“Fshesa” e Zaev pastron 75 zyrtarë

Kryeministri i Maqedonisë së Veriut, Zoran Zaev ka shkarkuar mbi 75 drejtorë të ndërmarrjeve dhe agjencive shtetërore, për shkak të mungesës së rezultateve me këto ndërmarrje. Shkarkimet do të prekin 31 drejtori, 40 borde dhe 3 agjenci inspektoratëve.

Këto shkarkime ishin paralajmëruar edhe më herët nga Zaev, i cili tha se këto institucione nuk kanë treguar rezultate pozitive në arritjen e objektivave të tyre. Institucionet e prekura nga shkarkimin, janë ndër më të rëndësishmet në vend, ndërsa drejtuesit e larguar ishin pjesë e thuajse të gjitha partive politike, përfshirë edhe shqiptarë.

Këto shkarkime vijonë si pjesë e riformatimit të qeverisë, pas akuzave që qeverisja Zaev ka marrë për mospërmbushje të premtimeve dhe mungesë të rezultateve.

Flirtimet nacionaliste të qeverisë së re dhe e ardhmja e pasigurt e Greqisë

Nga Gazmend Kapllani

Pas një dekade trazirash qeveria e sapozgjedhur po premton të vendosë Greqinë në rrugën e rimëkëmbjes ekonomike – por flirtimet e saj me nacionalizmin populist dhe retorikën anti-imigrante janë shkaqe për të cilat duhet të shqetësohemi.

Ekziston një anekdotë të cilën e tregojnë mes tyre politikanët në Greqi teksa pijnë një filxhan me kafe.

Jean Marie Le Pen, lideri i vjetër e Frontit Kombëtar Francez të ekstremit të djathtë, vizitoi Greqinë në mesin e viteve 1990 për të dhënë bekimet e tij në krijimin e Frontin Kombëtar Grek (Ethniko Metopo), një grup i vogël i ekstremit të djathtë, që më pas u drejtua nga Makis Voridis .

Kur një gazetar grek e pyeti Le Pen pse partitë ultranacionaliste të ngjashme me Frontin Kombëtar Francez nuk ishin në gjendje të bëheshin forca politike relevante në Greqi, kumbari e së djathtës ekstreme franceze të pasluftës u përgjigj: “Sepse në Greqi të gjitha partitë politike janë ultra –nationaliste”

Është thjeshtëzuar disi si thënie, siç ndodh zakonisht me anekdotat por ka pjesën e së vërtetës brenda saj. Sido që të jetë, politika greke ka kaluar nëpër ndryshime dramatike që atëherë.

Në vitet 1990, Greqia po shijonte momentin më të mirë të historisë së saj moderne, ndërkohë që shumica e fqinjëve të saj ballkanikë po merreshin akoma me mbeturinat e lëna nga regjimet e tyre komuniste apo tmerret e luftërave jugosllave. Nacionalizmi ishte i fortë në Greqi (gjithnjë ka qenë), por ekonomia po bënte shumë përpara.

Pastaj, dhjetë vjet më parë, erdhi rënia e shkaktuar nga “kriza e borxheve”. Grekët po vërshonin me zemërim kundër sistemit të korruptuar politik dhe klasa e mesme i trembej kolapsit.

Për t’i vënë vulën gjithçkaje, një valë e madhe refugjatësh sirianë u përpoqën t’i shpëtonin ferrit dhe u strehuan në brigjet greke. Shumë prej tyre tashmë kanë lënë Greqinë, duke vazhduar udhëtimin drejt veriut evropian. Të tjerët ndihen të bllokuar në Greqi, duke jetuar në kushte të tmerrshme dhe ata ende shpresojnë se një ditë do të largohen në një vend tjetër në veri të Europës.

Zemërimi kundër establishmentit politik dhe ksenofobia në rritje solli në krye forcat e reja politike: Syriza në të majtën e demokracisë sociale dhe Agimi i Artë në të djathtën ekstreme të së djathtës ekstreme.

Në vitin 2012, Agimi i Artë u bë partia e parë e dhunshme neo-naziste që hyri në parlamentin e zgjedhur në mënyrë demokratike të një vendi europian pas Luftës së Dytë Botërore. Në zgjedhjet e fundit, Agimi i Artë nuk u rizgjodh në parlament, duke humbur me një numër të vogël votash – por ajo do të vazhdojë të përfaqësohet në Parlamentin Europian.

Shumë grekë nxorën një psherëtimë lehtësimi me përjashtimin e Agimit të Artë, pasi ata kanë përjetuar praninë e saj shtatë vjeçare në parlamentin grek si një poshtërim personal.

Megjithatë, një tjetër parti e ekstremit të djathtë tani ka hyrë në parlament. Ajo quhet Zgjidhja Greke (Elliniki Lysi) dhe ideologjia e saj bazohet në antisemitizëm, një përmbledhje me bollëk të teorive të konspiracionit dhe një formë e veçantë e fundamentalizmit fetar. Udhëheqësi i kësaj partie është Kyriakos Velopulos i cili thotë se gjaku i pastër arian grek rrjedh në venat e Jezusit, dhe se për më tepër ai zotëron letra të shkruara nga vetë Jezusi.

Zgjidhja Greke është gjithashtu e përfaqësuar në Parlamentin Evropian, duke e bërë Greqinë vendin e vetëm në legjislaturën evropiane, jo vetëm me një, por edhe me dy parti të së djathtës ekstreme.

Sigurisht, ekziston një dallim thelbësor midis dy grupeve të ekstremit të djathtë: Agimi i Artë është një bandë e banditëve të dhunshëm ndërsa Zgjidhja Greke është një grup kllounësh. Por ne nuk duhet të nënvlerësojmë faktin se në të djathtën ekstreme, kllounët dhe banditët kanë bashkëjetuar gjithmonë në harmoni.

Duke ndjekur fushatën zgjedhore në Greqi, nuk u impresionova nga ajo që u tha, por nga ajo që u la pa thënë. Nuk pati diskutim serioz për sfidat e mëdha që vendi përballet pas dhjetë vjet trazirash.

Në fund, Demokracia e Re fitoi zgjedhjet me një shumicë domethënëse (më shumë se tetë përqind), por Syriza mbajti pjesën më të madhe të votuesve, duke ringjallur kështu sistemin tradicional dypartiak, i cili i dha Greqisë stabilitetin e tij institucional pas rënies së juntës ushtarake në vitin 1974.

Kreu i Demokracisë së Re Kyriakos Mitsotakis është fituesi i madh i zgjedhjeve. Mbetet për t’u parë nëse ai do të jetë në gjendje të imponojë vlerat politike të modës së vjetër të së kaluarës, mbi tendencat e forta ekstreme të së djathtës që egzistojnë në partinë e tij.

Rritja e fundit e lëvizjeve nacionaliste-populiste në të gjithë Evropën, e shoqëruar nga rënia e partive të vjetra të djathta konservatore, do ta komplikojë më tej detyrën e tij.

Emigracioni, një çështje shumë e ndjeshme në Greqi, do të jetë prova më e madhe në lidhje me qëndrimin e qeverisë së re greke për çështje thelbësore që lidhen me nacionalizmin dhe racizmin, respektin për të drejtat e njeriut dhe barazinë.

Deri më tani, diskursi i Demokracisë së Re për emigrantët dhe refugjatët ka qenë shpesh armiqësore, kështu që ka shqetësim të thellë midis emigrantëve dhe refugjatëve në Greqi se vendi i tyre në shoqëri do të përkeqësojë dhe të drejtat e tyre, mes të cilave edhe qasja tashmë e kufizuar në shtetësinë greke.

Mitsotakis u kujdes për t’i ushqyer më tej këto frika që nga dita e tij e parë kur mori pushtetin, duke vendosur të shfuqizojë Ministrinë e Imigracionit dhe vendosjen e emigracionit nën krahun e Ministrisë së Rendit Publik. Simbolizmi në politikë ka rëndësi dhe ky vendim sjell kujtime të këqija nga një e kaluar jo shumë e largët – kur emigrantët u ndoqën në rrugë dhe u trajtuan brutalisht nga policia greke.

Shumë fytyra të Alexis Tsipras

Mitsotakis (kryeministri) dhe Alexis Tsipras (ish kryeministri) mund të shihen si dy tregime politike në shoqërinë aktuale greke.

Mitsotakis vjen nga një dinasti familjare, anëtarët e së cilës kanë qenë në pushtet në Greqi, për të paktën gjysmë shekulli.

Tsipras vjen nga një sfond i klasës së mesme. Ai nuk është i arsimuar në Harvard si Mitsotakis, por ai është një politikan dinak dhe karizmatik i Ballkanit i cili është në gjendje të “ofrojë” persona të ndryshëm për bashkëbisedues të ndryshëm.

Gjatë këtyre katër viteve e gjysmë si kryeministër i Greqisë, ai ka ‘luajtur’ role të ndryshme: shantazhisti i Evropës (me referendumin e shpëtimit të Syriza në vitin 2015, i cili rrezikoi të shndërrohej në Grexit shkatërrues) dhe në të njëjtën kohë, mbrojtësi i ashpër i BE-së.

Ai ka luajtur gjithashtu rolin e udhëheqësit populist anti-kapitalist (me një dobësi për Venezuelën e Chavezit dhe Kubën e Kastros) dhe gjithashtu një mik i kapitalizmit modern; oportunisti i majtë i cili qeveriste në koalicion me një grup kombëtar-populistësh të krahut të djathtë (Grekët e Pavarur) – qeveria e parë në Europën e pasluftës e përbërë nga të majtët dhe ultranacionalistët; dhe burrë-shteti vizionar që arriti Marrëveshjen e Prespës për t’i dhënë fund mosmarrëveshjes së gjatë të Greqisë me Maqedoninë e Veriut.

Askush nuk e di me siguri se cila, nga të gjitha këto personalitete politike, do të mbizotërojë në të ardhmen e Tsipras.

Sa i përket Mitsotakis, ai ka qenë në gjendje, deri më tani, t’i mbajë të gjithë të lumtur – centristët dhe ‘ekstremistët’, liberalët dhe neo-të djathtët.

Ai ka premtuar, mbi të gjitha, që ta kthejë Greqinë në rrugën e duhur, financiarisht. Formula e tij për të arritur këtë është mjaft e thjeshtë: ai e do kapitalizmin dhe për këtë arsye kapitalizmi do ta dojë atë përsëri. Mbetet për t’u parë se si kjo çështje dashurie do të evoluojë.

Mitsotakis gjithashtu ka premtuar të luftojë nepotizmin në administratën shtetërore dhe klientelizmin, edhe pse ai vetë është ‘produkt’ i një nepotizmi të tillë dhe kapitalizmi klientelist. A do të kthehet kundër traditës së tij familjare dhe do të flakë një rrugë drejt ringjalljes së vërtetë të zhvillimit social në Greqi?

Marrëveshja e Maqedonisë nxit pakënaqësinë nacionaliste

Pozicioni i Greqisë në Ballkan nuk është më ai i një udhëheqës rajonal, pasi politikanët dhe mediat greke kanë punuar shumë për të minuar rolin udhëheqës të vendit të tyre.

Establishmenti politik grek mbështeti Slobodan Millosheviçin gjatë luftërave jugosllave, duke luajtur rolin e të dyshuarve në shtete të dobëta si Shqipëria dhe Maqedonia. Mediat greke mbeten ende ndër më të pavërtetat kur është fjala për Ballkanin.

Konflikti i pafund mbi emrin e Maqedonisë e bëri Greqinë pjesë të problemeve të Ballkanit dhe jo të zgjidhjes së tyre. Marrëveshja e Prespës që Tsipras kishte guximin të përfundonte – kundër kundërshtimit të fortë të Mitsotakis dhe partisë së tij – më tepër ndihmoi Maqedoninë e Veriut të dilte nga pyjet, sesa Greqinë.

Në vend të kësaj, ajo nxiti një valë të pakënaqësisë nacionaliste në Greqi që mund të kishte luajtur një rol vendimtar në humbjen e Syriza. Le të shpresojmë se Mitsotakis nuk do t’i bëjë gjërat më keq. Nëse qeveria e tij e re vazhdon të luajë me nacionalizëm, në fund ajo mund të ketë një efekt bumerang: një kulm i ultranacionalizmit mund të përballojë një goditje vdekjeprurëse ndaj përpjekjeve greke për rimëkëmbjen ekonomike dhe të luajë në duart e grupeve ekstremiste.

E nisa këtë analizë me një anekdotë rreth kumbarit te së djathtës franceze Jean Marie Le Pen duke vizituar mikun e tij grek Makis Voridis në mesin e viteve 1990.

Që atëherë, ka një det të tërë ndryshimesh. Vajza e Le Pen, Marine Le Pen, ka qenë në gjendje të bëjë Frontin Kombëtar Francez forcën kryesore politike të së drejtës politike në vend.

Makis Voridis, sot një anëtar i spikatur i Demokracisë së Re në pushtet, sapo u bë Ministër i Zhvillimit Bujqësor në qeverinë e re greke.

Midis gjithë kësaj, ai ka paguar shërbimet e tij besnike në një tjetër parti të ekstremit të djathtë, LA.OS. pasi ai dha dorëheqjen nga Front Nacional. Vorides njihet gjerësisht si një anti-semitist i vendosur. Ai në njëfarë mënyre është ai “gishti i keq” që qëndron në qeverinë e re dhe tregon se sa e vështirë do të jetë që zoti Mitsotakis t’i mbajë përgjithmonë të gjithë të lumtur në Partinë e tij, centristët dhe të djathtët e të djathtës, liberalët dhe neo-të djathtët …/Marrë nga BIRN, përkthyer nga Realstory.al

#Gazmend Kapllani është autor dhe gazetar poliglot. Ai jeton dhe jep mësim. Romani i tij i katërt, ‘Wrongland’, i botuar tashmë në gjuhën shqipe dhe greke, do të botohet në frëngjisht në shtator. Ai është gjithashtu gazetar në Greqi dhe shkruan për të përditshmen më të madhe, “TA NEA”.

Qeveria i mbështet financiarisht, shqiptarët në Mal të Zi: Vendimi historik

Shqipëria ka kthyer vëmendjen nga shqiptarët që jetojnë në trevat jashtë territorit tonë. Këshilli i Ministrave ka marrë vendimin për të mbështetur financiarisht Këshillin Kombëtar të Shqiptarëve në Mal të Zi, me seli qendrore në Ulqin dhe dy zyrat e tij koordinuese në Malësi/Tuz dhe Plavë. “Këshilli Kombëtar i Shqiptarëve luan një rol substancial në përfaqësimin e përgjithshëm dhe fuqizimin e rolit të veçantë të shqiptarëve në Mal të Zi. Ai adreson një gamë të gjerë çështjesh duke filluar nga arsimi, përdorimi i gjuhës shqipe në institucionet publike, sfidat socio-ekonomike e deri tek ruajtja e trashëgimisë kulturore e historike të shqiptarëve në Mal të Zi. Vendimi i Qeverisë së Shqipërisë për mbështetje financare të Këshillit Kombëtar të Shqiptarëve në Mal të Zi nuk është një veprim i izoluar dhe individual. Ky veprim shënon vetëm fillimin e programit të Qeverisë për të marrë përsipër financimin periodik dhe mbështetjen sistematike të Këshillit Kombëtar të Shqiptarëve në Mal të Zi”, shkruante Ministri i Jashtëm i Shqipërisë Gent Cakaj në një postim në rrjetet sociale.

Ndërkohë, pas këtij vendimi, ka ardhur dhe një reagim, ku shprehet falënderimi ndaj Qeverisë së Shqipërisë, nga Këshilli Kombëtar i Shqiptarëve të Malit të Zi. “Këtë e konsiderojmë si vendim historik i cili duhet përshëndetur, pasi është rasti i parë që Qeveria e Republikës Shqiperisë jep mbështetje financiare për Këshillin Kombëtar të Shqiptarëve në Malin e Zi. Pa dyshim, ky është një vendim i mirëpritur nga ne dhe vjen si rezultat i bashkëpunimit intensiv ndërmjet Keshillit Kombëtar, Ambasadës së Republikës së Shqipërisë në Podgoricë dhe Qeverisë Shqiptare”, shkruhet në deklaratën e Këshillit Shqiptar në Mal të Zi.

Më tej, në deklaratë jepen dhe sqarime se për çfarë do të përdoren këto para, që do të jepen nga Qeveria shqiptare. “Këto mjete do të dedikohen për fuqizimin e aktiviteteve të Këshillit Kombëtar, vënien në funksion të zyrave koordinuese në Malësi dhe Plavë, me qellim të jemi sa më pranë qytetarëveshqiptarë në Mal të Zi, një mundësi më shumë, për të raportuar për shqetësimet e tyre në rastet e shkeljeve të të drejtave kombëtare, për nisma dhe iniciativa kërkimore për situatën aktuale të respektimit të të drejtave, në përputhje me konventat ndërkombëtare dhe ligjet në fuqi, për çështje të tilla si: arsimi në gjuhën shqipe në Mal të Zi, e drejta e përfaqësimit dhe punësimit proporcional të shqiptarëve në institucionet publike, e drejta e përdorimit zyrtar të gjuhës shqipe, përdorimi i lirë i simboleve tona kombëtare, media dhe informimi në gjuhën shqipe, situata socio-ekonomike e shqiptarëve dhe investimet në infrastukturë etj”, citohet nga deklarata.

Më herët, Qeveria Shqiptare ka marrë dhe dy vendime të tjera të rëndësishme për shqiptarët në Mal të Zi; – Vendimi për heqjen e nevojës për t’u pajisur me leje pune për shqiptarët nga Mali i Zi që punojnë dhe ushtrojnë veprimtarinë e tyre në Shqipëri dhe Vendimi për hapjen e Konsullatës së Republikës së Shqipërisë në qytetin e Ulqinit.

Realstory: Qeveria të marrë përgjegjësitë, ose të tërhiqet

Realstory.al zbuloi ekskluzivisht të martën në mbrëmie, qëllimin e vërtetë të kërkesës që Presidenti i Repubulikës Ilir Meta i drejtoi Komisionit Qendror të Zgjedhjeve, për të ditur në rrugë zyrtare, numrin e deputetëve që ka aktualisht Parlamenti. Në fundin e javës së kaluar, kur dhe u zbardh veprimi i Ilir Metës, të gjithë krijuan përshtypje, përfshi dhe Realstory.al, se kjo lëvizje ishte hapi i parë i presidentit drejt shpërndarjes së Parlamentit. Mirëpo, arsyeja nuk ishte kjo, Ilir Meta, siç zbuloi të martën Realstory.al, po përgatitet për të mbrotjur veten, duke i bërë parapri një vendimi final të Kuvendit për shkarkimin e tij me 94 vota, çka mazhorancës do t`i duhen edhe votat e deputetëve të rinj për të plotësuar korumin e nevojshëm për të shkarkuar kreun e shtetit.

Pikërisht, tek deputetët e rinj qëndron “thembra e Akilit” për Ilir Metën. Ai, pritet të përgatisë dosjen e mbrojtjes për shkarkimin nga parlamenti, ku do të cilësojë si të paligjshëm deputetët e rinj, që morën mandatet e dorëzuar në shkurt të këtij viti nga PD dhe LSI. Meta do të kapet pikërisht te verifikimi i dorëzimit të mandateve të opozitës në shkurt, ku në disa prej formularëve të firmosur nga ish-deputetët e PD-LSI, përfshi dhe atë të Monika Kryemadhit, ka pasur parregullsi.

Ndërkohë, shkrimin e plotë të Realstory.al e lexoni këtu!

Por gjithë kjo ndodhi para se kryetarët bashkive të drejtuar nga të zgjedhurit e PD-LSI të ndërmerrnin hapa konkret për vënien në zbatim të skenarit të pengimit të zgjedhjeve, duke mësyrë në Komisionet Zonale të Administrimit të Zgjedhjeve. Tashmë situata ka kaluar përtej një tensioni normal, duke shënuar edhe të plagosur mes militantëve të PD-së apo punonjësve të policive bashkiake të kësaj force politike, të cilët po zbatojnë urdhrat e shefave të tyre për të djegur e shkatërruar materialet zgjedhore. Në fakt, nuk është as më shumë e as më pak, por ajo që zëdhënësi i Ilir Metës, Tedi Blushi, lajmëroi pak ditë më parë “se parlamenti i ‘çunave të Shijakut” do të merrte përgjigjen e merituar nga qytetarët shqiptarë”. Sot trekëndëshi Presidencë-PD-LSI, po vë në zbatim skenarin e pengimit të zgjedhjeve.

Por kujt po i shërben më shumë ky skenar? Kauzës së opozitës për zgjedhje të lira dhe të ndershme? Apo është pasojë direkte e dekretit të 8 qershorit të Metës? A është kjo beteja e kreut të shtetit, për të mos ikur me asnjë mënyrë e me çdo mjet nga Presidenca? Këtë të mërkurë në Burrel është plagosur një militant i Partisë Demokratike, Alfred Lika. Ky i fundit, sipas vetë deklaratës së PD-së “ishte duke zbatuar dekretin e Presidentit, në mbrojtje të Kushtetutës”. Cituar kjo nga një njoftim shpërndarë për mediat nga zyra e shtypit e selisë Blu.

Aktet e dhunshme të së mërkurës bien ndesh me argumentin e Presidentit. Ai argumentoi se protesta e 8 qershorit do të kishte përfunduar në akte dhune të pallogaritshme atë natë, nëse s`do dilte dekreti i tij. Por cili është rezultati sot, dhjetë ditë më vonë?

Situata është tensionuar dhe ka ndezur vatrat e para të konfliktit, pikërisht për shkak të atij dekreti, apo në “mbrojtje” të atij dekreti. Kjo situatë, e cila pritet të kalojë një të enjte “përvëluese” më 20 qershor, mund të jetë prologu i një tensioni dhe më të madh të premten më 21 qershor, ku vatrat e konfliktit për momentin vetëm nëpër bashkitë e djathta, të ndizen përballë Kryeministrisë në protestën e thirrur nga PD-LSI, në Tiranë. Por a do të kenë guximin për ti shkuar deri në fund këtij skenari?!

Të mërkurën pasdite presidenca nxitoi të shpërndante një letër qe Meta ja ka dërguar OSBE dhe kreut të saj Lajçak, të cilin së bashku me disa të tjerë i quajti para disa ditësh ngatërrestarë. A është kjo shenjë se skenari i ditëve të fundit, që mund të kulmojë në 21 qershor, është një mjet final presioni për të bërë që ndërkombëtarët të ndryshojnë mendje për 30 qershorin? A është kjo përpjekja finale për të legalizuar një dekret, që sot është shkaku kushtetues për shkarkimin e Metës? A është fakti më i fundit i asaj që paralajmëruam një ditë më parë, se e gjithë kjo nxitje e rrëmujës, është në fakt vetëm një përpjekje e Ilir Metës për të shpëtuar jo vetëm Presidencën, por veten e tij, pas dekretit të diskutueshëm të 8 qershorit, që amerikanët e quajnë vetëm “njoftim”?

Ndërkohë përballë, Komandant Iliri dhe të tijët, kanë përballë maxhorancën, e cila nuk është e qartë në qëndrime sesa është në fjalë. Duket se kur ndërkombëtarët thonë se “zgjidhjen ta gjejnë vetë shqiptarët”, nënkuptojnë edhe përgjegjësinë dhe vendosmërinë e qeverisë për të mbajtur zgjedhjet në 30 qershor. Për këtë mbështetja e tyre nuk ka munguar për kryeministrin Rama. Por të mërkurën mesazhet e maxhorancës kanë qënë kontradiktore. Kryeministri Edi Rama dhe Ministri i Brendshëm Sandër Lleshaj, ashtu si dhe Policia e Shtetit, kanë bërë thirrje për distancim nga aktet e dhunës dhe pengimi i zgjedhjeve, pasi urdhëruesit e këtyre akteve do të përballen me ligjin. Por ndërsa kemi patur deklarime direkte të bashkiakëve demokratë, nga Voltana e Molotovëve e deri te Frani i tokave të Lezhës, ndërsa kreu i Kavajës jep ultimatume si Berisha në 9 mars 1997, ndërsa në Kukës policët sulmohen si kafshët nga disa mbështetës të PD, qeveria (ajo e llafeve të Lleshit dhe e nje ligji që gjoja nesër kalon në kuvend kundër krimit zgjedhor, por që s’do ketë asnjë efekt për dhunuesit e para 30 qershorit), “Policia ka vepruar me profesionalizëm për të shmangur përshkallëzimin e situatës”.

Të paktën, kështu u shpreh zëvendës ministrja e Brendshme Rovena Voda për të justifikuar tërheqjen përballë njerëzve në Kukës. Por a është Kukësi pjesë e Shqipërisë, që drejton Edi Rama? A është kjo shenjë e një paqartësie, pasigurie dhe tërheqjeje e maxhorancës përballë dhunës politike të paralajmëruar nga Meta, Berisha dhe Basha? Sot është momenti që maxhoranca të marrë përgjegjësitë e qeverisjes së vendit. Ajo nuk mund të presë me kompjuterin hapur, në pritje të ndonjë emaili nga Uashingtoni ose Lajçak. Ja dhe deklarata nga Lajçak erdhi. Po sa e ndryshon kjo situatën? Sa e forcon kjo deklaratë veprimin e qeverisë? Dhuna vazhdon. Nga Shkodra e Voltanës, e deri tek Delvina e Balilëve. Ajo ose duhet të vendose ruajtjen e ligjit dhe të rendit publik, ose të tërhiqet tani, siç thotë zëvendësministrja Voda. Nëse si Voda, mendon dhe kryeministri, se skenari do ketë viktima, dhe ata nuk e ndalkan dot, vecse duke u tërhequr, atëherë më mirë të tërhiqen tani sesa kur të vriten njerëz në 30 qershor. Këtë e ka paralajmëruar Meta, Berisha dhe tani po e thonë edhe grekët. Tërheqja sigurisht do kishte siklet dhe turp brenda pasi prej 5 muajsh, Rama i thotë njerëzve se ka zgjedhje në 30 qershor. Por nëse këtë është i paaftë ta sigurojë, atëherë më mirë të tërhiqet.

Mund të humbasë “betejën” bulliste përballë një opozite të dhunshme drejtuar nga një President i papërgjegjshëm, mund të humbasë besimin e ndërkombëtarëve tek Edi Rama si një lider i qendrueshëm, por të paktën nuk bëhet pjesë qoftë dhe padashje e skenarëve të përgjakshme të kokave të nxehta të Tiranës. E rëndësishme është të mos tërhiqet, si pasojë e një pazari. Edi Rama e di mirë përse ndërkombëtarët këmbëngulin që ai të mbajë zgjedhjet në 30 qershor. Se beteja e vërtetë fillon më pas: ajo Për SPAK.

Shqipëria nuk do ta humbasw luftën përballë të shkuarës dhe të keqes. Thjesht dikush e shtyn atë në kohë. E shtyn. Ky është suksesi i vetëm i dekretit personal të Ilir Metës, njëlloj si ato të Berishës në 1997: Që shtyn udhëtimin pa biletë kthyese të së shkuarës. Kemi pritur 30 vjet. Mund të presim edhe tre muaj.

Fushata: Qeveria cakton fondin për partitë

Në mbledhjen e datës 5 qershor, Këshilli i Ministrave ka miratuar fondin prej 65 milionë lekësh, i cili do iu shpërndahet partive politike që do të marrin pjesë në garën e zgjedhjeve lokale të 30 qershorit.

Vendimi i Këshillit të Ministrave është publikuar në faqen zyrtare të Qeverisë, ku thuhet se “për financimin e fushatës zgjedhore për organet e vetëqeverisjes vendore të datës 30 qershor 2019, në programin “Mbështetje për partitë politike” shtohet fondi prej 65 000 000 (gjashtëdhjetë e pesë milionë) lekësh, i cili iu shpërndahet subjekteve zgjedhore pjesëmarrëse në këto zgjedhje, nga Komisioni Qendror i Zgjedhjeve”.

VKM-ja hyn në fuqi menjëherë, ndërsa paratë do të përballohen nga fondi rezervë i buxhetit të shtetit. “Efekti financiar i parashikuar sipas pikës 1, të këtij vendimi, përballohet nga fondi rezervë i buxhetit të shtetit, miratuar për vitin 2019. Ngarkohen Ministria e Financave dhe Ekonomisë dhe Komisioni Qendror i Zgjedhjeve për zbatimin e këtij vendimi. Ky vendim hyn në fuqi menjëherë dhe botohet në “Fletoren zyrtare”, thuhet ndër të tjera në VKM.

Vendimi i plotë:

V E N D I M PËR

NJË SHTESË FONDI NË PROGRAMIN “MBËSHTETJE PËR PARTITË POLITIKE”, PËR FINANCIMIN E FUSHATËS ZGJEDHORE, TË SUBJEKTEVE PJESËMARRËSE NË ZGJEDHJET PËR ORGANET E VETËQEVERISJES VENDORE, TË VITIT 2019

Në mbështetje të nenit 100 të Kushtetutës, të pikës 1, të nenit 87, të ligjit nr.10019, datë 29.12.2008, “Kodi Zgjedhor në Republikën e Shqipërisë”, të ndryshuar, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, të nenit 13, të ligjit nr.99/2018, “Për buxhetin e vitit 2019”, si edhe të vendimit të Kuvendit të Shqipërisë nr.59/2019, “Për miratimin e fondit për financimin e partive pjesëmarrëse në zgjedhjet e organeve të qeverisjes vendore të vitit 2019”, me propozimin e ministrit të Financave dhe Ekonomisë, Këshilli i Ministrave

V E N D O S I:

Për financimin e fushatës zgjedhore për organet e vetëqeverisjes vendore të datës 30 qershor 2019, në programin “Mbështetje për partitë politike” shtohet fondi prej 65 000 000 (gjashtëdhjetë e pesë milionë) lekësh, i cili iu shpërndahet subjekteve zgjedhore pjesëmarrëse në këto zgjedhje, nga Komisioni Qendror i Zgjedhjeve.

Efekti financiar i parashikuar sipas pikës 1, të këtij vendimi, përballohet nga fondi rezervë i buxhetit të shtetit, miratuar për vitin 2019.

Ngarkohen Ministria e Financave dhe Ekonomisë dhe Komisioni Qendror i Zgjedhjeve për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

Shfaqet Salianji nën gërmadha: Të shpallet gjendja e jashtëzakonshme

Ish deputeti demokrat Ervin Salianji, duke e cilësuar emergjente situatën në qytetin e Korçës, ka kërkuar shpalljen e gjendjes së jashtëzakonshme dhe përqendrimin e të gjitha burimeve në këtë bashki për t’u ardhur në ndihmë banorëve.

Në një postim në facebook, Salianji akuzon qeverinë që i ka lënë, sipas tij banorët, nëpër çadra pa asnjë kusht, ndërsa shton se kjo situatë nuk zgjidhet me foto në facebook.

“Situatë më emergjente se çdo emergjencë, shpallja e gjendjes se jashtëzakonshme, dëmshpërblimi për çdo pronë të dëmtuar dhe përqëndrimi i gjithë burimeve në bashkitë Korçë, Devoll dhe Kolonjë, kryesisht në Floq, Qafzez dhe Vidohovë në zonat e shkatërruara nga tërmeti!

Fëmijë të vegjēl, gra, të moshuar dhe burra të gjunjëzuar dhe me lot dhimbje për mundin e gjithë jetës te shkuar dëm dhe për pamundësinë për të ndihmuar familjet që flejnë me keq se bagëtitë në kasolle apo çadra skandaloze pa asnjë kusht.

Nuk është kërkesë për përfitim politik, ështē kerkese njerëzore përcveçse detyrim ligjor për të ndihmuar qindra familje që vuajnë në mes të rrugëve! Nuk zgjidhet situata me facebook dhe me parada por me përqëndrim të çdo burimi në zonë, ka nevojë emergjente për ushqime, ilaće, batanije dhe më shumë se keto kanë nevojën të sigurohen që prona dhe jeta e tyre do të rindërtohen!

Turpi i mbuloftë gjithë ata punonjës administrate që e ndajnë për të majte dhe jo për votuesit e PD dhe pakon e makaronave që nevojitet për të mbajtur frymen e banorëve!”, shkruan Salianji.

Prej disa ditësh, Emergjencat Civile, ministria e Mbrojtjes dhe ajo e Shëndetësisë janë angazhuar në qarkun e Korçës për t’u ardhur në ndihmë banorëve të prekur nga tërmetet duke i siguruar atyre, fjetje, ushqim dhe shërbim shëndetësor gjatë 24 orëve.

Situatë më emergjente se çdo emergjencë, shpallja e gjendjes se jashtëzakonshme, dëmshpërblimi për çdo pronë të dëmtuar…
Gepostet von Ervin Salianji am Dienstag, 4. Juni 2019

Jo tendera për kryebashkiakët në largim dhe administratë asnjanëse

Me afrimin e zgjedhjeve më 30 qershor, qeveria ka marrë dy vendime që kanë të bëjnë me mbarëvajtjen e procesit zgjedhor, por që do të mundësojë edhe një qeverisje më të mirë.

Në vendimin e parë qeveria ka miratuar që t’u hiqet e drejta të gjitha krybashkiakëve që po u mbaron mandati të mos kenë më të drejta për dhënien e tenderave apo prokurime me vlerë të lartë. Ndërsa në vendimin e dytë ka ngritur një Task-Forcë për të mos lejuar administratën të bëhet pjesë e procesit elektoral duke siguruar asnjanësinë e saj.

VENDIM

PËR PEZULLIMIN E PËRKOHSHËM TË FILLIMIT TË PROCEDURAVE TË PROKURIMIT NGA NJËSITË E VETËQEVERISJES VENDORE DHE AUTORITETET KONTRAKTORE NË VARËSI TË TYRE, PËR VITIN 2019

Nё mbёshtetje tё nenit 100 tё Kushtetutёs, të neneve 16 e 40, të ligjit nr.9936, datё 26.06.2008, “Pёr menaxhimin e sistemit buxhetor në Republikën e Shqipërisë”, tё ndryshuar, me propozimin e Kryeministrit, Kёshilli i Ministrave

V E N D O S I:

Pezullimin e përkohshëm të fillimit të procedurave të prokurimit nga njësitë e vetëqeverisjes vendore dhe autoritetet kontraktore në varësi të tyre, për vitin 2019.

Përjashtohen nga ky rregull:

– prokurimet me vlerë të vogël;

– procedurat e prokurimit që kanë si objekt produktet ushqimore.

Ngarkohen të gjitha institucionet e vetëqeverisjes vendore, institucionet në varësi të tyre dhe Agjencia e Prokurimit Publik për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

VENDIM

“Task-Forca, në bashkëpunim me titullarët e ministrive dhe grupet e monitorimit, të përmbushë detyrat, si më poshtë vijon:

a) Monitorimin e sjelljes dhe të veprimtarisë së administratës shtetërore, sipas këtij vendimi;
b) Monitorimin e administratës shtetërore në drejtim të përdorimit të autoritetit shtetëror vetëm në përputhje me ligjin duke mos lejuar përdorimin e burimeve njerëzore, financiare dhe logjistike të shtetit gjatë procesit zgjedhor si dhe duke mos lejuar kryerjen e veprimeve dhe/ose dhënien e premtimeve, favoreve apo moscenimin e të drejtave të shtetasve, si mekanizëm për favorizimin apo dhënien e votës një subjekti të caktuar politik apo kandidati;
c) Monitorimin e procesit zgjedhor me qëllim konstatimin dhe raportimin e përdorimit gjatë fushatës dhe procesit zgjedhor të mjeteve financiare nga burime të paligjshme apo të krijuara nga veprimtari të paligjshme;
ç) Monitorimin e procesit zgjedhor, përfshirë ditën e votimit, në funksion të mospërfshirjes në të të zyrtarëve apo personave të tjerë që ndodhen në institucione shtetërore, përfshirë personat e burgosur, dhe marrjen e masave për ndëshkimin e atyre zyrtarëve që veprojnë në kundërshtim me ligjin. Pjesë e kësaj detyre është edhe monitorimi i lëvizjes së nëpunësve të lartë dhe të mesëm shtetërorë në qendër dhe qarqe apo bashki gjatë procesit zgjedhor;

d) Monitorimin e përditësimit dhe ndjekjen e problematikave me listat e zgjedhësve;
dh) Monitorimin e zbatimit të masave për pezullimin e iniciativave për kontrata të përkohshme në nivel qendror e vendor;
e) Monitorimin e përditësimit të akteve të Komisionerit për Mbikëqyrjen e Shërbimit Civil;
ë) Njoftimin apo kryerjen e kallëzimit penal në Prokurorinë e Përgjithshme për raste të marrjes/vënies në dijeni për kryerjen e veprave penale në fushën zgjedhore;

f) Njoftimin e Avokatit të Popullit kur merr apo vihet në dijeni për kryerjen e shkeljeve të të drejtave të njeriut gjatë procesit zgjedhor;
g) Njoftimin e Komisionit Qendror të Zgjedhjeve kur merr dijeni apo vihet në dijeni për problematika të procesit zgjedhor;
gj)Bashkëpunimin dhe bashkërendimin e punës me Policinë e Shtetit në funksion të marrjes së masave të menjëhershme në përputhje me ligjin kur konstatohen raste të sjelljeve apo veprimtarive të kundërligjshme gjatë procesit zgjedhor;

h) Çdo detyrë tjetër në funksion të monitorimit të zbatimit të këtij vendimi”,- thuhet në vendimin e qeverisë.

Përplasjet me TIA, qeveria konsulencë të huaj për monitorimin e marrëveshjes

Grabitja e parave në pistën e avionëve në Rinas më 9 prill, ka çuar qeverinë shqiptare në përplasje me koncensionarin kinez të Rinasit.

Edhe pse qeveria akuzoi pikërisht koncensionarin si fajtor kryesor të mungesës së sigurisë në një vend që pritej të ishte ndër më të sigurtit. Pas ngjarjes policia çoi forcat ushtarake për të kontrolluar sigurinë në aeroportin e Rinasit.

Mirëpo me një vendim të sotëm, të botuar në fletoren zyrtare, Shqipëria do të kërkojë asistencë ligjore nga studio avokatie të huaja për të monitoruar zbatimin e marrëveshje mes qeverisë shqiptare dhe TIA-s.

Qeveria shqiptare kërkon konsulenca mbi kontratën dhe përcaktimin nëse ka pasur shkelje të saj apo jo. Nëse konkluzionet janë të faror të qeverisë shqiptare, pritet vendimi për ta depozituar këtë konflikt në arbitrazhin ndërkombëtar.

Qeveria miraton dëmshpërblimin për banorët e Astirit

Plot 1 miliardë e 224 milionë lekë janë vendosur në dispozicion të banorëve tek “Unaza e Re” si dëmshpërblim të banesave të tyre që preken nga projekti “Rehabilitimi i segmentit rrugor “Pallati me shigjeta – rrethrrotullimi “Shqiponja””. Shpronësimi i banorëve do të fillojë menjëherë dhe se banorët duhet të paraqesin dokumentacionin përkatës pranë Autoritetit Rrugor Shqiptar dhe Agjencisë Shtetërore të Kadastrës.

Procedurat e kalimit të pronësisë në favor të shtetit dhe shpronësimi i banorëve duhet të nis brenda 30 ditëve, nga data e miratimit të këtij vendimi.

Banorët e Astirit, prej muajsh, protestojnë thuajse çdo ditë, ku kërkojnë dëmshpërblim me vlerën e tregut për pronat e tyre, pavarësisht statusit të legalizimit të tyre. Gjatë protestave nuk kanë munguar edhe përplasjet me policinë.

100 mijë euro nga Shqipëria për Notre-Dame

Edhe Shqipëria do të ndihmojë Francën për rindërtimin e Notre-Dame. Qeveria mori sot vendimin për t’i dhuruar Francës 100 mijë euro për rindërtimin e Katedrales së Parisit.

Më herët, edhe Kosova është bërë pjesë e listës së dhuruesve, por pa dhënë një shifër konkrete. Aktualisht, deri më tani janë grumbulluar rreth 1 miliardë euro, por ekspertët kanë vlerësuar se për rikthimin e Katedrales në gjendjen e mëparshme, nevojitet një shumë më e madhe.

Katedralja e famshme 850 vjeçare e Parisit dy ditë më parë u përfshi nga flakët duke shkatërruar një pjesë të mirë të saj. Autoritetet kanë thënë se zjarri ka qenë aksidental, ndërkohë që presidenti francez ka premtuar rindërtimin e saj brenda 5 viteve të ardhshme.