Negociatat, Ministri grek: Kushti i Mitsotakis për Ramën

Respektimi i të drejtave të minoriteti grek, vetëdeklarimi i tyre dhe e drejta për pronat janë disa nga çështjet që u diskutuan gjatë takimit mes kryeministrit Rama dhe homologut të tij grek Mitsotakis në SHBA gjatë asamblesë së OKB-së. Pas këtij takimi, Greqi doli hapur duke deklaruar “pro” integrimit të Shqipërisë, por më herët Mitsotakis tha se “nëse Shqipëria kërkon një ‘po’ nga Greqi duhet të respektojë të drejtat e minoriteti grek.” I njëjti kusht duket se është kërkuar nga ai edhe gjatë takimit me Ramën. Kështu bëri të ditur Ministri i Jashtëm grek, Nikos Denidas gjatë një interviste për mediat në Athinë. Ministri grek deklaroi se ky kusht nuk ka të bëjë me diferencat mes Shqipërisë dhe Greqisë, por me respektimin e të drejtave të njeriut

“Ne do të dëshironim që të dy vendet të ecnin përpara, ky është realiteti, ky është interesi i tyre dhe në të njëjtën kohë, interesi i Greqisë dhe BE-së. Por ata duhet të plotësojnë kushtet. Mitsotakis u takua me z. Rama në New York, ku unë gjithashtu isha i pranishëm dhe i tha qartë: Vetëdeklarim për minoritetin grek. Ky nuk është pretendimi i Greqisë kundër Shqipërisë, por është një e drejtë themelore e njeriut. A mund të thotë dikush “Jo ti nuk je” kur ti mendon se i përket pakicës greke? Mitsotakis foli qartë me zotin Rama edhe për pronat. Këto gjëra nuk kanë asnjë lidhje me diferencat mes Greqisë dhe Shqipërisë, ato kanë të bëjnë me të drejtat themelore të njeriut dhe ligjit evropian. Në rast vështirësish, pala greke është e gatshme t’u ofrojë atyre ndihmë dhe ekspertizë, po ashtu dhe BE.” –tha Denidas

Ministri Denidas tha se Greqia nuk dëshiron të shkaktojë probleme për Shqipërinë, por thjeshtë kërkon respektimin e ligjit, që është edhe në interes të shoqërisë shqiptare.

“Pala shqiptare ofroi një kompromis me ne, por ai nuk mjafton. Dhe po e përsëris, jo sepse duam t’i detyrojmë. Dhe e them këtë sepse nuk dua që shqiptarët të mendojnë se Greqia u shkakton atyre probleme, por sepse është në interes të shoqërisë shqiptare. Shqipëria, qeveria, duhet të afrohet me pakicën greke, ata në fund të fundit janë qytetarët e saj.”u shpreh ministri i jashtëm grek.

Mitsotakis ‘veto’ Shqipërisë, Ngjela: Është i paaftë, ne kemi SHBA-BE me vete

Nga Spartak Ngjela

Kryeministri grek, për çeljen e negociatave të Shqipërisë, na paska dalë sot me një kusht për minoritetin grek në Shqipëri.

Cili është ky minoritet?

Kryeministrat grekë, me ndonjë përjashtim, “minoritet grek” quajnë aneksimin e Jugut të Shqipërisë. Dhe, e dini pse? Se ata nuk mund të pranojnë që të ketë ortodoksë që të flasin shqip. Domethënë, shqiptarë. Sepse iu del zbuluar pushtimi i territoreve të gjera shqiptare, dhe gjithë politika e ndyrë që kanë bërë në 150 vjet kundrejt arvanitasve në Greqi dhe genocidit antishqiptar e antiçam në Epir.

Këta mesjetarë, pasi pushtojnë territoret shqiptare, me genocid, dëbojnë nga tokat e tyre shqiptarët myslimanë, si turq. Ky ka qenë turpi i tyre historik. Dhe këtë gjithmone ia ka pranuar edhe Stambolli; kurse pastaj, shqiptarët ortodoksë nuk i lënë të flasin shqip, dhe i detyrojnë të deklarohen “helenë”. Ja, kjo është metoda e tyre çnjerëzore kundër shqiptarëve në këta 150 vjetët e fundit.

Janë po këta, që, me anë të kishës greke, gjuhën shqipe e kanë quajtur “gjuhë të mallkuar”. Dhe, e dini pse? se gjuha shqipe është gjuha e parësore e gadishullit tonë, domethënë edhe e vetë Greqisë. Në shkollat greke nuk thellohen në atë që i thonë “greqishte e vjetër”, se ajo gjuhë mund të shpjegohet vetëm me gjuhën shqipe, sidomos me gegnishten.

E kuptoni tani se sa vuajnë këta kur shohin forcimin ndërkombëtar të Shqipërisë dhe Kosovës?

ll.

Por ky, në fakt është kryeministri më i paaftë grek. Do ta shihni.

Kryeministër! Asnjë kusht nuk vini dot ju shqiptarëve. Edhe Uashingtoni, edhe Berlini, edhe Brukseli, që të dyja gjeopolitikat e mëdha të botës perëndimore, e kanë përcaktuar Shqipërinë dhe Kosovën në zonën e vet.

Pse, kryeministri grek, që nuk di se ku ka kokën, do ta mundë këtë politikë të madhe! Le më pastaj injorantët liderë të Shqipërisë që shkojnë deri te Erdogani për të njëjtën gjë. Qesharakë janë këta ballkanas që nuk dinë asgjë dhe iu duket se dinë gjithçka.

Gjithsesi, lodhen kot së koti dhe fare kot.

lll.

Po ku ka forcë politika e kryeministrit grek që të mundë gjeopolitikën e madhe USA-BE!

Pse nuk e ka atë forcë?

E para, se grekë nuk ka as në Athinë e jo më në Shqipëri. Athina ka qenë e gjitha me shqiptarë të quajtur arbëreshë, si shqiptarët e Italisë së Jugut. Por çmendurisë greke po i vjen fundi.

E dyta: Greqia i ka Gjermanisë 350 miliardë Euro borxh. E di kryeministri grek që Shqipëria është aleate e ngushtë me politikën e Berlinit? Dhe, a e di ky që vota e Greqisë tanimë kondicionohet nga Berlini?

E pra, pse flet kështu kryeministri grek?

Sepse ka frikë nga potenca që po akumulon dhe do të akumulojë bota shqiptare në Ballkanin Perëndimor. Sidomos kjo do të shihet qartë pas përfundimit të reformës që ka nisur kundër liderëve të korruptuar të Shqipërisë, të gjithë të shitur te fqinjët dhe te armiqtë shekullorë të shqiptarëve dhe kundër botës shqiptare në Ballkanin Perëndimor.

Por, një gjë është e sigurt: kjo kohë e re po punon për shqiptarët. Prandaj, edhe kryeministri grek është mirë ta rregullojë gjuhën brenda kontekstit historik.

Merkel uron Mitsotakis dhe i kujton marrëveshjen me Maqedoninë e Veriut

Kancelarja Merkel ka uruar qeverinë e re greke dhe kryeministrin e ri Kyriakos Mitsotakis, ndërsa ka kërkuar nga ato që të vazhdojnë të kenë një rol konstruktiv në normalizimin e marrëdhënieve me Maqedoninë e Veriut. Merkel tha se Gjermania dhe Greqia do të vazhdojnë bashkëpunimin e tyre, ndërsa e i ka bërë ftesë Mitsotakis, duke deklaruar se “pret me padurim të takohen”.

“Marrëveshja e Prespës është një arritje që mundëson normalizimin e marrëdhënieve mes Maqedonisë së Veriut dhe Greqisë dhe sinqerisht shpresojmë se qeveria e re greke në mënyrë konstruktive do të marrë pjesë në këtë proces pozitiv.” – ka thënë Merkel

Kancelarja gjermane falënderoi edhe ish-kryeministrin Aleksis Cipras për punën e bërë duke cilësuar se “ai ka kaluar shumë vite sfiduese, por gjithmonë ka arritur një bashkëpunim të besueshëm.”

Meta dhe Bushati urojnë Mitsotakis: Shpresojmë të fuqizohen marrëdhëniet tona

Ilir Meta ka uruar Kryeministrin e sapozgjedhur të Greqisë, Kyriakos Mitsotakis. Meta shprehet se ka zhvilluar një bisedë telefonike me kreun e ri të qeverisë në shtetin fqinj, që u shpall fitues në zgjedhjet e 7 korrikut. “Kënaqësi t’i uroja sot gjatë një bisede telefonike, shumë suksese, kryeministrit të ri të Greqisë, z.Kyriakos Mitsotakis. Shpresëplotë se marrëdhëniet mes dy shteteve tona do të fuqizohen akoma më shumë në interes të dy popujve tanë. Progresi i Greqisë është shumë i rëndësishëm për të gjithë shqiptarët që jetojnë atje dhe për të ardhmen e përbashkët evropiane”, shkruan Meta në facebook.

Ndërohë, më herët kreut të ri të qeverisë greke, i ka përcjellë urime edhe ish-ministri i jashtëm Ditmir Bushati. “Urime Mitsotakis dhe Demokracia e Re për fitoren. Si anëtare me përvojë e BE, Greqia ka një rol të rëndësishëm në integrimin evropian të rajonit tonë. Besojmë se lidhjet do të forcohen më tej në dobi të vendeve dhe popujve tanë”, shkruan Bushati në urimin e tij për Kyriakos Mitsotakis.

Greqia zhvilloi zgjedhjet e parakohshme të dielën, fituese nga të cilat doli partia Demokracia e Re e kryesuar nga ish-bankieri, Kyriakos Mitsotakis. Të hënën në mesditë kreu i ri i qeverisë greke bëri betimin, ndërsa të martën pritet të prezantohet dhe qeveria e re.

Shehu e quan “eveniment” fitoren, por Mitsotakis: Veto integrimit të Shqipërisë

Tritan Shehu ka nxituar për të bërë urimin e tij si ish-lider i PD-së, për fitoren e pritshme të së djathtës në zgjedhjet e parlamentare të parakohshme në Greqi. Partia konservatore Demokracia e Re, e Kyriakos Mitsotakis, pritet të shpallet fituese në këto zgjedhje, pasi sipas sondazheve ka marrë rreth 38% të votave. Për këtë arsye, Tritan Shehu, reagon i pari nga e djathta shqiptare, dhe i shpreh urimet Mitsotakis për fitoren. “Urimet më të mira për ND e Kyriakos Mitsotakis, Kryeministër i ri i Greqisë, tashmë përsëri pilastër e europianizmit”, shkruan ndër të tjera Shehu.

Me tej, në urimin e tij shpërndarë në rrjetet sociale, Tritan Shehu e cilëson lajm pozitiv zgjedhjen e Mitostakisit në krye të qeverisë greke, jo vetëm për Europën, por edhe për integrimin e Shqipërisë në union. “Një mesazh ky shumë i rëndësishëm nga populli grek, në mbrojtje të vlerave të mëdha, bashkjetesës, paqes e forcave zhvilluese të BE. Kjo është një ngjarje e rëndësishme për Rajonin tonë, që aspiron veçse rrugën e integrimit, ku padyshim roli pozitiv i Greqisë tashmë do të forcohet. Fitorja e ND ësht ënjë eveniment pozitiv edhe për Shqipërinë, qoftë në planin bilateral, qoftë dhe në mbështetjen ndaj procesit tonë të integrimit në tërësi”, shkruan ndër të tjera ish-deputeti i PD-së.

Por a është gjithç kaq mirë sa thotë Tritan Shehu? A do të jetë Mitsotakis mbështetës i integrimit të Shqipërisë në BE? Këtë nuk e dim ta themi akoma, pasi është ende herët. Por në një deklaratë të kreut të Demokracisë së Re, bërë gjatë fushatës për zgjedhjet në Parlamentin Europian, Kyriako Mitsotakis u shpreh se do të vendoste “veton” për Shqipërinë dhe Maqedoninë e Veriut. “Do i qëndroj të drejtës për të vënë veton ndaj Maqedonisë së Veriut dhe integrimit të Shqipërisë për në BE. Unë do të mbroj të drejtat e pakicës kombëtare greke. Dhe nëse nuk respektohen, Shqipëria të harrojë kursin e saj evropian” deklaroi ai gjatë një fjalimi në Selanik gjatë muajit maj, Kyriakos Mitsotakis.

Greqia voton të dielën, Mitsotakis premton ulje të taksave. Tsipras rritje të pagave

Greqia u drejtohet kutive të votimit të dielën më 7 korrik, për të mbajtur zgjedhjet e parakohshme parlamentare, pas shpërndarjes së parlamentit nga Kryeministri Alexi Tsipras, qëhumbi në zgjedhjet për Parlamentin Europian. Partia konservatore “Demokracia e Re” e Kyriakos Mitsotakis, që u shpall fituese edhe në zgjedhjet e Parlamentit Europian, shihet si favorite në zgjedhjet e të dielës në Greqi.

Këtë të premte është mbyllur zyrtarisht fushata elektorale për zgjedhjet e 7 korrikut, teksa në Athinë është mbajtur dhe mitingu përbmbyllës. Mitsotakis ka premtuar premtuar ulejn e taksës mbi të ardhurat, që sipas tij do bëhet 9% nga 22% që është aktualisht.

Gjithashtu, kreu i konservatorëve, ka premtuar ulje deri në 30% të tatimit mbi pronën gjatë dy viteve të ardhshme, duke i dhënë mundësi rritjes së aktivitetit konik dhe konkurrencës në vend. “Është obligimi ynë, veçanërisht për brezin e ri që meriton të gjejë punë në Greqi, në vend që të shkojë jashtë vendit”, ka thënë Kyriakos Mitsotakis.

Sondazhet i japin kreu të Demokracisë së Re në Greqi një avantazh të kënaqshëm në raport me kundërshtarin e tij, Alexia Tsipras, i cili po vuan rënien e popullaritetit për shkak të problemeve ekonomike që ka pasur vendit.

“Ne kemi rritur pagën minimale me 11%. Jemi zotuar që të ketë një rritje prej 15% të pagave gjatë dy viteve të ardhshme, në mënyrë që pagat të paktën të arrijnë nivelet e para krizës”, ka shkruar në Twitter, Alexis Tsipras, të premten duke i kërkaur mbështetje qytetarëve grek për një mandat të ri.

Të drejtën e votës për të zgjedhur deputetët e parlamentit të ri në Greqi, e kanë dhe mijëra qytetar shqiptarë që jetojnë prej vitesh në shtetin fqinj, dhe që kanë fituar të drejtën për të votuar.

Zgjedhjet e PE, në Greqi sondazhet i japin fitoren konservatorëve

Në Greqi janë publikuar “exit poll-et” e para për zgjedhjet e trefishta që janë mbajtur sot. Ndryshe nga vendet e tjera të Europës, qytetarët grekë kanë votuar sot për zgjedhjet e përgjithshme vendore, lokale dhe ato për Parlamentin Europian. Vëmendja kryesore lidhet pikërisht me këto të fundit, ku duket se të gjitha sondazhet paraprake nxjerrin fitues opozitën konservatore greke me në krye Kyriakos Mitsotakis me partinë “Demokracia e Re”.

Të dhënat nga sondazhet i japin Mitsotakis-it 32-36% të votave, ose 8-9 vende në Parlamentin Evropian. Ndërkohë, SYRIZA e Alexis Cipras parashikohet të marrë 25-29% të votave duke siguruar gjashtë ose shtatë vende në Parlamentin Europian.

Sondazhet thonë se aleanca e qendrës së majtë, Lëvizja për Ndryshim do të grumbullojë midis 7 dhe 9% të votave, ose dy deri në tre vende, ndërkohë që edhe Agimi i Artë pritet të ketë të njëjtin numër vendesh në PE. Edhe Partia Komuniste Greke duket se do të ketë një ose dy vende në Parlamentin e ri Europian, që do të dalë nga zgjedhjet e përgjitshme të mbajtura katër ditët e fundit në të gjithë Evropën.

Duke folur duke hedhur votën e tij në një lagje të Athinës, presidenti grek Prokopis Pavlopulos i përshëndeti zgjedhjet si një mundësi për grekët “për të provuar se si jemi europianë”.

Për kryeministrin e majtë Alexis Tsipras, i cili votoi në rrethin e Athinës në qendër të qytetit, votimi ishte një mundësi për qytetarët që të “mbrojnë sakrificat dhe përpjekjet e popullit grek” duke votuar në favor të SYRIZA-s, për të miratuar “programin e qeverisë për rimëkëmbjen ekonomike”. Kreu i Demokracisë së Re Kyriakos Mitsotakis shprehu besimin se “një ditë e re do të agojë për vendin tonë” të hënën në mëngjes”.