Pas thirrjes në gjuhën turke të Macron, Erdogan zbut tonet dhe del me njoftimin e papritur për tensionet me Greqinë

Presidenti i Turqisë, Rexhep Taip Erdogan, duket që i ka ulur tonet e larta dhe ka ndryshuar strategji përsa i takon mosmarrëveshjeve me Greqinë, në lidhje me kërkimet ne Mesdheun Lindor.

Dy postime në Twitter të Erdogan u bënë përshtypje të gjithëve, kur krejt papritur shkruan për zgjidhje diplomatike mbi situatën e krijuar, duke ulur tonet e lënë mënjanë demonstrimin e forcës.

“Turqia është një vend me histori mijëra vjeçare, shkruan ai në Twitter dhe shton se, pa dashur të krijojë probleme, do të vazhdojë t’i zgjidhë keqkuptimet me urtësi dhe mënyrë të kulturuar, duke marrë parasysh çdo kërkesë të sinqertë, me qëllim që t’i japë diplomacisë më shumë hapësire për zgjidhje nga te cilat të gjithë të dalin të fituar.

Postimet e presidentit turk në fakt duken si një përgjigje ndaj postimit të mëhershëm të presidentit francez, Macron, i cili i bënte thirrje Turqisë që të ulej në tryezë për një dialog të përgjegjshëm për t’i dhënë zgjidhje situatës.

Negociatat, reflekton Macron: Dëshiroj të kemi unitet në samitin e Zagrebit

Gjatë një vizite zyrtare në Kroaci, Presidenti i Francës Emanuel Macron u shpreh “se dëshiron që Samiti i Zagrebit të jetë i suksesshëm”. Gjatë takimit me kryeministrin e Kroacisë, Andrej Plenkovic, Macron deklaroi se “ndante të njëjtin mendim që gjatë samitit të ardhshëm të liderëve të BE, të arrihet unitet për të mirën Evropës”. Por, Presidenti i Francës është shprehur se ndryshimi i mteodologjisë së procesit të negociatave është një parakusht për fillimin e negociatave me vendet kandidate.

“Unë do të doja të nënvizoja dëshirën e Francës që samiti në Zagreb të ishte një sukses. Unë i ndaj përpjekjet tuaja që samiti në Zagreb në maj të arrijë unitet. Ne presim që të kemi përfundime konkrete për metodologjinë e re të zgjerimit të cilën e kemi propozuar me qëllimin që të mos vazhdojë më të jetë burokratike por të sjellë përfitime konkrete për qytetarët e vendeve kandidate. Në ditët në vijim edhe komisioni do të japë rekomandimet mbi metodologjinë e re, ku do të bashkëngjiten edhe propozimet e vendeve të tjera anëtare”, tha Macron.

Në samitin e tetorit të kaluar, Franca, së bashku me Hollandën, bllokuan fillimin e negociatave të pranimit me Maqedoninë Veriore dhe Shqipërinë. Kroacia, e cila mori presidencën gjashtëmujore të Këshillit të BE më 1 janar, dëshiron të zhbllokojë procesin sepse beson se për këto vende perspektiva europiane është e vetmja alternativë. “Unë jam i kënaqur që Presidenti Macron shprehu optimizëm për suksesin e samitit të Zagrebit. Për ne, ky takim është jashtëzakonisht i rëndësishëm. Është në interesin tonë që këto vende të jenë të qëndrueshme, të ndërmarrin reforma ekonomike dhe sociale”, tha kryeministri i Kroacisë, Plenkoviç.

Duke folur për çështjen e zgjerimit, ai tha se kishte biseduar me Macron për ndryshimin e metodologjisë së procesit të pranimit, të cilën Franca e konsideroi si parakusht për të filluar negociatat me Shkupin dhe Tiranën. Komisioni Evropian pritet të dalë këtë muaj me një propozim për të ndryshuar procesin e pranimit, dhe në shkurt të publikojë një raport shtesë për Maqedoninë Veriore dhe Shqipërinë.

Lider i Evropës apo mbrojtës i interesave tradicionale franceze?

Ku dëshiron ta çojë BE dhe NATO-n me prishjen e statuskuosë aktuale Presidenti francez Macron? Veprimet e fundit të tij janë në kontradiktë me qëndrimet e mëparshme franceze ndaj Evropës, shkruan Auron Dodi.

Gjermania iu përgjigj këtë javë zyrtarisht pikëpyetjes franceze për të ardhmen e NATO-s. Ministri i Jashtëm i Gjermanisë, Heiko Maas deklaroi në takimin e ministrave të Jashtëm të NATO-s se NATO-ja duhet të zhvillohet, në pikëpamje konceptuale dhe politikisht, me “qeliza politike të gjalla”. Gjermania kërkon që NATO-ja të mos fiksohet vetëm në politikën e mbrojtjes, por të theksojë funksionin e saj politik. Për këtë ministri Maas propozoi ngritjen e një komisioni ekspertësh, të kryesuar nga Sekretari i Përgjithshëm i NATO-s, Jens Stoltenberg: për të paraqitur propozime si politike, ashtu edhe për çështje transatlantike.

Ky propozim gjerman pranon atë që thonë francezët: se ka probleme në bashkëpunimin brenda NATO-s. Shkasin për kritikën e fundit me “fjalë drastike” ndaj NATO-s, Presidenti francez Macron e mori nga dy veprime të pakoordinuara me aleancën të dy anëtarëve të NATO-s: SHBA dhe Turqisë. Presidenti Trump i tërhoqi trupat nga Siria dhe Presidenti turk Erdogan marshoi në Siri pa u konsultuar me Aleancën. NATO-ja është e vdekur klinikisht dhe nuk dihet nëse funksionon klauzola e mbrojtjes reciproke ndaj një shteti anëtar, deklaroi në këtë kuadër Presidenti Macron në intervistën, tashmë të famshme, me gazetën britanike “Economist”.

Reformim, por jo pikëpyetje NATO-s

Funksionin e prishjes së statuskuosë, apo “disruptiv” siç cilësohet në Evropë stili i ri i Macronit, intervista me britanikët e arriti. Gjermania përpiqet tani me propozimin e saj ta fusë debatin në linja konstruktive, në mënyrë që besimi ndaj NATO-s të mos tronditet në themel. Gjermania kërkon reformim të NATO-s, nuk pranon ta vërë në diskutim atë. NATO-s si aleancë ushtarake nuk i vihet pikëpyetje, edhe nëse Macroni ka të drejtë në 95% të atyre që thotë, deklaroi edhe ministri i Jashtëm i Luksemburgut, Jean Asselborn. Ne shtrojmë pyetjen a mund të mbështetemi vërtet te një aleate si Franca, që gjithsesi investon pak për Aleancën, ishte reagimi i zemëruar që erdhi nga Varshava. Përballë kësaj, sekretarja franceze e shtetit për Evropën, Amélie de Montchalin argumenton se Macroni i shtroi qëllimisht tani pyetjet e tij: në prag të kremtimit pas dy javësh të 70 vjetorit të Aleancës dhe para fillimit të punës së Komisionit të ri Evropian.

Aftësia e Macronit për t’u vënë gjërave emrin që kanë dhe guximi i tij ka simpatizantë edhe në Gjermani. Por ajo që çudit me veprimet e Macronit këtë vit është se mjaft vetëve ai u kujton rolin që luanin në BE deri tani britanikët e parehatshëm: ata kundërshtonin (shpesh me sukses) përpjekjet për politika të përbashkëta evropiane, p.sh. në mbrojtje, të cilat do të lejonin thellimin e unifikimit në BE. Kjo në një kohë kur deklaratat e Macronit janë të kundërta me veprimet e tij bllokuese këtë vit: ai ka këmbëngulur për thellimin e BE, në mbrojtje, në fushën e sigurisë dhe me bashkimin bankar.

Veprimet e Macronit janë kontradiktore. Ai flet për forcimin e BE, por veprimet e tij dobësojnë pozicionin evropian duke bllokuar hapjen e negociatave me Maqedoninë e Veriut dhe me Shqipërinë.

Macroni kërkon një ushtri të fortë evropiane, por ushtarakisht nuk e forcon kontributin evropian në NATO: Franca nuk pranon p.sh. të drejtojë batalione të përbashkëta të NATO-s në Estoni. Ai kërkon autonomi ushtarake nga SHBA. Por pa SHBA, ushtritë e dobësuara evropiane nuk e mbrojnë dot kontinentin. A është Franca në fakt më e interesuar që të marrë rolin e superfuqisë ushtarake në një Evropë të dobësuar? A po sheh fuqi të tjera, si p.sh. Rusinë në këtë rol? Cilat janë me të vërtetë synimet e Macronit?

Kufizimi i fuqisë politike të Gjermanisë – motiv frymëzues për Macronin?

Te shumë vëzhgues po forcohet përshtypja se motiv frymëzues për Macronin është bërë dëshira për të kufizuar fuqinë politike të Gjermanisë në Evropë. Kjo ka qenë traditë e politikës franceze, veçanërisht deri në ribashkimin e Gjermanisë. Veprimi i fundit bllokues i Presidentit francez, vetoja për fillimin e negociatave për anëtarësim të BE me Shqipërinë dhe Maqedoninë e Veriut shihet si një hap tjetër në këtë drejtim. “Nëqoftëse se Gjermania do të zgjerojë sferën e saj të influencës, nuk mund ta bëjë këtë falas”, i tha një politolog francez së përditshmes Le Monde. Ai nuk përmendi përpjekjen e Francës për të rigjallëruar marrëdhëniet me Serbinë, gjë që u duk në vizitën në korrik në Beograd të Presidentit Macron. Dhe bllokimin nga Franca të liberalizimit të vizave të BE me Kosovën. A do t’u kushtohet Franca në të ardhmen kryesisht lidhjeve të saj tradicionale? Fakt është se Franca nuk sheh përfitim nga zgjerimi i BE në vendet e Evropës lindore dhe jugore. Ky zgjerim ka theksuar rolin qendror të Gjermanisë në BE.

Në shkurt të këtij viti papritur Franca e shpalli veten kundërshtare të tubacionit të furnizimit me gaz nga Rusia, Nordstream 2. Kundërshtimi i Francës ndaj këtij tubacioni, me të cilin Gjermania do të furnizohet me gaz rus e forcoi qëndrimin kritik për këtë projekt të Komisionit Evropian. Kompromisi u arrit me shumë vështirësi.

Mungesa e re e vullnetit nga Parisi për t’u koordinuar me Berlinin për Evropën, shkakton habi në Berlin. Ministri i Jashtëm gjerman, Maas kërkoi në kuadër të takimit të NATO-s që të dyja vendet të dakordohen “për premisat strategjike – në mënyrë që të mos shkaktohet dëm” i rëndë. Në kuadër të takimit të Partisë Popullore Evropiane në Zagreb, kancelarja Merkel tha se BE do të bisedojë me hollësi me Macronin, edhe për zgjerimin e BE.

Kjo në një kohë kur revista gjermane “Der Spiegel” shkruan këto ditë se kur punonjësit e Kancelarisë Federale pyesin në Paris homologët se pse Franca nuk po i koordinon qëndrimet me Gjermaninë, përgjigjja që vjen nga bashkëpunëtorët është se ata kanë vetëm ndikim të kufizuar te Presidenti i tyre. Kjo të kujton marrëdhëniet e Trumpit me bashkëpunëtorët. Prandaj një analist flet për një lloj “trampizmi intelektual” që vjen për momentin nga Parisi.

Afrimi francez me Rusinë dhe rezervat evropiane

Linja tjetër e re e politikës së jashtme franceze, afrimi me Rusinë, flet për këmbënguljen franceze për të ndjekur në BE një politikë të jashtme të ndryshme nga ajo e frymëzuar prej Gjermanisë. Fillimisht me këmbënguljen e Macronit, Rusia fitoi së fundi të drejtën e votës në Këshillin e Evropës në Strasburg. Pas kësaj, pa u konsultuar me gjermanët, Macroni dërgoi në Moskë ministrat e tij të jashtëm dhe atë të mbrojtjes. Synimi i shpallur: për të nisur bashkëpunim të ri sigurie (të BE!) me Rusinë.

Argumenti i Macronit është që Rusia ndodhet në Evropë dhe Evropa nuk ka interes ta lërë Rusinë të thellohet në afrimin e nisur me Kinën. Për këtë, thotë Macroni, duhet rimenduar me vetëkritikë politika evropiane ndaj Rusisë, nisur nga ngjarjet rreth Ukrainës.

Parimisht edhe Gjermania nuk është e mbyllur ndaj gjetjes së rrugëve për shtensionim marrëdhëniesh me Rusinë. Por këtë e pengon fakti se nuk ka ndryshim në politikën ruse, sidomos ndaj Ukrainës, pas aneksimit të Krimesë. Kështu që heqja e sanksioneve të BE ndaj Rusisë për momentin nuk vjen në diskutim. Këtë hap e kundërshton jo vetëm Gjermania, por në radhë të parë shtetet lindore të BE. Vlerësimi demonstrativ që Macroni dhe kryeministri hungarez Viktor Orban (gjithashtu ithtar i afrimit me Rusinë) i bëjnë së fundi njëri-tjetrit, nuk ndikon aspak për ta afruar Macronin me shtetet e tjera lindore.

Macroni është i vetmuar, konstatonte javët e fundit një analist i New York Times. Me padurimin e tij, ai ka lënduar jo vetëm lindorët, por edhe Gjermaninë./DW/

S’e takon në Ohër, e takon në Paris

Deklaroi se nuk shkoi në Ohër, sepse Serbia nuk e njihte Kosovën, por për dy ditë, Hashim Thaçi ka ndryshuar mendje.

Presidenti i Kosovës dhe presidenti i Serbisë, Aleksandër Vuçiç u takuan të martën në Paris me ndërmjetësimin e presidentit francez Macron, ndërkohë që vetëm dy ditë më parë, Thaçi refuzoi të takohej me Vuçiç në Samitin e Ohrit, pas ftesës së kryeministrit Rama, me pretendimin se Kosova s’mund të jetë pjesë e samiteve, ku marrin pjesë vendet që nuk e kanë njohur pavarësinë.

Të martën, në Samitin e Paqes, Thaçi pranoi ftesën dhe dorën e Macron për t’u takuar me Vuçiç, pra duke refuzuar Ramën dhe pranuar pikërisht ftesën e atij që vetëm një muaj më parë nuk lejoi që popullit të Kosovës t’i liberalizohen vizat. Në momentin që hyri nga dera e Macron, Presidenti i Kosovës “harroi” se Serbia nuk e ka njohur pavarësinë e saj.

Kohët e fundit Macron është vënë në shënjestër të vetë BE-së për shkak të politikave të tij bllokuese për zgjerimin, ku i mbylli derën Shqipërisë dhe Maqedonisë së Veriut, ndërsa refuzoi liberalizmin e vizave për qytetarët e Kosovës.

Pas takimit trepalësh, Thaçi tha se qëllimi i tij ishte dialogu Kosovë-Serbi dhe arritja e një marrëveshje përfundimtare mes dy vendeve të pavarura dhe sovrane, ndërsa theksoi nevojën për bashkëpunimin ndër-fqinjësor dhe të ardhmen evropiane të rajonit të Ballkanit Perëndimor. Por vetë presidenti serb, Aleksandër Vuçiç tha se nuk e kishte kursyer Thaçin. Media serbe “Blic” shkruan se Vuçiç tha në sy të Macron dhe Thaçit se edhe 10 shtete po presin për të hequr njohjen për Kosovën. Mesa duket edhe Sandri i Beogradit, e ka kuptuar se tani “ligjin” në Prishtinë e bëjnë të tjerë…/ RealStory

Pendarovski takon Macron: Rregullat e reja të zgjerimit, në mars të 2020

“Metodologjia e re e zgjerimit të BE do të jetë gati deri në mars të 2020.” Kjo ishte deklarata për mediat e presidentit të Maqedonisë së Veriut, Stevo Pendarovski, pas takimit që zhvilloi me presidentin francez Macron. Pendarovski tha se Macron shpreson që reformimi i metodologjisë të bëhet deri në mars 2020, në mënyrë që në Samitin e Zagrebit, më 6 maj 2020, të mund të merret një vendim lidhur me negociatat për Shqipërinë dhe Maqedoninë e Veriut.

“Franca tashmë ka paraqitur një propozim joformal për vendet anëtare të BE-së që parasheh reformimin e metodologjisë së negociatave të pranimit, një reformë që Macron po kërkon të miratohet përpara se të japë dritën e gjelbër për Maqedoninë e Veriut dhe Shqipërinë. Në parim, ai mendon se metodologjia duhet të miratohet më së voni deri në muajin mars. Ai më ka thënë saktësisht se kurrë nuk ka qenë qëllimi i tij që të na rekomandojë ndonjë alternativë tjetër, në vend të anëtarësimit në BE. Ai thjesht dëshiron të përmirësojë procesin, që mos të prodhojë suksese burokratike dhe dështime thelbësore”, tha Pendarovski, pas takimit me presidentin Macronin në Samitin e Paqes në Paris.

Macron prej kohësh kërkon një reformim të vetë BE-së dhe rregullave se si ajo do të zgjerohet më të ardhmen. Franca ishte një ndër vendet që më 18 tetor bllokoi procesin e negociatave për Shqipërinë dhe Maqedoninë e Veriut me arsyetimin se fillimisht Unioni duhet të vetëreformohet dhe të mos shkaktojë më dështime si BREX-it apo probleme të tjera të brendshme.

Rusia përkrah Macronin për NATO: Tha fjalë të arta

Deklarata e presidentit francez Macron se “NATO po vdes” për shkak të braktisjes nga SHBA nën udhëheqjen e Trump, u përshëndet nga Rusia, e cila e quajti atë “një deklaratë të artë”

Zëdhënësja e ministrisë së Jashtme, Maria Zakharova i cilësoi “fjalë të arta dhe një përcaktim i saktë i gjendjes aktuale të NATO-s”, ato që u thanë nga presidenti Macron.

Gjatë një interviste për “The Economist”, Macron foli ashpër në lidhje me NATO-në duke thënë se kjo aleancë po vdes dhe se Shtetet e Bashkuara nën presidentin Trump po ‘na kthejnë shpinën’. Presidenti Macron tha se BE ‘duhet të rivlerësojnë realitetin e ri të NATO nën dritën e angazhimit të Shteteve të Bashkuara. Europa ndodhet në buzë gremine dhe duhet të fillojë të mendojë si një fuqi gjeopolitike, përndryshe nuk do të jemi më në kontroll të fatit tonë.”

Kjo deklaratë u hodh poshtë nga kancelarja Merkel dhe Sekretari i Përgjithshëm i NATO-s, Stoltenberg, pak orë pasi foli Macron. Ato thanë se “NATO-ja mbetet një gur themeli i sigurisë së BE”. Nga ana tjetër Sekretari Amerikan i Shtetit, Mike Pompeo tha se NATO-ja ishte “e rëndësishme”, ndoshta një nga më të rëndësishmet “në të gjithë historinë”.

“S’ka të drejtë të fyej popullin tonë”, Macron zemëron edhe bullgarët

Pas pakënaqësisë që u shkaktua në Ballkan, për Jo-në e Francës e qëndrimin pritës të presidentit, Emannuel Macron për hapjen e negociatave me Shqipërinë e Maqedoninë e Veriut, tani presidenti francez zemëron bullgarët. Një deklaratë e Macron vihet në qendër të mediave bullgare e shoqëruar me reagime nga politika. „Askush nuk i jep atij të drejtën të fyejë popullin bullgar”, është shprehur zëvendëskryeministri dhe ministër i Mbrojtjes në Bullgari, Krasimi Karakatshanov të shtunën në televizionin privat bullgar, bTV në Sofje.

Në një intervistë të revistës franceze, me orientim të djathtë, “Valeurs Actuelles”, presidenti francez kishte theksuar, se do të veprojë me të gjithë forcën kundër shoqërive paralele dhe imigracionit ilegal në Francë. “Unë preferoj emigrantë legalë nga Guinea apo Bregu i Fildishtë (…) në vend të bandave ukrainase apo bullgare”, citohet presidenti francez.

Ministrja e Jashtme bullgare, Ekaterina Sacharieva ka porositur ambasadorin bullgar në Paris të dërgojë një notë proteste në Ministrinë e Jashtme franceze. Ndërkohë edhe ambasadorja e Francës në Sofje, Florence Robine është thirrur për të hënën në Ministrinë e Jashtme të Bullgarisë, bëri të ditur televizioni shtetëror në Sofje.

Kritikët e akuzojnë presidentin francez, se me këtë intervistë ai po pozicionohet që tani për fushatën zgjedhore presidenciale, 2022 kundër Marine Le Pen. Populistja e djathtë kishte deklaruar së fundmi, se do të rikandidojë sërish për zgjedhjet presidenciale./ DW

Kritikat ndaj Francës, Macron me ofertë të re për Ballkanin?

Franca po përballet me presione të shumta dhe sulme nga liderët e BE, pas vetos së vendosur për bllokimin e negociatave për Shqipërinë dhe Maqedoninë e Veriut. E ndodhur në këto kushte dhe pas “masakrimit” nga eurodeputetët që mbështesin hapjen e negociatave, Macron duket se kërkon të gjejë një tjetër zgjidhje për rajonin e Ballkanit “jo anëtarësim të plotë të tij” por krijimin e një “partneriteti të veçantë të privilegjuar”.

Sipas gazetës serbe “Nezavisne”, Macron po zhvillon takime diplomatike jozyrtare për të ofruar partneritet të veçantë të privilegjuar për disa nga vendet e Ballkanit Perëndimor, në mënyrë që të zëvendësojë kërkesën e tyre me një anëtarësim të plotë.

Ai kërkon t’u ofrojë përmes këtij “partneriteti të privilegjuar” mbështetja financiare, partneritet speciale për qasje në tregjet evropiane dhe përfitime të tjera, në këmbim të një tërheqje të heshtur nga ana e Ballkanit Perëndimor për kërkesën e tyre për anëtarësim të plotë në BE.

Një partnerit i tillë sipas gazetës “Nezavisne, thuhet se i është ofruar edhe Turqisë 10 vite më parë nga Gjermania, por ajo u pa si një mënyrë elegante e heqjes dorë nga pranimi i Turqisë në BE.

Në shkrim thuhet se kjo është arsyeja pse zgjedhjet në Maqedoninë e Veriut janë caktuar në prill për të parë nëse BE do të aprovojë vazhdimin e procesit të para-pranimit për anëtarësim në mars.

Franca u shpreh se nuk dëshiron një zgjerim të Ballkanit në këto momente, pa u zgjidhur çështjet e brendshme të tij, por duket se në fakt me ofrimin e një “partneriteti të tillë të veçantë” në këmbim të heqjes dorë nga anëtarësimi i plotë në BE, Macron nuk kërkon një integrim të Ballkanit Perëndimor në BE. Kjo qasje e tij është kritikuar ashpër nga ndërkombëtarët duke e akuzuar atë se po shtyn Ballkanin Perëndimor në duart e Rusisë, Turqisë dhe Kinës.

Shqipëria me avokate në PE. Kokalari sulmon Macron

Eurodeputetja shqiptare, që përfaqëson Suedinë në Parlamenti Europian, Arba Kokalari foli ashpër ndaj Presidentit të Francës Emanuel Macron për përdorimin e vetos për të mos hapur negociatat me Shqipërinë dhe Maqedoninë e Veriut. Gjatë fjalës që mbajti në seancën e diskutimit të rezolutës për Shqipërinë dhe Maqedoninë e Veriut, Arba Kokalari e quajti të tmerrshëm vendimin e përdorimit të vetos nga Macron për të bllokuar negociatat e Shqipërisë dhe Maqedonisë së Veriut.

“Presidenti Macron erdhi këtu dy vite më parë dhe tha se çfarë mendon për demokracinë dhe BE. Tregoi se duhet të vazhdojmë në rrugën e reformave, dhe unë jam shumë dakord me këtë. Tani e shikoj të tmerrshme që Macron dhe Franca e përdorën veton për çeljen e negociatave me Shqipërinë dhe Maqedoninë e Veriut”, tha Kokalari.

Më tej, ajo theksoi se me këtë mos vendim për të hapur negociatat, BE i hapi rrugën Turqisë, Rusisë dhe Arabisë Saudite në rajonin e Ballkanit Perëndimor. “I gjithë procesi i zgjerimit ka qenë shumë dobiprurës, për inkurajimin e demokracisë dhe respektimin e të drejtave të njeriut dhe ecurinë e reformave. Ne duhet t`i inkurajojmë këto shtete, që po ndërtojnë demokracinë, që të vazhdojnë të ecin në këtë rrugë sepse nëse BE nuk do jetë prezente në rajon, Turqia, Rusia dhe Arabia Saudite do të hynë. Ne na duhet një BE që të jetë e bashkuar si në Perëndim ashtu dhe në Lindje”, tha deputetja shqiptare në Parlamentin Europian. /Realstory.al/

Merkel: Marrëdhëniet me Francën do forcohen

Takimi Merkel-Macron shihet si mundësia e vetme që kancelarja gjermane të arrijë të bind Francën skeptike për hapjen e negociatave me Shqipërinë dhe Maqedoninë e Veriut. Pasi Gjermania ka dhënë “po” e saj për të dy vendet, Franca duket se kërkon ta shtyjë vendimin edhe me një vit, pasi për të BE nuk është ende gati për të kryer një proces tjetër zgjerimi. Pak orë para nisjes së kancelares në Francë, Merkel deklaroi se marrëdhëniet franko-gjermane do të vazhdojnë të forcohen, si në marrëdhënien dypalëshe edhe në zgjidhjen e konflikteve ndërkombëtare. Kjo duket si një shenjë pozitive për Shqipërinë dhe Maqedoninë e Veriut, duke shpresuar se Merkel do të arrijë të bindë presidentin Macron të japi “po” për zgjerimin e BE-së.

“Në marrëdhëniet dypalëshe si dhe në zgjidhjen e konflikteve ndërkombëtare, Gjermania dhe Franca punojnë ngushtë dhe duan që kjo të vazhdojë edhe në të ardhmen. Pas nënshkrimit të traktatit Aachen, bashkëpunimi ynë duhet të bëhet akoma më i fortë”, deklaroi Merkel.

Takimi i kancelares në Francë nis të dielën, ndërsa pritet të zhvillojë një takim të gjatë me Presidentin Macron. Më datat 17 dhe 18 tetor do të vendoset për hapjen apo jo të negociatave për Shqipërinë dhe Maqedoninë e Veriut.