Dekreti i Metës, Veliaj: Presidenti po i jep një dorë Bashës, por ai nuk bëhet më

Nga Farka ku zhvilloi një takim elektoral, Erion Veliaj ka komentuar vendimin e presidentit Ilir Metan për shtyrjen e datës së zgjedhjeve. Veliaj u shpreh se akti i Metës i shkon në ndihmë Lulzim Bashës, por, sipas Veliajt, Luli ka treguar se nuk është i aftë dhe nuk bëhet më.

“Ne të vazhdojmë punën, rrugën dhe drejtimin e duhur për Tiranën tonë. Jam entuziast se shumica e popullit shqiptar nuk shkuan pas një guri që hodhi njëri në lumë. Sot nuk ka asnjë pengesë pse qytetarët të mos zgjedhin politikanët e duhur. Presidenti e provoi që t’i japë Lulit një dorë. Po Lulit jepi ça të duash nuk bëhet më. E kishte Tiranën në dorë 4 vite”, u shpreh Veliaj.

Dekreti i Metës. Çfarë është presidenti për ju?

Më tej, kryebashkiaku Erion Veliaj u shpreh se Lulzim Bashën po mundohen ta mbajnë me pilula, ndërsa shtoi se sot u kemi thënë lamtumirë atyre që na bllokojnë. “Lulin po mundohen ta mbajnë me shiringa me pilula, po nuk bëhet më. Këtu në Farkë s’kishte autobus të vinte këtu, nuk kishte një kopsht, një çerdhe. E menaxhonte Loni këtu. Duket sikur ka qenë para 100 viteve, por ka qenë para pak. Sot i kemi thënë lamtumirë dekreteve, lamtumirë atyre që na bllokojnë”, tha Veliaj.

Gjatë fjalës së tij, Erion Veliaj, u shpreh se dekreti i Metës vjen direkt pas reagimit që mbajti SHBA, që u shpreh se më 30 qershor amerikanët do të vinin në Shqipëri për të monitoruar zgjedhjet, dhe përgjegjësit e dhunës do të ishin Luli e Mona.

“Dekreti nuk ndodhi në dhjetor, para se të caktohej data e zgjedhjeve, por ndodhi dje. Dekreti ndodhi dje sepse Amerika tha do jemi në Shqipëri në 30 qershor që qytetarët të votojnë të lirë. Ja pse ndodhi. Një herë në 4 vjet, do merret më i miri në punë. Jo kur të dojë qejfi ty. Kjo nuk është në dorë të politikanëve, është populli që i zgjedh”, theksoi Veliaj.

Ndërkombëtarët “opium” për… opozitën

Protestës së opozitë i ka paraprirë një reagim i fortë nga selitë diplomatike dhe përfaqësues të shteteve partnere në Tiranë. I pari që reagoi paraditen e së shtunës, ishte Zëvendës Ndihmës-Sekretari i Shtetit në SHBA Mattheë Palmer, që i dha një mesazh të fortë krerëve të opozitës. Z.Palmer, në një intervistë për mediat shqiptare u shpreh se nëse në protestën e opozitës do të ketë akte dhune, përgjegjësit do të ishin Lulzim Basha dhe Monika Kryemadhi.

“Dua të jem shumë i qartë me Z. Basha, Znj. Kryemadhi dhe të tjerë në partitë e tyre: nëse në protestat e ardhshme ka akte dhune, për ne ata do të jenë përgjegjësit. Ka qenë shumë e qartë në të kaluarën që kur drejtuesit duan që protestat që të jenë paqësore, ato kanë qenë paqësore. Demonstratat e dhunshme po dëmtojnë përpjekjet e Shqipërisë për reforma demokratike si dhe perspektivën e vendit për të ecur përpara në rrugën drejt BE”, shprehet Palmer.

Por, Palmer nuk është ndalur vetëm me dënimin e dhunës së ushtruar në protestat e opozitës, pasi ai ka lëshuar dhe një paralajmërim të fortë për ata që do të tentojnë të prishin zgjedhjet e 30 qershorit, një paralajmërim që së fundmi është dëgjuar shpesh edhe nga kryeministri Edi Rama në takimet elektorale që po zhvillon në këtë fushatë.

“I kemi paralajmëruar drejtuesit e opozitës të mos pengojnë procesin zgjedhor, çka siç e vërejta, mund të përbënte shkak për të mos u kualifikuar për të hyrë në SHBA. Ditën e zgjedhjeve, ekipet tona të ambasadës do të vendosen në qendra votimi për monitorim zgjedhor. Kemi në plan të shqyrtojmë raportimet për monitorimin zgjedhor të ekipeve tona si dhe ato të ODIHR”, deklaroi Palmer.

Pak para nisjes së protestës së 8 qershorit, ambasada e Bashkimi Europian në Tiranë ka reaguar duke bërë thirrje që nuk do të tolerojnë asnjë lloj të dhunës apo përdorim të mjeteve që janë projektuar për të lënduar. Në një deklaratë për mediat, BE cilëson se nëse ka dhunë në protestë përgjegjës do të jenë vetëm drejtuesit e saj, ndërsa ka bërë thirrje për një dialog urgjent për të kapërcyer situatën aktuale politike.

“Ndërkohë që respektojmë plotësisht të drejtën themelore të qytetarëve shqiptarë për të demonstruar, ritheksojmë rëndësinë e ushtrimit të kësaj të drejte në mënyrë të rregullt dhe paqësore. Ne dënojmë të gjitha aktet e dhunshme që kanë ndodhur në protestat e mëparshme. Asnjë formë e nxitjes së dhunës nuk është e tolerueshme. Përdorimi i eksplozivëve ose i ndonjë sendi tjetër të projektuar për të shkaktuar lëndime është krejtësisht i papranueshëm”, thuhej ndër të tjera në deklaratën e ambasadës së BE në Tiranë.

Të njëjtën retorikë mbajti edhe Ambasada Gjermane në Tiranë, ku bëri thirrje që drejtuesit e protestës të siguroheshin që nuk do të kishte përdorim dhune, ndërsa theksuan nevojën urgjente për tu ulur në tryezën e dialogu.

Ambasada e Britanisë së Bashkuar në Tiranë ka zgjedhur ta japë mesazhin e saj për opozitën në dy gjuhë. Në anglisht dhe shqip, selia diplomatike në Britanisë në Tiranë, i drejtohet opozitës dhe kryetarit të saj Lulzim Basha, që të ushtrojë të drejtë për të protestuar në mënyrë të rregullt dhe paqësore.

“Ndërkohë që respektojmë plotësisht të drejtën themelore të qytetarëve shqiptarë për të demonstruar, ritheksojmë rëndësinë e ushtrimit të kësaj të drejtë në mënyrë të rregullt dhe paqësore”, shkruan në nisje të deklaratës së saj ambasada e Britanisë.

Më tej, mesazhi bëhet dhe më i qartë, më domethënës për opozitën dhe drejtuesit të saj, pasi ambasada e Britanisë shprehet se “dënon të gjitha aktet e dhunës që kanë ndodhur në protestat e mpërashme të opozitës, dhe asnjë formë e dhunës nuk është e tolerueshme”, thuhet në deklaratën e ambasadës së Britanisë.

“Përdorimi i eksplozivëve ose i ndonjë sendi tjetër të projektuar për të shkaktuar lëndim është krejtësisht i papranueshëm. Është përgjegjësi e drejtuesve të protestës të sigurojnë që demonstrimet të mbahen në mënyrë të sigurt si për pjesëmarrësit ashtu dhe për banorët e tjerë në Tiranë, si dhe për të shmangur çdo përshkallëzim gjatë protestave”, thuhet në deklaratën e ambasadës së vendit ishullor.

Në fund, ambasada e Britanisë dërgon dhe një tjetër mesazh, duke u kërkuar palëve angazhim urgjent për dialog. “Ne vazhdojm t`i bëjmë thirrje të gjitha palëve të angazhohen urgjentisht në një dialog konstruktiv për të kapërcyer situatën politike”, mbyllet mesazhi i ambasadës britanike.

Erion Braçe: SHBA vendos vijën e kuqe për Lulin dhe Monën

Pas deklaratës së zv.ndihmës Sekretarit të Shtetit, ka reaguar zëvendës kryeministri Erion Braçe i cili thotë se SHBA vendosi vijnë e kuqe për Lulin dhe Monën.

Braçe shkruan se SHBA bën përgjegjës opozitën për molotovin kundër policisë deri sot, si dhe paralajmëron pasojat për të gjitha ata që do të prekin zgjedhjet.

Zëvendës kryeministri thekson se zgjedhjet do të mbahen në 30 qershor dhe se kjo ka mbështetjen e plotë të SHBA-së.

Postimi i plotë i Erion Braçes në Instagram:

SHBA VENDOS VIJEN E KUQE!

#PergjegjesitPerDhunen jane

Lulzim Basha e Monika Kryemadhi;

#KushPrekZgjedhjet arsye per te mos hyre me ne SHBA!

#QeveriaAmerikane vendos #VijeneKuqe dhe e thote publikisht, hapur, qarte:

NE, SHBA DO TE JEMI NE ZGJEDHJE NE #30QERSHOR!

Pas kesaj kam dy gjera per te thene:

Lyrzim, ti nuk je Don Kishot-ai ishte i mencur!

Ti je #KatranmeBoje!

Pas nje akuze personale per vjedhje ngritur nga Prokuroria dhe ende e pagjykuar;

Pas nje akuze publike, ooo sa publike per vrasjet e 21 janarit;

Pas nje akuze dhe hetimi ne zhvillim ne SHBA personalisht ndaj teje;

Pas nje akuze dhe hetimi ne zhvillim ne SHQIPERI personalisht ndaj teje;

Shtohen edhe dy te tjera ardhur nga SHBA;

Njera te ben personalisht pergjegjes per dhunen e derisotme dhe vendos #VijeneKuqe per dhunen e paralajmeruar per darken e sotme;

Tjetra vendos pergjegjesine e Molotoveve kunder Policise dhe institucioneve personalisht tek ty; jo vetem natyrisht!

Me rende se kaq nuk ka!

I perveluar me Molotovin qe e pergatite vete!

E dyta,

kur #EdiRama paralajmeroi se

kush prek zgjedhjet do i ndalohet hyrja ne SHBA e BE,

ideologet e dhunes barbare Andi, Mandi, Tosi, Turi, Tani, Soni etj,

posacerisht Lyli, Mona, Titi etj,

uleriten: NUK NDODH!

Urdheroni;

Lexojeni tani dhe degjojeni ne oren 15.00,

anglisht, shqip por TROÇ:

Kush cenon zgjedhjet eshte arsye per mos kualifikim per te hyre ne SHBA!

Dhe ketu jane te gjithe, te gjithe:

Nga ai qe do preke daten e zgjedhjeve #30QERSHORIN,

deri tek ai qe do cenoje zgjedhjet fizikisht ne diten e mbajtjes se tyre #30QERSHOR!

Qeveria e SHBA lajmeron se,

do je jete ne zgjedhje ne #30QERSHOR,

DO TI VEZHGOJE E VLERESOJE ATO!

Kaq!

Degjohemi ne oren 15.00!

Rama si Palmer: Dhuna i mbyll Lulit derën për Amerikë. Pyet Saliun

Kryeministri Rama u ndal të shtunën në Skrapar nga ku i dërgoi një mesazh të qartë drejtuesve të opozitës duke thënë se dyert e tyre do të mbyllen nga SHBA për shkak të thirrjeve për dhunë. Madje ai tha se këtë gjë e di mirë edhe Sali Berisha.

“Jo vetëm personalisht por edhe familjarisht do të humbasin të drejtën për të shelur në SHBA dhe kjo do të fillojë nga këta kryesorët që bëjnë thirrje për dhunë, bëjnë thirrje për përmbysje, bëjnë thirrje për vullnetin e sovranit që do ccojë në fund revolucionin e tyre imagjinar dhe kush nuk e beson këtë le t’i bëjë një telefon plakut (Berishës) dhe ta pyes. Edhe pastaj le ta dëgjojë plakun, por nëse plaku thotë jo, më pyesni mua se ju sqaroj unë edhe për plakun”, tha Rama.

Ai tha se më 30 qershor do të ndodhin vetëm dy gjëra:

“Së pari do të bëhen zgjedhjet dhe do të nisë mandati i ri i qeverisjes vendore për 4 vitet e ardhshme dhe së dyti do të ndëshkohen me të gjithë forcën e ligjit të gjithë ata që do të gabojnë duke shkuar pas berihajit dhe jo vetëm që do të përballen me një nga ligjet më të ashpra që ka ky vend, por që në momentin që do të fillojë procedimi penal do të ndalohen të dalin jashtë shtetit. Nuk do të ketë kufij në BE që mund ta kalojnë kontrollin e policisë dhe do të jenë pjesë e listës së zezë të BE-së dhe SHBA”, tha kryeministri.

ERTV Live😊: SKRAPAR #30QERSHOR🌹 ⭐BASHKIA QE DUAM⭐ SHQIPERIA🇦🇱QE🇪🇺DUAM
Gepostet von Edi Rama am Samstag, 8. Juni 2019

Pas fotos “Kosova është Serbi”, SHBA i kthehet Daçiç

Pas publikimit të fotove në internet ku Daçiç shfaqej me një kartëmonedhë 100 dollarëshe ku shkruante “Kosova është Serbi”, ka reaguar Ambasada Amerikane në Beograd. Përmes një deklarate ambasada i kujton Daçiç një thënie të famshme të Benjamin Franklin “Ji në luftë me veset e tua, dhe në paqe me fqinjët.”

‘Në vend që të shkatërrojë kartëmonedhën me imazhin e shkencëtarit të madh dhe burrështetasit Benjamin Franklin, ministri Daçiç mund të mendonte thënien e tij: Ji ne luftë me veset e tua, e në paqe me fqinjët” – thuhet në reagimin e saj.

Më herët Daçiç e arsyetoi foton duke thënë se “Kosova është Serbi” është politika shtetërore që ndjekin dhe e themi vazhdimisht në deklaratat tona, kështu që nuk ka arsye pse të mos e shkruaj edhe në letër.”

Kina mesazh popullit të saj: SHBA është e keqe, mos shkoni atje

Marrëdhëniet mes Kinës dhe SHBA prej kohësh janë tensionuar, që nisën me vendimin e presidentit të SHBA, Trump për ngritjen e tarifave nga 10% në 25% ose 200 miliardë dollarë për mallrat kineze dhe pasoi me ndalimin e gjigandit teknologjik kinez Huawei për të eksportuar produktet e saj në tregun amerikan.

Ditët e fundit, qeveria e Kinës ka lëshuar dy njoftime për qytetarët e saj që shkojnë në SHBA ku i paralajmërojnë për “rreziqet’ që i presin, ndërkohë që mediat shtetërore kanë ngritur retorikën e zjarrtë antiamerikane. Kjo tregon edhe një herë ashpërsimin e marrëdhënieve pas një lufte të zgjatur tregtare mes dy ekonomive më të mëdha në botë.

Ministria e Kulturës dhe Turizmit e Kinës paralajmëroi qytetarët e saj për rreziqet për të udhëtuar në SHBA me një alarm për rritje të vrasjeve, dhunës dhe vjedhjeve, ndërsa Ministria e Jashtme lëshoi një paralajmërim sigurie për qytetarët kinezë, duke pretenduar “ngacmimin e përsëritur” të shtetasve kinezë në SHBA.

Abuzonte seksualisht me fëmijët, arrestohet kreu i një sekti fetar

Kreu i një organizate ndërkombëtare fetare është arrestuar në SHBA për akuzat e trafikimit të qenie njerëzore, dhunim seksual të fëmijëve dhe krime të tjera. Naason Joaquín García, i cili ishte kreu i kishës La Luz del Mundo (Drita e Botës), u arrestua në aeroportin e Los Anxhelosit, së bashku me 3 gra që akuzohen si bashkëpunëtore të tij.

Plot 26 krime rëndojnë ndaj të arrestuarve për periudhën 2015 dhe 2018 në Kaliforninë e Jugut, mes të cilave prodhim të imazheve të abuzimit seksual të fëmijëve dhe përdhunimin me forcë të të miturit.

García, i njohur si “Apostulli” është kreu i një organizate fetare me seli në Meksikë, që pretendon se ka pagëzuar më shumë se 5 milionë njerëz rreth globit si ndjekës të saj.

Vjazat e mitura të përdhunuara kërcënoheshin me fjalët se “nëse do të shkonin kundër dëshirave të “Apostullit” ata do të shkonin kundër Perëndisë.” Ndërsa vetë organizata La Luz del Mundo i ka hedhur kategorikisht poshtë akuzat duke thënë se García do të shpallet i pafajshëm.

Palmer: Nuk ka vijë të kuqe për bisedimet Kosovë-Serbi

Zëvendës ndihmës sekretari amerikan i shtetit, Mathew Palmer, tha se Shtetet e Bashkuara nuk kërkojnë një afat të caktuar për arritjen e një marrëveshjeje për normalizimin e marrëdhënieve ndërmjet Kosovës dhe Serbisë, por do të dëshironin një rifillim sa më të shpejtë të bisedimeve.

Në një intervistë për programin në gjuhën serbe të Zërit të Amerikës, ai tha se Shtetet e Bashkuara nuk vendosin vija të kuqe në procesin e bisedimeve, por kjo nuk nënkupton se të gjithë mundësitë janë të hapura.

Zëri i Amerikës: Zoti Palmer, a prisni që Serbia dhe Kosova të nënshkruajnë një marrëveshje për normalizimin e marrëdhënieve mes tyre në Shtëpinë e Bardhë këtë vit?

Matthew Palmer: Ne nuk po kërkojmë ndonjë kuadër kohor të caktuar. Ne mbështesim normalizimin e marrëdhënieve mes Kosovës dhe Serbisë, ne duam të shohim që dialogu për arritjen e këtij synimi të rifillojë sa më shpejt që të jetë e mundur dhe që palët të arrijnë një marrëveshje gjithëpërfshirëse për normalizimin e marrëdhënieve në kohë. Në se kjo do të ndodh apo jo deri në fund të vitit, nuk jam në gjendje ta parashikoj.

Zëri i Amerikës: Presidenti Trump ka bërë thirrje për arritjen e një marrëveshje sa më shpejt që të jetë e mundur. Prandaj ju pyeta, a besoni se ajo do të ndodh këtë vit?

Matthew Palmer: Në këtë moment jam më i interesuar që palët të ulen përsëri në tryezën e bisedimeve, të rifillojnë dialogun, të përparojnë hap pas hapi drejt një marrëveshjeje. Nuk mendojmë se vendosja e një kufiri artificial kohor do të ndihmonte arritjen e një marrëveshjeje apo të lehtësonte procesin. Por, duam që palët të rifillojnë negociatat sa më shpejt që të jetë e mundur dhe urgjentisht.

Zëri i Amerikës: Presidenti Vuçiç foli në parlament për një kompromis për çështjen e Kosovës dhe paralajmëroi se mund të ketë sulme nga shqiptarët nëse nuk arrihet një kompromis. A e shikoni këtë si një sinjal se ai është më i gatshëm të arrijë një kompromis nga sa ç’ka qenë më parë?

Matthew Palmer: Mendoj se presidenti Vuçiç e ka bërë të qartë se është i përgatitur të kthehet tek negociatat kur tarifat të hiqen dhe të punojë me Kosovën drejt një marrëveshjeje për normalizimin e plotë të marrëdhënieve. Ne besojmë se ai është i sinqertë për këtë, ne besojmë se pala e Kosovës është gjithashtu e sinqertë në dëshirën për të siguruar marrëveshje për normalizimin e plotë të marrëdhënieve. Por këto janë çështje të ndërlikuara. Ato janë të ndërlikuara politikisht, emocionalisht dhe psikologjikisht. Pra do të duhet kohë për t’i zgjidhur. Hapi i parë sigurisht është që palët të ulen përsëri në bisedime për negociata dhe të ecin në drejtimin e duhur.

Zëri i Amerikës: Përse besoni se Vuçiç do ta arrijë këtë. Ai ka qenë në pushtet për shtatë vjet dhe asgjë s’ka ndryshuar?

Matthew Palmer: Ne besojmë se presidenti Vuçiç është i vendosur për një të ardhme evropiane për Serbinë dhe besoj se ka një kuptim të qartë tek të gjithë që janë të përfshirë në këtë proces se e ardhmja evropiane si për Serbinë edhe për Kosovën, do të kërkonte një marrëveshje për normalizimin e marrëdhënieve. Pra shpresa jonë është që palët të takohen, të negociojnë, të arrijnë marrëveshje, ta zbatojnë atë dhe të hapin një rrugë të qartë evropiane si për Serbinë ashtu edhe për Kosovën.

Zëri i Amerikës: Beogradi nuk do të kthehet në tryezën e bisedimeve para se Prishtina të heq tarifat. Prishtina e refuzon një gjë të tillë edhe pse Shtetet e Bashkuara dhe BE-ja kanë bërë thirrje disa herë për ta bërë një gjë të tillë. Edhe ju e keni kërkuar këtë. Presidenti Vuçiç tha javën e kaluar se Prishtina do të heq tarifat kur “mentorët e saj perëndimorë të vendosin një gjë të tillë”. Cili është komenti juaj?

Matthew Palmer: Mendoj se është shumë e rëndësishme që Serbia, udhëheqja politike në Beograd të pranojë se Kosova ka agjenci të pavarura. Kosova nuk është thjesht një instrument i Shteteve të Bashkuara. Kosova është një vend i pavarur, një shoqëri e pavarur që ka politikat e veta dhe këto politika duhet të zbatohen. Çështja e negociatave, çështja e tarifave është çështje e ngarkuar politikisht në kontekstin e politikës në Kosovë. Ne do të mbështesnim pezullimin apo heqjen e tarifave si një mjet për t’u kthyer në dialog. Ne mendojmë se ky do të ishte një hap i rëndësishëm përpara. Por, gjithashtu mendojmë se është e rëndësishme që vetë palët të gjejnë një rrugë për të manovruar sfidat në të dyja anët për t’u kthyer në tryezën e bisedimeve, për të gjetur një rrugë përpara për të arritur një zgjidhje të negociuar.

Zëri i Amerikës: Pra ju thoni se Uashingtoni nuk mund të bëjë asgjë për të inkurajuar Prishtinën për të pezulluar tarifat?

Matthew Palmer: Jo, nuk është ajo që po them. Mendoj se ka gjëra që mund të bëjmë për të mbështetur dhe lehtësuar përparimin që përfshin inkurajimin e partnerëve tanë në Kosovë të mendojnë thellë dhe me kujdes nëse tarifat në fakt avancojnë interesat e Kosovës. Ne besojmë se interesat e Kosovës shërbehen më mirë me arritjen e një marrëveshje gjithëpërfshirëse me Beogradin dhe për të arritur atë marrëveshje, ata duhet të kthehen tek dialogu dhe për të arritur tek dialogu, është e rëndësishme që tarifat të eliminohen si një pengesë për përparim.

Zëri i Amerikës: Kur do të ndodh kjo?

Matthew Palmer: Nuk mund t’u japë një datë për këtë por shpresoj që të ndodh sa më shpejt që të jetë e mundur.

Zëri i Amerikës: Do të ndodh këtë vit? A mendoni se dialogu mund të vazhdojë këtë vit?

Matthew Palmer: Po, mendoj se është absolutisht e mundur.

Zëri i Amerikës: Nëse flasim për modelin e zgjidhjes, duket sikur Gjermania dhe Franca e hoqën nga tryeza idenë e shkëmbimit të territoreve, pas samitit në Berlin.

Matthew Palmer: Ne mendojmë se është e rëndësishme që vetë palët të vendosin parametrat e marrëveshjes. Ajo çfarë ne do të dëshironim të shikonim është një marrëveshje me autorësi lokale, një marrëveshje të qëndrueshme, një marrëveshje të drejtë, një marrëveshje të zbatueshme dhe që mund të pranohet nga publiku i të dyja palëve, që mund të zbatohet drejt dhe plotësisht, dhe një marrëveshje që mund të çelë rrugëtimin drejt të ardhmes evropiane.

Zëri i Amerikës: A do të thotë kjo se SHBA-ja nuk e ka hequr nga tavolina idenë e shkëmbimit të territoreve? Pra, në kundërshtim me Gjermaninë dhe Francën?

Mattthew Palmer: Ne nuk po vendosim vija të kuqe në procesin e negocimit, për gjëra që palët nuk duhet të diskutojnë. Është në dorën e vetë palëve që të gjejnë rrugën për të lëvizur përpara, me mbështetjen tonë. Por, kjo gjithashtu nuk është një “çek i bardhë”. Do të dëshironim t’i shohim palët të negociojnë marrëveshjen më të mirë të mundshme; të na e paraqesin, nëse do të kërkojnë mbështetjen tonë. Nëse do të kemi shqetësime, do t’i shprehim ato dhe do të përpiqemi të gjejmë zgjidhjen me palët për të arritur diçka që mund ta mbështesim dhe me të cilën mund të punojmë për zbatimin e saj. Por, ky nuk është procesi ynë. Ky është procesi i tyre. Ne i mbështesim.

Zëri i Amerikës: Çfarë prisni se do të ndodh në Paris?

Matthew Palmer: Nuk kam ndonjë pritshmëri specifike për atë takim

Zëri i Amerikës: A keni biseduar me partnerët francezë dhe gjermanë

Matthew Palmer: Absolutisht. Mendoj se synimi i takimeve, në Berlin në prill dhe në Paris në korrik, të ndihmojnë të krijojnë kushte që do të lejonte palët të ktheheshin në negociata përmes procesit të udhëhequr nga BE-ja që ka sjell marrëveshjen e Brukselit dhe ka prodhuar disa lëvizje përparuese për një marrëveshje gjithëpërfshirëse.

Zëri i Amerikës: A do të marrin Shtetet e Bashkuara një rol më të rëndësishëm apo më të dukshëm në dialog tani që Komisioni Evropian po ristrukturohet?

Matthew Palmer: Ne kemi qenë partnerë me Evropën për këtë proces, e kemi mbështetur këtë proces dhe BE-ja e ka udhëhequr këtë proces. Nuk shoh ndonjë arsye specifike përse kjo duhet të ndryshojë në këtë moment.

Zëri i Amerikës: Shumë palë kanë bërë thirrje për një angazhim më të madh të Shteteve të Bashkuara

Matthew Palmer: Në se do të ketë një rol për ne, që të jetë konstruktiv dhe mbështetës për këtë proces, një rol që partnerët evropianë dhe vetë palët do të donin që ne të luanim, ne jemi të hapur për çdo gjë që mund të bëjmë në mbështetje të këtij procesi.

New York Times: Opozita do largimin, por Rama ka mbështetjen e SHBA

“New York Times” i ka kushtuar një artikull të gjatë protestave të qytetarëve në disa shtete të Ballkanit. Nga Bosnja, Serbia, Mali i Zi dhe Shqipëria, gazeta amerikane analizon atë që po ndodh në “fuçinë e barutit” prej disa muajsh. Duke u ndalur në Shqipëri, “New York Times” shkruan se një valë protestash ka nisur prej muajsh, ku opozita kërkon largimin e Kryeministrit Edi Rama, por ky i fundit ka mbështetjen e Bashkimit Europian dhe Amerikës.

“Në Shqipëri, protestuesit kanë organizuar tubime prej muajsh, madje duke u përpjekur të sulmojnë Parlamentin, ndërsa kërkojnë dorëheqjen e Kryeministrit Edi Rama, të cilin ata e akuzojnë për korrupsion dhe manipulimin e zgjedhjeve të vitit 2017. Megjithatë, z. Rama, i cili mbështetet nga të dyja palët SHBA dhe BE, duket i sigurt në pushtet”, shkruan “NYT”.

Më tej, në analizën kushtuar protestave në rajon, “NYT”, shkruan se shumë syresh në Ballkan besojnë se anëtarsimi në Bashkimin Europian, do të forcojë demokracitë e reja.

“Shumë në Ballkan kanë shpresuar se perspektiva e anëtarësimit me Bashkimin Europian mund të përforcojë demokracitë e reja. Por me zyrtarët në Bruksel, të cilët janë fokusuar në frenimin e kërcënimeve nga nacionalistët brenda bllokut, interesi kryesor i Bashkimit Evropian në Ballkan duket se është që rajoni të ketë stabilitet”, shkruan ndër të tjera media amerikane.

Kim Jong-un ekzekuton diplomatët e tij, dështuan në negociatat me SHBA

Kim Jong-un ka ekzekutuar negociatorët e tij me SHBA-në për takimin e dytë të zhvilluar në Vietnam me Presidentin Trump për arritjen e një marrëveshje bërthamore.

Negociatorët u ekzekutuan si përgjegjës për dështimin e këtij takimi dhe u akuzuan për “tradhti ndaj liderit suprem”.

Kim Hyok Chol është qëlluar në aeroportin Mirim, pasi akuzohet se ishte faji i tij që “SHBA doli fituese” nga ai takim. Diplomati, i cili shoqëronte Kim Jong-un në trenin e tij privat përpara samitit në Vietnam, ishte një nga katër zyrtarët e lartë të Ministrisë së Jashtme të ekzekutuar në aeroport. Zyrtarët e tjerë të ekzekutuar nuk u bën publik me emra, por të gjithë u akuzuan si “spiunë” të SHBA.

Sipas raporteve, një tjetër zyrtar i lartë, Kim Yong Chol, i cili kishte qenë në diskutimet bërthamore me Pompeon, u dërgua në burg për riarsimim ideologjik. Gjithashtu edhe përkthyesi i Kim Jong-Un, Shin Hye Yong u dërgua në burg për një gabim në samitin.