Skema fiktive me TVSH/ ‘Sëmuren’ në gjyq, lirohen 9 nga 15 biznesmenët e arrestuar

Gjykata e Tiranës ka dhënë masën e sigurisë për 15 biznesmenët e arrestuar pak ditë më parë, të cilët akuzohen se kanë ngritur një skemë fiktive financiare, duke i shkaktuar miliona euro dëme shtetit. Në përfundim të seancës gjyqësore, Gjykata e Tiranës ka vendosur të lirojë 9 nga 15 biznesmenët e arrestuar, duke u dhënë masën e sigurisë ‘arrest shtëpie’.

Konkretisht, janë lënë të lirë biznesmenët; Paqsor Buzi, aksioner me 50% i G.P.G Company; Astrit Lala, kompania Leksi ‘Security 1’; Haxhi Sala, kompania Leksi ‘Security’; Ilia Dimo, kompania IBS sh.p.k; Shkëlqim Prodani, kompania ‘Red Black’; Shpresa Joanidhi, kompania “Shpresa” sh.p.k; Rabi Kurti, kompania “Kurti Construction”; Riza Roshi, kompania “Dorgen” sh.p.k dhe Rrapo Baduni, kompania “Bani/s”.

Ndërkohë, Gjykata e Tiranës ka dhënë masën e sigurisë ‘arrest me 20 ditë burg’ për gjashtë biznesmenët e tjerë. Ata janë; Besnik Pelivani, kompania e ndërtimit A.B.BE; Fatmir Firi, kompania Arb &Trans Sh.p.k; Ardian Bejko, kompania “Babeko Trans”; Vasil Korita, kompania “Medi Pharma” ; Vangjush Mbriçe, kompania C.E.C Group dhe Mhill Ndreca, kompania “Kombeas”.

Ka qenë prokurorja Elisabet Imeraj, e cila në fillim të seancës gjyqësore kërkoi arrest me burg për 14 nga 15 biznesmenët e arrestuar. Por pasi biznesmenët kanë dhënë dëshmi në gjyq, prokurorja Imeraj ka kërkuar masë lehtësuese me ‘arret shtëpie’. Kjo gjë ndodhi pasi disa nga biznesmenët kishin probleme shëndetësore. Ndërkohë, gjatë ditës së shtunë është arrestuar dhe një tjetër biznesmenë, i dyshuar si i përfshirë në skemën e rimbursimit të TVSH, duke i shkaktuar shtetit një dëm prej rreth 30 milion euro.

Mandati i dytë në krye të Tiranës, Veliaj kërkon miratimin në gjykatë

Erion Veliaj në zgjedhjet e 30 qershorit fitoi mandatin e tij të dytë në krye të Bashkisë së Tiranës. Pas certifikimit të rezultatit nga Komisioni Qendror i Zgjedhjeve, Veliaj ka kërkuar legjitimitetin e mandatit të tij edhe në Gjykatën e Tiranës.

Njohja e mandati nga gjykata është hapi i fundit ligjor për miratimin e kandidatëve fitues në krye të bashkive përkatëse. Kërkesa e Erion Veliajt është dorëzuar ditën e mërkurë në Gjykatën e Tiranës.

Në zgjedhjet lokale të 30 qershorit, Erion Veliaj kandidonte përball rivalit të tij Arben Skënderi, nga Bindja Demokratike. Veliaj u shpall fitues me 152,230 vota , ndërsa Arben Skënderi mori 9364 vota.

Më herët, gjatë ditës së mërkurë, Gjykata e Tiranës ka mohuar t’i jap mandatin kryebashkiakut të ri të Vorës, Agim Kajmaku duke shpallur moskompetencë për kërkesën e dërguar nga kandidati i PS.

Cilës gjykatë t`i besojmë? Tre vendime të ndryshme për zgjedhjet e 30 qershorit

Gjyqtarja Mimoza Margjeka në Gjykatën e Durrësit, vendosi të mos i jepte mandatin e kryetares për Bashkinë Durrës, të zgjedhurës së PS në 30 qershor, Valbona Sako. Në vendimin e Gjykatës së Durrësit argumentohet se zgjedhjet e 30 qershorit janë të paligjshme, pasi sipas gjyqtares Margjeka, partia Bindja Demokratike nuk është regjistruar brenda afateve ligjore për të marrë pjesë në zgjedhje.

Ky vendim, bie ndesh me vendimet e gjykatave të tjera në vend, që deri më tani kanë konfirmuar disa nga bashkiakët e rinj të zgjedhur në 30 qershor. Megjithatë, veç këtij precedenti, një tjetër precedent është vendosur nga Gjykata e Tiranës. Ajo ka shpallur moskompetencë për kërkesën e kandidatit të PS, në bashkinë e Vorës Agim Kajmaku, duke refuzuar njohjen e mandatit të tij në mënyrë indirekte dhe dërgimin e kërkesës në Gjykatën Administrative.

Gjykata bazuar në nenet 61/1 e 62 të Kodit të Procedurës Civile, nenit 60(1), të ligjit nr.139/2015 “Për vetëeverisjen vendore”, si dhe nenin 72 të ligjit nr.49/2012 “Për organizimin dhe Funksionimin e Gjykatave Administrative dhe Gjykimin e Mosmarrëveshjeve Administrative”, i ndryshuar, vendosa: Shpalljen e moskompetencës lëndore për shqyrtimin e çështjes me nr.10727 akti, dt. Rregj 11.07.2019, me kërkues Agim Kajmaku”.

“Dërgimin e akteve për kompetencë Gjykatës Administrative të Shkallës së Parë Tiranë. Kundër këtij vendimi mund të bëhet ankim i veçantë në Gjykatën e Lartë, brenda 5 ditëve duke filluar ky afat nga e nesërmja e komunikimit të vendimit të arsyetuar. U shpall sot në Tiranë më 15.072019”, shkruhet në vendimin e gjyqtares Ariana Gunbardhi (Caco).

Tre vendime të ndryshme, kaotike në përmbajtjen e tyre, që vërteton dhe njëherë se sistemi gjyqësor në Shqipëri i lexon ligjet në kontekste të ndryshme. Gjithashtu, tre vendimet e ndryshme, (nga njohja e mandateve, moskomptenca dhe refuzimi i tyre), të bëjnë të ngresh pyetjen, cilës gjykatë t`i besojmë?/Realstory.al/

GJYKATA E DURRËSIT DEL MBI KQZ

Admir Thanza dënohet nga Gjykata, i pari gjyqtar që e pëson nga Vettingu

Duket se Reforma në Drejtësi ka nisur të japë sinjalet e para të funksionimit të saj, pasi këtë të premte Gjykata e Tiranës ka vendosur të dënojë me 18 muaj shërbim prove ish-gjyqtarin, Admir Thanza.

Ky i fundit ishte pjesë e sistemit të drejtësisë, duke mbajtur disa poste të larta deri si Gjyqtar i Gjykatës së Lartë, nuk arriti të kalonte në “sitën” e Vettingut, pasi Komisioni i Pavarur i Kualifikimit zbuloi një dënim të vjetër të gjyqtarit Thanza.

Ai ishte dënuar në vitin 1999 nga drejtësia italiane me akuzën e vjedhjes së sendeve dhe produkteve kozmetike në një supermarket në zonën e Pescarës.

Kështu, vendimi i sotëm erdhi pasi Prokuroria e Tiranës pretendonte se Admir Thanza kishte fshehur me ndërgjegje vendimin e dhënë nga drejtësia italiane.

Për këtë arsye akuza shqiptare nisi një letër-porosi në shtetin fqinj, ku faktoi dënimin e ish-gjyqtarit Thanza.

Ndërkohë, vendimi i sotëm i Gjykatës së Tiranës, nuk është në përputhje me dënimin e kërkuar nga Prokuroria, pasi kjo e fundit kërkonte dënimin me 18 muaj burg për “falsifikimin e formularëve”.