Riatdhesohen 114 shqiptarë, mes tyre të dënuar në vendet e BE

Të shtunën u riatdhesuan 114 shtetas shqiptarë, të cilëve u ishte refuzuar kërkesa për azil nga vendet e Bashkimit Europian. Me anë të një komunikate, Policia e Shtetit njoftoi se shtetasit shqiptarë kishin thyer rregullat e qëndrimit në vendet e BE-së.

Sipas njoftimit, mësohet se shumë prej këtyre personave të riatdhesuar, kishin kërkuar azil në Francë, Belgjikë dhe Gjermani. Nga Franca janë rikthyer 28 shtetas ndërsa nga Belgjika 5.

Sipas policisë, 81 shtetas të tjerë të riatdhesuar, janë persona të cilët kishin thyer rregullat e Schengen, ndërsa një pjesë e tyre janë deportuar nga Anglia, pasi kishin hyrë ilegalisht në këtë vend.

Disa nga personat e riatdhesuar janë shtetas shqiptarë që rikthehen në vendin tonë, pasi kanë përfunduar dënimin për vepra të ndryshme penale në një nga vendet e Bashkimit Europian.

Policia e Shtetit apelon edhe njëherë për të gjithë shtetasit shqiptarë që udhëtojnë për në vendet e BE-së, të respektojnë rregullat e lëvizjes në hapësirën Schengen dhe të mos kërkojnë azil, pasi shanset për ta fituar janë zero.

Kërkuan azil në Francë, riatdhesohen 60 shqiptarë

Të mërkurën në aeroportin e Rinasit janë rikthyer 60 shtetas shqiptarë, të cilët kishin aplikuar për azil në Francë. 60 personat janë riatdhesuar duke u sjell me çarter nga Lille. Sipas një njoftimit të bër të ditur nga Policia e Shtetit mësohet se 20 prej të riatdhesuarëve kishin aplikuar për azil, ndërsa 40 të tjerë kishin shkelur rregullat e qëndrimit në vendet e Bashkimit Europian.

Operacioni i riatdhesimit do të vazhdojë edhe në javët e ardhshme. Për këtë arsye, Policia e Shtetit u ka bërë thirrje shtetasve shqiparë që udhëtojnë në vendet e BE, të respektojnë rregullat e lëvizjes dhe qëndrimit në hapësirën Schengen, duke mos kërkuar azil. Shanset për të përfituar këtë të drejtë në vendet e BE nga shtetasit shqiptarë, sipas policisë, janë zero.

Njëkohësisht Policia Kufitare, në pikat e kalimit do vijojë me kontrollet rigoroze në drejtim të verifikimit të dokumentacionit dhe plotësimit të kushteve për të udhëtuar në vendet e BE-së, si dhe të kontrollit më të rreptë të kufirit jeshil.

U refuzohet azili, riatdhesohen 29 shqiptarë

Këtë të martë (2 korrik) janë riatdhesuar vullnetarisht 29 shtetas shqiptarë, të cilët ishin larguar më herët nga vendi dhe kishin kërkuar azil në vendet e Bashkimit Europian. Policia e Shtetit raporton se 29 shtetasit e rikthyer përsëri në Shqipëri, kanë ardhur nga Franca, pasi më herët në këtë vend të BE-së kishin kërkuar azil.

Kthimi i tyre në mënyrë vullnetare është bërë me një avion të posaçëm, i cili ka transportuar nga shteti francez në drejtim të vendit tonë 29 shtetasit, që tashmë do të riatdhesohen pas mohimit të kërkesës për azil dhe kthimit vullnetar.

Nëpërmjet një komunikate për mediat, Policia e Shtetit u ka bërë thirrje të gjithë shtetasve shqiptarë që të mos tentojnë të kërkojnë azil.

Gjithashtu, policia, kërkon që të mos abuzohet me rregullat për lëvizjen në hapësirën Schengen, si dhe të tregojnë kujdes për të mos rënë pre e mashtrimeve për të marrë dokumente false, me qëllim përfitimin e azilit në vendet e BE.

Gjatë muajti qershor janë riatdhesuar disa shtetas, kryesisht nga Franca por edhe vende të tjera të BE, të cilët ishin larguar më parë nga vendi dhe kishin paraqituar kërkesat për azil në vendet e BE.