Messi “The Best” i FIFA. Ronaldo në shtëpi

Mbrëmjen e së hënës është mbajtur ceremonia e dhënies së çmimeve “The best”, e organizuar nga FIFA. Eventi është mbajtur në teatrin “La Scala” të Milanos. Lojtari më i mirë i vitit i cili rrëmbeu trofeun “The Best” u shpall Lionel Messi. Argjentinasi këtë trofe nuk e fitonte që prej vitit 2014. Gjatë këtyre viteve fitues kanë qënë Cristiano Ronaldo dhe një herë Luka Modric.

Për këtë çmim garonte dhe Virgil Van Dijk i cili është shpallur dhe lojtari më i mirë i Premier League. Në garë për këtë çmim ishte edhe Cristiano Ronaldo. Portugezi nuk ishte i pranishëm në ceremoninë e sotme pas një problemi shëndetësor që i është shfaqur. Lodhja e muskujve e ka bërë atë të mos jetë i pranishëm në këtë event por jo vetëm, ai gjithashtu nuk do të jetë i pranishëm në ndeshjet e fundjavës me ekipin e tij Juventus.

Çmimi “Puskas” shkoi për lojtarin e Debrecenit, Daniel Zsori i cili ka shënuar golin më të bukur të vitit ndaj skuadrës së Ferencvaros. Një tjetër trofe i fituar, këtë herë në futbollin e femrave iu dha Megan Rapinoe, futbollistes së ekipit amerikan Reign FC, e cila mori çmimin si lojtarja më e mirë e vitit.

Formacioni i vitit u shpall ky: Alisson, De Ligt, Sergio Ramos, Van Dijk, Marcelo, Modric, De Jong, Hazard, Mbappé, Messi dhe Cristiano Ronaldo. Ndërsa formacioni më i mirë në futbollin e femrave për sezonin që lamë pas është: Van Veenendaal, Lucy Bronze, Fischer, O’Hara, Renard, Ertz, Henry, Lavelle, Marta, Morgan dhe Rapinoe. Në këtë ceremoni u ndanë dhe disa çmime të tjera për trajnerët, futbollistët apo edhe çmimi tifozi më i mirë. çmimin për trajneren më të mirë të femrave e mori 53 vjecarja Jill Ellis të cilës ia dha Jose Mourinho.

Çmimi trajneri më i mirë i vitit e mori tekniku gjerman Jurgen Klop. Ai u shpall kampion i Europës me ekipin e Liverpool. Portieri më i mirë u shpall gardiani i Liverpool Alison Beker i cili garonte së bashku me Ter Shtegen të Barcelonës dhe Ederson të ekipit të Mancester City. Portierja më e mirë e vitit e mori Van Venedal, gardiania e Atletiko Madridit. Një çmim tjetër special ishte ai për tifozin më të mirë të vitit dhe ky trofe shkoi për Silvia Greko. Mamaja e një djaloshi të verbër, tifoz të ekipit të Palmeiras, e cila i shpjegon golat dhe rastet djalit të saj sa herë që ekipi i zemrës së tij ka ndeshje.

Renditja e FIFA/ Kosova vendos rekord, Shqipëria në vendnumëro

FIFA ka publikuar renditjen e përmuajshme të kombëtareve. Kreun e kësaj renditje mban Belgjika, e cila vijojnë të jetë në formë të shkëlyqer në ndeshjet ndërkombëtare. Në “Top 10”
skuadrat e para ka pasur disa ndryshime, ku Franca është ngjitur në vendin e dytë, pas Belgjikës, ndërsa Brazili ka zbritur në vendin e tretë. Dhjetëshja e parë plotësohet me Anglinë në vendin e katërt, Prtugalinë, Uruguay, Spanjën, Kroacinë, Kolumbinë dhe Argjentinën.

Ndërkohë, kombëtarja jonë përfaqësuese mbetet në vendnumëro, pasi nuk ka ndryshuar pozicion. Kuqezinjtë mbajnë vendin e 64 në renditjen e FIFA-s edhe për këtë muaj. Ajo që ka pasur një tjetër përmirësim, është përfaqësuesja e Kosovës. Daradanët janë ngjitur në vendin e 119-të. Kosova është ngjitur me një vend në renditjen e FIFA-s, duke tërhequr vëmendjen e Qeverisë Botërore të Futbollit.

FIFA e ka promovuar këtë rritje të Kosovës në faqen e saj zyrtare, duke shkruar “Kosova arrin rekordin e lartë”. “Kosova, në vendin e 119) është shpërblyer për paraqitjet e tyre të mira në kualifikueset e UEFA Euro 2020, duke arritur pozitën e tyre më të mirë, të pasur ndonjëherë”, shkruhet në faqen zyrtare të FIFA-s.

Racizmi në futboll, FIFA ashpërson masat për ekipet dhe lojtarët

Federata botërore e Futbollit ka ashpërsuar masat për kodin e ri disiplinor kundër racizmit. Kodi i ri, që nis aplikimin që më 15 korrik, parashikon të aplikojë pezullim me10 ndeshje për futbollistët që do të shpallen fajtorë për sjellje diskriminuese. Në lidhje me koret raciste të tifozëve sanksionet do të shkojnë deri në humbje ne tavolinë për ekipin.

Këto masa FIFA i merr në kuadër të minimizimit të koreve diskriminuese dhe raciste brenda stadiumeve.

“Çdo diskriminim nga shkallët e impianteve, për ngjyrën e lëkurës, origjinën etnike, gjeografike apo sociale, apo edhe orientinim seksual, do sjellë dënimin e ekipit.” – përcaktohet në masat e reja të FIFA-s.

Dënimet e parashikuara nga disiplina do të aplikohen vetëm në kompeticionet zyrtare të FIFA-s , përfshirë dhe ndeshjet kualifikuese për botërorin 2022.

Arrestohet zëvendës presidenti i FIFA-s në Francë, akuzohet për korrupsion

Presidenti i Konfederatës së Futbollit Afrikan, Ahmad Ahmed është arrestuar mëngjesin e të enjtes në Francë, pasi dyshohet që është i përfshirë në një marrëveshje korrupsioni. Raportimet e mediave njoftojnë se Ahmad Ahmed është arrestuar në orën 08:30 në hotel “Berris” në Paris, aty ku po qëndronte pas mbajtjes së Kongresit të FIFA-s, ku u ribesua Gianni Infantino edhe për një mandat në krye të qeverisë botërore të futbollit.

Arrestimi i Ahamd është bërë pasi lidhet me një çështje kontraktuale, pasi në postin e presidentit të CAF, ai dyshohet të ketë prishur një marrëveshje me prodhuesin e veshjeve sportive Puma, në favor të një kompanie tjetër.

Ahmad Ahmed, dyshohet se ka prishur në mënyrë të njëanshme marrëveshjen që CAF kishte me Puman, duke lidhur një tjetër kontratë me Tchnical Steel, një kompani franceze veshjes sportive.

Presidenti i Konfederatës Afrikane të Futbollit dyshohet se ka pasur njohje dhe afrimitet me një nga drejtuesit e kompanisë Technical Steel, duke i dhënë kësaj të fundit kontratën me vlerë prej rreth 739 000 eurosh.

FIFA ka reaguar me një deklaratë zyrtare për këtë arrestim, duke u shprehur se “FIFA nuk është në dijeni për detajet e këtij hetimi dhe prandaj nuk është në gjendje të bëjë ndonjë koment në mënyrë specifike”, është shprehur FIFA në deklaratën e saj.

Nga penalltitë deri te kartonët, ja si ndryshojnë rregullat në Futboll

Gjatë mbledhjes së FIFA në muajin mars, u vendosën disa ndryshime në rregullave të lojës së futbollit dhe nga sot ato hyjnë në fuqi për Botërorin e U20 dhe deri më 25 qershorit do të përfshijnë vetëm kompeticionet e FIFA-s dhe më pas do të përfshihen edhe kompeticionet UEFA. Prekja me dorë e topit, përplasja e topit me arbitrin dhe deri tek vendosja e kartonëve, ja si ndryshojnë rregullat e reja të lojës.

PREKJA ME DORË DHE GOLI
Vullneti nuk do të jetë më kriter: cilido gol i shënuar me një prekje me dorë, edhe në mënyrë të pavullnetshme, nuk do të vlerësohet.

SULMUESIT E BARRIERA
Për të evituar një sjellje të gjykuar anti-sportive, sulmuesit duhet të qëndrojnë të paktën një metër larg barrierës kundërshtare. Në të gjitha drejtimet.

RINISJA E TOPIT
Në rinisjen nga fundorja, topi nuk duhet të dalë më nga zona për tu luajtur: portieri mund ta pasojë topin edhe brenda zonës, por sulmuesi kundërshtar mund të ndërhyjë vetëm pasi të jetë bërë pasimi i parë.

FAULLI ME DORË
Faulli me dorë do të sanksionohet nëse është i vullnetshëm. Por nga sot do të dënohet gjithnjë cdo prekje me dorë nëse krahu është në lartësinë e supeve ose përtej e në çdo rast kur krahu është larg trupit e në pozicion jo natyral.

POZICIONI I PORTIERIT NË RAST PENALLTIE
Nga sot portieri mund të spostojë një këmbë përtej linjës së portës. Var mund të ndërhyjë për të përsëritur penalltinë në rast pritje, nëse të dy këmbët do të rezultojnë përtej linjës së portës në momentin e goditjes.

KARTONA EDHE PËR TRAJNERËT
Edhe për trajnerët në pankinë futet në fuqi rregulli i kartonëve: në fillim i verdhi e pastaj i kuqi. Kur përjashtohesh rekomandimi është gjithnjë skualifikimi për ndeshjen e ardhshme.

ARBITRI NUK BËN ‘MË’ LOJË
Deri më sot nëse topi përplasej me arbitrin loja vazhdonte. Nuk do të jetë më kështu: në rastin në të cilin prekja e arbitrit favorizon një asist ose edhe një gol për skuadrën tjetër, loja do të ndalohej. Në zonë topi është gjithnjë i portierit.

ZËVENDËSIMET MË TË SHPEJTA
Nuk do të jetë më e nevojshme të dalësh nga mesi i fushës në rast zëvendësimi. Për të fituar kohë lojtarët duhet të dalin jashtë në anën më të afërt.

NUK DO TË JETË MË TOPI I DISKUTUESHËM
Nga tani, arbitri duhet të përcaktojë se kush do ta riluajë topin e kundërshtari duhet të qëndrojë në distancë prej katër metrash.

Presidenti i FIFA uron Partizanin, Infantino: Vazhdoni me përkushtim

Presidenti i FIFA-s, Gianni Infatntino i ka dërguar një letër urimi Presidentit të FSHF-së Armand Duka dhe nëpërmjet tij uron dhe klubin e Partizanit, që u shpall kampion i Kategorisë Superiore për këtë sezon.

“U gëzova shumë kur mësova që KF Partizani u kurorëzua kampion i Shqipërisë për sezonin 2018/2019. Me gëzim të madh e përgëzoj ekipin për titullin kampion, të cilin e prisnin që nga 1993, dhe të 16-tin në total”, shkruan ndër të tjera Infantino në letrën e urimit për Partizanin.

Gjithashtu, kreu i qeverisë botërore të futbollit inkurajon klubin e Kuq, për të vijuar punën me vendosmëri dhe përkushtim, ndërsa shpreh mirënjohjen për Partizanin dhe FSHF-në, për shpërndarjen e mesazheve pozitive për futbollin.

Letra e plotë e Gianni Infantion:

I dashur President

U gëzova shumë kur mësova që KF Partizani u kurorëzua kampion i Shqipërisë për sezonin 2018/2019. Me gëzim të madh e përgëzoj ekipin për titullin kampion, të cilin e prisnin që nga 1993, dhe të 16-tin në total.

Kjo është pa dyshim rezultati i përpjekjeve dhe një pune të palodhshme, dhe i gjithë stafi dhe personat e përfshirë duhet të jenë krenarë për këtë arritje të madhe.

Përcillja përgëzimet e mia lojtarëve, trajnerit, administratorëve, stafit teknik dhe mjekësor , gjithashtu edhe tifozëve të saj.

I inkurajoj ata të vazhdojnë punën me vendosmëri dhe përkushtim.

Ne emër të komunitetit ndërkombëtar të futbollit, gjej rastin të falenderoj KF Partizanin dhe Federatën tuaj, për ndihmën e shpërndarjes së mesazheve pozitive për futbollin, dhe praktikimit të kësaj loje të bukur që na bashkon të gjithëve.

Me kënaqësi pres t’ju takoj së shpejti në Paris, me rastin e Kongresit të 69-të FIFA-s.

Me respekt,

Gianni Infantino

UEFA “gradon” Enea Jorgjin, i beson Spanjën në kualifikueset e Euro 2020

Enea Jorgji vijon të bëjë hapa të rëndësishëm në karrierën e tij si arbitër i FIFA, pasi së fundi i është besuar gjykimi i një tjetër ndeshje të rëndësishme ndërkombëtare. Arbitri elbasanas, së bashku me tre arbitra të tjerë shqiptarë, do të gjykojë ndeshjen kualifikuese të Euro 2020 mes Ishujve Faroe dhe Spanjës, që do të zhvillohet më 7 qershor.

Lajmin e ka konfirmuar për “RealStory.al” vetë Enea Jorgji, që prej vitesh mban stemën e FIFA. “Po, jam përzgjedhur për të gjykuar ndeshjen Ishujt Faroe-Spanjë. Unë do të jem arbitër kryesor në këtë takim. Asistentët e mi do të jenë Ridigert Çokaj nga Lezha dhe Rejdi Avdo nga Tirana. Arbitër i katërt do të jetë Juxhin Xhaja”, u shpreh fillimisht Enea Jorgji.

Për Enea Jorgjin kjo do të jetë hera e parë që gjykon Spanjën, ekip që ka fituar Kupën e Botës dhe të Kampionatin Europian të futbollit më herët, duke e shtuar shumë përgjegjësinë e arbitrit shqiptar. Megjithatë, më herët atij i janë besuar edhe sfida të tjera të rëndësishme, siç ishte ndeshja Hungari-Estoni vitin e kaluar, e vlefshme për Nations League.

Por ndeshja e radhës ndërkombëtare, do të jetë shumë e rëndësishme për arbitrin shqiptar, pasi performanca e tij do të jetë deçizive për karrierën. Pas kualifikueseve, gjatë muajit qershor pritet të ketë ndryshim në vazot e arbitrave të FIFA-s.

Aktualisht Enea Jorgji është në vazon e dytë dhe shpreson kapërcimin në vazon e parë, duke u bërë pjesë e arbitrave më të mirë në botë. Nëse kjo arrihet, Enea Jorgji së shpejti mund të gjykojë edhe ndeshje në nivele më të larta, në grupet e Champions League apo gara si Kampionati Europian apo Kupa e Botës.