PD sulmon sërish prokurorinë: Bllokoi 3 denoncimet tona

Partia Demokratike ka sulmuar Prokurorinë e Përgjithshme, ku e akuzon se nga ndaluar verifikimet për 3 rastet e bashkive në vend që janë denoncuar nga selia blu. PD tha se për të 3 rastet janë paraqitur dokumente e prova të pakundërshtueshme, por prokuroria zgjodhi të hesht dhe të mos bëjë asnjë veprim.

“Me kontrollin e plotë mbi prokurorinë Edi Rama ka stopuar verifikimin e kriminelëve të tij në të paktën 3 bashki të vendit, për të cilët Partia Demokratike ka sjellë dokumente të pakundërshtueshëm. Megjithëse kanë kaluar disa javë nga denoncimi i tyre, kriminelët e Ramës vazhdojnë të drejtojnë bashkitë, vazhdojnë të mos përballen me drejtësinë për shkak të mosveprimit të prokurorisë.

Prej më shumë se 3 muajsh, Partia Demokratike ka referuar në prokurori krimin shtetëror të 30 Qershorit, rastet flagrante të blerjes së votave, presionit mbi administratën, shkeljen flagrante të ligjit nga komisionerët e të gjitha niveleve, manipulimin e votave në 30 Qershor, por organi i prokurorisë nuk ka bërë asnjë veprim.

Deri tani nuk ka asnjë procedim penal të regjistruar, nuk ka asnjë person të hetuar dhe nuk ka asnjë person të arrestuar.” tha Enkelejd Alibeaj gjatë një deklarate për mediat nga selia blu.

Alibeja fajësoi kryeministrin Rama që nuk lejon prokurorin të hetojë krimet elektorale dhe për këtë po del kundër Bundestagut, ku një nga 9 pikat e vendosura janë për vjedhjen e votave.

“Hetimi i krimeve elektorale është një nga 9 kushtet e vendosura nga Bundestagu gjerman për hapjen e negociatave me Shqipërinë, por prokuroria hesht. Hajdutët e votave janë të paprekshëm. Ata nuk hetohen dhe nuk ndëshkohen, sepse i shërbejnë pushtetit të korruptuar dhe të kriminalizuar të Edi Ramës.

Duke mos regjistruar zyrtarisht asnjë procedim penal që lidhet me zgjedhjet, Prokuroria ka zhvlerësuar edhe ODIHR-in, i cili thekson se ishte dëshmitar i rasteve të kërcënimit të votuesve dhe shkeljes së fshehtësisë së votës në qendrat e votimit.

Mosveprimi i prokurorisë për të ndëshkuar krimet zgjedhore që mbajnë në pushtet Edi Ramën, është treguesi më i qartë i mungesës së vullnetit politik të kryeministrit për të zhvilluar zgjedhje të lira e të ndershme. Edi Rama është pengesa e vetme që Shqipëria nuk bën dot zgjedhje si në Kosovë apo në vende të tjera, ku demokracia funksionon vërtet.” tha Alibeaj

Dosja “Babale”, dëshmon Alibeaj: S’më takon mua të bëj ekspertizën e videos

Ish deputeti Demokrat, Enkelejd Alibeaj ka dëshmuar para trupës gjyqësore në lidhje me çështjen “Babalja”. Alibeaj gjatë dëshmisë së tij thotë se e publikoi audio përgjimin bashkë me kolegët e tij, Ervin Salianji dhe Gazmend Bardhi në cilësinë e drejtorit të departamentit për rendin dhe sigurinë publike.

Edhe pse video rezultoi e pavërtetë, Alibeaj tha se nuk ishte detyra e tij të bënte ekspertizën e videos, por kishte detyrim moral politik që ta publikonte.

Në lidhje me përfshirjen në çështjen “Babalja” dhe audio-përgjimet e publikuara do të dëshmojë edhe sekretari i Përgjithshëm i PD, Gezment Bardhi në seancat e 30 korrikut.

Procesi gjyqësor në ngarkim të të pandehurve Albert Veliu dhe Fredi Alizoti, vijon me pyetjen e dëshmitarëve.

“Përplasje në 30 qershor”, PD pranon qarkoren, Alibeaj: Nuk i lirojmë zyrat e bashkive

Ish-deputeti demokrat Enkeled Alibeaj, ka konfirmuar për herë të parë zyrtarisht Qarkoren e shprëndarë një javë para mbajtjes së zgjedhjeve nga PD për strukturat e saj. Në atë Qarkore bëhej thirrje për dhunë dhe pamundësim të zgjedhjeve deri në përplasje me policinë.

“Ne thamë që do të pamundësojmë zgjedhjet dhe kjo bëhet duke mos marrë pjesë. Sa i takon përplasjeve fizike, e menduam. Ju thamë njerëzve që kjo nuk është çështje e opozitës, ne shqiptuam faktin që të mos lejonim zgjedhjet, qoftë edhe fizikisht. I thamë popullit “po e kemi të drejtën, të ndalojmë me çdo lloj mjeti farsën”. Ne nuk kompleksohemi nga asnjë ndërkombëtar, por dëgjojmë zërin e arsyes, që do të thotë nëse nga ana e regjimit ka papërgjegjshmëri, gjë që e treguan, se Rama kërkoi vëllavrasje, pse duhet ta çonim ne në planin e tyre. E lamë të dështonte plani i autokratit dhe kështu ndodhi”, tha ndër të tjera Alibeaj.

Opozita po përgatit skenarin e radhës për të mos lejuar kryebashkiakët e rinj të dalë nga zgjedhjet e 30 qershorit, të shkojnë në zyrë. Atë që e kanë konfirmuar individualisht të ish-drejtues të bashkive të zgjedhur në siglën e PD-së si Xhelal Mziu apo Voltana Ademi, tani e konfirmojnë në nivele të larta nga përfaqësues të PD-së. Ish-deputeti, Enkelejd Alibeaj, në një studio televizive, është shprehur se kryetarët e bashkivet të PD-së nuk do të liërojnë zyrën për të zgjedhurit e rinj të PS, që morën mandatin e kryebashkiakëve të rinj në 60 bashki të vendit.

“Nuk është punë karrigesh, tanët nuk e kanë bërë për karrige, se ata po. Kryetarët tanë kanë qenë të diskriminuar nga qeveria, asnjë projekt, kanë bërë vetëm me taksat e vogla. Asnjë mbështetje financiare nuk kanë marrë. Nuk është e rëndësishme çfarë do bëjnë kryetarët tanë, por çfarë do bëjë publiku në këto bashki. Ky që po vjen nuk është produkt i dëshirës së tyre. Kryetarët tanë kanë për detyrë t’i lirojnë karrigen një pasardhësi të ligjshëm. Kur nuk njihet procesi, edhe produkti është i paligjshëm”, u shpreh ish-deputeti.