BE për drogërat: Trafiku në rritje, treg rekord 30 mld €. Ballkani rruga kryesore

Këtë vit trafiku i drogërave të forta ka pësuar rritje. Kjo ishtje gjetja e raportit të bashkimit europian për vitin 2020. Sipas të dhënave të përpiluara problemi i kokainës në Evropë po përkeqësohet. Komisionerja e BE për Çështjet e Brendshme, Ylva Johansson, tha droga në Europë është bërë mjaft shqetësuese, dhe kap një një treg prej 30 miliardë eurosh. Fitimet qarkullojnë në banka dhe grupet e krimit të organizuar po fuqizohen duke blerë njerëz, fuqi, e duke bërë që krimi i organizuar të minojë shoqërinë dhe demokracinë. Sipas komisioneres rruga e Ballkanit është furnizuesja kryesore e heroinës në BE, dhe përdorimi i drogërave po rritet eksponencialisht, vit pas viti.

“Aty ku ka drogë, shpesh ka edhe armë, krim dhe vrasje. Aty ku ka trafikantë droge, ka edhe krim të organizuar. 5 mijë grupe të krimit të organizuar janë aktive në Evropë. Më shumë se 1/3 merren me drogë. Tregtia e drogës mbështet krimin e organizuar me 30 miliardë euro në vit. Tregtia e jashtëligjshme e drogës është tregu më i madh kriminal në Bashkimin Evropian.

Në raport thuhet se në vitin 2018 sasia e kokainës së sekuestruar në Bashkimin Evropian arriti nivelet më të larta të regjistruara ndonjëherë, me më shumë se 110 000 konfiskime të raportuara, që arrinin në 181 ton. Sasia e kokainës së kapur tejkaloi rekordin e mëparshëm, nga 2017, me më shumë se 42 tonë.

Drejtori i Qendrës Evropiane të Monitorimit për Drogat dhe Varësinë nga Droga Alexis Goosdeel i druhet rënies ekonomike pasi sipas tij do të sjellë përfshirjen e shumë njërëzve në aktivitetin e drogës.

Duhet të jemi të kujdesshëm me çfarë ndodh në muajt në vijim. Të gjithë presin një rënie të thellë ekonomike që mund të rrisë cenueshmërinë e disa grupeve të popullatës që janë vulnerabël. Gjithashtu ka rrezik për shkak të situatës. Mund të kemi përfshirjen e më shumë njerëzve në aktivitete të lidhura drejtpërdrejt ose jo me drogën”,

Raporti vëren gjithashtu se pandemia e koronavirusit ka ndikuar edhe në aspektin e trafikut dhe marrjes se drogës. Raporti tregon se izolimi i ka bërë më krijues trafikantët me mënyrën si ata furnizojnë përdoruesit, ndërsa të varurit kanë pasur vështirësi në marrjen e trajtimeve për lënien e drogës.

Lufta mes karteleve të drogës në Meksikë, 60 mijë të zhdukur nga viti 2006

Mbi 60 000 njerëz janë zhdukur në Meksikë nga koha kur ky vend ka nisur luftën kundër drogës në vitin 2006. Lufta mes karteleve të drogës dhe grupet e krimit janë autorët kryesorë të zhdukjeve dhe vrasjeve masive në vend.

Sipas të dhënave të autoriteteve nga 2006 e deri në 2019, janë mbi 60 000 të zhdukur, ku 53% e atyre janë të moshës 15 dhe 35 vjeç dhe 74% ishin burra.

“Këto janë të dhëna tmerri dhe pas tyre ka histori me dhimbje të mëdha për familjet”, tha Karla Quintana, udhëheqëse e Komisionit Kombëtar të Kërkimeve.

Në vitin 2006, presidenti i atëhershëm i Meksikës, Felipe Calderon, ka nisur sulme ushtarake mbi tregtinë e drogës, por problemi ka vazhduar edhe pas dy ndryshimeve në administratë.

“Vetëm vitin e kaluar, më shumë se 5 000 njerëz janë zhdukur, tha Quintan.

Një milion euro drogë në garazh, arrestohet shqiptari

Një 32-vjeçar shqiptar u arrestua, pasi në garazhin që ndodhej në pronësi të tij u gjetën dhe sekuestruan një sasi droge prej 72 kilogramë marijuanë. Droga po të dilte në treg kapte vlerën e 900 mijë eurove, ndërsa po të shitej me pakicë shkonte në rreth 1 milionë euro.

Aksioni i policisë u zhvillua në Torino, ndërsa vetë shqiptari tha para prokurorëve se “lënda narkotike nuk ishte e tij, por po e mbante atë për të tjerët deri për Krishtlindje.”

Ktheu banesën në “market” kokaine, pranga 23-vjeçares

Një vajzë e re shqiptare u arrestua pasi u kap në flagrancë duke shitur lëndë narkotike. Shqiptarja 23-vjeçare, identiteti i të cilës nuk bëhet i ditur, e kishte kthyer apartamentin e saj si një market për klientët ku mund të blinin kokainë.

Pasi kapën ‘mat’ një çift që sapo kishte blerë drogën, policia italiane hyri në banesën e shqiptares, ku gjeti disa doza të bëra gati për shitje. Policia sekuestroi drogën, një peshore elektronike dhe materiale që shërbenin për paketimin e dozave.

Oficeri i sigurisë “zbërthen” grupin e kokainës: Më joshën me 200 mijë lekë

“Më tha se do të më paguante 200 mijë lekë për të nxjerrë një çantë nga terminali duke më garantuar se nuk kishte asnjë rrezik. Prandaj pranova, nuk e dija që kishte drogë.” Ardian Bega, oficeri i sigurisë në Portin e Durrësit, i cili është një prej të arrestuarve në portin e Durrësit, në lidhje me kokainën që vinte nga Ekuadori, nuk ka pranuar të kishte dijeni në lidhje me trafikun e drogës, ndërsa tha se e mendoi si një punë të thjeshtë për të cilën ishte joshur nga çmimi. “Në ato momente mua m’u tha pështyma në gojë. Personalisht u tremba shumë dhe nuk kam folur asnjë fjalë.” kanë qenë fjalët e Begës gjatë dëshmisë, kur kuptoi se çantat ishin me drogë, raporton News 24.

Njohja e tij me Gentian Malindin, pronar i anijes “Anyway”, daton prej më shumë se një vit. Bega tha se nuk e dinte që brenda kishte kokainë, por e kuptoi atë pasi Malindi kishte marrë 22 pakot me “oriz” që i mendonte se ishte drogë.

“Gentian Malindi do më paguante 200 mijë lekë për ndihmën që do t’i jepja në Port. Ai më kërkoi ta ndihmoja për të nxjerrë një çantë nga terminali dhe më garantoi se nuk ishte asgjë me rrezik. Më joshi shpërblimi….por nuk kisha dijeni se bëhej fjalë për kokainë. Kur u ulëm për kafe, shoku i Gentit doli nga makina nga krahu që dola dhe unë. Ai kishte veshur një jelek fosforeshent dhe u drejtua drejt kontenierëve brenda sheshit.” deklaroi Bega, i cili tha se e gjithë procedura zgjati jo më shumë se 15 minuta dhe se më pas u nisën drejt shkëmbit të Kavajës, të cilit e kishin marrë çantën.

“Sapo dolëm nga Porti, Gentiani i tha shokut të tij: “shtype, shtype pak”, “jepi ka si boshllëk”. Ai i përgjigjet: “po ashtu më duket”. Genti i tha nxire ta shikoj me çfarë është mbështjellë. Ai nxori nga çanta një kallëp dhe ia tregoi. Genti i kërkoi të nxirrte edhe një tjetër. Në momentin që ai po e nxirrte, Genti e pyeti: Sa ishin, 22? Dhe shoku iu përgjigj: Po. Në ato momente mua m’u tha pështyma në gojë. Kam arritur t’iu them vetëm dy fjalë: çfarë është kjo?”. Gentiani më tha: Pusho me nerva dhe vazhdoi bisedën më shokun e tij. Kur Genti mori pakon në dorë i tha shokut të tij: Nuk është kjo mbështjellja, qenka lojë. Dhe tha: Mos flisni se ka çip. Kuptova se ishte i acaruar dhe po ecte tmerrësisht shpejt. Kur ndodheshim afër Plepave, Gentiani i tha shokut të tij: Çaje njëherë të shohim, ai me zor e çau dhe i tha Gentianit: “Është oriz”. I nevrikosur Gentiani i tha: “Çaj edhe një tjetër”. Pasi ai e çau edhe pakon e dytë, ai përsëri i tha se ishte oriz. Në këtë moment Gentiani i tha hidhe çantën. Personalisht u tremba shumë dhe nuk kam folur asnjë fjalë”. ka deklaruar Bega për prokurorët

Operacioni në portin e Durrësit, për të kapur të përfshirët në trafikun e drogës nisi me një bashkëpunim të policisë greke dhe asaj shqiptare. Droga që vinte nga Ekuadori u kap në portin e Pireut dhe do të nisej drejt Shqipërisë në portin e Durrësit. Për të zbuluar të përfshirët në trafikun e drogës, policia greke lejoi që operacioni të zhvillohej, pro bëri zëvendësimin e kokainës me oriz.

Pas zbarkimit të kontenierëve në portin e Durrësit, policia shqiptare ka bërë monitorimin e tyre në distancë , ku të parët që u panë ishte pikërisht Ardian Bega dhe Altin Mislihaka, punëtor në anije e Malindit, të cilët janë arrestuar. Ndërsa është ende në kërkim edhe Gentian Malindi. 137 kilogramë kokainë ishte fshehur në motorët e frigoriferëve, në 4 kontenierë dhe ishte nisur nga Ekuadori me destinacion Shqipërinë.

Kokaina, spiuni në Pire, lajmëroi pritësit në Shqipëri

Detaje të reja dalin nga hetimi për kapjen e 137 kg kokainë në Portin e Durrësit. Sipas një lajmi të publikuar nga Shqiptarja.com, mësohet se pritësit e vërtetë të kokainës, janë lajmëruar 1 muaj përpara, se në portin e Pireut në Greqi ishte zbuluar droga dhe në lojë ishte futur DEA Amerikane.

Sipas këtij artikulli, pritësit e drogës së nisur nga Ekuadori, ishin dy grupe kriminale, që drejtohen nga dy shtetas me inicialet A.C. dhe L.M. në Elbasan dhe Fier.

Dyshohet se pritësit e drogës kishin informator në Greqi, një shtetas nga qyteti i Elbasanit.

Fakti që asnjë nga personat e dyshuar si pritësit e vërtetë të drogës nuk është kapur, e përforcon më tej dyshimin se operacioni policor në Greqi është zbuluar një muaj përpara se ai të finalizohej në Durrës. Informatori mendohet se është nga Elbasani dhe jeton në Greqi.

Policia ishte me grupe vëzhgimi në terren për disa ditë, por pa mundur të kap “peshqit e mëdhenj”. Policia ka vënë në pranga dy persona për kokainën në Durrës, një punonjës i portit dhe një person tjetër.

Ndërkohë, në kërkim është shpallur shtetasi Gentian Malindi, i cili ishte personi që mori drogën nga kontenieri. Malindi pikasi se në 22 pakot e tërhequra nga kontinjeri, gjendjen oriz dhe kokainë, ndërsa ende nuk është arrestuar nga policia.

Shkatërrohet rrjeti i trafikut të kokainës në Itali, Arbër Cekaj koka e grupit kriminal

Arbër Cekaj është një emër i njohur për policinë shqiptarë i cili akuzohet për trafikun e mbi 600 kg kokainë në Shqipëri përmes bananeve. Edhe pse i arrestuar para pak kohësh në Gjermani, emri i tij sërish ka dalë në media, por këtë herë nga drejtësia italiane.

Arbër Cekaj dyshohet se është dhe drejtuesi i një grupi kriminal i shkatërruar gjatë të martës në Itali që trafikonte kokainë nga Shqipëria drejt Novaras . Gjatë aksionit u arrestuan 19 persona,7 prej tyre janë shqiptarë.

Rrjeti kriminal u shkatërrua pas një hetimi 2 vjeçar, ndërsa policia italiane thotë se Cekaj ishte kryetari i këtij grupi kriminal për trafikimin e drogës nga Shqipëria në Itali. Hetimet kanë nisur dy vite më parë, më 2017 pas arrestimit të shtetasit shqiptar Elton Shano, 38 vjeç me 3 kg kokainë e 1 pistoletë. Pak muaj pas arrestimit ai ka vendosur të bashkëpunoj me forcat e policisë e rrëfimi i tij ka ndihmuar në zbardhjen e një trafiku kokaine që jo vetëm tranzitonte në qytetin e Novarës, por dhe kishte një qendër magazinimi në këtë qytet.

Kokaina e cilësisë së pastër 95% trafikohej nga Kolumbia në Shqipëri e më pas transportohej në Novara. Kokaina furnizonte tregjet e shitjes së saj jo vetëm në Novara, por dhe në Alessandria, Bustio Arsizio, Massa Carrara e Pavia.

Prishën pazaret e drogës, dy të arrestuar për vrasjen e shqiptarit

“Larje hesapesh për shkak të pazareve të prishura të drogës”, kështu është cilësuar vrasja e një shqiptari në Mykonos të Greqisë. Një 34-vjeçar shqiptar u qëllua me breshëri automatiku, teksa po udhëtonte me fugonin e tij. Një motor skuter i ka prerë rrugën duke qëlluar me breshëri plumbash ndaj tij. Ngjarja ndodhi të premten, ku shqiptari edhe pse mori ndihmën mjekësore nuk mundi t’i mbijetonte plagëve.

Për ngjarjen policia greke ka arrestuar dy persona një 56-vjeçar grek dhe një 21-vjeçar të huaj.

Viktima rezulton një person me ndjekje penale nga policia për trafikim droge dhe për këtë ka bërë dy vite burg nga 2013-2015. Dyshimet e para të vrasjes janë ato të prishjeve të hesave të drogës. Shqiptari, pas daljes nga burgu kishte vendosur të bënte një jetë të qetë, ku punonte në një dyqan fruta-perimesh në Mykonos.

Aksioni anti-drogë, për 24 orë asgjësohen 2120 rrënjë kanabis, 5 të arrestuar

Policia e shtetit brenda 24 orëve ka ndërmarrë 3 aksione anti-drogë në zona të ndryshme të vendit duke çuar në asgjësimin total prej 2120 rrënjë kanabis sativa dhe arrestimin e 5 personave si kultivues te tyre.

Në Përmet zbulohet parcela me rreth 100 rrënjë kanabis në fshatin Alipostivan. Pas agjërimit u bë e mundur arrestimi i katër kultivuesve Niko Shena, Marsel Shena, Xhoni Mucaj dhe Andi Mucaj.

Një tjetër aksion u shtri në fshatin Fllomo në Dropull. Policia gjeti dhe sekuestroi 2 mijë rrënjë kanabis në thellësi të pyllit të fshatit. Policia është vënë në kërkim të poseduesve të saj.

Aksioni i tretë ndodhi në Tepelenë ku u zbuluan 20 rrënjë kanabis në fshatin Dragot dhe ka bërë të mundur arrestimin e kultivuesit të tyre shtetasit Visar Bisha, 29-vjeç.

Shkatërrohet rrjeti i drogës Shqipëri-Itali, 18 të arrestuar

18 persona, italianë dhe shqiptarë, kanë përfunduar në prangat e policisë italiane nën akuzën e trafikimit të lëndëve narkotike.

Grupi i strukturuar kriminal vepronte në të gjithë Italinë, ndërsa rrugët e transportit të drogës ishin të lidhura nga Shqipëria përmes gomoneve që zbarkonin drogën në Puglia.

Bëhet fjalë për një trafik të gjerë kokaine dhe marijuane, ndërsa në operacion u përfshinë 150 efektiv policie në qytete të ndryshme të Italisë Qendrore dhe Veriore.

Arrestimet u kryen në kuadër të operacionit të koduar “outlet”, nuk jepen detaje të tjera në lidhje me identitetin dhe sasinë e sekuestruar të drogës.