Çdo minutë, 5 të vdekur në botë nga trajtimi i gabuar

Organizata Botërore e Shëndetësisë ka shpallur 17 shtatorin si “Ditën Botërore për Sigurinë e Pacientëve” për ndërgjegjësimin e të sëmurëve por edhe mjekëve që japin mjekim të gabuar. Sipas raporti të fundit të OBSH, miliona njerëz vdesin në vit si pasojë e trajtimeve të gabuara mjekësore.

“Çdo minutë vdesin 5 njerëz në botë për shkak të trajtimeve të gabuara” deklaron OBSH, e cila sqaron se 40% e pacientëve në botë kanë pësuar lëndime në trajtimet popullore, kurse në spitale kanë pasur probleme vetëm 10% e tyre.

Në 150 vende me të ardhura të ulëta e të mesme 2,6 milionë njerëz madje kanë ndërruar jetë për shkak të trajtimeve jo të duhura mjekësore.

“Gama e gabimeve është e madhe, që nga diagnoza e gabuar deri tek ilaçet e papërshtatshme, ata kanë marrë rrezatimin jo të duhur apo janë infektuar gjatë trajtimit. Ka pasur edhe prerje të gjymtyrëve të gabuara apo operacione në anën e gabuar në kokë tek fëmijët.” deklaron OBSH.

OBSH: Shqipëria e rrezikuar nga fruthi, bëni vaksinën

Pas disa vitesh ku u shënua përparim i vazhdueshëm drejt eliminimit të fruthit, duket se kjo sëmundje është rikthyer sërish. Organizata Botërore e Shëndetësisë deklaron se Shqipëria është në mesin e katër vendeve në Europë që nuk e kanë eliminuar përhapjen e fruthit.

Rikthimi i përhapjes së fruthit është shqetësues. Nëse mbulimi me vaksina nuk arrihet dhe nuk mbahet në çdo komunitet, edhe fëmijët, edhe të rriturit do të preken dhe rrezikojnë të humbin edhe jetën. Përveç Shqipërisë vendet e tjera që rrezikohen nga përhapja e fruthit janë edhe Çekia, Greqia dhe Mbretëria e Bashkuar.

Fruthi është një sëmundje shumë ngjitëse dhe potencialisht fatale që shkakton kollitje, skuqje dhe ethe.

Ekspertët shëndetësorë paralajmërojnë se gënjeshtrat në lidhje me vaksinën e fruthit kanë lejuar që sëmundja të përhapet në zona ose komunitete të caktuara.

Të gjitha rajonet e botës treguan një rritje të fruthit përveç Amerikës, e cila pati një rënie të vogël.

Afro 365,000 raste janë raportuar në të gjithë botën këtë vit, tha OBSH, gati tre herë më shumë sesa në gjysmën e parë të 2018-ës.

Ligji anti-duhan vlerësohet nga OBSH

Ligji anti-duhan, i miratuar në seancën e fundit parlamentare për këtë sezon, ka marrë mbështetjen dhe vlerësimin edhe të Organizatës Botërore Shëndetësore.

Përmes një letre drejtuar Ministres së Shëndetësisë dhe Mbrojtjes Sociale, Ogerta Manastirliu, OBSH vlerëson të gjitha amendamentet dhe ndryshimet e miratuara në Ligjin anti-duhan për mbrojtjen e shëndetit nga të gjitha llojet e produkteve të duhanit.

OBSH përgëzon qeverinë e Shqipërisë për hapat e ndërmarrë, për të çuar përpara implementimin e Konventës Kuadër të Kontrollit të Duhanit, duke vendosur si prioritet shëndetin e qytetarëve shqiptarë, mbi interesat e tjera. OBSH shpreh mbështetjen e saj për të gjitha kauzat që sigurojnë mbrojtjen shëndetësore të njerëzve dhe implementimin e efektshëm të të gjithë masave ligjore që vendosin shëndetin para gjithçkaje.

Ndryshimi i Kodit Penal për duhanpirjen në ambiente publike, ndalon konsumimin e duhanit me ngrohje, cigaret elektronike apo shisha/nargjile, në ambiente të mbyllura. Prej kohësh, nuk lejohet konsumimi i cigares në ambiente të mbyllura, por tashmë, ligji ashpërsohet duke përfshirë të gjitha llojet e cigareve.