Agim Kajmaku ka bërë betimin e tij si kryetari i ri i Bashkisë Vorës përpara këshillit të ri bashkiak, ku ceremonia e konstituimit u bë në ambientet e prefekturës së Tiranës. Më pas Kajmaku i është drejtuar Bashkisë Vorë, i cili u fut në zyrën e tij pa probleme dhe pa kundërshtime të kryetarit tashmë të larguar Fiqiri Ismaili, i cili vinte nga radhët e PD. Edhe pse Partia Demokratike kishte bërë thirrje që të mos liroheshin zyrat e bashkive, pasi zgjedhjet ishin të paligjshme, në fakt lirimi i tyre është bërë pa incidente.
Fiqiri Ismaili, i cili drejtoi Bashkinë Vorë për 16 vite, ka bërë lirimin e zyrës së tij pa asnjë kundërshtim duke zhvilluar një rotacion të qetë të kryetarëve. Në ambientet rreth Bashkisë Vorë ka pasur disa mbështetës të opozitës, por që nuk kanë shkaktuar probleme apo incidente.
Agim Kajmaku mori mandatin e tij nga Gjykata Administrative, pasi gjykata e Tiranës e shpalli moskompetencë të saj. Kjo ndodhi pas një gabimi në fjalët e përdorur në shkresën për të marrë mandatin nga gjykata ku në vend të “vërtetim” ishte shkruajtur “verifikim”.
Tashmë Kajmaku do të qeverisë dhe menaxhojë Vorën për 4 vitet e ardhshme. Gjatë fjalës së tij, Agim Kajmaku u shpreh se do t’i shërbejë të gjithë qytetarëve pavarësisht bindje politike që kanë.