Shqipëria merr pjesë në asamblenë e “IRENA” për Energjinë e rinovueshme

Shqipëria mori pjesë në sesionin e 10-të të Asamblesë së IRENA (Agjencia Ndërkombëtare e Energjisë së Rinovueshme), i cili u zhvillua gjatë Javës së Qëndrueshmërisë Energjetike, në Abu Dhabi. Vendi ynë u përfaqësua me delegacionin e Ministrisë së Infrastrukturës dhe Energjisë, kryesuar nga ministrja Belinda Balluku.

Gjatë këtij eventi të përvitshëm, me rëndësi të veçantë për avancimin e shtrirjes së energjisë së rinovueshme në të gjitha kontinentet, ministrja Balluku zhvilloi një takim bilateral me Drejtorin e Përgjithshëm të IRENA, Francesco La Camera.

Në takim u diskutua mbi ecurinë aktuale të diversifikimit të burimeve të rinovueshme në Shqipëri, si dhe mundësinë për një mbështetje teknike e financiare, të dhënë nga Fondi i Zhvillimit të Abu Dhabi.

“Balancimi i energjisë së prodhuar nga burimet hidrike me energjinë e prodhuar nga parqet diellore dhe ato eolike, janë synimi kryesor i diversifikimit të burimeve të rinovueshme në vendin tonë”, – u shpreh ministrja Balluku gjatë takimit.

Ministrja Balluku i propozoi drejtorit La Camera të mbështesë planet tona të së ardhmes, përmes projekteve inovative si panelet e lundrueshme, të cilat janë pilotuar me sukses në disa vende. “Jam shpresëplotë se IRENA dhe personalisht z. La Camera, do të ndihmojnë Shqipërinë për realizimin e objektivave të vendosura”, – theksoi Balluku.

Agjencia Ndërkombëtare e Energjisë së Rinovueshme ka për synim dhe përgjegjësi, përshpejtimin e procesit të transformimit të energjisë si dhe mbështetjen e vendeve anëtare për krijim e bazave ligjore e rregullatore, por dhe përthithjen e investimeve në fushën e energjisë së rinovueshme.

Forumi i SEEF, Balluku: Bashkëpunim rajonal për diversifikimin e burimeve energjitike

Ministrja e Infrastrukturës dhe Energjisë, Belinda Balluku, ka marrë pjesë në Forumin e Energjisë të Vendeve të Europës Juglindore, zhvilluar në Selanik të Greqisë. Ministrja Balluku, me anë të një postimi në rrjetet sociale, shkruan se në këtë forum është shprehur se ‘diversifikimi i burimeve të energjisë, mbetet gjithmonë një nga strategjitë kryesore të së ardhmes’.

“Gjatë Forumit të Europës Juglindore për Energjinë 2019, SEEF, i cili u zhvillua në Selanik, pata rastin të diskutoj me homologët e mi çështjet prioritare në fushën e energjitikës. Diversifikimi i burimeve të energjisë, mbetet gjithmonë një nga strategjitë kryesore të së ardhmes, jo vetëm për Ballkanin, por edhe për tërë Europën. Vëmendje të veçantë paneli ministror i kushtoi zhvillimeve gjeopolitike në rajon dhe më gjerë, me fokus korridoret strategjike të transmetimit, gaz dhe energji elektrike”, shkruan ministrja.

Më tej, Balluku shprehet se gjatë forumit ka thënë se diversifikimi i burimeve të energjisë kërkon bashkëpunim midis vendeve të rajonit. “Gjithashtu siguria energjitike zuri vend të veçantë gjatë ketij forumi dhe u prek gjerësisht në të gjitha panelet, si një nga pikat më delikate për zhvillimin e qëndrueshëm të kësaj industrie”.

“Theksova gjatë këtij forumi se strategjia e Qeverisë Shqiptare për gazifikimin e vendit, si pjesë përbërëse e strategjisë afatgjatë për diversifikimin e burimeve të energjisë, kërkon bashkëpunim me të gjithë aktorët vendimmarrës ndërkombëtarë, veçanërisht ato rajonalë. Në këtë kontekst sinergjia e shteteve Ballkanike dhe më gjerë, nën ombrellën rregullatore të BE, do të ishte ajo çka i duhet sot rajonit për të përmirësuar e zhvilluar kapacitet energjitike dhe ato të transmetimit”, përfundon ministrja Belinda Balluku.

Tremujori 2019, INSTAT: Bie ndjeshëm prodhimi i energjisë elektrike

Prodhimi i energjisë elektrike për tremujorin e parë të vitit 2019 ka rënë me 2.5 herë, duke arritur vlerën 1.28 miliardë kilovatorë, nga 3.2 miliardë kilovatorë energji të prodhuar në tremujorin e parë të vitit 2018.

Prodhimi i energjisë elektrike, i cili ndikoi në gati një të tretën e rritjes ekonomike vitin e kaluar (sidomos në 9 muajt e parë) ka shënuar rënie të ndjeshme në tremujorin e parë të 2019-s, duke paralajmëruar për një ecuri të dobët të ekonomisë në tremujorin e parë të vitit. Sipas INSTAT, gjatë tremujorit të parë të vitit 2019, energjia elektrike në dispozicion u ul me 1.2%. Prodhimi neto vendas i energjisë elektrike në këtë periudhë ka rënë me rreth 2.5 herë, duke arritur vlerën 1.28 miliardë kilovatorë, nga 3.2 miliardë kilovatorë energji të prodhuar në tremujorin e parë të vitit 2018.

Ky prodhim i energjisë elektrike u realizua nga hidrocentralet publike në masën 53.6%, nga hidrocentralet private dhe koncensionare në masën 46.1% dhe nga të tjerë prodhues (energji e rinovueshme) në masën 0.3% të prodhimit neto vendas të energjisë elektrike.

Ulja e prodhimit të energjisë elektrike, në tremujorin e parë të vitit 2019, ka ndikuar në rritjen e importeve bruto të energjisë elektrike (energji në marrje) me rreth 7.9 herë dhe uljen e eksporteve bruto të energjisë elektrike (energji në dhënie) me rreth 14.3 herë, krahasuar me të njëjtën periudhë të një viti më parë.

Hidrocentralet publike, në tremujorin e parë të vitit 2019, prodhuan 687 milionë kilovatorë, nga 2.1 miliardë të prodhuar në tremujorin e parë të vitit 2018, duke shënuan kështu një rënie të prodhimit me rreth 3 herë. Ndërsa, hidrocentralet private dhe koncensionare, prodhuan 590 milionë kilovatorë.

Importi bruto i energjisë elektrike (energji në marrje) në tremujorin e parë të vitit 2019, rezultoi me rritje duke arritur vlerën 901 milionë kilovatorëve, nga 115 milionë kilovatorë në tremujorin e parë të vitit 2018.

Por, pozitiv është fakti që gjatë tremujorit të parë të vitit 2019, humbjet në rrjet kanë arritur vlerën 531 milionë kilovatorë, nga 599 milionë që ishin në tremujorin e parë të vitit 2018, duke shënuar kështu një rënie me 11.4%. Ndikim në këtë rënie ka patur ulja e humbjeve në shpërndarje e cila përbën 92.8% të humbjeve gjithsej në rrjet dhe humbja në transmetim e cila përbën 7.2% të humbjeve. Humbjet në shpërndarje janë ulur me 3.9%, krahasur me tremujorin e parë të vitit të kaluar, si rrjedhojë e uljes së humbjeve teknike në shpërndarje me 5.7% dhe uljes së humbjeve jo teknike në shpërndarje me 0.2%, ndërsa humbjet në transmetim janë ulur me 55.9% krahasur me tremujorin e parë të vitit të kaluar.

Përdorimi i energjisë elektrike nga konsumatorët, në tremujorin e parë të vitit 2019, u rrit me 2.8% duke arritur vlerën 1.56 miliardë kilovatorë nga 1.52 miliardë që ishte në tremujorin e parë të vitit 2018.

OSHEE në terren për vjedhjen e energjisë, procedohen 67 abonentë

Operatori i Shpërndarjes së Energjisë ka ndërmarrë një fushatë kontrolli për të verifikuar nëse abonentët vjedhin energjinë elektrike. Në qytetin e Shkodrës OSHEE ka realizuar rreth 1000 procedura verifikimi dhe gjatë dy javëve të fundit janë konstatuar 18 raste linjash furnizimi jashtë matjes, 35 raste rilidhjesh të paligjshme, 7 raste furnizimi pa kontratë dhe 3 ndërhyrje në sistemin e matjes.

Në vijim të këtyre rasteve të konstatuara, OSHEE ka depozituar procedim në organet e drejtësisë për 63 konsumatorë (biznese dhe familjarë).

Operatori i Shpërndarjes së Energjisë Elektrike njofton se do të vazhdojë kontrollet jo vetëm në qytetin e Shkodrës por në të gjithë territorin për të garantuar zbatimin e ligjshmërisë në konsumin e energjisë elektrike.