Demi inspekton stadiumin e Partizanit: Kur do jetë gati

Kampionët e vendit në fuqi, Partizani, do të luajnë vitin e ardhshëm në stadiumin e tyre. Ky është lajmi që jep klubi i kuq këtë të premte, pas inspektimit të punimeve të stadiumit nga presidenti i Klubit Gazmend Demi.

“Presidenti Gazment Demi ndjek nga afër ecurinë e punimeve të stadiumit, në kompleksin e Klubit të Futbollit Partizani. Aktualisht po përfundojnë betonimet e Tribunës ballore. Po vijon puna për instalimet dhe pajisjet e Tribunës qëndrore, si edhe konstruksionet dhe mbulesa e të dyja tribunave të stadiumit. Punimet po vijojnë me intensitet të lartë dhe në fazën e tretë të kampionatit stadiumi do të jetë gati për të mirëpritur Kampionët e vendit”, shkruhet në një njoftim të klubit.

Ky është një lajm i madh për tifozët e Partizanit, që prej vitesh presin të ndjekin ekipin e zemrës në stadiumin e tyre. Impianti i ri i Partizanit do të ketë rreth 5 mijë vende. Stadiumi do të përbehet nga dy tribuna kryesore. Ajo VIP dhe ajo përballë saj.

Ndërkohë, si pjesë e këtij projekti është dhe një hotel për lojtarët si dhe disa fusha stërvitore për ekipin e parë dhe akademitë. Të dyja tribunat do të jenë të mbuluara.

Stadiumi i ri i Partizanit do të ketë të gjitha shërbimet që kërkon UEFA për licencim. Këto pritet të respektohen me rigorozitet, ndërkohë që të kuqtë do të luajnë aty jo vetëm ndeshjet e kampionatit por edhe ato në garat ndërkombëtare.

Gjashtë vjet te Partizani, largohet Labinot Ibrahimi, i falenderon të gjithë

Mbrojtësi Labinot Ibrahimi i ka dhënë fund aventurës me Partizanin pas gjashtë vjetësh pjesë e klubit të “demave”. Me anë të një postimi në faqen e tij në Facebook, mbrojtësi kosovar ka lajmëruar tifozët e Partizanit se duke nisur prej të mërkurës nuk do të jetë më pjesë e klubit.

“Të dashur miq, dashamir të mi dhe të skuadrës së Partizanit. Nga sot nuk do të jem më pjesë e këtij klubi. E falënderoj presidentin Gaz Demi për mbështetjen që më ka dhënë këto 6 vjet, falënderoj drejtorin Olsi Rama, falënderoj trajnerët me të cilët punova, shokët e skuadrës, gratë të cilat na bonin bukën e na lanin rrobat, punëtorët e fushës dhe çdo njeri që e rrethon këtë klub”, shkrun ndër të tjera Ibrahimi.

Më tej ai vijon me falënderimet, duke shprehur mirënjohjen për tifozët Ultras Guerrils, ndërsa e mbyll mesazhin e tij duke u shprehur se largohet me kokën lartë, pasi arriti qëllimin, fitoren e titullit kampion. “Unë po largohem nga klubi me të cilin u dashurova që në ditën e parë që erdha. Po largohem me kokën lartë, pasi ja arrita qëllimit që kishta, titullin kampion”, shkruan ndër të tjera Ibrahimi.

Olsi Rama: Ka qenë fat që kam punuar me Gaz Demin, secili bëri atë që i takonte

Olsi Rama është një nga hallkat kyçe të suksesit të këtij sezoni për Partizanin. Merkato, trajneri, shuarja e polemikave, disiplina dhe rregulli janë disa nga meritat kryesore të drejtorit sportiv të Partizanit gjatë këtij sezoni, duke e rikthyer klubin në fronin e fitimtarëve këtë sezon. Pas ndeshjes dhe marrjes në dorëzim të titullit kampion, numri dy i klubit të kuq ka folur për mediat duke analizuar gjithçka.

Trofeu për ju…

E kam ngritur një trofe në basketboll dhe ky është trofeu i dytë. Kënaqësi e veçantë, pasi kam kontribuuar me përulësi në shtëpinë e një mikut tim, për të ndihmuar në rikthimin e titullit te Partizani, pas shumë viteve.

Rrugëtimi i Partizanit…

Ka qenë një fat që kam punuar me Gaz Demin, miku im dhe presidenti i Partizanit. Ka qenë fat që kam punuar me Skënder Gegën dhe stafin e tij, por edhe me këta djem të mrekullueshëm. Ne vendosëm që të bënte gjithsecili detyrën që i takonte, por ndonjëherë edhe më tepër, gjithmonë duke shtuar dozën e profesionalizmit. Ky ishte edhe synimi ynë i vërtetë, por për fat të mirë ia dolëm të marrim edhe titullin në fund. Shpresoj të kemi ndërtuar një bazë për të ardhmen dhe të arrijmë edhe më shumë suksese.

Deklaratat e Dukës se “Partizani e fitoi vetë titullin?”

Unë nuk bëj polemika me askënd. Edhe vetë si tip jam i tillë. Qëllimi i Partizanit nuk ka qenë që të krijojë polemika, dhe synimi im ka qenë të mbajmë preisonin larg ekipit. Lojtarët kanë qenë më të qetë, dhe kështu kanë ardhur dhe rezultatet që duhej të vinin. Partizani nuk ka për synim që të bëjë polemika.

Partizani evropian?

Ekipi merr pushimet tashmë, të cilat i meriton plotësisht, pasi kanë kaluar një periudhë vërtetë të ngarkuar. Duhet që djemtë të shkojnë pranë familjeve, për t’u çliruar si fizikisht, ashtu edhe psikologjikisht dhe për të qenë gati për sezonin e ardhshëm. Pjesën e përforcimit të skuadrës ne e kemi në konsideratë çdo ditë, por tani është moment më “i nxehtë” dhe shpresoj që të marrim vendimet e duhura. Unë nuk do të përqendrohem për të ndërtuar një Partizan vetëm për Europën, por dua të sjell elementë që të mund të bëhen pjesë integrale e ekipit dhe të na shërbejë si në garat europiane, ashtu edhe sezonin e ardhshëm.