qytetare më 30 qershor

Aleatët e Partisë Demokratike kanë bërë thirrje që qytetarët të bojkotojnë zgjedhjet duke mos pranuar farsën që Rama ka vendosur të mbajë më 30 qershor. Zgjedhjet monopartiake të “Rilindjes” rrezikojnë pluralizmin politik dhe janë në kundërshtim me ligjin dhe dekretin e presidentit Meta thuhet në deklaratën e aleatëve të Bashës.

Duke njohur 30 qershorin, aleatët kanë kërkuar që Aleanca Qytetare për Mbrojtjen e Demokracisë të vijojë misionin e saj legjitim për të mbrojtur demokracinë kur ajo është në rrezik. Një urdhër ky i porositur edhe nga Basha më herët që qytetarët të ndjekin modelin e Shkodrës dhe të bëjnë qëndresa më 30 qershor. Ky qëndrim i Bashës vjen të paktën në retorikë dhe shkresa, pasi vetë dita e zgjedhjeve do të jetë e qetë, ashtu si ka thënë më herët edhe realstory.al

“Vendi ndodhet në një udhëkryq të rrezikshëm që kërcënon një arritje të shenjtë për çdo popull: Pluralizmin politik. Në kundërshti totale me ligjin dhe me dekretin e Presidentit, tashmë të botuar në fletoren zyrtare të Republikës së Shqipërisë, përfaqësuesit e ‘Rilindjes’ vijojnë moskokëçarës projektin e tyre për zgjedhje monopartiake.”- thuhet në deklaratë.

Aleatët e Bashës bën thirrje për qëndresë qytetare si e vetmja alternativë për të shmangur zgjedhjet farsë të 30 qershorit. “Grupimi i Qendrës së Djathtë, në unison me opozitën e bashkuar, i bën thirrje qytetarëve shqiptarë të mos bëhen pjesë e procesit farsë të 30 Qershorit dhe të refuzojnë me neveri votime antikushtetuese dhe antidemokratike. Ne inkurajojmë Aleancën Qytetare për Mbrojtjen e Demokracisë të vijojë misionin e saj legjitim, për të bërë, as më shumë dhe as më pak sesa atë që bëjnë të gjithë popujt liridashës, nga të cilët ne frymëzohemi kur demokracia është në rrezik”.

Në sondazhin e publikuar mbrëmjen e ditës së hënë, të zhvilluar nga GPF Inspiring Research, rezultoi se pavarësisht dhunës dhe retorikës kërcënuese që opozita ka përdorur për të bllokuar zgjedhjet e 30 qershori, mbi 55 % e qytetarëve kanë votuar se do të shkojnë në zgjedhjet e 30 qershori.

Një përqindje goxha e lartë për zgjedhjet lokale. 55 % e pjesëmarrjes në votime është mesatarja normale e zgjedhjeve parlamentare në Shqipëri, ndërsa në zgjedhjet lokale, pjesëmarrja tenton të jenë më e ulët, nën 50 %.

SHQIPTARËT I ‘TREMBEN’ ZGJEDHJEVE, POR MBI GJYSMA E TYRE DO VOTOJË NË 30 QERSHOR

Aleatët e Bashës takojnë Metën: S’ka datë pa marrëveshje politike me ne

Pas anulimit të dekretit për 30 qershorin, presidenti Ilir Meta ka nisur ditën e mërkurë konsultimet me partitë politike për caktimin e një date të re për zgjedhjet. Në takim ishin aleatët e Bashës, Vangjel Dule, Dashamir Shehi, Agron Duka, Nard Ndoka dhe përfaqësuesi i PR, Arian Madhi, por duket se diskutimet nuk kanë qenë rreth një date konkrete për zgjedhjet por arritjes së një marrëveshje politike mes palëve.

“Është bërë një hap i vogël në rrugën e duhur, por ende nuk kemi propozuar një datë, as presidenti nuk ka bërë” tha Dashamir Shehu, ku cilësoi se kërkesat e opozitës duhet të merren parasysh për arritjen e një marrëveshje. “Nuk do të ketë një datë për zgjedhjet pa u arritur një marrëveshje politike, që merr në konsideratë edhe kërkesat e opozitës. Dita e zgjedhjeve duhet të jetë derivat i një analize tjetër, çfarë duhet të bëjmë që zgjedhjet të jenë të pranueshme”

Dekreti i Metës. Çfarë është presidenti për ju?

Gjithashtu Shehi tha se nëse “pala tjetër vijon të jetë me qëndrimin se më 30 qershor ka zgjedhje, do të bëhemi gati për aksione të tjera opozitare”. /realstory.al

Takimi i Bashës me aleatët, Mediu: Nuk ka ndryshim, zgjedhje pa Ramën

Kreu i PD-së, Lulzim Basha ka zhvilluar pasditen e të hënës një takim me aleatët e tij politik për të diskutuar për aksionin opozitar që do të ndiqet pas vendimit të presidentit Meta për mos mbajtjen e zgjedhjeve më 30 qershor. Pas takimit në selinë e PD-së, u prononcua për mediat kreu i Partisë Republikane, Fatmir Mediu, i cili tha se të gjithë aleatët janë në të njëjtën dakortësi mendimesh me atë që Basha tha më herët në një konferencë për shtyp.

“Pa dyshim që qytetarët do të qëndrojnë deri në fund për të garantuar zgjedhje të lira dhe të ndershme, pa Ramën kryeministër. Qëndrimi ynë është i njëjtë me atë që zoti Basha ka mbajtur në konferencën për shtyp sot. Kjo ka qenë dhe mbetet pjesë e axhendës sonë.’ – tha Mediu

Para takimit më aleatët, Basha tha për mediat se “nuk do të ketë zgjedhje lokale në 30 qershor dhe nuk do të shkarkojë kush Presidentin e Republikës”.