Aleatët kundër 13 tetorit

Kreu i Lëvizjes për Zhvillim Kombëtar, pjesë e koalicionit opozitar, Dashamir Shehi ka deklaruar se data 13 Tetor nuk është e përshtatshme për zgjedhje, krejt ndryshe nga kreu i PD-së, Lulzim Basha. Pas takimit me presidentin Meta, Basha doli në mbështetje të propozimit të presidentit për të zhvilluar 3 procese zgjedhore në 13 tetor, duke thënë se kjo është një mundësi për të zgjidhur krizën.

Por Shehi mendon ndryshe nga Basha. Sipas tij, data 13 tetor nuk është e përshtatshme për të zhvilluar zgjedhje, pasi është shumë afër dhe nuk plotësohen kërkesat e opozitës.

“Në zgjedhje do të shkohet detyrimisht, pasi nuk kemi kërkuar shkëmbim pushteti. Por, unë gjykoj që 13 Tetori nuk është data e përshtatshme pasi është shumë afër për t’u plotësuar pretendimet tona. Ne kemi pretenduar për një qeveri tranzitore”, tha Shehi.

Në lidhje me vijimësinë e aksionit opozitar, Shehi deklaroi: “Kemi mbushur sheshin 10 herë, por nuk u kemi ofruar mbështetësve se çfarë do të bëjmë me shtetin tonë. A do të thotë zoti Basha që kryeministri nuk do të ketë më shumë se dy mandate? A do t’i balancojmë pushtetet mes Kryeministrit dhe Presidentit? Duhet të ndërtojmë një matricë politike që ai tjetri që do të vijë nesër në vend të Ramës, të mos na dalë si Edi Rama. Mbi shtetin e ri shqiptar duhet ndërtuar një politikë e re, një ligj zgjedhor ndryshe që shqiptarët të votojnë flamurin e partisë dhe njeriun. Basha ka nisur ta bëjë këtë dhe unë pres që të jetë edhe më i vendosur në këtë linjë, në mënyrë që të mos u ofrojmë shqiptarëve mirazhin e mirëqenies dhe lugën bosh. Duhet t’u japim mundësi shqiptarëve që të mbushin lugën vetë”.

Kur u pyet nëse do të ketë protesta së afërmi, Dashamir Shehi theksoi se tani nuk është koha e duhur.

“Protestat duhet të vijnë duke u rritur, por do të ishte absurde që në mes të gushtit të presim që të ketë protesta. Me vjeshtën do të ketë rritje të intensitetit të protestave. Opozita ka edhe detyrën që të sqarojë opinionin ndërkombëtar se si janë zgjedhjet me Edi Ramën dhe të përmirësohet raporti me ta, pasi e kam thënë edhe herë tjetër, që shpesh kemi gabuar”, sqaroi Shehi.

Shehi pranon përçarjen: Pasi të heqim Ramën, reformojmë veten

Kryetari i LZHK-së, Dashamir Shehi, pjesë e Koalicionit Opozitar ka pranuar të mërkurën se ka një përçarje brenda opozitës, gjë të cilën e ka paralajmëruar më herët Realstory.al.

Por Shehi thotë se më parë opozita do të bëjë çdo përpjekje për të larguar Ramën dhe më pas do të hedhë sytë për të reformuar veten e saj.

“Opozita për sa kohë që të jetë Rama, do jetë e bashkuar edhe me negativët e saj. Ditën që do rrëzojmë Ramën, që do hapet fusha e lojës, gjykoj që opozita e ka për detyrim që të reflektojë brenda vetes, se si mund të përmirësohet sistemi, sesi duhet të largohen njerëz që janë konsumuar edhe në frontin opozitar. Kur është Rama në pushtet, do mbyllim “sytë”. ”, tha Shehi në Report TV.

I pyetur për kreun e PD-së, Lulzim Basha, Shehi tha se ai ka defektet e veta por është lideri i opozitës.

“Basha mund t’i ketë të gjitha defektet e veta, por unë e shikoj më të mirin e pranueshëm. Nuk jemi kundër që të na drejtojë ai. Shqipëria ka nevojë për njerëz të ndershëm dhe të thjeshtë. Nuk kemi nevojë as për Skënderbe, e ka mazhoranca, është bërë Edi Rama, dy nuk bëjmë ne. Basha unë gjykoj se është një lider i mjaftueshëm”, tha Shehi.

Më herët Realstory referuar një deklarate të bërë nga kryetarja e LSI-së, Monika Kryemadhi, raportoi se brenda koalicionit opozitar ka një përçarje dhe se Kryemadhi po flirton me Ramën. Ajo vetë ka deklaruar në një interviste televizive se “nëse do ishte në vend të Bashës do të futej në zgjedhje me Ramën”. Deklaratë kjo që bie në kundërshtim me qëndrimin “Rama ik” të Bashës.

Aleatët e Bashës të vendosur për protesta

Kryetari i PD-së, Lulzim Basha ka zhvilluar sot një takim me aleatët të cilët duket se janë të vendosur për të vazhduar rrugën e protestave. Pas takimit për mediat ka folur Dashamir Shehi, i cili është shprehur se protestat do të vijojnë.

“PS-ja ka filluar manipulimin zgjedhor që tani me spostimin e komisioneve, tani ka vetëm 25 kandidatë dhe gara është false. Kjo është që sot ka filluar manipulimi, zgjedhjet kanë rënë moralisht dhe praktikisht. Edhe sikur ti mbushin plot letrat nuk do të lejojmë që të zhvillohen zgjedhjet. Nuk heqim dorë nga takimet me ndërkombëtarët, por aksi kryesor është protesta e rrugës deri në fund kur të mbërrijmë një zgjidhje finale.

E konsiderojmë pozitive për Shqipërinë që të vijë dita dhe të bëhen zgjedhje, pasi këtu nuk mund të ketë. Ky është mesazhi kryesor, këtë diskutuam dhe do të diskutojmë. Ka shumë alternativa për protestën e radhës, qyteti mund të prodhojë përditë, por ne do të marrim pjesën më pozitive. Në nuk bëjmë protestë për protestë, por pasi po shkelet rregullat e lojës” deklaroi Dashamir Shehi.