Arrestohet zëvendës presidenti i FIFA-s në Francë, akuzohet për korrupsion

Presidenti i Konfederatës së Futbollit Afrikan, Ahmad Ahmed është arrestuar mëngjesin e të enjtes në Francë, pasi dyshohet që është i përfshirë në një marrëveshje korrupsioni. Raportimet e mediave njoftojnë se Ahmad Ahmed është arrestuar në orën 08:30 në hotel “Berris” në Paris, aty ku po qëndronte pas mbajtjes së Kongresit të FIFA-s, ku u ribesua Gianni Infantino edhe për një mandat në krye të qeverisë botërore të futbollit.

Arrestimi i Ahamd është bërë pasi lidhet me një çështje kontraktuale, pasi në postin e presidentit të CAF, ai dyshohet të ketë prishur një marrëveshje me prodhuesin e veshjeve sportive Puma, në favor të një kompanie tjetër.

Ahmad Ahmed, dyshohet se ka prishur në mënyrë të njëanshme marrëveshjen që CAF kishte me Puman, duke lidhur një tjetër kontratë me Tchnical Steel, një kompani franceze veshjes sportive.

Presidenti i Konfederatës Afrikane të Futbollit dyshohet se ka pasur njohje dhe afrimitet me një nga drejtuesit e kompanisë Technical Steel, duke i dhënë kësaj të fundit kontratën me vlerë prej rreth 739 000 eurosh.

FIFA ka reaguar me një deklaratë zyrtare për këtë arrestim, duke u shprehur se “FIFA nuk është në dijeni për detajet e këtij hetimi dhe prandaj nuk është në gjendje të bëjë ndonjë koment në mënyrë specifike”, është shprehur FIFA në deklaratën e saj.

U konfliktua me mjekët dhe policët, arrestohet 28 vjeçari në Elbasan

Policia e Elbasanit ka arrestuar një 28-vjeçar me inicialet D.K, pasi është paraqitur në Spitalin e Elbasanit për ndihmë mjekësore dhe është konfliktuar me stafin mjekësor.

Sipas njoftimit të Policisë së Shtetit, pasi është marrë njoftimi për rastin, efektivët blu kanë shkuar në spitalin e qytetit dhe kanë bërë ndalimin e të riut. Mirëpo shtetasi D.K ka kundërshtuar me dhunë edhe ndalimin nga punonjësit e Policisë së Rendit.

“Konfliktohet me stafin mjeksor të urgjencës së spitalit, kundërshton me dhunë policinë por vihet nën pranga. Specialistët për Hetimin e Krimit në Komisariatin e Policisë Elbasan, arrestuan në flagrancë shtetasin:

“D.K., 28 vjeç, banues në Elbasan. Ky shtetas ka shkuar në Spitalin e Elbasanit për ndihmë mjekësore dhe është konfliktuar me stafin mjekësor. Pas marrjes së njoftimit menjëherë shërbimet e Policisë kanë shkuar në vendngjarje por gjatë shoqërimit ky shtetas ka kundërshtuar me dhunë Punonjësit e Policisë së Rendit’.

“Materiale hetimore i kaluan Prokurorisë pranë Gjykatës së Shkallës Parë Elbasan për veprën penale ” Kundërshtimi i punonjësit të policisë së rendit publik”.

Kapet në Rinas me 26 mijë euro, arrestohet 38-vjeçari

Një 38 vjeçar është vënë sot në pranga nga Policia kufitare e Rinasit pasi u kap duke kaluar 26 mijë euro pa i deklaruar në doganë.

Policia njofton se “në kuadër të masave të përbashkëta të marra mes Policisë Kufitare dhe autoriteteve doganore për rritjen e masave në drejtim të forcimit të kontrollit me qëllim parandalimin, evidentimin dhe goditjen e paligjshmërisë, gjatë paradites së sotme është evidentuar dhe goditur një tjetër rast i transfertave të parave në mënyrë të paligjshme jashtë vendit.

Gjatë kontrollit në vijën e dytë të shtetasit J. S. 38 vjeç, i cili do të udhëtonte për jashtë vendit Policia Kufitare në bashkëpunim me doganën, i gjeti këtij shtetasi 26500 euro te padeklaruara në doganën e Rinasit, të cilat u sekuestruan në cilësinë e provës materiale”.