Sot prezantohen “Fauda” e SPAK. Vjen ora e “peshqve të mëdhenj”

Të hënënprezantohet ligji i “Fauda” shqiptare, apo e njohur nga Kryeministri Edi Rama si; Paketa Speciale Anti-KÇK. Paketa është hartuar në bashkëpunim me partnerët strategjikë të Shqipërisë, lajm të cilin e dha Kryeministri Rama pasditen e të dielës në Twitter. Ai shkroi se ky ligj po përgatitet në një kohë kur miqtë e Shqipërisë janë vënë në shënjestër të politikës mjerane, ndërsa thekson se këta partnerë do të tregojnë se sa të rëndësishëm janë në luftën e Shqipërisë për progres e drejtësi.

“Sot kur partnerët strategjikë të Shqipërisë e ambasadat e tyre janë vënë në shënjestrën e politikës mjerane të të çmendurve nga frika e drejtësisë, Paketa Speciale Anti-KÇK do të provojë përsëri se sa të paçmueshëm janë këta partnerë në luftën e Shqipërisë për progres e drejtësi. Pa mbështetjen e SHBA/BE e ndihmën e përfaqësuesve të tyre në Shqipëri, s’do kishte nisur kurrë pastrimi i llumit të madh të (pa)drejtësisë e s’do ishte hapur dot kurrë perspektiva e barazisë së vërtetë para ligjit! Edhe Paketa Speciale AntiKÇK s’do bëhej dot pa ndihmën e tyre”, përfundon Kryeministrit.

Po çfarështë “Fauda” që do të prezantohet të hënën?

Realsotyr.al njoftoi disa javë më parë se së shpejti në Shqipëri do të krijohet “Fauda”, një njësi speciale policore, e cila do të ketë në fukos të saj goditjen e grupeve kriminale, të njohur si të “fortët” apo të “paprekshmit”. Disa dhjetëra oficerë janë përzgjedhur dhe trajnuar dhe presin vetëm që paketa ligjore të kalohet në Kuvend. Modeli është i bazuar mbi “Fauda” izraelite. Madje, krerët e kësaj force, kanë trajnuar prej muajsh në Shqipëri, efektivët e “Fauda” shqiptare.

Në fakt, duket rastësi, por “Fauda” do të prezantohet në të njëjtën ditë kur Këshilli i Lartë i Prokurorisë do të emërojë 8 prokurorët e parë të SPAK. Prokuroria Speciale Anti-Korrupsion dhe Anti-Krimit të Organizuar do të marrë jetë pikërisht më 25 nëntor me emërimin e 8 anëtarëve të parë të saj, ndërsa në fillim të vitit të ri, SPAK pritet të jetë gati për të nisur punën me dosje të bujshme. Në të njëjtën kohë po merr jetë dhe Byroja Kombëtare e Hetimit, apo “FBI” shqiptare. Të dyja këto njësi po krijohen nën vëzhgimin dhe ndihmën e pakursyer të Shteteve të Bashkuara të Amerikës, që vetëm pak ditë më parë dhuroi 5 poligrafë për BKH-në. /Realstory.al/

“Fauda” prezantohet në 25 nëntor. Do luftojë “KÇK” dhe krimin e organizuar

Kryeministri vendosi të mos i kushtonte shumë vëmendje atyre që i quajti “marrëzi të Ilir Metës”. Gjatë fjalës së tij në seancën e Kuvendit për miratimin e projekt-rezolutës për Gjykatën Kushtetuese, Rama foli për ligjin special kundër krimit të organizuar dhe gjyqtarëve apo prokurorëve të korruptuar. E njohur ndryshe si “Fauda shqiptare”, që Realstory.al e lajmëroi pak ditë më parë, Rama tha se platforma e këtij ligji do të bëhet publik në datën 25 nëntor.

“Beteja jonë sot nuk është me Ilir Metën, beteja është me ata të “Kap Çfarë të Kapësh”. Duhet vepruar një orë e më parë kundër KÇK, duke nxjerrë në pah të gjithë përmasën e llumit që është kthyer në një shtupë që e pengon sot më shumë se asnjëherë rrjedhjen e lirë të ujërave drejt sistemit të drejtësisë. Ky është një tjetër motiv për ne, të shpejtojmë dhe përshkallëzimin e luftës ndaj KÇK-së mos e lëmë thjesht dhe vetëm në radhën e pritjes së vettingut, por ta nisim dhe ta shoqërojmë njëkohësisht me një përshkallëzim të luftës kundër krimit të organizuar”, tha Rama.

Në shënjestrën e “Fauda” do të jenë ata që nuk janë dënuar për krime të rënda që kanë kryer, si dhe prokurorët apo gjyqtarët që i kanë shpëtuar kriminelët, të cilëve do t`ju sekuestrohet pasuria. “Ata që kanë marrë dënim për krime të rënda të lidhura me veprimtari kriminale më shumë se sa një vrasje, ata që janë akuzuar për krim të organizuar dhe për krime të rënda të asaj natyre dhe që nuk janë dënuar si rezultat i atyre prokurorëve e gjykatëseve që e kthyen drejtësinë në një pazar, duhet të kthehen një orë e më parë në shënjestrën tonë. Nuk mundet më që ata nga njëra anë, dhe këta të tjerët nga ana tjetër, KÇK t’i gëzojnë pasuritë e tyre. Ofensiva ndaj pasurive të tyre do të jetë thelbi i një procesi pa kthim që do duhet dhe do të nisë një orë e më parë”, tha Kryeministri.

Kryeministri shtoi se ky ligj është duke u diskutuar me partnerët ndërkombëtar, ndihma e të cilëve nuk do të jetë vetëm në aspektin juridik, por i gjithanshëm theksoi Rama. “Kam qenë këtu kur fola për rastin skandaloz të Durrësit dhe u zotova se do t’i sjell kuvendit shumë shpejt një platformë ligjore për tu miratuar dhe për tu kthyer në platformë lufte ndaj krimit dhe KÇK-së. më 25 nëntor unë do t’i prezantoj publikut shqiptar këtë platformë. Do të jetë sfida e vërtetë e këtij kuvendi, që do ndajë ata që janë gati për ta shpallur këtë luftë ose jo. Për ligjin special kundër krimit të organizuar dhe KÇK, jemi duke diskutuar me ndërkombëtarët. Do të jetë luftë që nuk është parë ndonjëherë. Është një luftë që do të kemi nevojë për ndërkombëtarët. Jo vetëm mbështetje juridike, por në të gjitha anët”, tha Rama.

“Fauda”, shkaku pse Rama nuk është shfaqur në publik

Disa ditë më parë, disa media online qarkulluan lajmin se kryeministri Edi Rama për shkak të gjendjes shëndetësore jo të mirë, kishte anuluar takimin me presidentin e Maqedonisë së Veriut, Stevo Pendarovski. Nga Ohri, ku mbajti një bisedë me gazetarët shqiptarë pas samitit për Shengenin ballkanik, Rama shuajti zërat se ishte sëmur.

“Më vjen keq që shëndeti im është shpresa e atyre që humbin pushtetin. Skam probleme shëndetësore. Edhe sikur të kisha, besoj se nuk është kjo një rrugë fortë e respektueshme për të bërë politikë”, tha Rama. Po përse kryeministri Edi Rama ka munguar në daljet e tij në publik? Përgjigjen e jep vetë ai. Nga Ohri ai u shpreh se mungesa e daljeve në publik, lidhet me punën që po bëhet për ligjin special kundër “KÇK-së” dhe bandave kriminale.

“Lidhur me ligjin special shumë shpejt ne do ta bëjmë publik dhe më lejoni të mos nxjerr ende detaje. Kjo është edhe një nga arsyet e mungesës sime të zakonshme në publik. Kemi punuar me një grup të gjerë pune, me partnerë ndërkombëtarë dhe kemi grupuar shumë eksperienca botërore dhe kam vendosmërinë të hyjmë në një luftë të pa njohur më parë kundër krimit të organizuar dhe të marrim masa kundër prokurorëve dhe gjyqtarëve të grupit KÇK”, -tha kreu i qeverisë shqiptare.

Gjithashtu, Kryeministri u është përgjigjur dhe njëherë liderëve kosovarë për Shengenin Ballkanik. Ai u shpreh se nëpërmjet kësaj nisme, do të krijohet mundësia që të hiqen kufijtë mes Shqipërisë dhe Kosovës. “Sa herë është folur për hapjen e kufijve, është vënë kuja për Shqipërinë e madhe. Unë i kam thënë Vuçiç se nëse nuk përfshihet lëvizja e lirë ne nuk përfshihemi. Kam dëgjuar nga Albin Kurti që ka thënë se Kosova është mirë të jetë në tryeza por unë nuk marr përsipër të bëj më të madhin dhe të bind njeri. Janë liderët e Kosovës që vendosin”, tha Rama.