Fact Checking/ 3 listat e zeza të Bashës, nga oligarkët, kryebashkiakët dhe së fundi… mediat

Kryetari i opozitës jashtparlamentare, Lulzim Basha, i cili nxorri PD-në jashtë çdo pushteti dhe institucioni së fundi ka nisur të flasë si kryeministër dhe si kryeprokuror dhe në këto pozicione të reja që i ka dhënë vetes ka përpiluar edhe lista të zeza me emra konkretë. E ka nisur me oligarkët që janë sipërmarrës dhe biznesmenë të këtij vendi që kanë firmosur kontrata dhe kanë bashkëpunuar me të gjithë që kanë qenë në pushtet si me Ramën, si me Berishën ashtu dhe me vetë Bashën. Por ky i fundit një sërë prej tyresh i ka vënë në listë të zezë duke i kërcënuar madje se kur ai të bëhet kryeministër do t’i anulojë të gjitha koncesionet. Me emër e mbiemër PD ka hartuar listën e zezë të oligarkëve sipas Bashës.

Lista e biznesmenëve, që PD thotë se do iu sekuestrojë pasurinë

Vilma Nushi – përfituese e koncesionit të Check-Up it (120 milionë euro);

Shefqet Kastrati dhe Pëllumb Salillari – përfituesit e koncesionit të ndërtimit dhe mirëmbajtes së rrugës Milot- Morinë;

Shkëlqim Demir Fusha – përfituesi kryesor nga Ligji për prishjen e Teatrit Kombëtar

Klodian Zoto – përfitues i koncesioneve të ndërtimit dhe menaxhimit të inceneratorëve të Tiranës (128 milionë euro), Fierit (28 milionë euro) dhe Elbasanit (22 milionë euro);

Bashkim Ulaj – përfitues i koncesionit të ndërtimit të rrugës Tiranë- Thumanë- Vorë (225 milionë euro);

Idajet Ismailaj – përfituesi i ndërtimit të stadiumit kombëtar dhe kullës 24-katëshe;

Gentian Sula – përfitues i koncesionit të kontrollit të instrumenteve matës të karburantëve dhe gazit të lëngshëm;

Arjan Leskaj – përfitues i ndërtimit të hekurudhës Fier- Ballsh- Vlorë

Edmond Bego – përfitues i lejeve minerare në Elbasan;

Rrok Gjoka – përfitues i ndërtimit dhe menaxhimit të Rrugës së Arbrit (268 milionë euro);

Ilir Rrapaj – përfitues i koncesionit të sterilizimit (77 milionë euro);

Jani Karathano – përfitues i koncesionit të shërbimeve laboratorike (104 milionë euro).

Më pas vijoi me sulmet ndaj kryebashkiakëve socialistë, të cilët nuk pati kurajën t’i luftonte në garën e zgjedhjeve të 30 qershorit, duke refuzuar në mënyrë të paprecedentë që partia më e madhe opozitare në vend të futet në zgjedhje. Por fill pasi dështoi me pengimin e zgjedhjeve si dhe me mos mbajtjen e premtimit për të mos i liruar zyrat e kryebashkiakëve demokratë në fund Basha u tërhoq duke lënë të vetëm edhe militantin më të thekur demokrat, Xhelal Mziu. Ky i fundit testoi deri në minutën e fundit mbështetjen e demokratëve, por e pa se nuk pati asnjë mbështetje nga lidershipi i partisë që nuk dërgoi në Kamëz as sa për një show mediatik asnjë nga figurat drejtuese, u largua nga zyra duke lënë përmbys foton e Ilir Metës që siç duket është kuptuar se ai është përgjegjësi i gjithë kësaj situate në të cilën ndodhet vendi. Si përfundim edhe për kryebashkiakët Basha ka një listë të zezë.

Lista e zezë e kryebashkiakëve të PS

Valdrin Pjetri kryebashkiaku i Shkodrës: Ka fshehur të kaluarën për trafik droge.

Pjerin Ndreu kryebashkiaku i Lezhës: Në listën e zezë të partnerëve prej vitit 2003 dhe i larguar nga policia për përfshirje në trafiqe, i kapur në përgjime në dosjen 184 duke urdhëruar shkarkimin e mësuesve që nuk votojnë për PS.

Artur Bushi i Krujës: Mbaroi një mandat si bashkiak, trafikant në Itali

Dionis Imeraj, Valbona Sako, të dy të kapur në përgjimet e Dibrës, të dy mbrohen dhe promovohen nga Edi Rama.

Tërmet Peçi, Klement Ndoni, trafikantë droge, në vend që të shkojnë para drejtësisë, mbrohen dhe rikandidohen.

Agim Kajmaku, i kandiduar në Vorë, i dënuar në Greqi.

Rakip Suli i Kamzës, i kapur në vjedhje flagrante me tendera dhe qira shtetërore, në konflikt të hapur interesi me statusin e deputetit, në vend që të largohej si deputet dhe të ndiqej penalisht, e mbron dhe e promovon Edi Rama.

Dhe më e fundit është lista e zezë e medieve. Më herët Basha ka folur kundër tyre dhe i ka akuzuar se janë të kapura nga Rama, ku çdo kush në këtë vend e di se siç ka media të PS-së ashtu ka dhe media me shumicë që i shërbejnë PD-së. Por rasti më i fundit ishte konferenca për shtyp e së premtes ku Basha lëshoi akuza për merecenarë mediesh që paguhen nga Rama dhe oligarkët e tij dhe që punojnë me 3 skema sulmi ndaj tij. Basha përfshiu dje në këtë listë Tema tv duke iu përgjigjur gazetarit që e pyeti nëse PD do t’i rikthehet protestave në shtator pasi gjatë gushtit dhe gjatë korrikut nuk ka pasur të tilla. Por përgjigja e Bashës ishte kjo: “Që opozita do të vazhdojë me protestat dhe jo do t’i rikthehet, sepse nuk është larguar asnjëherë, për këtë nuk ka pikë dyshimi. Ndërsa ajo që thashë, që të jemi të qartë, – t’i do të jesh i qartë pavarësisht se TV do ta shtrembërojë, sepse hyn tek klientët më besnikë të qeverisë, ndër më të hershmit e qeverisë, të paktën këtë duhet t’ia njohim si meritë që ka qenë klient i Edi Ramës që në opozitë – është se në kërkojmë një zgjidhje politike”, tha Basha, por e vërteta është se PD i ndërpreu protestat dhe këtë Basha s’mund ta mohojë, sikurse bën.

Përsëri i pyetur nga TEMA TV nëse ka ndonjë informacion nëse pronari real i kompanisë Jehona Shpk, mund të jetë zoti Dollapi? Basha tha: “Jo! Kjo është një shpifje totale, tipike për pronarin e Temës, sepse ai është mësuar me lojëra të tilla”.

I pyetur nga një tjetër gazetar nëse ka një përçarje mes partive të opozitës nisur nga fakti se aleatët e tij janë regjistruar për zgjedhjet e 13 tetorit dhe PD jo, madje ata kanë pranuar bisedime me Ramën kryeministër dhe PD jo, Basha përgjigjet:

“Ndaj qëndrimi i Opozitës së Bashkuar është ai që sapo ju shpreha dhe gjithçka tjetër është pa vlerë në këtë diskutim. Mund të ketë vlerë gazetareske për të mbushur lajmet e ditës, por nuk ndryshon asgjë në qëndrimet tona politike, të cilat janë të pandryshuara dhe janë të marra me konsensus dhe unanimitet të plotë në gjirin e një opozite të bashkuar, ndryshe nga çfarë synon ta shesë Edi Rama me mercenarët e tij politikë dhe mediatikë, për të cilët po hidhet para e madhe këta muaj të verës për të përdorur të vetmen levë që i ka mbetur, përçarjen e opozitës, përçarjen e Partisë Demokratike”.

Po kështu edhe KLAN plus është në listën e zezë të Bashës. Gazetari e pyeti të premten se pas gënjyet për 30 qershorin se nuk do njihet dhe pasi gënjyet se nuk do lironi zyrat e bashkive pse duhet t’ju besojnë demokratët dhe shqiptarët, kur ju thoni se nuk do të ketë një marrëveshje me kryeministrin Rama?

Basha shprehet: “Sepse të dyja parashtrimet që bëre janë të gabuara dhe vijnë direkt nga kuzhina e Edi Ramës. Dhe është një linjë grafike e mënyrës sesi mundohet ta zhvendosë vëmendjen e diskutimit nga ajo që është tek ajo që do të jetë ai”.

Më herët në një deklaratë të bërë në 20 qershor Basha ka sulmuar ashpër dhe dy televizionet Tv Klan dhe Top Channel duke i cilësuar ato si “vegla qorre” të Ramës. Pra lista e zezë e medias është e 3-ta e hartuar deri tani nga Basha që është ende një opozitë jashtëparlamentare. Deri sa të vijë në pushtet ndoshta do të ketë të tjera lista, ose ndoshta edhe këto që ka tani zhbëhen. Kjo mbetet për t’u parë./Realstory.al

Lista e zezë e DASH, Kulluri-Bashës: Mos u gëzo për Dakon, mund të jesh dhe vetë

Ish-anëtari i Këshillit Kombëtar të Partisë Demokratike, Edvin Kulluri, ka reaguar në lidhje me deklaratën e Lulzim Bashës për shpalljen ‘non grata’ të Vangjush Dakos nga SHBA. Kulluri, i drejtohet Bashës duke u shprehur se “nuk duhet të gëzohet”, pasi në listën e zezë të Departamentit Amerikan të Shtetit, mund të jetë dhe vetë kryedemokrati. “Mos u gëzo shumë për Dakon në Listën e Zezë të SHBA, se mund të jesh dhe vetë, jo për gjë, po nuk e zgjidh dot me një gënjeshtër tjetër po të doli emri”, shkruan Kulluri në rrjetet sociale.

Të martën Departamenti Amerikan i Shtetit publikoi vendimin e Sekretarit të Shtetit, për t`i ndaluar përfundimisht hyrjen në SHBA Vangjush Dakos dhe familjes së tij, pasi sipas DASH, Dako është i përfshirë në afera korruptive. Pas këtij vendimi, në mbrëmjen e së martës, reagoi dhe Lulzim Basha, i cili e quajti “lajm të mirë dhe të keq”, vendimin e Departamentit Amerikan të Shtetit për Vangjush Dakon.

Megjithatë, Edvin Kulluri, nëpërmjet statusit në Facebook, sjell në kujtesën e kryedemokratit deklararat që bëri Zëvëndës Ndihmës Sekretari Amerikan i Shtetit, Matheë Palmer, që dy ditë para zgjedhjeve të 30 qershorit, u shpreh se “nëse PD dhe LSI do të kryenin akte dhune gjatë procesit zgjedhor, ato do të futeshin në listën e zezë të SHBA, duke ndërprerë marrëdhëniet me amerikanët”.

Opozita dhe tre hapat para të Ramës

“Unë jam tre lëvizje para të tjerëve”, u shpreh Edi Rama në studion e “Real Story” të gazetarit Sokol Balla disa javë më parë. Kjo deklaratë e kryeministrit të vendit, u bë vetëm dy ditë para se Ilir Meta të njoftonte se do të anulonte 30 qershorin, ndërsa opozita përgatitej për protestën e 8 qershorit, e cila ishte paralajmëruar se do të ishte e dhunshme. Po çfarë nënkuptonte Edi Rama me “unë jam tre lëvizje para të tjerëve”?. Le të bëjmë një vështrim të ligjërimit të kryeministrit Edi Rama gjatë fushatës elektorale të këtij muaji, të lidhur me ngjarjet politike që pasuan. Tre janë kolonat kryesore të fjalimit, që Kryeministri Edi Rama ka mbajtur gjatë gjithë fushatës së tij në çdo bashki ku ka prezantuar kandidatët e PS për zgjedhjet e 30 qershorit.

I pari: Edi Rama ka theksuar vazhdimisht, prej shtatë letrave për dialog dërguar Lulzim Bashës, e deri afër këtij fundi fushate, se zgjedhjet elektorale do të mbahen më 30 qershor. “Zgjedhjet do të zhvillohen më 30 qershor për të mos lejuar precedentin e shtyrjes së tyre sa herë që një parti politike mund ta kërkojë më pas atë. Mund të dalim ne në 2021 dhe të themi s`duam zgjedhje”, është shprehur vazhdimisht kreu i qeverisë, duke e argumentuar këtë edhe me të drejtën kushtetuese për të zhvilluar zgjedhje sipas kornizave ligjore. Pra, edhe pas nxjerrjes së dekretit të Ilir Metës për anulimin e zgjedhjeve, e drejta Kushtetuese prevaloi, pasi dekreti mori dy përgjigje, të parën nga KQZ dhe të dytën nga Kolegji Zgjedhor, duke e bërë nul anulimin e 30 qershorit. Po në këtë pikë, Edi Rama ka pasur dhe mbështetjen e faktorit ndërkombëtar, që është angazhuar për zhvillimin e zgjedhjeve, duke folur prerë për mbajtjen e tyre në datën e përcaktuar sipas kornizave kushtetuese.

Hapi i dytë: “Kush do të guxojë të prek zgjedhjet më 30 qershor, do ti hiqet e drejta për të shkuar përjetësisht në SHBA”, ka thënë Edi Rama pothuajse në çdo takim elektoral. Kjo deklaratë është bërë prej nisjes së fushatës, ndërsa theksin më të madh e ka marrë pas dekretit të Ilir Metës për të anuluar 30 qershorin. Në fakt, deri para pak ditësh, kjo shprehje e kreut të qeverisë dukej si një pjesë e rëndomtë e fjalimit. Në fakt, rastësisht ose jo, kjo shprehje mori kupti vetëm pak ditë më parë, kur pas protestës së fundit të opozitës, mediat publikuan një lajm se: “PD dhe LSI do të futeshin në listën e zezë të organizatave kriminale nga SHBA, nëse do të përdornin dhunë dhjetë ditët e fundit të fushatës”. Pavarësisht se lajmi nuk u konfirmua zyrtarisht, as nuk u mohua. Madje mori fuqi besimi në momentin që Lulzim Basha dhe Monika Kryemadhi ndërhynë vrullshëm në lidhje telefonike në emisione televizive, një ditë para protestës ku shprehën: “Në protestë do të dalim me fëmijët tanë, do të jetë paqësore”. Kështu ndodhi, protesta ishte e përkyre, asnjë kapsolle, gjithçka në paqe. Pra, atë që Rama e kishte lajmëruar kohë më parë “se askush nuk do shkelte në SHBA nëse përdorte dhunë në zgjedhje”, e konfirmoi Basha e Kryemadhi me lëvizjen e tyre për të ndalur dhunën ndaj KZAZ-ve por dhe në protestë. Pra, Rama e dinte se çfarë e priste PD dhe LSI nëse do të guxonin të kryenin apo kryejnë akte dhune për të penguar zgjedhjet.

Hapi i tretë (jo më pak i rëndësishmi): “Ata nuk i duan zgjedhjet, sepse i tremben drejtësisë së re. Bashkimi Europian do të na kërkojë rezultate konkrete nga Reforma në Drejtësi, dhe ne duhet tu tregojmë atyre se ligji është i barabartë për të gjithë”, është shprehur gjithashtu vazhdimisht Kryeministri Edi Rama gjatë fjalimeve në fushatën elektorale. Madje, kjo pjesë e fjalimit të tij, ka dalë në plan të parë ditët e fundit, e sidomos pas vendimit të Këshillit të Europës që la si afat muajin tetor për çeljen e negociatave për integrim të Shqipërisë me Bashkimin Europian. Kreu i qeverisë e ka pasur më të qartë se askush tjetër, duke e pohuar publikisht se hapja e negociatave do të kërkojë rezultate konkrete nga Reforma në Drejtësi. Praktikisht, ajo çka kreu i qeverisë ka lajmëruar që nga nisja e fushatës, po merr jetë në ditët e fundit të saj. Ambasadori i Bashkimit Europian në Shqipëri Luigi Soreca zhvilloi një takim të martën me kreun e Këshillit të Lartë të Prokurorisë, ku në fokus të bisedës së tyre ishte pikërisht ngritja e Prokurorisë së Posaçme që do të hetojë krimin e organizuar dhe korrupsionin në vendin tonë. Po të martën, RealStory.al publikoi një shkrim ku njoftonte kalimin e Vettingut të dhjetë prokurorëve të parë, të mjaftushëm për të krijuar SPAK-un. Pra, edhe në këtë pikë, Kryeministri Edi Rama ka qenë i qartë, teksa ngjarjet po tregojnë se tre hapat para të tij, kanë qenë pikërisht, vendosmëria për të mbajtur zgjedhjet më 30 qershor, lista e zezë e SHBA-së dhe ngritja e institucioneve të reja të drejtësisë, që do të dënojnë korrupsionin dhe krimin e organizuar, si e vetmja rrugë për të çelur negociatat me BE. Pra, Rama paralajmëroi gjithçka!

LISTA E ZEZË/ Pse e “zëvendësoi” Lulzim Basha molotovin me familjarët në protestë?

Nga Ardit Rada/

Nëse e dëgjoni Lulzim Bashën se do të marrë bashkëshorten në protestë, ta dini se të nesërmen nuk do të ketë molotovë dhe kapsolla. Do të jetë gjithçka e qetë, tamam si një protestë europiane.

Kështu do jetë dhe sonte, kur opozitarët të parakalojnë në Bulevardin e Tiranës. Me një dalje në stil të gjerë në emisionet e darkës një ditë më parë, Basha, Kryemadhe dhe disa zyrtarë të tjerë të opozitës habitën njerëzinë kur veshën kolektivisht lëkurën e qingjit, duke përsëritur pafund frazën “nesër s’do të ketë asnjë akt dhune në protestë”! Kjo ndodhi pasi na kanë thënë nja njëqind herë se nuk e drejtojnë ata “zemërimin e Sovranit” dhe se nuk kanë asnjë influencë mbi dhunën në protesta!!!

“Unë do dal me vajzat e mia, me gruan time në protestë. Kemi marrë të gjtha masat për të parandaluar incidente. Nuk ka shërbëtor nga Beogradi që të vijë dhe ta mbrojë më Ramën. Fundi i tij do të vuloset nesër me një protestë qytetare paqësore” – tha dje Basha, duke futur pa vend edhe Beogradin në punët e krizës shqiptare. Por edhe duke iu dhënë të huajve mesazhin më të fortë që mund të japë: Më besoni se do jemi të qetë, po marr me vete edhe gruan e fëmijët…

Në fakt skenari mund të jetë pak më i ndryshëm, sesa ai i një krize të papritur moderimi të liderëve të opozitës. Thuhet se ambasadat më të rëndësishme perëndimore në Tiranë kanë dalë mbrëmjen e djeshme jashtë rreshtave të deklaratave të zakonshme. Përflitet se një kërcënim i hapur është bërë nga një ambasadë e fuqishme në Tiranë, për t’i skeduar partitë opozitare në listën e zezë të organizatave e lëvizjeve politike në botë. Dhe një hap i tillë dihet se çfarë pasojash imediate sjell për cilindo që e sheh veten në listë.

Këto fjalë i përforcoi sot dalja e zakonshme e ambasadave, para protestës, me deklarata të forta që dënojnë dhunën mbi KZAZ-të në disa qytete të vendit dhe bëjnë thirrje të mos cënohet procesi elektoral.