“Gjithë jeta më iku”, banorët kthehen tek apartamentet në pallatin e djegur në Pogradec

Të shtunën një zjarr i madh përfshiu një pallat në qytetin e Pogradecit. Të paktën 12 apartamente u shkrumbuan dhe 5 familje mbetën në qiell të hapur. Banorët janë tronditur nga ngjarja e rëndë, që tashmë i la pa strehë. Një prej banoreve, shtëpia e së cilës u dogj të shtunën, foli për “News 24”, duke treguar se “gjithë mundi dhe kujtimet e fëmijëve tashmë janë shuar”.

“Gjithë jeta ime më iku, nuk kam një kujtim nga fëmijët, televizorin nuk e gëzova dot, si nuk më shpëtoi fotografia e djalit, nuk më shpëtoi një fotografi, u shua mundi im. Nuk i kam gëzuar këto shtëpi akoma. O Zot i madh! Nuk kam gëzuar asgjë të re. Gjithë jeta imë më iku. Po ç’ishte kjo? I kam mbajtur me grep e me shtiza. Shisja çentro që mbaja fëmijët. Ah ç’më gjeti mua”, thotë Shemshie Ilo në vaj.

Zjarri përfshiu katet shtesë të një pallati në qytetin e Pogradecit të shtunën. 12 apartamente u shkrumbuan totalisht, ndërsa dy punonjës zjarrfikës mbetën të lënduar gjatë shuarjes së flakëve. Zjarri zgjati për disa orë, ndërsa ende nuk dihen shkaqet që çuan në rënien e zjarrit në pallat.

U dëmtua nga tërmeti, 65 familje boshatisin pallatin në Kombinat

Familjet e një pallati që u shpall i pabanueshëm në Kombinat, janë larguar prej tij. Sipas News 24, 65 familje në Kombinat kanë nisur boshatisjen e apartamenteve të tyre, pasi pallati ku ata banonin është vlerësuar i pabanueshëm nga ekspertët.

Pallati në të cilin jetonin 65 familje në Kombinat, nuk e kishte herën e parë që dëmtohej. Ai është dëmtuar edhe në vitin 1988 nga një tjetër tërmet. Në atë kohë, sipas News 24, pallati është rikonstrukuar, çka mesaduket i shpëtoi dhe jetën shumë banorëve në tërmetin e fundit.

Dëmet më të mëdha janë shkaktuar në katin e dytë të tretë dhe të katërt të pallatit si dhe në kafazet e shkallëve, që kanë pësuar të çara. Ndërtesa me 65 apartamente ka përballuar 3 tërmete të forta, atë të vitit 1988, tërmetin e shtatorit të këtij viti si dhe tërmetin e 26 nëntorit.

“Lejen për pallatin ma dha Rama e Basha”. Kryemadhi përplaset me Lubonjën

Monika Kryemadhi dhe analisti Fatos Lubonja janë përplasur në “Real Story”. Kryemadhi, përmendi fëmijët e saj që studiojnë në Londër. Sipas saj, në Shqipëri vajza e saj nuk do mund të shkollohej. Ndërkohë, në këtë moment ndërhyri analisti Lubonja, i cili u shpreh se kalasa politike ka ndjekur logjikën për “t`i çuar fëmijët në Londër, ndërsa të tjerë të rrijnë këtu”.

Debati:

Lubonja: Logjika që na çoi këtu ishte që “ne t’i çojmë fëmijët jashtë dhe këta të rrinë këtu”.

Kryemadhi: Fakti që i fusim të gjithë në një kazan, normal që njerëzit nuk dinë të dallojnë pastaj. Partitë politike kanë faj, edhe krerët e partive, edhe mediet, të gjithë kanë faj. Njerëzit duhet të dinë sa para janë shpenzuar nga ky vit, në këtë vit. Nuk ndjehem keq pse vajza ime shkollohet për matematikë në Londër, se kush do ma shkollonte këtu.

Lubonja: Po ç’lidhje ka kjo tani. Pse bën këtë lëmsh, po flasim për gjithë klasën politike.

Kryemadhi: Unë e kam shansin për fëmijën tim, një tjetër nuk e ka shansin. Siç ke ndërtuar ti pallatin te vila jote, kam ndërtuar edhe unë pallatin te shtëpia ime, me lejen e Edi Ramës dhe me lejen e Lulzim Bashës.

Lubonja: Edhe unë nëse kam ndërtuar pallat, gabim.

Kryemadhi: Po jo pse kemi bërë gabim ne, pse kemi zhvilluar pronën tonë? Jo Lubonja e ke gabim, ne kemi zhvilluar pronën. Unë e kisha mundësinë që ma dhanë prindërit atë mundësi, për fat të mirë të babait tim, kam një pallat, 16 mijë metra katrorë, në të cilën shkolloj fëmijët e mij.

Lubonja: Atëherë mos u anko me Edi Ramën fare…

Kryemadhi: Jo, Edi Rama ma dha lejen mua dhe Lulzim Basha…Makineria e propagandës është shumë e madhe, sa të mbyt. Unë nuk jam si Edi Rama, kam kontribuuar më shumë se ai, se kam qenë e sulmuar si bashkëshortja e Ilir Metës. Ndërsa Edi Rama ka kaq shumë vite në pushtet dhe askush nuk flet për koncesionet e tij.

Lubonja: Po pse tani u bënë ato, po kur ishe ti në pushtet.

Kryemadhi: Nga 2013-2015 qeverisja ka funksionuar në mënyrë perfekte./Realstory.al/

Si Kryemadhi (dhe Meta) fituan 1 milion euro

Marrë nga Shqiptarja.com

Presidenti Ilir Meta deklaroi ditën e martë se bashkëshortja e tij i ka siguruar fëmijët pasi ka në pronësi një pallat. Po si arriti Kryemadhi të ndërtonte një pallat me të ardhura bazë vetëm pagën? Ilir Meta dhe Monika Kryemadhi kanë përfituar pallatin në Tiranë dhe vilën në Gjirin e Lalëzit me një sipërfaqe toke të blerë 5 milionë lekë dhe një pjesë të dhuruar nga vëllai i Kryemadhit.

Konkretisht, në vitin 2007, Monika Kryemadhi deklaron se ka blerë 1200 m2 tokë, me vlerë 5 000 000 lekë, ku 700 m2 janë blerë me të ardhurat e veta në vitin 2007, ndërsa pjesa tjetër është përfituar me dhurim në vitin 1995 nga i vëllai i saj. Një vit më vonë, pra në vitin 2008, Kryemadhi lidh një kontratë sipërmarrje me kompaninë Agi-Kons shpk, pa vlerë të specifikuar, për ndërtimin e një pallati në tokën me sipërfaqe 1900 m2. Sipas kontratës së deklaruar, Kryemadhi do të përfitonte 35 % për qind të pallatit.

Në vitin 2010, Meta dhe Kryemadhi, blejnë apartament banimi 2 kate, me sipërfaqe 317 metra katror në fshatin turistik në Gjirin e Lalzit Durrës me kontratë sipërmarrjeje me Lura sh.p.k, e njohur ndryshe si vila në Gjirin e Lalzit. Për të përfituar vilën, Meta dhe Kryemadhi thonë se kanë këmbyer sipërfaqen ndërtimore 300 metra katrore, ambiente tregtare, sipas kontratës me kompaninë Agi-Kons shpk, si përfitues 33 % (më parë 35 %) të sipërfaqes së ndërtimit si pronar trualli. Pra, nga toka që Kryemadhi ka dhënë për pallat, është përfituar pjesë në pallat dhe vila në Gjirin e Lalzit. Çfarë ndodh më tej? Në vitin 2014, Monika Kryemadhi deklaron se është pronare me 100 % e 13 apartamenteve të banimit me sipërfaqe totale 1444.8 m2, në pallatin në fjalë. Nga viti 2014 dhe në vijim Kryemadhi nis shitjen e apartamenteve.

Shitja e apartamenteve

Që nga viti 2014 deri në vitin 2018, kryetarja e LSI Monika Kryemadhi ka shitur 10 apartamente me vlerë 890 mijë euro. Në vitin 2014, Kryemadhi ka shitur dy apartamente me vlerë 57 798 euro dhe 64 020 euro. Gjatë vitit 2016, Kryemadhi ka shitur katër apartamente, konkretisht me sipërfaqe 200 m2 në vlerën 345 000 euro, 104.74 m2 në vlerën 60 958 euro, 166.2 m2 në vlerën 85 088 euro dhe 108.5 m2 në vlerën 57 885 euro.

Gjatë vitit 2017, Kryemadhi ka shitur dy apartamente të tjera, konkretisht apartament me sipërfaqe 101 m2 në vlerën 55 550 euro dhe apartament me sipërfaqe 166.2 m2 në vlerën 58 806 euro. Gjatë vitit 2018, Monika Kryemadhi ka shitur edhe dy apartamente me sipërfaqe 76.99 m2 me vlerë 42 284 euro dhe sipërfaqe 133,7 m2 me vlerë 64 103 euro. Po gjatë këtij viti, Kryemadhi deklaron një pagesë në vlerën 145 mijë euro për likuidimin e këstit të dytë të një kontrate, por nuk specifikohet lloji i saj./shqiptarja.com